Council Day hmang dan ding an rel
CCPUR: July 25, 2016, 1:00PM khan Mr Langkhanpau Guite, Chairman, ADCC inrawinain a Office chamber­ah ADC, CCPur hnuoia MDCs han meeting an nei a, August 1, 2016 nia ‘Council Day’ hmang dan ding le thu pawimaw dang dang an hriltlang.

ADC meeting chun, mithi 9 hai ruong District Hospital Morgue­a la um zing a ni leiin kumdang angin Council Day puithu ber burin hmang lova Victims family hai leh District Hospital Moruge­a hun hmang dingin an rel bakah ADC/CCPur Complex, Bungmual­ah thingkak phunna hun hmang dingin an rel.

District Council, CCPur­a nominated  MDC mi 2 hai laklutna ding thuah official order iengkhawm hmu a la ninaw thu hi huna hin ADC Chairman chun a hril.

Meihawl bag­ah ralthuom dapdawk
CCPUR: Police­a inthawk ei thu dawngnain a hril danin 26­Assam Rifles, Singngat­a um hai chun  report an dawng bawzuiin July 23, 2016, 8:05PM vel khan Tangpijol le Likhai khuo inkara Meihawl (charcoal) phur motor MN02B­1580 sukchawla an dapnaah Meihawl bag sungah ralthuom thahnemtawk tak dapdawkin motor a chuong mi 3 hai leh an man. Mana um hai chu Enkhanmang (46) s/o (L) Thanghuatkam of Ngathal; KL Muan (23) s/o Enkhanmang of Ngathal le Hauvanglian (26) s/o Khanpau of Vengnuam, New Lamka hai an nih.

Ralthuom an dapdawk hai chu­ 5.56MM Auto MA­2 MK­II 1, 5.56MM MA­3 MK­II 2; 5.56MM magazine 1; 5.56MM magazine (20 round capacity) magazine 1; 5.56MM (30 round capacity) magazine 4 hai an nih. Mi 3 le ralthuom an man hai hi 26 Assam Rifles chun Singngat Police station­ah an peklut a, hi thua hin Police chun FIR No. 4(7) 2016 SGT­PS U/S 25 (1­C) A.Act an registered.

ITI Saikawt Superintendent an inhmupui
CCPUR:  HSA, State Coordination Committee, Manipur le HSA CCPur JHQ thuoitu hai chun July 25, 2016 khan ITI, Saikawt an va kan nawk a, exam nei lai student hai an va enfel bakah ITI Saikawt Superintendent Mr Y. Achouba Singh khawm a office­ah inhmupuiin thu pawimaw tum tum an hrilpui.

ITI  compound le a se vel tawp le bal taka um chu an ngaimaw thu  ITI Supdet. Kuomah an intlun a, building thar um khawm hmang a ni hmaa se el  thei dinga um chu pawi an ti thu an intlun. Mr Y. Achouba Singh chun, hmatieng peiah Computer le Hair & Skin training hai khawm hawng vat tum a nita thu, building le thil dang dang hai sawrkarin duthusama a hung ngaisak zonaw thu, staff quarter hai umnaw leiin staff hai khawm nitin inlanin an kai  hlak a ni thu a hril.

Chun, zani hmasa khan HSA Campus, Rengkai, CPur­ah HSA CCPur Jt. HQ le State CorCom hai hmalaknain CCPur Jt. Hqrts sunga Unit tin thuoituhai meeting an neipui bawk.

Dr H.T. Sangliana ziek lekhabu
CCPUR: Dr H.T. Sangliana, IPS (retd), Ex­MP, Lok Sabha le Vice Chairman, Minority Commission  of India lo ni hlak in a ziek “Ka chanchin” ti lekhabu chu Rs. 250/­ in Synod Book Room, IB Road, CCPur­ah inchawk thei a nih.

CCPur­a inthawk teacher 14
CCPUR: July 27­28, 2016 sung khin Directorate of Education (S) huoihawtnain Imphal­a Multipurpose Hall, NCERT ah training on Quality Education­Teacher Accountability Fostering Teacher­Student Relationship for Teachers/Lecturers on Hills district um a tih. Training­a hin CCPur district­a inthawk Vungzagen Hr. Sec. School le Rengkai Hr. Sec. School haia inthawk teacher 14 va thang an tih.

