HKI le V/A han Pherzawl ADC building an enfel
PHERZAWL:  Hmarram Kohran Inzawmkhawm (HKI) thuoituhai le Pherzawl Jt. Churches leaders le Village Authority hai chun July 18, 2016 khan bawlzo le hawnga lo um tah Pherzawl ADC building a hmuna fein ADC building ngirhmun an va enfel. Hi huna fe thuoituhai chun, ADC peka ei um hi lawm a um lai zingin, iengtik am mipui sawr tlakin a hung um ding ti chu an lungkham thu, a puitling vat theina dinga  an thaw thei umsuna ngaiin Kohran thuoituhai chun Thanlon MLA, Tipaimukh MLA le thuneitu insang lem hai ta dinga tawngtaipekna an nei.

Hieng laizing hin a building enin lawmum ti hle hai sienkhawm a building sung an hang lut meu chun a sunga electric hrui fit sa um hai, switch box, tukver darthlalang le ceiling fan hai chu suksieta umin an hmu a, lainat um tiin tap pumin tawngtaina an nei nawk.

Khawtlang, ram le hnam hmasawnna dinga theitawp suoa nawr a ni lai zinga sukchavai le suksieta a hang um el chu pawi an ti a, a thawtu sawrkar ta dinga thafan nawna an tlun thei ti hriein mipui hai chu public properties hai suksietu ni lova a venghimtu ni tum seng dingin HKI thuoitu hai chun ngenna an siem. (Input: Lalnunthang Songate)

CDVDFWA thuoitu han DGP an inhmupui
CCPUR:  All Manipur VDF Welfare Association (AMVDFWA) thuoituhai chun an thil phut hai le inzawmin July 18, 2016, 10:00AM­11:10AM inkar sung khan PHQ, Imphal­ah Manipur DGP Pu L.M. Khaute le ADGP C.Doungel hai an inhmupui. Hi huna hin September 29, 2015 a Manipur Cabinet in VDF hai thla hlaw Rs. 1000/­ a sukpung dinga a lo pass ta chu an hmatienga sukpuitling ding; VDF hai kuomah kum tin Uniform thar pek ta ding ti le VDF in nuorna (aggitation) an nei huna an sina inthawka inchawltir (dis­engaged) hai chu an sina laklut nawk vawng dinga remti a nih tiin  S. Laltingen Vaiphei, Gen. Secy.  AMVDFWA chun a hril.

Lamsir nulla ah an tawl lut
CCPUR: Zani zantieng dar 1 vel khan Sielmat le Bijang infepawna Sielmat vadung chunga daw Leilak bul lai Car (Duster) chu Sielmat­a inthawk Bijang tieng tlankai a tum laiin lampui a lo innal deu leia changsuolin lampui sir nula ruom sungah a hnungtieng zawngin an tawl lut pal a, sienkhawm  a sunga chuong hai hliemna tuok an um naw bakah motor hi a sietna taluo a um nawh. Iemanichen hnungin JCB hmangin motor hi keidawk a nih.

Awareness on JE cum vaccination
CCPUR:  District Health Society, CCPur huoihawtnain July 20, 2016, 11:00AM  hin Siden khuoah One Day Awareness Campaign on JE­cum­JE Vaccinaton um a tih. Hi huna Dr Belamy, OSD, Dist. Hospital resource person in thang a ta, Nurse han JE Vaccination thawng an tih.

RKSK Module Training tan a nih
CCPUR: District Health Society, CCPur huoihawtnain July 30, 2016 chen aw ding Rastriya Kishor Swasthya Karyakram(RKSK) Module Training chu zanikhan  Synod Hall, IB Road, CCPur­ah tan a nih. Module Training hi CHCs l PHCs haia ANM, MHW (Male Health Worker) le Multi­Purpose Worker (MPW) hai ta dinga buotsai a nih. Training hi zani zingkar 10:30AM khan Dr Thangchinkhup Guite, CMO, CCPur in a hawng. First batch July 19­23, 2016 sungin  ANM 28 training an ta, 2nd batch ah ANM 31 training an tih. Zanikhan Dr Robinson inrawinain state le District Hospital a inthawk mi 9 han training an pek. July 29­30, 2016 inkar sungin MHW le MPW  inkawp 3rd batch mi 30 le 4th batch mi 31 hai training an tih.

