Distict Level Independence Day
CCPUR: India ram hmun tum tum haia hmang ang bawkin Aug. 15, 2016 9AM a inthawk khan Peace Ground, Tuibuong, CCPur­ah District level Independence Day hmang a nih. Hi huna hin Pu Lunminthang Haokip, IAS, DC, CCPur chu khuolliena thangin India flag keipharna le parade hai salute lakna a nei. Hi huna hin mi 88 hai kuomah Appreciations le Lal 33 hai kuomah Red Blanket inhlan an nih.

Hi huna khuollien DC, CCPur in thu a hrilnaa chun, district mipui hai kuomah Independence Day chibai a buk a, Public, Ground CCPur a District level Independence Day hmang hlak chu Gallery bawlna fe mek leiin Peace ground Tuibuong tienga hmang dinga DLOs meeting in a rel anga hi lai hmuna hmang a ni thu a hril. India ramin zalenna a suol tan dan le India ramin zalenna a hung hmu dan hai hi huna mipui fekhawm hai hmaah Pu Lunminthang Haokip, DC, CCPur chun a hril bawk.

Inremna siem a ni tah
CCPUR:  August 16, 2016 zing dar 9:30 khan SP, Bishnupur Office ah SP, CCPur le SP, Bishnupur hai inrawinain Siaklalzawm Vaiphei (40), s/o Thiankhogeen of Kangvai thina le inzawmin inbiekna nei a ni a. Inremna siem a ni ta leiin hi thina le inzawma JAC indina um chu thiek a ni tah tiin JAC Against the killing of (L) Siaklalzawm chun zanikhan thusuok an siem.

Tipk. block­a JNV entrance form
CCPUR: Kum 2017­18 session sunga JNV Tuinom, CCPur­a Class­VI inchuk ding lakna dinga  Tipaimukh biela­a inthawk Entrance Test­a thang nuom hai ta dingin DI Tipaimukh kuomah inthawk Entrance Form lak thei zing a nih. Entrance form peklut theina hun nuhnung tak chu September 16, 2016 a ni a, Entrance Exam January 8, 2017 a nei ding a nih.

Disabled hai kuomah hmangruo sem ding
CCPUR: SSA/IED (Inclusive Education for Disabled) CCPur Block­a Resource Room, Opp. Laitui Medico, CCPur­ah August 17, 2016, 11:00AM khin T. Goukhomang, ZEO, CCPur in Disabled hai kuomah hmangruo semdawkna nei a tih. Kum 2014­15 le kum 2015­16 sunga SSA huoihawtnaa Block tina Disability Assesment Camp nei huna hmangruo dawng thei dinga thlangsuok hai kuoma  hmangruo hi sem ding a nih. Semdawk ding hai lai hin Tri­cycle 6, Rolator 3, Hearing aids 20, Elbow Crutch 5, Wheel chair (large) 1, Wheel chair (small) 12 a thang. Chun, a chunga zieklang kum hun sunga Disability form laa pelut hai kuomah Disability Certificate sem ning a ta, certificate la ding han Rs.60/­ pei pek tul a tih.

HCLF  thuoitu thar ding hai
CCPUR:  August 15, 2016 khan VTI Auditorium, Muolhlum Rengkai, CCPur­ah Hmar Christian Leaders’ Forum (HCLF) General Body Meeting ­cum­ Election for 2016­2018 nei a nih. Hi huna hin   member kohran hai po po kim takin an thang seng. Kum 2016­18 sunga  HCLF Chairman dingin Rev. Rohminglien Pakhuongte; Vice Chairman in Rev. Ros Infimate; Secretary in Rev. Dr  V. Lalnghakthang; Asst. Secretary dingin Rev. Dr Lalhmuoklien; Finance Secretary dingin Rev. Lalhmingthang Khawbung le Treasurer dingin Rev. Lalsandam hai thlangtling an nih. Chun, Auditors dingin Rev. Rokhum Joute le Upa Dr Phirthanglien Buhril hai thlang an ni bawk.

Thuoitu dinga thlang thar hai hi Rev. Saithanglur Joute in tawngtaipekna a nei zoin charge inhlanna nei nghal a nih.

