Fak le dawn fimkhur dingin a ngen
CCPUR:  Dr V.C. Pau, DFWO/CCPur chun tulai nisa sat le fur ruotui tlak leia sungkhaw natna hri inleng thei zing a ni leiin mitin fak le dawna fimkhur dingin mipui hai a ngen. Vangduoi thila naupang sungkhaw an lo um chun nu le pa han home made ORS (chini, chi le tui chawkpawl) indawntir dingin a ngen bawk. Chun, Sungkhaw le inluok (vomiting) inthuoa naupang damnaw an um chun ORS/Wylite indawntir ding le a thei china tuisuongthat dawn dingin mipui hai a ngen bawk.

Dawr siem le sa zawr hai ta dinga inhriettirna
CCPUR: CEO, ADC, Churachandpur chun CCPur khawpui sunga Sa zawr le dawrkai hai ta dingin inhriettirna an suo. Hi dungzui hin lampui sira Arsa zawr  khap a ni a, Arsa zawrtu hai chun tuta inthawk thla khat sungin an Ar sa zawr ding a hmul sukfai sa (dressed chicken) hai glass container sunga an sie ngei ding ti le thil dang le arsa zawr kawp lo ding; Vawk that/ Vawk sa zawrtu hai chun an sa zawr ding a hmul raw el lova an pawtfai ding ti le Dawrkai hai chun tuta inthawk thlakhat sung ngeiin electronic weighing machine bukna (weighing scale/balance) an hmang ding ti a nih. Hi inhriettirna zawm lo hai chunga Section 49 of the Manipur (Hill Areas) District Council Act, 1971hnuoiah action lak ning a tih tiin CEO/ADCC chun a hril.

Mania thautui inthun a tul ding thu a hril 
CCPUR: District Hospital­a Ward haia admit damnaw hai hmun danga phurna ding Ambulance um zing sienkhawm hospital in ambulance maintenance a dingin fund iengkhawm a hmunaw leiin  Ambulance hmang nuom damnaw (patients) party han thautui an inthun a tul ding thu Dr Son Gou Kham Samte, MS/DH chun a hril. Maintenance fund umnaw lei hin District Hospital Ward­a enkawl hai ti lo Out patient  hai ta dingin service an pek theinaw niin a hril bawk.

Court­in bail in an suo
CCPUR: June 10, 2016 nia 2­J&K Light Infantry pawlin Khuangmun khuoa PLA/RPF ni dinga ringhla leia an man Phairibem Anand @ Jiten Meitei @ Nanao (42) s/o Ph. Manichao Meitei of Khuangmun Village, Sagang area chu zanikhan CCPur Police han Chief Judicial Magistrate (CJM), CCPur hmaah an inlangtir  a, CJM Court chun bail­in an suo. Phairibem Anand chunga hin CCPur Police han FIR No. 28 (6) 2016 CCP­PS U/S 20 UA (P) A. Act an registered a nih.

Mipui le motor inlawn han harsatna an tuok
CCPUR: Fur ruotui hung tla mek leiin Manipur khawpui pahnina tia hril Churachandpur District khawpui sung lampui hai chu a suksiet zuol leiin kea inlawn le motor khaltu hai ta dingin harsatna nasa tak an tlun mek. CCPur khawpui sung lampui sietna suk zuolkaitu chu Pipe le cable phumna dinga lampui sir chokhur hai hi an ni a, lampui sir chotu hai hin tha taka an vur nawk ta ngainaw leiin lampui siet hi a zuolkai a nih. CCPur Police station bul­a Tipaimukh Road le Tiddim Road insuktuona hmuna lampui cho khura um khawm tha taka vur le siemthat nawk a ninaw leiin Tipaimukh Road­a inthawk Tiddim Road hung lut le suok ding motor hai khawmin harsatna an tuok a, tulai hnai el khan Diesel Auto pakhat eksiden in a lo inletthlu ta nghe nghe a nih.

Chun, tulai fur ruotui hung tlak leiin lampui inkhurna haia tuihawk an tling rawn leiin motor khaltu han lampuia ke a inlawn hai chilper ding veng puma motor an khal seng nuom a um.