ADC Sadar Hills Administrative building thar Dy. CM Gaikhangam in a hawng
IMPHAL: Rs. 4.79 crore senga bawl Autonomous District Council (ADC), Sadar Hills Administrative Building thar chu zanikhan khuollien ni pumin Mr Gaikhangam, Deputy Chief Minister, Manipur in Kangpokpi hmuna a hawng. Hi huna hin IFCD, Printing & Stationary Minister  Ngamthang Haokip functional president le PHED, Science & Technology and Labour Minister T. Manga Vaiphei guest of honour in an thang.

Hi building thar hawngna hun hi Nemcha Kipgen, Kangpokpi A/C  MLA, Haokholal Hangshing, Chairman ADC, Sadar Hills, Thangjakam Misao, Vice Chairman, ADC Sadar Hills, Jacintha Lazarus, IAS, DC, Senapati le Sadar Hills ADC members han an uop tawl.

ADC Sadar Hills thangsain Manipur a ADC 6 hai chu sukbuoitu tam tak karah tluong takin an fe thei seng a. Hi thil hi mipui le ADC members han tha taka an thlawp lei a nih. Ram hmasawnna dingin inremna le muongna a um a tul hmasa a, hi lei hin inhmangai takin um tlang ei tiu. Tuta Manipur sawrkar fe mek hin tlangram biel a ngaitha ti thuvuongva a um a, hi thu hi thudiklo a nih. Manipur tlangram suk hmasawnna dingin sin tam tak a thaw a, Education, Sports, Healthcare le a dang dang hai thangsain Sector tinah hmasawnna sin a thaw a. Kum 10 liemta sung hin inthlakdanglamna nasa tak a um a, hi taka inthawk hin mipui han thudik hre thei an tih. Hmatieng peiah thuvuongva indiklo hi lo ring ta ngai naw ro. Hun la hung um pei dinga khawm tuta sawrkar fe mek hin  tlangram bielah hmasawnna sin chi tum tum la hung thaw pei a tih tiin thu ka tiem cheu tiin  Mr Gaikhangam chun hi huna mipui pungkhawmhai hmaah a hril.

ADC Sadar Hills Administrative building hi kum 2012 a inthawka Manipur Tribal Development Corporation (MTDC) in Special Central Assistance (SCA) fund Rs. 4.79 crore senga an bawl, kum 2015 a bawlzo ta le zanita hawnga um a nih.

Bank Branches 178 le ATMs 293
IMPHAL:  Manipur­ah Bank chi hran hran 26 a um a, hieng Bank­hai hin Branches 178 le ATMs 293 an nei. Bank branch la hawng der nawna Blocks 21 a la um a, hawng pei la ning a tih. Electronic  Clearing Service (ECS) Credit le e­payment hai bakah mipui ta dinga sin pawimaw chi tum tum thaw a nih tiin Mercina R. Panmei, Director, Directorate of Institutional Finance (DIF) chun zanita DIPR Complex, Imphal­a press conference huna a hril.

Non­Tax Revenue Rs. 8.92 lakh
IMPHAL: Kum 2016­17 fe meka hin Directorate of Printing & Stationery, Govt. of Manipur chun Non­Tax Revenue Rs. 8.9 lakh a hmu ta tiin Toijam Dev of Printing & Stationery, Govt. of Manipur chun zanita DIPR Complex, Imphal­a Press Conference huna a hril.

Manipur sum ngirhmun a tha nawh
IMPHAL: Tulai tak hin Manipur sum ngirhmun a thanaw hle a, Overdraft  nei el thei ding ngirhmuna um ei ni leiin state sawrkar chun financial transaction hrim hrim a sukchawl hmak niin Finance Department­a senior finance officer pakhat chun a hril tiin ei thu dawngna chun a hril. Manipur sum ngirhmun (financial position) hi a thanaw (not in good health) a. Hi lei hin state sawrkar chun Treasury le Sub­Treasury Offices hai khawm department bills hai Bank­a inthawk sum laksuok dinga advice thawn lo dingin an hriettir vawng ta niin ei thu dawngna chun a hril.

Application Form lak thei
IMPHAL: Planning Department, Government of Manipur hnuoia LDC le Grade­IV sin hai lakna ding le inzawma Employment Office haia hming pelut hai ta dingin July 21, 2016 a inthawk khin Application Form hi Department office, Babupara, Imphal­ah lak thei le fill up zovin 30­07­2016 chenin hi Department office a bawk hin peklut nawk ding a nih.

SDPO, Imphal West lunga deng hliem
IMPHAL: Zanikhan Tamphasana Girl’s Higher Secondary School students han lampui hraw an tum a, hi school gate­ah Police han student­hai hi an lo dang a, chu huna students le Police hai inbeituonaah  A.G. Sharma, SDPO, Imphal West chu a bek takah lunga deng hliem a nih.