Dist. Level PMSMA panel/members
CCPUR: Ministry of Health & FW, Govt. of India thupek angin District level Pradhan Mantri Surakshit Matritva Abhiyan (PMSMA) Committee le Panels dingin hieng a hnuoia ang hin siem a nih. Chairman­ Dr Thanchinkhup Guite, CMO; Member Secretary­ Dr Kimneihlam, Dist. Nodal Officer, PMSMA; Members in Dr Vumchinpau Tonsing, Dist. RCH Officer/DFWO; Dr Lalzuitluangi, Obstetrician/Gynaecologist; Mr Seiboi Mate, Dist. Prog. Manager le Dr F. Thienkhogin, SCH, NGO dealing with maternal health. August 18, 2016, 1:00PM khin CMO Office Chamber­ah PMSMA first sitting ko a ni a, member hai chu thang seng dingin CMO/Dist. Mission Director, CCPur chun an hriettir.

Posting/Utilization Order pelut dingin
CCPUR: CMO, CCPur hnuoia thawk Grade­IV staff hai chu August 31, 2016 chenin an posting/ Utilization Order CMO/CCPur Office­ah pelut dingin CMO chun an hriettir.

Application form lak thei
CCPUR:  ITI, Saikawta Computer le Hair & Skin Care tienga  training nei nuomhai ta dingin application form August, 2016 thla sunga lak le peklut thei a nih. Inhnikna neihai chun ngaiven vat ding a nih.

Hmar Inpui­in lawmthu le ngenna
CCPUR: Aug. 16, 2016: Hmar Inpui, GHQ (Hmar Supreme House) chun Tuithaphai laia Inpui fund dawla um mek, thahnemngai taka petuhai chunga lawmthu a hril. Chun, Inpui fund dawl suoka um ta hai Finance Committe kuta pelut pei dingin ngenna a siem.

Dist. level inter­school games trial
CCPUR: Dist. Youth Affairs & Sports, CCPur huoihawtnain August 22, 2016 a inthawk Sept. 15, 2016 chen khin discipline tum tum haiah District Level Inter Schools Games Trial­cum­Selection, 2016 um a tih. A thang nuom han August 16, 2016 a inthawk DYASO, CCPur Office­ah Eligibility Certificate lak thei ning a tih. Under 14& 17 boys & girls Archery a dinga form peklut theina hun nuhnung tak Aug. 20, 2016 a ni a, test Aug. 22, 2016 in um a tih. Judo ah last date Aug. 22, 2016 le test Aug. 23, 2016; Taekwondo­ah last date Aug. 22, 2016 le test Aug. 24, 2016 ning a tih.

Under 14 & 17 boys & girls last date Aug. 31, 2016 le test Sept. 1­3, 2016; Football U­ 14 yrs boys & girls last date Aug. 31 le test Sept. 1­3, 2016 inkar ning a tih.

Athletic U­14 & 17 boys & girls; Kabadi U­17 boys & girls le Badminton U­14&17 boys & girls haia last date  Sept. 10, 2016 le trial test Sept. 13­15, 2016 inkar sung nei ning a tih.

EVM hai enfel mek a nih
CCPUR: Mr N. Praveen Singh, Joint CEO (Chief Electoral Officer), Imphal chu zani zingkar khan CCPur­ah a hung inzin a, DC/CCPur Office­a Election Department sin thawna a enfel. Election Department, CCPur chun DC Office­a a Electronic Voting Machine (EVM) control Units 341 le Ballot units 359 hai election huna hmang thei a la ni ding le dingnaw hai an enfel mek a nih.

Activa inrutu hai Jail­ah
CCPUR: April 17, 2016 zana Rengkai Raod­a Activa inrutu mi pahni August 11, 2016 nia an man Lianchhunga@Robert(23)s/o (late)Lalrosiama of Thingkangphai le Hemam Ranbir Singh(32)s/o Hemam Jugin Singh of Terakhongsangbi hai chu zanikhan Police han CJM Court, CCPur hmaah an inlangtir a. Court in a rel angin Police han Jail­ah an thun tah. Activa inruk hmanga um neitu hi Lalthangkhum s/o Hrangthangvung of Thenmuol a ni a, Activa hi hmukir le a neitu kuoma pekkir a ni tah. Hi thua hin Police chun FIR No.38(8)2016 CCP­PS U/S 379 IPC an registered a nih.