June 22­ah Union Cabinet sawidanglam beisei a nih; 
UP le Uttarakhand han minister an chang rawn tak el thei
NEW DELHI: Union Cabinet chu June 22, 2016 khin sawidanglamna a um beisei a nih. Ramdanga inzin mek President Pranab Mukherjee chu June 18, 2016 khin New Delhi hungtlung a ta, June 21, 2016 in International Yoga Day hmang ning a ta, June 23, 2016 in PM Narendra Modi chu New Delhi suoksanin ramdangah an zin nawk ding a ni leiin Union Cabinet sawidanglamna hi June 18­22, 2016 inkar sunga nei a ni el thei tiin BJP tiengpang thusuok chun a hril. Union Cabinet sawidanglam zo hin BJP sunga khawm Organisational changes a um ring a nih tiin ei thu dawngna chun a hril bawk. Gujarat Assembly Election chu December, 2017 vela nei ni el theia hril a ni a, sienkhawm BJP National President Amit Shah chu Gujarat tieng fe lo dingin Delhi­ah umin President sin hi a la chelzing ding nia hril a nih.

Cabinet sawidanglam huna Finance, External Affairs, Defence le Home Minister chanvo hai chu tawkchang lovin a pangngai han an la chel pei ding nia hril a nih. Amiruokchu, minister danghai chu thlakthleng an ni el thei. PM Narendra Modi chun ministers, an sin le mawphurna zo lova a hriet hai chu banin mi thar iemanizat minister chanvo an cheltir el thei.

Assembly Election nei hnai ta hai laia Uttar Pradesh le Uttarakhand state hai chun Union Cabinet sawidanglam a ni huna hin minister chanvo an chang rawn tak el thei nia hril a nih. Kum 2017 a Assembly Election nei dinghai chu Goa, Gujarat, Himachal Pradesh, Uttar Pradesh, Punjab, Manipur le Uttarakhand hai an nih. BJP chun Assembly Election hung um dinga hin Uttar Pradesh le Uttarakhand haiah hratna chang ngei an inring a, hi lei hin hang ditsak deu an tum (BJP in) nia hril a nih.

Union Cabinet sawidanglam a ni huna minister a laklut  ni el theia hril rika um hai lai Bhagat Singh Koshiyari (Uttar Pradesh) le Rameshwar Teli (Assam) hai an thang. Minister thar dinga laklut dinghai lai hin OBC le Dalit mi inthangtir tamlem tum nia hril a nih. Chun, BJP Organisation­a khawm OBC le Dalit mihai chu a hma neka tam lem laklut tumna a um nia hril a ni bawk.

An inbiek vat ta ding
AIZAWL: Mizoram Police Service Association (MPSA) chun zanikhan Khatla, Aizawl­ah Annual Conference an nei. Hi huna khuollien Mizoram Home Minister R. Lalzirliana in thu a hrilnaa chun, Mizoram sawrkar le HPC(D) han inbiekna an nei vat ta ding niin a hril. Autonomous District Concil hran ngenna ruok chu mipui dit dan a ninaw leiin pek ni thei naw nih tiin a hril bawk.

Pasal pakhata inthawk silaimu man
IMPHAL: Indigo flight No. 6E­2002 a Kolkata pan ding passenger­hai an check huna zani 10:40AM vel khan Tulihal Airport, Imphal­a CISF duty han pasal pakaht, T. Maraiba, s/o Taruba of Maram Keithel, Senapati kuta inthawk silaimu pakhat an hmu niin ei thu dawngna chun a hril.

Army­a thang dinghai Class X passed a tul tah
IMPHAL: Army Recruitment chungchangah dan thar siem a ni a, chu dungzui chun Army (Soldier General Duty le Tradesmen) a lut theina ding chun Class­X passed a tul ta a, hi thil hin Scheduled Tribe candidate­hai khawm a huomsa vawng ta a nih tiin PIB Defence Wing, Imphal thusuok chun a hril.

Lâm thiemhai ta dingin
IMPHAL: January 15, 2017 khin Asian Broadcasting Unions (ABU) chun International Dance Festival a huoihawt ding a ni a. HI taka thang ding hin Prasar Bharati chun lam thiem (dancer & dance teacher) a dit a, hi taka thang nuom hai chun June 25, 2016 chenin hnina peklut thei a nih tiin DIPR thusuok chun a hril.