Training on Aquaculture tan
CCPUR: Zani 12:00Noon khan District Fishery Office, CCPur­ah National Fisheries Development Board, Hyderabad sponsored­na le District Fishery CCPur huoihawtnain ni 3 sung aw ding Training tan a ni a, hi huna hin Nga vaitu (fish farmers) mi 30 an thang. Hi hun hmangna hi S. Umananda Singh, Dist. Fishery Officer, CCPur le Chief Guest S. Kulla Mangang, Advisor, Fish Farmers Association, CCPur hai khawmin thuhrilna hun an hmang.

S. Umananda Singh, DFO, CCPur chun, training a ni khatni in theory thaw ning a ta, ni 2 sung practical thaw ning a tih tiin a hril a, training­a thang hai chu theory le practical hai lunglut taka thang dingin an fui. Training­a  mi 30 hai chun Thanga, Bishnupur district­a Fish Farm pakhatah practical an nei nghal ding thu  hrilin, chu thila dingin department chun mi pakhat peia Travel allowance (TA) ni khatah Rs. 150 pei a pek ding thu a hril.

S. Kula  Mangang chun, CCPur­a Sa le Nga zawr hai tuolsunga mi a tlawm leiin training­a thang hai chu lunglut taka inchuk dingin an fui. Technical Session­ah S. Umamanda Singh, DFO, CCPur in Nga vai dan inchuktirna a nei.

Muolvaiphei HWA in lampui an siem
CCPUR:  Muolvaiphei Village Authority hmalaknaa Sugnu Road Muolvaiphei khawsung lampui siemthatna sin chu sunzawm zing a la ni a. Zanikhan Hmar Women Association (HWA) Muolvaiphei Unit hmalaknain khawtlang huopin lampui siemthatna sin an thaw a. Ruo sur khawmin an lampui siemthaa sin an thawna hi a sukbahla chuong nawh. Pil le lunghrieu Truck iemanizat zet sung nita sien khawm lampui hi a la pawr zing tho leiin a pawrna lai lampui intluona Tektei bawng rembitna sin hi an thaw a nih.

ADC, CCPur a nominate member dingin
CCPUR: Manipur a Autonomous District Council (ADCs) 6 um hai laia ADC 4 haia nominate  member dingin mi 2 pei nominate an ni ta a, ADC CCPur a nominated member a ruothai chu, M. Chungpa Kom (55) s/o  (L) M. Thangloson Kom of K.K. Haotak Village, CCPur district le Holkhojang (68) s/o Limlhun of D. Phailian, CCPur hai an nih. ADC, Chandel a dingin T. Cicilia Haokip @ Chinneivah, w/o Onjamang Haokip of Mission Veng, Moreh le  Mangta Alen Kom of Litan village, Chandel hai an nih. ADC, Sadar Hills a dingin Milan Pradhan le Thangkam Lupheng  hai ruot an nih. ADC Senapati a dingin Robinson le Kh. Sapinii hai ruot an nih.

OBC students 1,05,449  kuomah Scholarship
IMPHAL: Kum 2001­2002 a intahwk khan Minorities and Other Backward Classes (MOBC), Manipur chun OBC students, Manipur sung le Manipur state puotienga lekha inchukhai kuomah Scholarship a pek tan a, tuchen hin OBC students 1,05,499 hai kuomah Scholarship pek a ni ta a, kum 2014­15 chena Scholarship a sum hmang chu Rs. 1035.49 lakhs a tling phak ta tiin Kh. Dineshchandra, Director, MOBC chun zanita DIPR Complex, Imphal­a Press Conference huna a hril. Kum 2016­17 a hi Scholarship hmu chu students 17178 anni a, hienghai lai hin Muslim 3510, Christians 13599, Sikh 31, Buddhist 36, Jain 27 le Parsi 15 an thang. Kum 2011 intiempui dungzuiin Manipur­ah Christian population chu 41.29, Muslim 8.4, Buddhist 0.25, Jain le Parsi 0.06 an nih tiin a hril bawk.

Smart City a dingin Rs. 1,523 crore
IMPHAL: Manipur State khawpui Imphal Smart City­a siemna dinga thil tul ding hai chu inpeisa diema zo fel a ni ta a, Imphal Smart City project a sum hmang dinga riruong chu Rs. 1,523 crore a nih tiin Nepram Gitkumar, Director, MAHUD in zanita DIPR Complex­a Press Conference huna a hril.