KT Spring Pakage Drinking Water  hawng
CCPUR : 16th Aug, 2016 khan KT Spring, Muolvaiphei chun Reverse Osmosis (RO), Ultra Violet (UV), Ultra Filter (UF) Treated Packaged Drinking Water mitin ta dingin a lo hawng tah. Pastor Rodawnglien in hawngna le inhlânna a nei. Connection charge Rs. 500/­ ning a ta. Innei le function nikhuo haia khawm Order thei zing an nih. Thuchieng hre nuom ha’n Mob. no. +91­9856292534 le +91­8414019105 ah hai hin iengtiklai khawm order thei zing a nih. Aneitu chu Pu Lalrammawi Hmar s/o Upa KT Suoka, Muolvaiphei, Churachandpur niin ei thu dawngna chun a hril.

Patpuihmun directory tlangzar
CCPUR: August 13, 2016, 10:30AM khan Rengkai Govt. Hr. Sec. School­ah Patpuihmun khuoa peing le Patpuihmun a inthawk Tuithaphai, CCPur phairuoma hung kai hai po po umna Directory tlangzarna hun hmang a ni a, Chief Guest dinga fiel Upa Lalruotsang Pulamte le functional president ding Glory Wilson hai an remchangnaw leiin a nuhmei Pi Hmangaikim, ANM inrawinain Directory tlangzarna hun hmang a ni a. Special invitees in  Upa Er Lalthanzam Amo; Pu Laltleilien Amo, Headmaster pensioner; Pu Lalneikung Pudaite le Pu T. Siemlien, Advizor hai an thang.

Independence Day hlawtling taka hmang zo a nih
IMPHAL: India ramin zalenna a hmu champha (Independence Day) a vawi 70­na chu August 15, 2016 khan Manipur a khawm buoina le harsatna taluo um lovin hlawtling taka hmang zo a nih. State level a Independence Day lawmna hi 1st Manipur Rifles Parade ground, Imphal­ah nei a nih. Hi huna hin CM O.Ibobi Singh chu khuolliena thangin India hnam puonzar keipharna le parade­hai chibai a buk. Parade a hin Ex­Servicement, BSF, CRPF, Manipur Rifles, Civil Police, IRB, Jail, Home Guard, Fire Service, NCC, School le College student­hai thangsain Contingents 40 lai zet an thang. Ministers, MLAs, Civil le Police tienga officer lienhai khawm an thang tawl.

CM, O.Ibobi Singh in thu a hrilnaa chun, India ram hi ram inthanglien hrat takel a ni leiin khawvel pumpui huopa mihai inzakai a nih. India mi ka ni hi ka lawm a, ka uongpui bawk a nih. Manipur khawm nasa takin hma a sawn pei a, Olympics a India team a khawm  Manipur mi 6 lai an thang ve a, lawm a um takzet a nih tiin  a hril. Manipur mihai humhimna ding Bill thar draft zova umta chu Chanchinbu hai le Govt. website haiah insu a ni ta a, mipuihai chu ngaidan le thurawn pe dingin ngenna a siem.

CorCom in Independence Day han boycott leiin inlirtheihai an tlan naw bakah bazar, dawr, sumdawngna hmun hai khar anni leiin Imphal khawpui sung chu a re hle. Independence Day boycott a ni lai hin venghimna sin uluk taka thaw a ni a, sienkhawm hi ni hin hmun pahniah bomb a puok. Bomb puok hmasa tak chu zing dar 8:30 velin Manipur College Gate bulah a puok a, a pahnina chu Tera Keithel hmuna a puk nawk a, bomb puok hin tawkpawi ruok chu a nei thu hriet a ni nawh.

Imphal-­Moreh Road bandh hlip
IMPHAL : August 10, 2016 zanrila inthawka JAC Against the murder of M. Jamkholal Zou @ George thina le inzawma Imphal­Moreh road a hun tiemchin um lova bandh thawa um chu hlip a ni tah. Bandh thawtu le sawrkar palai han zanikhan inbiekremna an nei ta leia bandh hi hlip niin ei thu dawngna chun a hril. Bandh hun sung hin Bandh bawsea tlan Bus 1, Omni Van 1, Alto Car 1, ECCO Van 1 le Honda Activa 2 suksiet a nih.

