CCPur­ah JE leia thi mi 4 an tling tah
CCPUR:  Tv. Jeho Lalhmingsang (24) s/o Pastor HB Laltlansung of Sesawng Mizoram, tuta Sielmat Bible College (SBC) Sielmat­a B.Th. 1st Year inchuklai chu August 5, 2016 zingkar khan JNIMS Hospital, Imphal­ah Japanese Encephalitis (JE) ringhla in a thi nawk leiin tukum sunga CCPur district­a JE natna leia mihriem thina tuok chu 4 an tling tah.

Tv. Jeho Lalhmingsang ruong hi zanikhan Hmar Ambulance in Imphal­a inthawk CCPur hung phurtlung a ni a, SBC ah sunna hunser iemanichen hmang a ni hnungin Pu Lalrobul Buhril of Sielmat inah a ruong laklut a ni hnungin a pa umna Sesawng, Mizoram tieng panpui a nih. Tv. Jeho Lalhmingsang hi a nuin ama bawisawm dingin CCPur a hung pan ve a, sienkhawm a hung tlung hma in chatuon ram a lo inlawisan a nih. Lusun sungkuo hai ei sunpui hle.

JE lei hin August 3, 2016 khan Mrs Thiamneihoi (50) w/o Damtinkhup of Lingsiphai chu JNIMS hospital­ah a lo thi ta bakah tuta hma met khan Vimala Raina H/S Headmaster T.Donglianpau le midang pakhat JE ringhla in an lo thi ta bawk a nih.

AIR Imphal in Dist. Level Quiz Competition
CCPUR:  All India Radio, Imphal chun August 6, 2016 (vawisun) 10AM a inthawk hin Synod Hall, IB Road, CCPur­ah District Level Quiz Competition buotsai a tih. Competition­a hin CCPur district­a inthawk Colleges 8­ Vision Academy, Lamka College, Rayburn College, Don Bosco Hr. Sec. School; V.K. Tawna College, CT Hr. Sec. School; Sielmat Christian Hr. Sec. School haia inthawk student pahni seng thang an tih. District levela thlangsuok hai chu State level competion­ah district aiawin va thang an tih.

HYA hmalaknain Fogging  
CCPUR: Churachandpur district­ah JE natna leia mi 4 lai zetin thina an tuok ta leiin mipui tienga inthawk nawrna nasa tak a um leiin HYA GHQ thuoituhan theitawpa hma an lakna zarin Hmar khuo tina Fogging thaw tum a ni a. Zani zantieng khan  HWA le HYA volunteers han VA hrietpuiinain  Muolvaiphei khuoa inthawk fogging kap tan a nih.

Fogging thawna dinga thil tul damdawile machine hai zanikhan HYA GHQ President rawiin CMO Office­ah an hang lak a nih. Fogging kap dan dinga thuoitu han riruong an siem dan chun Muolvaiphei, Hmarveng, Khawmawi, M. Ramthar, Saidan, Thingchom, Saikawt, Hmuntha, Varparkawn, Khawpuibung, Muolbem, Thenmuol le Ngurte haiah a dawt dawta kap dinga ti a nih.

Health Dept. hnuoiah ANM a hmu ve
CCPUR: Manipur Health Services hnuoia kum 2013­a  Female Health Worker (ANM) post 200 le Staff Nurse post 21 lakna dinga exam neia um final result chu July 30, 2016 khan puong a ni a, ANM a dinga hlawtlingna chang hai lai Ms Valley Rose Ramhmangai d/o H. Zaneisang of Rengkai khawm a thang ve. A hlawtlingna ei chanchinbu chun a lawmpui hle.

Belladonna 200 sem sunzawm
CCPUR: JE laka invengna damdawk Belladonna­200 chu zani khawm khan sem sunzawm a ni a. Saikawt PHC le Behiang PHC haia khawm zanikhan sem a ni a; PHC dang hai ruok chun an la lak hman naw a, a um an gang DFWO/CCPur chun an sem zo pei. Zani zangieng khan  a hung tlung  belsa beisei a nih.