Shorthand le Speed Test hun
IMPHAL: Manipur Legislative Assembly Secretariat hnuoia thawk ding Reporter Grade­III regular basis a lakna ding le inzawma Shorthand le Speed Test (Computer typing) chu July 22 & 23, 2016, 11AM a inthawk khin Reporter’s Room, Assembly Secretariat, Imphal­ah nei ning a tih tiin Deputy Secretary (Admn), Manipur Legislative Assembly chun inhriettirna a siem. Chun, State  Mission Directorate, ICDS, Manipur hnuoia post hran hran lakna dinga Interview/Viva Voce chu July 22, 2016­ August 3, 2016 inkar khin Bal Bhavan, Khuman Lampak  Sports Academy Complex, Imphal­a nei dinga ti a nih.

HPC(D) le inbiek dingin feelers a tir
AIZAWL: HPC(D) pawl inbiekpui dingin Mizoram sawrkar chun feelers a tir ta tiin zanikhan  Zorammawia, Inspector General of Police (IGP), Mizoram chun a hril. Police Headquarters, Mizoram chun CID (Special Branch) chu dan pangngaia HPC(D) pawl chu inbiekpui dinga feelers tir dinga thu pek a ni dungzuia feelers hi tir a ni ta a, HPC(D) tienga inthawk dawnna hmu a ni pha leh inbiekna hmun le ni ding chu ruot ning a ta, a tira inbiekna chu official level ning a tih tiin Zorammawia chun a hril. Inbieknaa thang dingin HPC(D) Army Chief, Lalropui Famhoite, tuta Central Jail, Aizawla intang mek chu insuo a ni ding le ding naw thuah Home Department, Mizorama official han iengkhawm hril rik an la nei nawh. (PTI)

SC in Rahul  Gandhi ngaidam inhni dingin
NEW DELHI:  AICC Vice President Rahul Gandhi chu tuta hmaa vantlang inkhawmnaa thu a hril huna Mahatma Gandhi thattua RSS an tumna chungchangah Supreme Court chun, Rahul Gandhi chu  July 27, 2016 liem hma ngeia ngaidam an hni naw chun a chunga defamation casse siema um dungzuiin Court hmaah rorelna a hmasuon ding a nih tiin Supreme Court thusuok chun a hril. Rahul GAndhi chun Ukil in senior Advocate Harin Raval a hmang. Hieng laizing hin Congress chun, Rahul Gandhi in ngaidam inhni naw ni a, RSS an tumna le inzawma sukchiengna Court­ah suklang a tih tiin an hril.

APJ Abdul Kalam Memorial
NEW DELHI: Defence Minister Manohar Parrikar chun, July 27, 2016 khin India President hlui APJ Abdul Kalam inza le chawimawinain a ruong zalna Rameswaram, Tamil Nadu hmunah Dr Kalam Memorial bawlna ding lungphumna nei ning a tih tiin zanikhan Derek O’Brien (TMC) indawnna dawnin Rajya Sabha hmuna Zero Hour huna a hril. Hi thila ding hin sawrkar thlungpui chun ram acres 5 a lien a dit a, sienkhawm tuhin ram 1.8 acres chau sawrkarin a hmu a, sienkhawm Kalam memorial bawl tumna hi fethleng pui tho ning a tih tiin a hril a, design le iengkim sukfel vawng a nita thu a hril bawk.

Curfew la zam zing, mithi 42 an tling tah
SRINAGAR: Jammu and Kashmir buoina chu re thei lovin a la um zing a, protesters hai le security forces hai inbeituona leia hliemna tuok an um belsa nawk leiin tuchena Kashmir buoina leia thina tuok chu mi 42 an tling ta a, Kashmir Valley a chun zani khawm khan Curfew zam zing a la ni nih. July 8, 2016 nia Security forces hai le Hizbul Mujahideen helpawl hai inkaptuo hunah Hizbul Commander Burhan Wani le a rawihai pahni kap hlum an nia inthawka buoina hi hung intan a nih.  Hi thu ei sut chena hin buoina suok thar  ruok chu hriet a ni ta naw a, sienkhawm Mobile telephone le mobile internet services hai chu that zing a la ni bakah Kashmir phairuoma inthawka insuo chanchinbu hai khawm zani khan insuo an la ni nawh. Kashmir phairuoma chanchinbu hai  ni 4  a suok tanaw a nih.