IFCD Minister in a sunpui thu a puong
IMPHAL: Zanikhan Manipur IFCD minister Ngamthang Haokip chun Ex­MLA, Kishore Thapa thi a sunpui thu a puong. Krishna Thapa hi mi fel tak le hnam thuoitu tha takel a ni a, a thina hi ei state mipuihai ta dinga channa lien takel a nih tiin a hril. Kishore Thapa hi Kangpokpi A/C a inthawka MLA a thlangtlinga lo um ta a nih.

Chanchinbumihai an hmupui
IMPHAL : State sawrkarin Wanterd­a a puong le JCILPS Convenor hlui Khomdram Ratan chun zanikhan Imphal West District a hmun pakhatah Chanchinbumihai an hmupui. State sawrkarin Wanted­a a puong dan chu India danpui kal a nih tiin Chanchinbumihai kuoma a hril. Hieng laizing hin zanikhan a chungthu Manipur High Court­ah final hearing nei a ni a, sienkhawm Corut rorelna le thutlukna chu puonglang lova la sie a nih.

SO a inthawk AE in a kaisang
IMPHAL: Manipur Tribal Development Corporation (MTDC) hnuoia SO sin thaw lai mek Pu Samuel Lalropar chu SO a inthawk AE in a kaisang. A kaisangna hi ei chanchinbu chun a lawmpui hle.

MOLVETA in hrilfiena an siem
IMPHAL: Human trafficking case­a man Mr Lalbiakliana (50) s/o (L)  Van Vel Thanga of Khawmawi  kha Mrs Thangkhumi Mizo in indiklo taka an tum leia man a nih tiin Moreh Line Van/EECCO Transport Association (MOLVETA) President M. Thangkhopau le Secretary Zamlunthang han zanikhan hrilfiena an siem. Mr Lalbiakliana of Khawmawi village hi tuta Ngathal Village, CCPur a um mek a ni thu, kum 4 liemtaa inthawk Moreh line a motor khala fak lo zawng ta a ni thu le kum 3 liemtaa inthawk MOLVETA a in registered a ni thu hrilin, human trafficking a khan inrawlna a neinaw thu an zieklang bawk.

Petrol le Diesel man a tlahnuoi
NEW DELHI: Indian Oil Corporation (IOC) chun Petrol man litre 1­ah Re. 1 le Diesel man Rs. 2 in a sukhnuoi. July thlaa inthawk tuta tum hi thautui man sukhnuoia um a tum lina a nih. Petrol le Diesel man sukhnuoia um hi zani hmasa zan sawt hnunga inthawk khan hmang tan nghal a nih. Hi dungzui hin Delhi­a chun Petrol litre khatah Rs. 60.09 ni tang a ta, Diesel chu 50.27 ni tang a tih.

Kashmir­a inbeituonaah mi 5 an thi
SRINAGAR: Jammu and Kashmir­a Budgam district sunga Magam area­a chun zanikhan security forces hai le protestors hai inbeituo naah mi 5 in an thipha nawk bakah midang 6 in hliemna an tuok nawk a, tuchena Kashmir buoina leia mihriem thina tuok chu 61 an tling tah. Thalai mi iemanizat han zani zingkar khan Magam area­a Aripathan hmuna CRPF hai motor lungin an deng a, security forces han an thunglet naa mi 5 hai hi thi an nih tiin Police thusuok chun a hril. July 8, 2016 nia Security forces han Hizbul Mujahideen commander Burhan Wani an thatna leia buoina hi hung intan a ni a, tuchena thina tuok hai lai hin Police 2
an thangsa.

RPF in a neitu kuomah Rs. 93,000 an pekkir
NEW DELHI: Railway Protection Force (RPF) chun zanikhan Old Delhi station­a Jind ­Delhi Rel sungah a neitu in a theinghil Rs. 93,000 zet le thil hlu dang dang umna Bag pakhat an hmu a, bag sunga inthawk Kolkata hmuna hotel pakhat receipt an dapdawk a, chu taka inthawk a neitu zawngdawkin bag hi an pekkir. Hi bag hmutu chu RPF constable Phool Kunwar a nih. Bag neitu hi Satish Kumar of Jind, Haryana a nih.