July 19, 2016 chen peklut thei
IMPHAL: Revenue Department hnuoia Revenue Inspector, Zilladar, Mandol, LDC, Driver, Lambu, Peon, Process Server le Chowkidar sin hai lakna dinga thang nuomhai chun application form chu June 20, 2016­July 9, 2016 inkar sungin DC, Imphal West district office, Lamphelpat­ah lak le peklut thei ning a tih tiin Under Secretary (Revenue), Govt. of Manipur chun inhriettirna a siem.

IMC Mayor le Dy. Mayor dingin
IMPHAL: Zanikhan Soram Sunil in IMC Mayor le Meibon Phaomei in Deputy Mayor, IMC sin chel dingin Ningthoujam Geoffrey, DC, Imphal West District hmaah sesamna an nei. Soram Sunil hi Ward No.9 a inthawka thlangtling le Meibon Phaomei hi Ward No. 26 a inthawka IMC Councilor dinga thlangtling an nih.

IPS Officer lem man
CHANDIGARH: Zanikhan Punjab Vigilance Bureau han IPS Officer nia inhril Rahul Kumar of Gurdaspur district chu Dharmshala,Kangra, Himachal Pradesh­ah anman. Mr Rahul hin SP, Vigilance Bureau sinthaw nia inhrilin government officials hai kuomah corruption thuah complaint a dawng thu hrilin pawisa a demand hlak nia hril a nih.

Assam Congress President Anjan Dutta a thi
NEW DELHI/GUWAHATI:  Assam Pradesh Congress Committee (APCC) president Anjan Dutta chu zani zingkar 7:11AM  khan AIIMS, New Delhi hmunah cardiac failure leiin a thi. Dutta hi kum 64 mi a nita a, May 18, 2016 a inthawka kha hi hospital­a admit le Department of Pulmonary sciences­a enkawl a nih. A awm na a ti leiin May 21, 2016 khan Apollo Hospital, New Delhi hmuna admit a ni a, sienkhawm a hnungin AIIMS tienga insawn le enkawl nawk a nih. Dutta hin a nuhmei le nau nuhmei 3 a thisan. December 13, 2014 a inthawka kha APCC President dinga thlangtling a nih.

IPS officer ama le ama an kaphlum pal
VISAKHAPATNAM: Andhra Pradesh­a IPS Officer K. Sashi Kumar chun zani zingkar khan Visakhapatnam­a Paderu hmuna a office­ah a service Revolver (Pistol) a sukpuok pal leiin silaimu suokin a lu takah a dengfuk leiin damzo lovin a thi. Mr Sashi Kumar hi inrang takin hospital panpui a ni a, sienkhawm doctor han an san thei tanaw a nih. A ruong hi postmortem thaw dingin King George Hospital, Visakhapatnam a thawn a nih. K. Sashi Kumar hi 2012 batch IPS officer a nih.

Thia ngai tah kum 7 hnungin a hung kir nawk
DEHRADUN/ALWAR: 66 Armoured Regiment, Dehradun a um, kum 2009 a inthawk a umna chin hriet lova inhmang le hi taka inthawk kum 3 hnunga a thia puong tah Dharamveer Singh (39) chu  tulai hnai el khan hring le damin an inah a kir nawk. Mr Dharamveer Singh le a ruol dang mi pahni (army personnel) hai chuongna motor hi Chakrata road, Dehradun hmuna a eksiden a, a ruol dang pahni hai chu a hnungin an Unit ah an in report nawk a, sienkhawm Dharamver hi nasa taka zawng a ni hnung khawma hmuzo ta lova um a nih. Hi lei hin Army chun Death certificate pea a sunghai kuoma pension an pek ta a ni nghe nghe. Motor eksiden­a hin hrietna (memory) an hmang a, chu leia ramtina invak in kut a daw a, kar hmasa khan Haridwar hmuna bike in a baw a, inrang taka hospital panpui a ni hnunga a hung harsuok chun a hrietna (memory) hi a hung nei kir nawk leia hienganga a sunghai kuoma hung kir nawk thei a nih.

