ADCC in SP le CEO thar hai lawmpuina hun an hmang
CCPUR:  Mr Langkhanpau Guite, Chairman, ADC/CCPur inrawinain zani  sun dar 12 khan  ADC/CCPur a MDCs  han SP, CCPur thar Mr Rakesh Balwal le CEO, ADCC thar Mr Soiminlian Lengen, MCS hai lawmlutna le an sin chel thar lawmpuina hun an hmang. Hi huna hin MDCs han lawmpuinain puon pakhat seng an pek bakah District Council hnuoia Inspecting staff han CEO kuoma lawmpuinain puon pakhat an pek bawk.

Mr Langkhanpau Guite chun MDC hai inhmelhriettirna a nei a. Churachandpur district chu hnam (tribe) tum tum 10 chuong hai chengna hmun a ni leiin iengtik huna khawm buoina tlung phut phut thei zing a ni thu; MDC member tu amani pakhat takin SP CCPur kuoma security thila thangpuina a ngen huna SP chu security thuah thangpuina pe nghal hlak dingin a ngen.

Mr Soiminlen Lengen chun, mi thar sin inchuk fawm pei a ni leiin MDC members le Council staff hai chu a sinthawnaah thlawp pei dingin a ngen a. CEO a ni sungin mipui ta dingin a tam thei ang tak le sin a tha thei ang taka thaw a tum thu, a service hun sung tu le khawm insukbuoi loa um chu a thiltum a ni thu a hril.

Mr Rakesh Balwal, SP, CCPur chun, ama chanchin tawite hrilin introduction hun a hmang zoin CCPur district­a pawl le hnam tum tuma thuoituhai bakah MDC hai le mipui hai chu district­a law & order tha le fel taka enkawl a ni theina dinga thlawp seng dingin a a ngen.

Central Scheme hnuoia sinthawna an hung enfel ding
CCPUR: Ministry of Rural Development, Govt. of India a inthawk Dr Ambuj Mahopatra inrawinain National Level Monitoring Team  mi 4 hai chu Sept. 29, 2016 hin CCPur­ah hung inzin an ta, Henglep, Thanlon le Tuibuong Block haia Central Sponsored Schemes MGNREGS, IAY, IWMP, PMGSY, NSAP (Social Welfare) le NRDWP (drinking water) hnuoia sinthawna hai enfel an tih. CCPur district sunga Block 3 haia Villages (khuo) 20 thlangsuoka um hai laia khuo 10 haia sinthawna an enfel ding niin ei thu dawngna chun a hril.

PTC in lawmpuina
CCPUR:  L. Pumlianpau, President, PTC GHQ inrawinain PTC thuoitu han zanikhan Mr Rakesh Balwal, IPS, SP, CCPur inhmupuiin SP sin a hung chel lawmpuinain Paite puondum an pek.  PTC thuoitu hai chun law & order thuah Public leaders hai le thangruol dingin SP chu an ngen a, SP khawmin iengtiklai khawmin Public leaders hai chu cooperation pe dingin a ngen.

Manipur a ramngaw humhalna dingin thangpuina hung pek ning a tih: Anil Madhav Dave
IMPHAL: Union Minister of State for Environment, Forest and Climate Change (Independent Charge) Anil Madhav Dave chu Imphal­a zankhat riekin zanikhan Aizawl, Mizorama intahwk Imphal a hungtlung. Imphal a hungtlung hnungin Principal Chief Conservator of Forest & Environment, Manipur Office, Sanjenthong, Imphal Conference  Hall­ah Forest and Environment Department, Manipur hnuoia official­hai an hmupui tawl. Hi huna hin Manipur Forest & Environment minister Irengbam Hemochandra Singh le Principal Secretary, Forest & Environment, Manipur hai khawm an thang.

Hi huna Anil Madhav Dave in thu a hrilnaa chun, Manipur hi  an vangnei khawp el. Asan chu vadung tui inhnik tak takel dawn thei ding in nei a. Manipur State sunga vadung hrim hrim a chin le a lien khawm nisienla tha taka humhal ding an nih. India ram chau ni lovin khawvela hin tui harsatna hi a zuol deu deu ding a nih. Chun, thing le ruo hai khawm humhal ding an nih. Manipur a ramngaw humhalna dingin sawrkar thlungpui chun thangpuina a pek thei ang ang a hung pek ding a nih tiin a hril.