Dist. TB Office July report
CCPUR: District TB Office, CCPur chun July 2016 sung khan TB natna invawi ni dinga ringhla mi 1702 an enfel a, New Sputum Exam 129, Old Sputum Exam (follow­up) 31, Cases detected: New Smear Positive 7, New Smear Negative 5, Relapse (Smear Positive) 2, Extra Pulmonary (Negative) 4, Treatment after default (Positive) 0, Failure (Smear Positive) 1, Others (Smear Negative) 0 le Treatment Started 19 thaw a nih.

JNV Entrance form
CCPUR: Kum 2017­18 academic session­a JNV/Tuinom, CCPur­a Class VI inchuk ding thlangsuokna dinga Entrance Test form chu August 8, 2016 a inthawk ZEO, CCPur Office­ah lak thei ning a ta, fill up zovin September 16, 2016 chenin peklut thei ning a tih. Form lak ding huna Student Identity Card, Headmaster/Headmistress/Principal a inthawk recommend­na hai chawi tul a tih tiin V. Pumsuanthang, DI of schools & i/c JNV/Tuinom chun a hril.

World Breast Feeding Weed hmang
CCPUR: ICDS Project CCPur huoihawtnain zanikhan Synod Hall, IB road, CCPur­ah ‘Breast Feeding: a key to sustainable Development’ ti thupui hmangin 24th World Breast Feeding Week  hmang a ni a, Chief Guest in Langkhanpau Guite, Chairman ADCC a thang.

Mr Guite chun, khawvel pumpuia nu nenetui thatna, balance diet tha tak a ni dan hai hrilhrietna dinga 24th World Breast Feeding Week hi hmang a ni thu a hril a. Pathienin nene netu dinga nau a mi pek ei hamthat zie, nau in nene a nek puma mu hai mitmeng enzingin thil tam tak an inchuk a, nuhai hlim le lungawinaw chieng takin an hriet thei hlak a nih. SSA guideline chu Anganwadi worker le helper han class I hnuotieng  hai lekha an inchuktir ding, bawngnene le fak ding an  pek ding ti a ni a. Anganwadi worker le helper hai ei ram ta dinga pawimaw, man­making mistry lai an thang ve a a nih tiin a hril.
       
Sumati Devi, Principal AWW Training Centre chun, nu nenetui thatna, nau hai ta dinga thil dang pop o neka thalem thu a hril.

Dr Amo chungah lawmthu an hril
CCPUR: Parbung khawlaidung lampui thatnawna leia mipui harsatna hrie a, Parbung mipui el chau ni lovin biel mipui hai harsatna hrie a, Dr Chaltonlien Amo hmalaknaa lampuia lung dap a nina thuah Mr Lalringnghet, Secretary, VA, Parbung chun Parbung mipui aiawin Dr Amo chungah lawmthu a hril.

Manipur Police Department in CCTNS hmangin sin an thaw tan: L.M. Khaute, DGP
IMPHAL: Manipur Police Department chun  Crime and Criminal Tracking Network System ­CCTNS (e­Governance Mission Mode Project) hmangin sin an thaw tan a, tuchen hin hi system hmang hin Police Stations 101 le higher offices 115 haiah Hardware le equipments an thun ta bakah hi system server hmangin FIR cases 2,530 le General Diary (GD) 50,472 an khum lut tah. Tuta kum fe mek sung hin Cyber  Crime le inzawmin mi 7 Police han an man ta a, FIR case 2 resistered le GD cades 121 zieklut, Rs. 0.50 lakh le Honda Activa pakhat hmukir a ni tah. Manipur Police Wireless ti hlak  chu Manipur Police Telecommunication Organisation tia thlakthleng a ni tah. CCTNS hi ministry of Home Affairs, Govt. of India, New Delhi fund hmanga indin a nih tiin zanita DIPR, Imphal a Press Conference huna LM. Khaute, DGP, Manipur chun a hril.