Bihar in GST a pawmpui
PATNA: Bihar Assembly chun constitution amendment bill Goods and Services Tax (GST) Bill chu zanikhan lungruol takin a pawmpui tah. Hi bill Assembly­a hriltlangna hunah CM Nitish Kumar chun, GST Bill hmang a hung ni pha state sawrkarin revenue a hmu chu nasa takin a hung pung ding a nih tiin a hril. GST Bill hi Lok Sabha le Rajya Sabha haia passed a ni hnungin hmang a ni theina dingin India rama state um hai laia a zatve (50%) han an pawmpui ve a la tul a, tuchena hin Assam le Bihar state han an pawmpui ta a nih.

PM in sawrkar hmalakna hrang hrang hai a hrillang
NEW DELHI: August 15, 2016 khan India ram states tin le hmun tin hai bakah ramdanga Indian  Embassy haiah India Independence Day a vawi 70­na hmang a nih. New Delhi­a Red Fort hmuna hi ni hmangnaa chun PM Narendra Modi khuollienin a thang a, India hnam puonzar keipharna a nei.

Hi huna PM Narendra Modi in thu a hrilnaa chun, India in zalenna a suol huna contribution lo nei tribal hnam tum tum hai pholangna ding le generation la hung um pei han India ram zalenna dinga contribution an nei hai an hung hriet theina dingin state iemanizatah permanent museums bawl a ni ding thu; Freedom Fighters hai pension 20 percent­a sukpung a ni ding thu, Rs. 25,000 dawng hlak han tuta inthawk Rs. 30,000 an dawng ta ding thu; mi naran hai ngirhmun dawmsang le thlakdanglam chu a sawrkar thiltum a ni thu;  India ramin mania ro inrelna dinga ‘Swarajiya’ a suoldawk hnungin sawrkar inrelbawlna ‘Surajya’ tiengpang thlurbing a tul ta thu; BPL sungkuo hai ta dinga damnaw inenkawlna sengso ah sawrkarin kum tin Rs. 1 lakh chen a tum ding thu, ramdanga thawkna nei hai ta dingin passport awlsam taka siem thei a nit a thu, power ei hmang tlawm lemna dingin sawrkarin LED ligh crore 77 sem a tum thu;  hi thila dingin a mantlawm in LED bulb sem a ni ding thu le sawrkar sinthawna dang dang tam tak Pu Modi chun a hrillang. Pasietna le retheinaa inthawka zalenna chu zalenna lai po poa a ngaipawimaw tak a ni thu, Pakistan in  terrorist hai a thangpui hlak  le terrorist hai chetna a thlawp tlat chu a dem thu hrilin India chu Terrorist hai hmaah kun a tum naw thu a hril bawk.

Hangpan Dada Ashok Chakra
NEW DELHI: Independence Day ni khan Arunachal Pradesh mi Army Haildar Hangpan Dada chu a thi hnungin Ashok Chakra inhlan a nih. Ama hi May, 2016 a J&K a helpawlhai le an inkaptuonaa, a thi hmaa helpawl kap hlumtu a nih. Hi ni hin Army 14  hai kuomah Shaurya Chakras, Army 63 hai   Sena Medal, Army 2 kuomah Nav Sena Medals le Army 2 hai kuomah Vayu Sena Medals inhlan anni bawk. Hi nia India ram sunga Army, Paramilitary Forces le Police medals inhlanna um po po hi mi 1000 chuong an nih.

VAWISUN THUPUI
Mi mawl chun thu tinreng el hi a ring a, Mi var ruok chun a fena chu a en ngun hlak. Mi var chun suol chu a tih a, a fe hmangsan hlak a, Mi invet ruok chun chaponain a hmang a, ama an ring tlat hlak. ­ Thuvarhai 14:15­16

Editorial: Khawtlang thatna dinga hmalakna

Ei indikna le ei chanvo ei hmu theina dinga hmalatu ding le namnul ei ni changa ei zuolkona ding sawrkarin khawtinah khawtlang thuoitu ding a mi sie pek a, thil tha le thil lawmum takel a nih. Khawtlang thatna ding chun thuoitu tha le fel nei a tul. Khawtlang thuoitu an tha a, an fel a, an inthuruol chun khawtlang mipui han an khawsunga cheng inhawi an ti hlak. Khawtlang thuoituhai an fel naw a, an inthuruol naw a, an rorel dan a hung innawi pha chun khawtlang mipuiin an tuor a, an khawsunga cheng han harsatna chi tum tum an tuok hlak. Ei ram, a bikin tlangram biel haia chun khawtlang thuoituhai hi a roreltu tak an ni leiin an mawphurna hi a rik ang reng hle. Hi lei hin mipui thlawp le thangpuina hi an mamaw a, chu ding chun khawtlang mipui khawmin mani thei ang tawk senga ei thlawp le thangpuina ei pek hi ei mawphurna a nih.