Anil Madhav Dave hin Manipur Governor Dr Najma A. Heptulla khawm an hmupui.  Vawituk hin Kangla hmuna thingkak phunna programme ah thang a ta, hi programme a hmangpui zoin Bishnupur District­ah inzin a ta, Loktak Dil, Keibul Lamjao National Park, Sendra le INA Museum, MOirang hai en a tih. Moirang a hin NGOs le Self Help Groups tum tum hai inhmupui a ta, Sangai humhal le enkawl that dan dinghai hriltlang an tih. Hi zo hin Imphal tieng kir nawk a ta, Imphal­a inthawk New Delhi pan a tih.
New Lambulane­ah kangmei suokin In le Biekin a kangsiet
IMPHAL: Zani sun dar 10:30 vel khan New Lambulane, Imphal­a kangmei nasa tak a suok a, kangmei suok hin Pu Lallienkhum Tlangte In chu a kangsiet vawng bakah a bul laia um EFCI New Lambulane Biekin khawm  siemthat thei talo ding khawpin a kangsiet.  Kangmei hi Pu Lallienkhum Tlangte chengnaina inthawka intan ni dinga ring a ni bakah kangmei hi electric fesuol leia intan ni dinga ring a nih tiin ei thu dawngna chun a hril.

Pu Lallienkhum Tlangte In hi a sawng, a tuong thingphek (far) a ni a, Pu Pienga F. Khawlum hai sungkuo le an hluo khawm a ni a.  Pu Lallienkhum  hai sungkuo hi bufa dinga insawng hnuoitieng an um huna thil kangrim an hriet leiin sawng chung tieng an hang en chun an mattresshai a meiin a lo  kang nasa hman ta hle bakah  tuong thingphek chu far thingphek a ni leiin meiin a kang nuom hle a, an thuomhnaw iengkhawm laksuok  nei hman loin a kang ral vawng el niin ei thu dawngna chun a hril.

Chun Pu Pienga Khawlum hai khawm hi an thlasik thuomnaw siena Thingrem lien pakhat tinaw chu TV le an thuomhnaw tha dang dang hai iengkhawm laksuok hman an nei nawh tiin ei thu dawngna chun a hril. EFCI Biekin khawm hi zuk siemthata inkhawmnaa hmang nawk el thei ding ngirhmuna um lo khawpin a kangsiet nia hril a nih.

Pu Lallienkhum hai hi an in compound sunga pastor quarter room ruokah an inbengbel hri a, Pu Pienga hai sungkuo ruok chu Pu Ramtawnlien In­a Room ruokah zani zan khan  in riektir phawt an nih.

Kangmei suok le inzawm hin HYA Imphal JHQ chun kangmei suok leia harsatna tuortu hai sawmdawlna dingin thangpuina an dawl. Thangpuina pe nuom hai ta dingin pek thei zing a ni thu HYA Imphal JHQ thuoituhai chun an hril.

Governor in Conference a hawng
IMPHAL: Indira Gandhi national Centre for Arts le Manipur University thangruola an huoihawt “International Conference on North East India­Myanmar Ethic and Cultural Linkages” chu zanikhan Manipur University­ah tan a ni a, Manipur Governor Dr Najma A. Heptullah in khuollien ni pumin a hawng. Hi Conference thiltum chu tha a ti thu le India le Myanmar inkara inlaichinna tha lem a hung intlun pha ngei a beisei thu Dr Najma Heptulla chun a hril. Hi Conference a hin Myanmar, Thailand Laos Cambodia haia inthawk khawmin palai an hung thang. Hieng palaihai hin a hranpain Raj Bhavan, Imphal­ah Dr Najma Heptullah an inpawlpui.