Non­local 45 man nawk an nih
IMPHAL: JCILPS thlawptu han zanikhan Dimapur a intahwka Imphal pana hung Bus­hai chu Sekmai  hmuna sukchawlin an lo dap nawk a, lekha pawimaw nei kim lo non­local 54 hai chu Bus a inthawk intumtirin an man a, a hnungin Sekmai Police Station­ah an inhlan. Ni 4 liemta sunga JCILPS thlawptu han Sekmai area hmuna non­local an man hi mi 400 an chuong ta nia hril a nih.

COHSEM Annual Function
IMPHAL: Council of Higher Secondary Education, Manpur (CoHSEM) indin tana inthawka kum 24 zet a liem hnungin COHSEM Annual Function hmasa tak chu zanikhan Classic Grande, Chingmeirong­ah nei a nih. Education Minister Dr Kh. Ratankumar Singh khuollienin a thang. Enruk sukbo hmakna ding chun student­hai thiem taka lekha inchuktir le thil umzie chieng taka inhriettir a nih tiin DR Kh. Ratankumar chun a hril.

Tui tam taluo leiin harsatna
IMPHAL: Tulai ni 2 vel a zana ruo a sur leiin Manipur phairam biela chun tui a tam tam leiin mipuiin harsatna nasa tak an tuok pha. Leilet a bu a chim bakah Ngakula inthawk Nga vai  hai an suok nasa leiin loneitu le Nga vaituhai a sukbeidawng hle niin ei thu dawngna chun a hril. Imphal khawpuia chenghai khawmin harsatna namen lo takel an tuok pha bawk.

Gang 2 le midang 8 man
IMPHAL: Mi thuoihmangna a inrawl ve  pasal 1 le Bank Pass Book le Aadhar Card tehlem siemtu pasal pakhat  hai chu July 19, 2016 khan man anni bakah NSCN(IM) cadre pahni thangsain misuol 8 man an nih. Mi 8 haia inthawk hin document lem, mobile phone, pawisa fai le silai hmu le man a nih tiin A.K. Jhaljit, SP, Imphal West chun a hril.

CEO Manipur thar ding ruot tum
IMPHAL: Election Commission of India (ECI) chun Chief Electoral Officer (CEO), Manipur thar ding ruot dingin rawtna a hung siem nia hril a nih. Tuhin Manipur Chief Secretary O. Nabakishore Singh in CEO, Manipur sin a chelsa a nih. Manipur Assembly Election hung um ding leiin ECI chun inthlangna dinga hmalakna hrat lem le fel lema thaw a hung ni theina dingin CEO hran lieu nei chu tha a ti dan nia hril a nih. ECI chun election nei dan ding thuah thil umdan enfel dingin Tamil Nadu  Joint CEO, Ajay Yadav a ruot a, Ajay Yadav hi vawisun (July 26, 2016) hin Imphal a hungtlung ding niin ei thu dawngna chun a hril.

HSLC Compartmental Exam result
IMPHAL: Board of Secondary Education Manipur (BSEM) hnuoia HSLC Compartmental Examination, 2016 result puonglang a ni ta a, candidates 12  um lai 11 an pass a, pass percentage 91.66 a nih. 1st Division a pasi an um naw a, second  division­ah mi pakhat le Third Division­ah mi 10 an passed.

Pranab Mukherjee in President sin a chel kum 4 tlingna lawm;
PM in Rashtrapati Bhawan Musuem­II a hawng
NEW DELHI: Pranab Mukherjee in India President sin a chel kum 4 tlingna zani zan khan Rashtrapati Bhavan, New Delhi­ah lawmna programme puithu taka nei a nih. Hi programme a hin PM Narendra Modi in Rashtrapati Bhavan Museum Phase­II a hawng. Hi programme a hin President Pranab Mukherjee, Vice President Mohammad Hamid Ansari, PM Narendra Modi, Lok Sabha Speaker, Union  Ministers, milien le milal tam tak an thang. Hi huna hin President le PM han thu hrilna hun an hmang. Pranab mukheree chun Rashtrapati Bhavan chu India mipuihai ta a nih tiin a hril.