Maxalites hai chetna leiin CRPF 10 an thi
PATNA: Bihar­a  Aurangabad district­ah Naxalites helpawl han  zani hmasa zan khan IED bomb sukpuokin CRPF a COBRA battalion hnuoia Commandos hai an lambunnaah CRPF personnel 10 an thi bakah mi 5 in hliemna an tuok. Hi huna inkaptuona tlungah Naxalites cadre 5 kap hlum an nih.   Hi thil hi Chakarbanda le Dumarinala inkar ramhnuoia tlung a nih.  Hi thil tlungna hmuna hin AK­47 Rifle, INSAS rifle le under barrel grenade launcher hai thangin ralthuom iemanizat dapdawk a nih. Hi thil tlungna hmuna hin security forces tamlem tirlut niin dappui nasa taka thaw a nih.

Bihar CM Nitish Kumar chun CRPF thi sunghai a sunpui thu puongin zangnadawmna Rs. 5 lakh seng pek dingin a puong bakah CRPF thi sung han insurance sum Rs. 20 lakh seng an dawng ding thu a hril bawk.

PM Narendra Modi chun hi  thil tlunga CRPF thi sung hai a sunpui thu a puong a, hliem hai khawm hung dam vat dinga a ditsak thu a hril. Union Home Minister Rajnath Singh chun Naxalites hai tukdawlna kawngah sawrkar thlungpui chun Bihar sawrkar a thangpui ding thu Bihar CM Nitish Kumar Telephone a biein a hril.

GST Bill thuah debate darkar 5 nei dingin
NEW DELHI: Business Advisory Committee, Rajya Sabha chun tuta kar sunga pass dinga phar le ngaituo ding Goods and Services Tax (GST) bill thua debate darkar 5 sung nei dingin a rel.  Amiruokchu, debate nei hun ding hi sukfel a la ni naw a, political party tum tum hai sawrkarin an rawnpui hnunga debate nei ding ni hi sukfel chau ni dinga hril a nih.

MGNREGA a dingin Rs. 28,022.87 crore
NEW DELHI: Kum 2015­16 a MGNREGA hnuoia Job Card hlaw le material cost la pekzo lo bakah kum 2016­17 a Job card sin thawnaa hmang dingin July 12, 2016 chen khan sawrkar thlungpui chun States le Union Territory sawrkarhai kuomah Rs. 28,022.87 crore lai zet a peksuok ta tiin Union Minister of State for Rural Development and Panchayati Raj, Ram Kripal Yadav chun zani hmasa khan Rajya Sabha an hriettir. Job Card hlaw a hun taka sem a ni pei theina dingin sawrkar thlungpui  chun National Electronic Fund Management System (NeFMS) an din ta a, States 11 haiah hmang mek a nih tiin Ram Kripal Yadav chun a hril.

AIADMK MP 4 in RS member dingin
NEW  DELHI: Tulai hnaia Rajya Sabha biennial election nei huna MP dinga thlangtling thar AIADMK a inthawk MP 4 hai chun zanikhan Rajya Sabha member dingin sesamna an nei. Zanita AIADMK MP sesamna nei hai chu an party leader A. Navaneethakrishnan, SR Balasubramoniyan, R. Vaithilingam le A Vijayakumar hai an nih. Rajya Sabha chun kum 83 mi nia March 3, 2016 nia lo thi tah an member chanpui hlui Abdul Gaiuyur Qureshi sunna hun an hmang.

Regional Centre for Biotechnology Bill, 2016 passed
NEW DELHI: Parliament chun Regional Centre for Biotechnology Bill, 2016 a passed tah. Hi bill hi  zani hmasaa kha Rajya Sabha in a pawmpui ta a nih. Hi bill hi United Nations Educational, Scientific and Cultural Organisation (UNESCO) enkaina hnuoia National Capital Region­a Regional  Centre for Biotechnology indin theina ding a ni a, Education training le research thaw theina   institution ding a nih.

VAWISUN THUPUI
Ngai ta, unauhai inngei diel diela um khawm hi, A va thain, a van hawi de! Lua hriek hlutak, Khakhmula luong thla a, A zakawfuol hmawra luong thla ang kha a nih. ~ Sam 133:1­2

Editorial: Ruol ban phak

Nu le pa tin hai chun an nau han ruol ban phak chau ni lovin ruol khumkhel hai sienla ti an nuom a, chu ding chun ka sawl ie, ka kham ie ti lovin thang an lak hlak. Hilei hin sin inrim khawm pawiti  lovin a sur a sa hnuoiah taima em emin sin an thaw tun tun hlak. An lekha inchukna ding kawngah khawm an sum le pai nei bak, a neihai ta  puk hiel khawpin thil an thaw ngam hlak. Ruol ban phak ni hi a tha el chau ni lovin a hlu a, mihai inza le inhnar hlawna a ni leiin thabo le lepchie takin nu le pa hai hi an um ngai nawh. Hiengang khawpa nu le pa han nauhai an hmangaina le ditsakna hi nau han ei theinghil a, ei uksak naw el hlak hi chu a pawi a nih. Hi lei hin nauhai hi ei thanghar a, nu le pa hai beiseina le duthusam ruol ban phak mi hung ni thei ngei dinga thang ei lak nuom a um.