Tuta kum fe mek sung hin State Police han helpawl 331 an man tah. Kum 2013 khan helpawl 938 an man a, helpawl 161 an inpe a; kum 2014 khan helpawl 1088 man an ni a, 98 an inpe a; kum 2015 khan helpawl 815 man annih. Hi hun sung hin mana um helpawlhai kuta inthawk ralthuom 700 chuong le pawisafai Rs. 75 lakh neka tam hmu le man a nih. Kum 2013 in Cases 3,930 registered a ni a, 3,044 sukfel, cases 2,667 Chargesheeted a ni a, kum 2014in cases 4,509 registerd,; hi laia 3,657 sukfel le cases 3,203 chargesheeted a ni a, kum 2015 in cass 4,854 registered; hi laia 3,670 sukfel; 2,920 chargesheeted a ni a, kum 2016 June 30, 2016 chenin cases 1,990 registered, 1,486 sukfel le 854 chargesheeted a nih tiin L.M. Khaute chun a hril.

Rangkachak kg. 7 man
IMPHAL: 2­Assam Rifles le Thoubal Police Commandos thangruol han August 2, 2016 khan Imphal­Moreh road a mobile check post­ah Moreh a inthawk Imphal pana hung Maruti Omni Van AS­01BP­5781 sukchawlin an dap a, rangkachak (gold bars) 42 dapdawkin hi Van a chuonghai leh an man a, Custom officials kutah an inhlan. Rangkachak mana um hi kg. 7 zeta rik niin HQ IGAR(S) thusuok chun a hril.

Army lakna dinga online registration
IMPHAL: October 16­22, 2016 inkar sung khin Senapati­ah Army ding lakna a um ding a ni a, hi taka thang nuomhai ta dingin August 17, 2016 a inthawk Online Registration thaw thei ning a ta, Online registration hi Sept. 30, 2016 ah khar ning a tih. Army lakna dinga thiemna Class­VIII passed ti hlak kha HSLC/Class X passed a tul ta tiin PIB Defence Wing thusuok chun a hril.

Mi 34 Police station­ah
IMPHAL: Independence Day hmangna ding le inzawma invenglawkna dingin Imphal West District Police han zanikhan Khuyathong le Hao Keithel area haiah dappui an thaw a, mi 34 hai chu lekha pawimaw an neinaw leiin thu indawn chieng dingin Imphal West Police Staion­ah an thuoi. Dappui hi  sunzawm pei la ning a tih.

Bill draft zo tep
IMPHAL: ILPS le inzawma Bill thar draft a um chu zofel tep a ni ta tiin R.K. Anand, MLA chun zanita Malom Tuliyaima Apunba Meira Paibi building thar a hawng huna a hril. Bill thar hi Manipur Assembly Monsoon Session hma ngeia draft zo tum le Assembly session huna putlut hman tum a nih tiin a hril.

Bomb puokah mi 3 an hliem
IMPHAL: Zani 6PM vel khan Manipur State Museum, Imphal bulah bomb a puok a, CRPF constables 2 thangsain mi 3 an hliem. Bomb puokna bula innghat Car pakhat khawm bomb hlek vuong darin a suksiet nuol. Hliemhai laia pakhat chu kum tlinglo niin ei thu dawngna chun a hril.

Gujarat CM thar dingin Vijay Rupani
AHMEDABAD: Gujarat BJP President Mr Vijay Rupani chu zanikhan BJP chun Gujarat Chief Minister thar  dingin an ruot a, Nitin Patel chu Deputy Chief Minister dingin an ruot bawk. Mr Rupani hi Rajkot West A/C  MLA  niin Ms Anandiben Patel Cabinet­a Transport, Labour and Water Supplies minister chel a nih. Mr Narendra Modi Chief Minister a ni huna khan Rajkot Mayor khawm a lo chel tah.

GST Bill Aug. 8 in Lok Sabha­ah
NEW DELHI: Lok Sabha­a chun August 8, 2016 khin GST Bill hriltlang le pass ni dinga ring a nih.  GST Bill hi Lok Sabha in an lo pass tasa nisienkhawm zani hmasa laia thenkhat siemthat a ni hnunga Rajya Sabha in an pass leia Lok Sabha­a hin siemthat a ni hnunga pass a tul nawk a nih. Lok Sabha in an pass hnungah states assembly 50% bekin an la pawmpui a tul a, state assemblies 50% han an pawmpui hnungah dan a hung ni ta ding a nih.