Thailand PM a hung inzin
NEW DELHI: Thailand Prime Minister Prayut Chan­o­Cha chu India rama ni 3 sung cham dingin zani zantieng khan New Delhi a hungtlung. Thailand PM hin vawisun hin Prime Minister Narendra Modi inhmupui a ta, hi huna hin Defence, Security, Science and Technology tiengpang thawtlangna ding le a dang dang hai hriltlang an tih. Chun, vawisun ma hin Rashtrapati Bhawan, New Delhi hmuna official reception function neipui ni bawk a tih. India ram a cham sungin General Prayut Chan­o­Cha chun India sumdawngtu hai khawm inhmupui a tih.

Assam sawrkarin NIA kuta pekdawk a tum
GUWAHATI: Assam rama Kaziranga National park­a Samak (Rhinos) dan lova sapeltu han an kaphlum rawpna thuah state sawrkar chun investigation thawna sin National Investigation Agency (NIA) kuta pekdawk dingin state sawrkar chun hma a lak mek tiin Assam Forest minister Pramila Rani Brahma chun a hril. State sawrkar chun kum 15 liemta sunga Samak kap hlumna tlung hai suizui dingin state sawrkar chun NIA pekdawk a tum niin Ms Brahma chun a hril. Hieng laizing hin Kaziranga National park Director M. Ali chu a sin a ngaitha tia intumna leiin Forest Department in a sina inthawk a suspended.

CBI kutah an hlan tah
AIZAWL: Rangkachak tlang 52, Rs. 14.5 crore manhu vel suomna case chu CBI suizui dingin Mizoram sawrkar in CBI kutah a pek tah. Hi rangkachak suomna a hin Mizoram state puotieng mi an inrawl bakah hi case suina ding hin modern equipment nei a tul leiin hi case suizuina sin hi CBI kutah pek a hung tul a nih tiin Mizoram Home Minister R. Lalzirliana chun a hril. A hma chun hi case hi Mizoram Police Department hnuoia indin Special Investigation team in an suizui a nih. Rangkachak lakhmanga um (Gold Bars 52) hi a umna hriet a la ni nawh.

RPF jawan chawilai AK­47 inchupuitu kap hlum
PUNE: Lungril kimlo pasal kum 31 mi Suresh Premsingh Purohit of Barner, Rajasthan chun zani hmasa khan  Pune­a inthawk km. 40 vela hlana hmuna Saswad Road Railway station­ah Railway Protection Force (RPF) jawan pakhat chawilai AK­47 lakpek tuma an chupui leiin RPF han an kap hlum. Mr Suresh Premsingh hin kum 7 vel liemta khan a nuhmei a that a, hi leia jail­a intang, bail­a hung suok niin, a nuhmeiin a thisana inthawk lungril buoi niin a sunghai chun an hril.

VAWISUN THUPUI
Chuongchun, ram sukhning ruollo ei chang leiin, lawmtakin um ei tiu, chu zara chun inza le tidek pumin Pathien lawm zawngin rawng ei bawl thei ding a nih; ei Pathien hi mi kawngbohmang mei a ni sih a. ­ Hebrai 12:28­29

Editorial: Ei thaw ding makmaw chu thangruol

Manipur­a Zohnathlak MLA le minister um hai hi state hran ei ngenna le inzawm hin MLA le minister an nina haia inthawk an inban ngam ve dim maw? State hran hmuna ding hin MP, MLA le minister inban ngam an hung um a tul ding a nih. Tuta ei ngirhmuna hin chu, inban chu hril lo, state hran va thlawp le hrilmawingam khawm an um naw niin an lang. Mipuihai an thangruol a tul ang bawkin mipui aiawa thlangtlinga um hai khawm an thangruol a tul a nih. Telangana in state hran an hmu theina ding khan Telangana region­a chenghai chun harsatna chi tum tum tuor an inhuom a, an tuor ngei bawk a nih. Zohnathlakhai khawm hin state hran hmuna dingin tuor dam, chan dam le harsatna chi tum tum hai tuor ei ngam a hung tul ding a nih.