Commitee tum tum chairman le member ding
IMPHAL: Kum 2016­17 sunga Manipur Legislative  Assembly a Committee hran hran a, Committee on Govt. Assurances, Committee on Delegated Legislation, Committee on Petitions, Rules Committee, Committee of Privileges and Thics, Library Committee, Committee on Welfare of  SC & ST, General Purposes Committee le Committee on Welfare of Women and Children haia Chairman le Member dinghai Assembly Speaker in a ruot a, hi le inzawma Notification chu Sept. 24, 2016 khan Joint Secretary, Manipur Legislative Assembly in an suo.

Pasal pakhat thisa ruong hmu
IMPHAL: Zani zingkar khang Thoubal District, Manipur­a Tanjeng area­ah pasal pakhat thisa ruong hmu a ni a. A driving licence dungzui chun mithi hi Th. Dinesh Singh (20) s/o (L) Th. Herojit Singh of Kwakeithel Thiyam Leikai a nih. Drugs overdose leia thi ni ring a ni a, post­mortem thaw dingin JNIMS Morgue­ah sie anih.

Hnina lekha peklut thei hun suksei
IMPHAL: Directorate of Education (s), Government of Manipur hnuoia Primary Teacher (SSA) sin lakna dinga hnina lekha peklut hun chu October 7, 2016 chena suksei nawk a nih tiin N. Praveen Singh, Director of Education (S), Manipur chun Sept. 27, 2016 khan inhriettirna a siem. Application form chu hi Department website: www.manipureducation.gov.in ah download thei ning a tih.

MSSWB Chairperson dingin M. Priyomala
IMPHAL: Manipur state Social Welfare Board (MSSWB) Chairperson dingin Maishnam Priyomala ruot a nih. MSSWB a hin members 12 an um a, hienghai hi state le central Government in a ruot an nih. Central Government schemes chi tum tum hai chu a dawng dinga awm nuhmei le naupang hai kuomah intlungtir chu ka ngaipawima zuol ning an tih tiin Maishnam Priyomala chun a hril.

Hnina lekha peklut thei hun suksei
IMPHAL: Directorate of Education (s), Government  of Manipur hnuoia Primary Teacher (SSA) sin lakna dinga hnina lekha peklut hun chu October 7, 2016 chena suksei  nawk a nih tiin N. Praveen Singh, Director of Education (S), Manipur chun Sept. 27, 2016 khan inhriettirna a siem. Application form chu hi Department website: www.manipureducation.gov.in ah download thei ning a tih.

SAARC Summit thul a nih
NEW DELHI: India thangsain SAARC rambung 8 um hai laia rambung 4 han November 9&10, 2016 haia Islamabad khawpuia 19th SAARC Summit hung um dingah thang an tum naw thu an hril leiin 19th SAARC Summit nei ding chu hun tiemchin um lova thul a nih. Pakistan chunga India lungawinawna chu thlawpin Bangladesh, Afghanistan le Bhutan hai chun SAARC  Summit a an thang ve naw ding thu hi an puonglang ve a nih.

Uri Army camp, J&K helpawl han an run a, Army 18 zet an that leia lungawi lova India hin SAARC Summit­a a thangnaw ding thu a puong a ni a, hi thu hi Ministry of External Affairs chun tuta SAARC Chairman sin chel Nepal kuomah September 27, 2016 khan an hriettir a nih.

Nomination hmaa inthawk Central forces
LUCKNOW: Election Commission of India (ECI) chun kum 2017­a Uttar Pradesh Assembly election hung um ding hi fel le thienghlim taka nei a ni theina dingin nomination process tan a ni hmaa inthawk Uttar Pradesh a chun Central Paramilitary Forces (CPMF) tirlut le hmang a tum. Political parties haia inthawk  report an dawng danin Nomination paper file huna hin candidate thenkhat chun nomination paper khawm an file mumal thei ngainaw  niin Chief Election Commissioner Naseem Zaidi chun a hril a, hi leia nomination process a fe hmaa inthawk central forces tirlut a tum niin a hril.