Rashtrapati Bhawan hmun hi British hun laia lo indin ta le British Viceroys han an lo hluo ta, kum 1947 a inthawka building tha taka lo bawl ta, chu hnunga suklien, siem that le cheimawi peia um a nih. Zanita Rashtrapati Bhavan Museum Phase­II hawnga um hi 10,000 Square meters zeta lien a nih. A hma chun museum bawlna hmuna hin heritage building a lo um hlak. Rashtrapati Bhavan museum phase­I le Clock Tower hai  chu July 25, 2014 le July 25, 2015 hai khan hawng a lo ni tah.

Museum thara hin Art Gallery khawm a um. Hi hun hmangnaa hin Rashtrapati Bhavan Publication Division in an buotsai le  sut, Rashtrapati Bhavan chanchin inziekna lekhabu thar 5 tlangzar a nih. Lekhabu thar 5 hai chu, “ A work of Beauty: The Architechture and Landscape of Rashtrapati Bhavan”, “First Garden of the Republic: Nature in President Estate”, “Around India’s First Table: Dining and Entering at Rashtrapati Bhavan”, The Arts and Interiors of Rashtrapati Bhavan:Lutyens and Beyond” le “Discover the Magnificient World of Rashtrapati Bhavan” ti hai an nih.

NEET paper leak ti thuah  mi 5 man
NAINITAL:  July 24, 2016 nia India ram pumpui huopa Medical College admission thawna ding le inzawma National Eligibility cum Entrance Test (NEET) neia uma question paper leak tia intumna le inzawmin Police han mi 5 an man. Mana um hai laia 3 hai chu Corbett National park­ hmuna zingkara man an ni a, pahni hai chu Haldwani hmuna man an nih. Hieng mi 5 hai hin NEET exam a thang ding candidates mi 44 hai kuomah question an zawr nia hril a nih. Question  an zawr hi exam huna question le chun an ang naw a, sienkhawm mi an hlem hai kuoma hin Rs. 10­15 lakh dam an lak nia hril a nih.

Member 9 umna panel an din
NEW DELHI: Kar hmasaa Aam Aadmi party MP Bhagwant Mann in Parliament complex video­a thla laa social media haia a thedarna thuah Lok Sabha Speaker Ms Sumitra Mahajan chun a suizui dingin member 9 umna panel an din a, hi panel inrawitu dingin BJP MP Kirit Somaiya ruot a nih.  Panel chun August 3, 2016 chenah report pelut an tih tiin Lok Sabha Speaker chun zanikhan a hril. Hi video thedar lei hin Parliament­a khawm inselna nasa tak a lo inumtir ta a nih. Hi  chungthu sukfel a ni hmapo chu Mr Mann  hi Parliament inthung­ah thang lo dingin Speaker chun Mr Mann hi an hriettir. Committee/panel hmah July 26, 2016 khin hrilfiena pe dingin an hriettir bawk a nih. Security thil leia video social media thedar hi sawrkarin a ngaimaw a nih.

Kamalnagar district siem tumna a um nawh:MPCC
AIZAWL: Mizoram  Pradesh Congress Committee chun, Chakma Autonomous District Council huomsungah Kamalnagar District siem tumna a um nawh tiin an hril. Opposition party le student Organisation thenkhatin  Chakma District  siem tumna a um nia an intumna le inzawma hi thu MPCC  in an hril a nih. State sawrkar chun Chief Secretary Chairman nina hnuoiah District Re­organisation Committee an din a, rawtna an la peklut nawh tiin MPCC thusuok chun a hril.

VAWISUN THUPUI
Tu ruok hin chu Krista Isuah, nangni inhmaa hlataka umhai kha, Krista thisen chun sukhnaiin in lo um tah a. Ama chu ei inremna a nih, pawl hnihai chu pumkhata siemin, an inkar ping dangna bang chu a sukchim a; ~ 2 Ephesi 2:13­14

Editorial: Mipui sawrkar

Democracy ram ei ni a, mipuiin ei aiawtu ding ei thlang hlak a, chuongang mihai chun mipui aiawin ro an rel a, chu chu mipui sawrkar ti a nih. Tuta Manipur Assembly fe mek hun (term) chu March 18, 2017 a tawp ding a ni leiin Assembly Election nawk hun ding chu a hnai ta hle. India khuo le tui ei ni chun mani vote thlak chu ei mawphurna a nih. Assembly election hung nei ei ta, vote thlak zova vote tla hai tiem hung ning a ta, vote tla hai tiem zova mipui aiawa roreltu dinghai ei hriet thei ding a nih. Ieng party amani, party hran hran thangtlanga rorelna le sawrkarna chang nihai sienlakhawm party sawrkar a ninaw a, mipui sawrkar a hung ni tho tho ding a nih tiah ei chieng thar a tul. Mipui sawrkar indik tak thlang thei dinga mipuihai ei lo insingsa nuom a um hle.