Assam­ahNDFB ni dinga ringhla han mi 14 an kap hlum
KOKRAJHAR: National Democratic Front of Bodoland (NDFB­S) ni dinga ringhla ralthuom tha tak tak chawi hai chu zani sun dar 12:30 vel khan Kokrajhar district sunga Balajan Tiniali hmuna va lutin  Balajan Tiniali Bazar sungah silai an kaphrut a, mi 14 in thina an tuok bakah midang 20 chuongin hliemna an tuok. Hi thil tlung huna security forces han an kaplet naah silai kaphruttu helpawl tienga mi pakhat kap hlum a nih tiin  Assam Director General of Police Mukesh Sahay chun a hril.

NDFB(S) helpawl ni dinga ringhla hai hi Maruti Van­a hung an ni a, mi 14  thi hai laia 12 hai chu a hmuna thi nghal an ni a, midang 2 hai chu hospital panpui mek an ni laia thi an nih. Police le Security forces tamlemin hi thil tlungna hmun hi pan nghalin dappui nasa takin an thaw a, AK­56 le AK­47 series Rifle bakah Grenades pakhat an dapdawk a, mi man ruok chu an la nei nawh. Hliem hai chu hospital tum tumah enkawl an nih.

Assam CM Sarbananda Sonowal chun hi thiltlung hi a dem hle a, hliemna tuok hai chu a tul le pawimaw anga enkawl dingin district thuneituhai an hriettr. Hi baka hin Finance, Education & Health Minister Himanta Biswa Sarma khawm a hmuna thil umdan enfel dingin a tir. PM Narendra Modi khawmin hi thil tlunga thi hai a sun thu le hliem hai a tuorpui thu  Assam CM fethlengin a puong.

Assam sawrkar chun hi thil tlunga thi sung hai kuomah zangnadawmna Rs. 5 lakh seng pek ding le hliem hai kuomah thangpuina Rs. 1 lakh seng pek dingin a puong.

VAWISUN THUPUI
Lalpa chu a tha a, lunginzing nia chun kul nghet a nih, amaa an ringna innghattuhai chu a hriet. ­ Nahum 1:7

Editorial: Games and Sports

Ei hriet seng angin khawvel hi inelna ram a ni ta a, inelnaa thang ngam lo le thang ve phak lo hai ta ding chun ei hmakhuo ding hi a eng (bright) bek bek nawh. Hieng a ni lei hin thangthar, a bikin thalai hai hi inelna tha le thienghlim haia thang ve phak dinga thang ei lak tak tak a tul hle a nih. Ieng thil khawm thaw ding ni inla inelnaah ei thang ve phak naw chun, hausak chu hril lova hmang fakkhawp  huotdawk hi thil harsa tak a nih. Sumdawngna, lekha inchukna, sin zawngna, games and sports thil haia khawm nisienla a tlin le a tlak hai chau ngirsuokna ram a ni tah. Hiengang ngirhmuna ei um ve phakna ding chun mihai neka taimak, tumru, thuawi thei le mi insumthei ni a ngai. Ieng thila mani bek  state level, national level  le international level a hming inlang phak ni ve thei dingin thalai han tumna nei inla nuom a um. Tumna a um phawt chun hlawtlingna chu a hung um el hlak.

Khawvel mipui han an ngaisang em em le an hlutsak Rio Olympic Games, 2016 chu vawituk zing dar 4:30 (IST) a inthawk hin Brazil rama Rio de Janeiro khawpuiah tan ning a tih. Hi Games a hin khawvel  rambung tum tum 205 haia inthawk inkhelmi 12,000 vel an thang ding a nih. India ram aiaw dingin mi 120 thlangsuok an ni a, hienghai lai hin Manipur mi 6 an thang ve. Olympic Games a Manipur mi 17 an thangna ding a nih. India ram aiawa thang ding Manipur mi 6 hai chu Laishram Bombayla (Archery), Saikhom Mirabhai Chanu (Weightlifting); Pukhrambam Sushila Chanu ( captain of Indian Women’s Hockey team); Anuradha Thokchom (Hockey), Khadangbam Kothajit Singh le Kangujam Chinglensana Singh (Hockey ve ve) hai an nih. India ram ta dingin Manipur state chu Games & Sports tienga power house a nih tia hrila a lo um hlak ang hrima India ram ta dinga medal hung la ngei dingin ditsakna ei inhlan tawl.