MP a salesman chu Crorepati a nih ti hrietsuok
BHOPAL:  Madhya Pradesh­a thla khatah Rs. 1,200 hlawa fair price shop a salesman sinthaw Suresh Prasad Pandey chu Lokayukta in a chengnain an dapnaah Crorepati a nih ti an hmusuok.  Mr Pandey hi Madhya Pradesh­a Sidhi District a cheng a ni a, Lokayukta official han a chengna in an dap huna hin double barrel  gun 1,  motors 4­ Bolero, Alto Car, Activa le Honda Shine motorcycle thangin rothil le rangkachak incheina thil Rs. 1 crore  vel manhu ding a nei ti an dapdawk a nih. A sum lamsuok le inhme loin a hausa tia sawiselna um le inzawma Lokayukta Officials han a chengnain hi an dap a nih. Mr Pandey hin a nuhmei le a naupa hming thangin Bank Accounts 8 zet a nei bawk.

MNF in Mizoramah President Rule puong dinga ngen an tum thu a hril
AIZAWL: Mizoram­a Opposition Mizo National Front (MNF) President Pu Zoramthanga chun, Mizorama Congress sawrkar chu dan le thupek enkawlna kawngah a hlawsam letder a nih ti India President Pranab Mukherjee le Prime Minister Narendra Modi kuomah intlun an tum thu zani hmasaa Aizawl Press Club­a Chanchinbumihai an hmupui huna a hril a. Mizoram chu President Rule hnuoia sie dinga a ngen ding thu a hril.

Pu Zoramthanga chun, tulai hnaia Lungleia thil tlung  chungthua Gauhati High Court Justice in Chief Minister Lalthanhawla kuoma lekha a hung thawna chun Lunglei district, Mizoram­ah law and order a tluse der a nih ti a zieklang thu hrilin, MNF in Congress sawrkar an intumna el ni lovin  Judiciary a Mizoram enkawltu Gauhati High Court Chief Justice in a hril a ni a, Democracy fe danah lungthu pathum­ Legislature, executive le Judiciary a um a, thangruol thei loin Judiciary chu a tlusie a nih tiin Zoramthanga chun a hril. Hiengang thil hi Congress in centre­a sawrkar an siem huna khan MNF in sawrkar an siem hun nisien President Rule­a puong ni nghal a tih tiin Zoramthanga chun a hril bawk.

Ralthuom tam tak an dapdawk
JAMMU: Jammu and Kashmir­a Doda district sunga Dessa area­a chun Army le Police thangruol han dappui an thawnaah ralthuom tam tak dapdawkin an man. Ralthuom an dapdawk hai lai hin  AK­47 rifle 1, 12 bore rifle 8, Under Barrel Grenade Launcher (UBGL) 1, Grenade 1, Chinese grenade, AK­47 silaimu 2263 hai bakah diaries 2, purse 1, notebook 1, AK magazine 2, Radio set 2 le Chinese Pistol 2 a thangsa. Report an hmu dungzuia dappui an va thawnaa hieng ralthuom hai hi an dapdawk niin defence thusuok chun a hril.

VAWISUN THUPUI
Mihaiin an lungrilin an ring a, felna an hmu hlak, bauin an tan a, sandamna an hmu bawk hlak a nih.   ­ Rom 10:10

Editorial: Bawka  chil innal ang

Tienlai thingtlanga chun a huoi lem lem bawka chil innal thaw hlak a nih. Tlangval thenkhat pasal naupang inelnaah an va fe a, a huoi lem lem le a hrat lem lem inchuna dingin pasal naupanghai bawka chil innal an inthawtir hlak. Bawka chil an hang innal meu chun pasal naupanghai ta ding chun thangtlawm le lungsen a um hle hlak. Hi lei hin bawka chil naltu le a va nalpektu pasal naupang kha a huoi lem le a hrat lem inchuin an insuol bawr bawr hlak. Hi thil hi thil tha le chingzawngsak tlak a ninaw lei ning a ta, thaw a ni ta ngai nawh. Bawka chil innal hi tul der lova insuk lungsenna le insuk thangtlawmna, umzie nei lo a nih. Mawl leia an lo thaw hlak niin an lang. Tulai chu nisienla lei chawina thei a ni ring a um.