Ei ram hi ram inhawia siem ding chun hnam dangin mi hung siem pek naw nihai a, ei ni ngei hi a siem thatu ding ei nih. Thil tha lo le mawi lo, ei ram le hnam ta dinga tha lo a nih ti ei hrietzing, ei thawlui nuom sung chun ei ram hi a changkang naw kumkhuo ding a nih. Ei ni thaw ra seng sik pei ei ta, ei thil thaw ngeiin tuorna le harsatna a mi siem let rawp ding a nih ti hi hriet ding a nih. Hnam danghai ban phak  le el phaka ei nun ei hmang seng a tul a nih. Ruol ban phak le khumkhel phak dinga thang ei lak phawt chun hlawsam nawng ei ta, ei hlawtling ngei ding a nih.

Zohnathlakhai hin, ei chengna hmun le ei khawlaidunghai hi a fai a, an hawi chun ei ram le hnam ta dingin an hawi a nih ti ei ngaituo nuom der naw a; khawlai le a vel hai vawng fai nek chun a peihnawktu ni ei rin der naw hi ruol ei ban nawna le ei changkang thei nawna  bulpui tak pakhat a nih. Ei renga ei ta le ei hmang tangkai em em thil hai chu vantlang ta niin ei hriet tlat a, vantlang chu ei ni tho ei nih ti ei hriet nuom naw tlat a. Fe puma thil sie hai siemthat nekin ei suksiet belsa hlak. Lamlien sira thil intar (signboard) tha tak tak hai khawm ei deng siet a, ei sukhmelhem hlak.

Lekha thiem tak tak, pa bengvar le nu bengvar tak tak, inchei nal em em, chin chang hre fu fu tam takel ei um ta lai zinga mawl hun lai ang ela vantlang zun in hai ei lan hnawm nuom ngat lem hi chu a pawi bek bek chau ni lovin a suol thlak em em a, ei hnam ta dinga thil inzak thlak tawp a tling a nih. A ruol ban phak naw thlak taluo bawk leiin bansan hmak chi a nih. Ei nu le pa han ruol ban phak le khumkhel dinga an min chuktir laia hiengang chau a nun hmang nuom ei la um hi chu a vangduoi thlak hle bawk a nih. Hnam varhai le hnam changkang hai ban phaknawna a nih. Hnam var le changkang hai nun dan entawn a, ban phak ngei ngei tum ding a nih.

Thil tha lo ei ching em em le hnam var hai ei ban phak nawna tak pakhat chu, ka thil thaw hin ka venghai ta dingin harsatna a siem ding am? ti ei ngaituo nuom ngainaw hrim hrim hi a nih. Hi thil hi ei mawlzie le hnufuolna tarlangtu a nih. Mani hlimhlawpna chau ngaituoin zan sawt tak tak music le TV ei enin ei ngaithlak a, dan kal le suol a nih ti hrim hrim ei hriet fuk ngai nawh. Hi khawm hi ruol ei ban phak nawna rasuok pakhat a nih. Ruol ban phak dinga ei harsuok hi chu a hun ta takzet a nih.

Zohnathlakhai hi incheina tiengah chun ei changkang em em a, sapram, Korea ram etc. hai leh danglamna ei nei ta naw a, ei nuomna tiengpangah chun ruol ei ban hla. Incheina tieng ruol ei ban ang bawk hin, taimakna, indikna, ringumna, tuorselna, Pathien thuawina, nu le pa thuawina, nungchang thatna, education, fak le dawn, thiltha thawna tieng le thil dang dang haiah ei thaw thei ding, ei thaw nuom lo thilthahai hi thaw ve inla, kawng tam takah chun khawthlang le khawsak ram nun hai ngai bik chuong nawng ei tih. Hi kawngah hin sawrkar tiengpang khawmin thaw ding le mawphurna nei veng ei tih. Politician­hai khawma ram le hnam thatna dinga ramdang tienga an ruolhai ban phak ve dinga hma an lak ve a tul bawk. Ruol ban phaka um hi hmasawnna le changkangna lampui a ni leiin ngaipawimaw seng ding a nih.

Post a Comment

Powered by Blogger.