Ei ram sawrkar khawmin scheme chi tum tum haia thil thaw dan a hung thlakthleng a, ni dang ang naw takin hmasawnna sin thawna ding le inzawma scheme chi hran hran hai chu khawtlang thuoituhai fe thlenga thaw dingin a hung ruot a. Ei rama sawrkar scheme inlar tak Job Card (MGNREGA) sin thawna khawm khawtlang thuoituhai inrawina a thaw a nih. A scheme  hi tha hle sienkhawm sum le pai hmangna thilah, thil indik naw le a fel zo naw deu a hung um hlak leiin khawtlang inthuruol nawna, khaw thenkhatah chun an tlun pha a, hi thil hi a pawi a, khawtlang hming sietna chen a hung intlun pha niin an lang.

Khawtlang thuoituhai lai inremnawna a um chun khawtlang mipui hi to tawka um el ding ei ninaw a, inremna a hung um theina dinga hma ei lak ngam nuom a um. Chun, thil indiklo a um a ni khawma tosan el lova sukdik dinga hma ei lak ngam a tul. Thil indiklo a um a ni chun thuneituhai kuomah mipui han ei va hril ngam ding a ni bawk. Indem le insawiselna ringawt hin chu thiltha intlun ngai naw nih. Thuoituhai khawma thaw suol an lo nei a ni chun mipui hmaah an suksuolna an puong ngam le  ngaidam an inhni el ding a nih. Chuong a ninaw chun inremna le inthuruolna khawtlangah um thei ngai naw nih. Mipui rorelna rama cheng ei ni a, mipui rawl chu an inza le an zui ve ding a nih.

Mitinin khawtlang thatna ding ei dit a, khawtlang thatna dingin ei thei tawkin hma ei lak hlak. Khawtlang thatna ding a ni phawt chun tiiin, phal ei neiin, khap ei nei bawk hlak. Khaw tinin zan sawt taluo chen chena dawr hawng dam, Pathiennia dawr hawng dam, Zu zawr dam, drugs zawr dam, buoina siem le thil thanaw chi tum tum thaw ei khap hlak. Hieng thil hai hi khawtlang ta dinga tha lo a nileia ei khap a nih. Khawtlang thuoitu an fel a, an inthuruol chun hiengang khapna hin inza le zui a hlaw hlak. Khawtlang inthuoi dan a felin fuknaw ruok chun ei thil khap khawmin inza le zui a hlaw ngai nawh.

Khawtlang thuoituhai chu an thuneina inlal thei ding khawpa an um, an khawsak le ro an rel a tul. Chuongang ngirhmuna an um thei naw pha pha chun khawtlangah inthuruolna tha a hung um thei ngai naw a, indemna, insawiselna, inhekna le intheidana hai chen a hung intlun hlak. Khawtlang rorelna an dik chun, khawtlang rorelna inza lo le khing ngam an um ngai nawh. Khawtlang rorel dan an dik phawt chun Kohran hmalakna ang tho a ei inza hlak a nih. Khawtlang thuoitu tha le fel hi ei ram mamawhai laia pakhat a nih.

Khawtlang thuneina hi tienlaia inthawka inza hlaw, tulai chena ei la bansan thei naw a nih. Khawtlang kalzawnga um le khawtlang do zawnga che hai hrim hrim a thawfuk an la um nawh. Khawtlang do le kalzawnga chehai chun khawtlang ensan anni hlak. Eiinlau tak khawm khawtlang ensan hi a la nih. Ei khawtlang inthuoi dan hi a thatna tam tak a um. Court case le police case tul kher lo khawma chingfel thei le rel fel thei tam tak a nei. Hi hi khawtlang rorel hlutna le thatna a nih. Hieng a ni lei hin khawtlang thatna dinga ei hmalakna hi mi tinin ngaipawimaw a, khawtlang thatna dingin hma la nasa nawk zuol seng ei tiu.



Post a Comment

Powered by Blogger.