Aizawl, July 01, 2016, Virthli (ONP): India rama MMA (Mixed Martial Arts) game sulsutu hai laia mi Tv. Samuel Lalrozama Hmar s/o Dr. Thangchungnunga chu IMMAF World Championship ah a thang ding a nih. Hi Championship hi Las Vegas, USA hmuna 4th -10th July inkar sunga nei ding a nih.

Tv. Samuel Lalrozama hi India-in MMA International Referee pahni a nei hai laia mi a nia, India ram anthawka World Championship referee hmasa tak khawm ani nghe nghe a nih. Nikum khan hi Championship a hin Referee sin alo thawa, inla fit nawk zuolin tukum chu a khel ve ding a nih. Tv. Samuela hi kg 71 a ni a, karkhat sungin 65kg a insuk zangin feather weight-ah a khel ding a nih.


Samuel Lalrozama Hmar hi Martial Arts Hall of Fame Award hai chen khawm inhlan alo ni tah. Senior Aircraft Maintenance Technician sin Bangalore hmuna thawin a hun awl lakah Martial Arts Instructor sin thaw hlak a nia, tulaia India rama kungfu tieng panga MMA League lientak Super Fight League le Ultimate Fighting Championship (UFC) a hai khawm Referee sin thaw hlak a nih.

Samuel Lalrozama Hmar hin Black Belt le Certified instructor nina styles paruk (6) zet hieng Taekwondo (ITF), Taekwondo(WTF), TangSooDo, Karate, Kickboxing, Jujutsu haia a nei a nih.Chun hienghai bak a hin National Judge, Referee le National Assistant Coach sin hai khawm lo thaw tah a ni bawk a nih. Muay Thai a khawm World No. 3 lo ni hlak, International levela inelna a hai khawm hratna vawi tamtak lo chang tah a nih. Tukum March thla khawm khan Thai Martial Arts & Festival neina ah Dap Thai (Thai Sword Fight) ah Bronze Medal alo lak zo chauh a nih.

Post a Comment

Powered by Blogger.