Thilman sukpung lo dingin an ngen
CCPUR: JAC Against Anti-Tribal Bills chun zanikhan Marwari Society, Bihari Society, Bengali Society, Nepali Society le Punjabi Society hai JAC Information Centre, KKL Complex- ah kokhawmin meeting a neipui a. Economic Blockade fe mekle inzawma thil man sukpung lo dingin an ngen.

HYA GHQ in lawmthu a hril
CCPUR:  June 10, 2016 nia Tuithapui vadung-a Pu T. Khamchinkhup (26) s/o T. Laltuakmoi of Khominthang, New Lamka, CCPur  ruong zawngsuokna dinga tha le zung, sum le pai hung tuoktuhai po po chungah HYA GHQ chun lawmthu a hril. Insung khawsak ngaituona leia Pa (mushroom) a zawngna lama vangduoina tuok (L) T. Khamchinkhup chu HYA GHQ in a sun takzet a, a maksan a sung-le-kuo hai Lapa’n thlamuon-a umpui zing dingin HYA GHQ chun ditsakna an hlan.

HYA GHQ fethlenga volunteers hai thingpui man ding Rs. 2000/- petu Pu M. Gouzamang Guite, EM, ADCC le Life-Jacket in hmangtirtu Major Arun, 1-AR hai chungah HYA GHQ chun lawmthu a hril a, ruong hmu le lasuoktu Pu Zarzosang of Saikawt chunga HYA GHQ chun hming hmerin lawmthu a hril bawk. T. Khamchinkhup ruong kha June 11, 2016 zantieng 3PM vel khan hmu  a nih.

Political dialogue nei dingin Delhi an pan
CCPUR: UPF le KNO thuoituhai chun Central sawrkar le Political Dialogue nei dingin zanikhan New Delhi an pan. UPF le KNO, state le central sawrkar hai hin kum 2008 a inthawka Suspension of Operation (SoO) an lo ziek tah an nih.

Tipaimukh bielah LLIN sem ding
CCPUR:  District Malaria Department hnuoia thawktu  hai chun June 15, 2016 a inthawk khin Tipaimukh biel sunga Senvawn PHC le Parbung PHC huomsunga khuo le veng tum tumah damdawi inchiesa Thosilen semna (LLIN) distribution nei an tih. LLIN semnaa hin  S. Thangthianmuan, DPO /Consultant; Ruolchunghnung, MHW/ Senvawn; S. Thanzalal, MPW/Leisen le Remruotsang, MPW/Pherzawl hai khawm thang an tih.

Pre¬paid box 9150 activate tah
CCPUR: Manipur State Power Distribution Company Ltd (MSPDCPL) chun June 11, 2016 chen khan electric pre-paid meter box 12400 an inbuk ta a, hi laia 9150 chu an activate tah.

Titanic Lawng intawlna lampui tuipuia inzin ding Lawng-ah Hmar nunghak
CCPUR:  Khawvela  Lawng lien, Titanic tia hrietlar , vur tlang a sutfuk leia kum 1912 April 14 zan dar 11:40 vela pil hmang tah in a hrawna tuipui zuia inzin suok ding Crystal Serenity Lawng a chun  Hmar nunghak Nk Cross Varmawi Buongpui d/o Pu L Buongpui of Rengkai, CCPur chu staff pakhat angin a chuong ve ding a nih. Crystal Serenity lawng hi Mr Elgir Giske Captain nina hnuoiah August 16, 2016 khin Anchorage USA a inthawk suok a ta, September 17, 2016 in New York a tlung hman dinga riruong a nih.

Crystal Serenity lawng hi ft. 820 a sei, sawng 13 nei, a sunga Movie theaters, Restaurants 6, khuolzinmi 3000 zet phur theina dinga Cyrstal Cruise company in special taka an siem a ni a; amiruokchu, passenger hai inhawi taka an inzin theina dingin tutum hin mi 1700 chau an chuong ding a riruong a nih. Titanic lawng lo inzinna (route) a hin khuolzin lawng tam tak an lo inzin ta a, sienkhawm tuta Crystal Serenity anga Lawng lien hi a lan zin nawk naw a nih. Hi lawng chuongman hi room pangngai dollar 22000 le Deluxe Penthouse dollar 120000 a ni a, online in chawlkar thum sungin ticket hi zawr fai vawng a nih.

Ni 32 an inzin sung hin escort-tu dingin (RRS Ernest Shackleton Operated by BAS and ICE 05 classed Ice breaker) hmang ning a ta, RRS hin operational support a pek ding bakah RRS hi Helicopter 2 emergency support le flightseeing activities a dingin phursa ning a tih. Hi baka hin Ice navigation, Communication equipment dang dang, Ice search light pahni, high resolution radar le a tul dang dang install a ni bawk.