Tulai khawvela hin bawka chil innal em um tanaw sienkhawm; a huoi lem, a hrat lem, a thiem lem, a hrie lem, a che thei lem, a tha lem, an dik lem, a thu nei lem, a tlin le a tlak lem inchuna le inngainain ei ram hi a sip ta niin an lang. Ei ram, a bikin Manipur State a cheng  pawl chi tum tum um hai laia pawl thenkhat chun  ei rama roreltu sawrkar neka thunei lem an tum niin anlang. Hi lei hin sawrkar thil thaw chu an hnuoisie hlak. Hi lei hin inrem nekin inremnawna a hung intlun a, bawka chil innal pek ang elin umzie boin thil a hung um a, thatpui nekin ei sietpui lem.

Dan kengkawtu ding ni si lovin dan ei kutah ei sie hlak bawk. Inlirthei eksiden a hungtlung a, dan hmanga rel ding a ni laiin a bul hnaia lo um han thuneina cheltua inngaiin inlirthei khaltu an vuok a, inlirthei chu raw annawleh suksiet a ni hlak. Hi thil hi dan kal, mani thuneina ni lova thuneina hmang le lekkawna a nih. Inlirthei eksiden a tlung a ni chun an rang thei anga Police Station­ah report nghal ding le a hliem an um chun hospital an rang thei anga panpui ding. Mithi dam an lo um a ni chun Police hai hungtlung hmakhat chu lo tawk lo ding a nih. Inlirthei eksiden hi tukhawma tuok ei nuom naw a, pawi ei ti seng. Hi lei hin kut inthlak khum hi ching lo ding a nih. Mihriem thina le hliemna tuok bawk, motor raw bawk, driver vuok bawk hi chu tuor chan dabawlna a nih.

ILPS le inzawmin ei state sawrkarin draft bill thar a siem a. Hi draft bill thar hi Manipur tlangmi le phaimihai chun ei dit naw a, ei sawisel ve ve. Amiruokchu, hi draft bill thua hin inbiektlang le hriltlang ruok chu ei nuom nawh. A thiem lem, a hrie lem, a var lem le an dik lem niin ei inngai seng ti inla ei hril suol taluo ring a um nawh. State sawrkar thangsain hi chungchanga hin an dik lem ei um naw a, a thu nei lem ei inchu seng niin an lang. Tuta anga ei fepui chun hi Bill chungchanga hin inlungruolna um thei ngainaw nih. Bawka chil innal ang elin lungawinawna, lungsenna le insuk thangtlawmna hai hung rasuok pei a ta, umzie boin ei sie ding niin an lang.

Manipur a tribal MLA­hai tanna ni lovin social boycott ei puongkhum  khawm hi ennawn a tulin an lang. naga mihai tamna Ukhrul, Senapati, Tamenglong le  Chandel district haia chun an MLA­hai an boycott naw niin an lang. Public function tum tum haiah khuollienin an hmang a, an district haiah zalen takin anfe a, an district mipuihai leh an inpaw zing a nih ti a hretu seng ei nih. CCPur district a ruok chun a nive nawh. Ei MLA­hai hi thunei khum ei nuom lei dam, mimal intheidana lei dam le mani nina (status) siem that tumna ding dam a ei hmang a ni chun umzie nei naw nih. Hieng a ni lei hin chik taka thil ei ngaituo vang vang a tul a nih.

An dik lem, a thunei lem le a che thei lem nia inngai a, ei theina kawnga ei inhrek le ei inensanna hin ei hnam le ei ram ta dingin thiltha an tlun ding am ti hi lungril lien tak puta ei ngaituo chet chet nuom a um. Ei district (CCPUr) hin tribal district dang hai nek chun inhmang le chan ei hau lem ta ti a chieng a, hiengang ngirhmuna ei um a nih ti ei hriet hnung khawma ei thil thaw dan ei ennawn nuom naw chun bawka chil innal pek ang thoin umzie bo le kawkboin um ei ta, a rasuok chu intheidana a hung ni ding a nih.


Post a Comment

Powered by Blogger.