Sawrkarna siemtu party­hai hin party mi le sa hai ditsak bik an ching hle hlak a, hi thil hi a ni dan ding  angah ngai liem el ei tih ti hi inlau um takel a nih. Ieng party khawm sawrkarna siem thei dingin hung um hai sienla an sawrkar chu party sawrkar a ninaw a, mipui sawrkar a nih ti an hriet tlat ding a nih. Mipui tiengpang khawmin mipui sawrkar siem thei ding chu tu ham an ni a ti hi chik taka ei ngaituo a, ei vote ei thlak nuom a um. Ei ramin party sawrkar ni lovin mipui sawrkar indik tak a pawimawin a mamaw bek bek el a nih.

Ieng party khawm hung sawrkar sienla, party mi le sa hai  hang ditsak lemna hi chu a um naw thei naw a, a awm tawk chu mipu tieng khawmin ei hrietthiempui tawk hle niin an lang. Amiruokchu, a taluo a inditsak bikna hi a um hlak a,hi thil hi chu mipui ta dingin hrietthiem a harsa hlak. A taluo a party mi le sa, sung le kuo hai inditsak bikna a hung um pha leh mipui inpumkhatna le thangruolna a suksiet a, khawtlang, kohran, ram le hnamah chen kakhawk tha lo an tlun thei hlak. Hi thil hi mipui aiawtu dinga thlangtling le sawrkarna cheltu han ngaipawimawa an neisa ve thiltha a ni ngei ring a um.

Ei rama hin ieng level­a khawm party feeling alut vat a, sin thawtu ding thlangna kawng le sawrkar sin (Job) pekna kawngah khawm a thiem, a tling le tlak, sin thaw tha thei ding nekin, party mi le sa inditsaknaa ei hmang hlak leiin, thaw tha thei lo, thiem lo le tling lo han an thawin an tawk a, a tuortu chu tu dang ni lovin, ei ni mipuihai tho ei hung ni hlak. Khawsunga hmasawnna sin thaw chungchangah khawm, party mi le sa inditsakna a hluor hlak a, sin thaw that a ninaw khawmin mipui tieng sawiselnain bengkhawn a hlaw naw a, mipui nekin mimal pakhat in ngaipawimaw a hlaw rawp hlak. Hiengang thil infawkkhawm hin ei ram le ei hnam hi a tuom mek a, hi lei hin hma ei sawn hrat thei naw niin an lang.

Sawrkar thar a hung pieng nawk huna khawm, party mi le sa hai chun inthlang laia an sin inrim, an sawlna le sum seng man intel le hmukir ngei tumin thlangtlinga um hai an baw nawk rui rui ngei ring a um. Hiengang hri hi ei invawi ta leiin sawrkar thar a hung pieng khawmin party sawrkar sung le kuo hai ditsak taluo bikna sawrkar a hung ni nawk el hi thil inlau um takel a nih. Hi thil hi ei fe pel a, ei bansan a hun tah.

A chunga ei hril ang fedan le thaw dan tha naw takel hi mipui tieng hin thlir liem mei mei ta lovin, sawrkar siem theitu ei ni ang bawkin, sawrkar umsa peithla nawk theitu ei ni ti hrie inla, thangsaru hle tang ei tiu. Mipui  sawrkarna um nawna rama inrelbawl dan thawpuikthlak tak ei hril changin  democracy (mipui rorelna) rama um ei ni leia vangnei ei intizie hahipa ei hril hlak lai hin, a takin chu vangneina chu ei chang chie am ti hi sut hlak ei tiu. Mipui sawrkar le mipui rorelna sawrkar tak tak nei thei dingin tuta tum chu hma la tlang ei tiu.



Post a Comment

Powered by Blogger.