Mary Kom Rio Olympic Games ­a thang dingin tuta tum chu a qualify zo tanaw leiin Rio Olympic Games 2016 a thang dingin Manipur tribal­hai ei hming an lang ve phak tanaw a nih. Manipur  a tribal­hai ta ding chun hmasawnna nekin hnungtawlna a ni leiin a pawi a, tuornat a um hle. Manipur tribal­hai hi Olympic Games a thang dingin ei tlin ve phak naw ni lovin, ei tumruna, ei taimakna le insumtheina ei tlasam lei a ni lem ti inla ei hril suol taluo ring a um nawh. Mary Kom hman a lo qualify el  bakah Medal chen a lo lak thei venaa inthawk hin Manipur tribal mihai khawm Olympic Games a thang thei ve dingin ei tlin (fit) ve a nih ti chu chieng takin an lang. Mary Kom hi Manipur tribal­hai ta dinga inchuktirtu, tumruna, taimakna le insumtheina petu hung ni sienla nuom a um ngei el.

Manipur tribal­hai hi Games & Sports ei inhniknaw bik le ei thiemnaw bik a ninaw a, ei inhnikna khawmin a la zo naw lei a nih. State level a khawm Tribal­hai hi games & sports tiengpangah ei hming an lang tlawm hle. Hi thila hin intumding bik ei um naw a, ei rengin ei mawphurna ei zo naw lei a nih. Nu le pahai tak tak khawmin hi kawngah hin ei mawphurna ei zonaw a, ei nauhai inhnikna ei zawmpui nuom naw a, an lekha inchukna ringawt ei inhnikpui a, lekha hlak chu ei beisei angin anlo thiem bawk si naw leiin Games & Sprots tienga mi hlawtling ding, mi hming inthang le ropui ding kha tam takel ei dangchat niin an lang. Ei nauhai inhnik zawng hi hrietpuiin, games & sports tiengah inhnikna an lo nei chun ngaisakin bawzuipui ve tang ei tiu.

Games & Sprots tiengpangah  hin inhrilhrietna (awareness) khawm ei la tlasam hle a. Manipur tribal­hai hi games & sports tiengpangah State level le national level hai chenah ni lova international level chena inlang phak le medal dawng phak ei hung inkat nuk ve theina dingin, thangruola awareness campaign ei nei tam hi nuom a um. Chu thil thawtu ding chun tribal mihai laia games & sports tienga inhnikna nei le chinchang hrie hai hi hung involunteer thei hai sienla chu sports tienga tribal­hai mi dawmsangtu a hung ni ngei beisei a um. Ei thalaihai hi an hmel le an pumduong khawmin a tlin a, a thuoitu ding, an chuktirtu dingle thil um dan hril hretu ding an mamaw a nih.

Lekha inchuk hi a tha a, sawiselna ding a um der nawh. Amiruokchu, ei  nau han sports an lunglut a, an lekha inchukna tieng neka an inhnik lem a ni phawt chun an khel hma ngeia  nu le pa han thutlukna ei siempui el thiltha le thil thaw dan ding lampui a ni ring a um. Lekha tiengpangah hlawsam bawk, sports tieng hlawsam bawk chu umzie neilo, damsunga an career sietna a hung ni ding a nih. Sports tiengpang hi fak hmuna chau ni ta lovin hausak theina, hmingthat theina, inlar theina a ni ta leiin, tulai khawvela ding chun games & sports hi inhnik chi a tling phak ta a nih. A bikin Manipur tribal­hai hi games and sports tiengpangah hma hang la thar zuol ei tiu. Ei ta dinga Sekibusuok ni thei ding a nih.


Post a Comment

Powered by Blogger.