Ei thenum state Assam a khawm state hran ngen an um a, thang nasa takin an lak a, nisienlakhawm tuchen hin state hran chu anla hmu hri nawh. A hmu hnai tak Bodo han Bodoland Territorial Council an hmu hram a, an duthusam a la ninaw leiin state hran ngena kalpen pei an la umzing a nih. Bodo hai hi ei ni neka population tam, nuoitel an ni a, hienganga tam population anni bakah an hmalakna a hrat em em vei leh, tuta hiengang  ngirhmun chaua an la um chun Zohnathlak nuoi tlawmte chau hai hmalak nasat a tul dan ding chu ngaituo fet a tul ding a nih.

Kum 2011 Census dungzui in Manipur state­ah mihriem 27,21,756 ei um a, hienghai lai hin tribal nuoi 8 vel ei um a.Tribal nuoi 8 vel um hai hin  state hran ngen le Alternative Arrangement ngen ei um a. Ei thil ngenhai hi thil mei mei  ni lo a ni ding leiin thang  nasat chu a tul hle ding a nih. Manipur a Zohnathlak han state hran ei ngenna kawngah hin  thil tul chi tum tum um a tih. A bul le pawimaw tak chu thangruol le inpumkhata kalchawi a nih. Tuta ei ngirhmuna hin ei inthuruolin ei thangruol tawk am ti hi ngaituo chet chet a tul takzet a nih. Thangruolna  naw chun  ei thil ngen hin hlawtling tak tak ngai nawng ei tih. Ei thaw ding makmaw chu thangruol hi a ni tawp el a nih.

Suspension of Operation (SoO) zieka a uma inthawk kum 8 lai zet a liem hnungin India sawrkar, Manipur sawrkar, UPFle KNO palaihai chun June 15, 2016 nia Ashok Hotel, New Delhi­ah Political dialogue  hmasa tak an nei thei hi thil lawmum le ei hmasawnna pakhat a nih. Inbiekna hi a fe tluong a, sawrkar thlungpui khawm hi inbieknaa hin an hawng hle nia hril a nih. Hi inbiekna a hung fe tluong pei theina ding le ei thil ngenin ra tha tak el a hung insuo theina ding chun inthuruol hi a pawimaw tak a nih ti hi ei hriet tlat nuom a um. Inthuruolna, thangruolna le inpumkhatna ei nei thei naw chun ei thil dit hi tha hle sienkhawm ei hmu ring a um nawh. Iengpo khawm nisienla thangruol thei dinga ei lungril ei thlakthleng a tul a nih. India ram state dang dang haia khawm state hran ngenna hi a lo um ta hlak a, a hlawtling ta le la hlawtling lo tam tak an um a nih.

Hi inbiekna hin UPF le KNO chun lungruol takin India Constitution hnuoia Article 3­na dungzuia “State” hran siem le pe dingin an demand a. Statehood demand le inzawmin Joint representation an peklut thei khawm hi lawm a um. A bawzuina kawngah fimkhur le hmalak dan thiem a tul hle ding a nih. Manipur a Zohnathlak han State hran ei ngen hi ei unau danghai, a bikin Chalranghai chun tha an tinaw hle ring a um. State hran ngenna hi tha an tinaw el chau ni lovin an theitawpa dang chu an thiltum a hung ni ding a nih. Imphal Chanchinbu pakhat lem chun ‘tribal UG han Manipur thedara state hran siem an ngen’ tiin a zieklang.

Andhra Pradesh a inthawka Telangana state siem a hung nina dinga khan a thlawptu le a dodaltu an um ve ve a. Amiruokchu, Telangana state hran dita ngentu tiengpang an hrat lem leia Telangana state thar kha a hung pieng a nih. Telangana state thar hung piengna ding khan an MP­hai, an MLA­hai le an MLC­hai chu an inban ngam a nih. Inban hai sienkhawm inthlangna a hung um nawk a, an ban ngamhai bawk thlangtling nawk pei an hung ni a, kha thil kha an hratna thahrui a nih. Telangana state hran ngenna leiin mani le mani inthat hiel khawm an um a nih.




Post a Comment

Powered by Blogger.