An inzinna ding hi very high risk a ni leiin khawvel mihriem hai ngaiven a hlaw hle a nih. Nk. Cross Varmawi hi kum 2006 a inthawk Cruise line a lo thawk ta hrim niin, Crystal cruiseline-a  head office a inthawk official hung han interview hran hran an thaw hnunga hi lawnga thawktu anga chuong ve dinga an thlang ve a nih. (ElàrEs)

Dist. level Sensitization Workshop
CCPUR:  June 15, 2016, 10:45AM khin EBC Dorcas Jubilee Guest House-a Mini Auditorium-ah State Level Banker Committee (SLBC) hnuoia Sub Committee of SLBC on Self Help Group and JLG le NABARD/CCPur huoihawtnain Dist. Level Sensitisation Workshop on SHG and JLGs for Bankers and Select NGOs um a tih. Workshop hi N. Hauzel, LDM/CCPur in hawng ata, Simon L. Hrangchal, Secy. Relief and Devpt. Department; Holkhomang Haokip, CF RAS Tuibuong hai resource person in thang an ta, Credit linkages le JLGs thuah discussion um bawk a tih.

Life/Patron member ni nuom hai ta dingin
CCPUR: Hmar tawnga nitin chanchinbu Hmasawnna Thar chu October, 2016 khin kum 32 a tling ta ding a ni a, hi le inzawm hin National standard size in phek 4-a insuo tan tum a ni a, sum tam tak mamaw a ni leiin Chanchinbu hmasawn peina dinga thahnemngai Life Member/Patron member ni nuom hai ta dingin kawt hawng zing a nih.

Hmasawnna Thar suklien tumna le inzawm hin June 12, 2016 zantieng khan Editor chengnain, Lighthouse Lane, CCPur-ah Chanchinbu ta dinga thahnemngai thenkhat hai inhmukhawmin Managing Board siem a ni a, Chairman dingin Pu Lalramsiem Zote; Secretary in Tv. LRS Puruolte hai ruot an ni a, Members in- Tv. Lalsansuok Pulamte; Pu Joseph Joute; Tv. Lalthanzau; Pu Lalruotlian Duhlian; Pu Lalmalsawm Sellate le Pu Roding L. Sellate hai ruot an nih.

Yairipok-ah Counter Blockade
IMPHAL:  Zani zingkara inthawk khan Yairipok Bazar-ah phaimi han Counter blockade an thaw tan. Ukhrul district a Kasom Khullen le Phungyar area sung haia nitin mamaw, thuomhnaw le hmangruo chi hran hran motor-a phurlut dinghai chu Counter blockade volunteers han an dang tlat. Police han an hmu zinga chu an en liem mei mei niin ei thu dawngna chun a hril. Chun, Counter blockade hi Swombung le Chingarel area haiah khawm thaw a nih. Imphal a inthawka Ukhrul road-a thil phur ding hai hrim hrim Counter blockade Volunters han an dang.

Manipur HC CJ tharin Ranjan Prasad
IMPHAL: Manipur High Court Chief Justice thar dingin hi High Court-a Judge-hai laia a senior tak Justice Rakesh Ranjan Prasad ruot a nih. Justice Rakesh Ranjan Prasad hin a sin thar hi June 10, 2016 a inthawk khan a lo chel tan tah. Hi High Court Chief Justice hmasa Justice Laxmi Kanta Mohapatra chu June 9, 2016 khan a sina inthawk a lo pension ta a nih.

KSA Volunteer-hai insuo
IMPHAL:  Kangleipak Student’s Association (KSA) General Secretary Sukham Bidyananda thangsaa KSA Volunteers 5 Police han anman le lungina khum hai chu zanikhan insuo anni tah. Hieng mi 5 hai hi May 27, 2016 a kha Vai dawrkai pahni an sukbuoi tia intum leia Police han an man a nih. KSA volunteer-hai chun Machi a thil dang chawkpawl leia vai dawr pahni haia inthawk  an Machi zawr an man pek niin an hril.

Admit Card lak thei
IMPHAL: Council of Higher Secondary Education, Manipur hnuoia Class XII Improvement Examination, 2016 a dinga Admit Card chu vawisuna inthawk hin Council Office, Imphal-ah lak tan thei ni tang a tih tiin Council of Higher Secondary Education, Manipur chun zanikhan inhriettirna a siem.

1st Year Diploma Course
IMPHAL: Kum 2016-17 academic session sunga Government Polytechnic, Imphal a 1st Year Diploma Course inchuk nuom hai ta dingin ngaiven hun a nih. Application Form chu Rs. 180/- pein June 27, 2016 chenin Controller of Technical Office, Takyelpat ah lak le fillup zoin June 29, 2016 chenin peklut thei ning a tih. Admit Card June 30, 2016-July 1, 2016 chen sem ning a ta, admission thawna dinga entrance exam chu July 3, 2016 a nei ning a tih.

June 17-ah Parliamentary team
IMPHAL:  Members 31 umna Parliamentary Standing Committee on Coal and Steel chu June 17, 2016 khin Imphal hungtlung an ta, minieral exploration tienga mawphurtuhai inhmupui an tih. Hi Committee Chairperson Rakesh Singh in Parliamentary Standing Committee team hi hung inrawi a tih. Hi Comittee member-hai chu Lok Sabha MPs, A. Arunmohithevan, Kalyan Banerjee, Jyoti Dhruve, Godam Nagesh, Faggan Singh Kulaste, Shailesh Kumar, Banshilal Mahato, Devji Mansinghram Patel, Riti Pathak, Tanjit Ranjan, Dr Ravindra Kumar  Ray, Neiphiu Rio, Tamradhwaj Sahu, Tathagata Satpathy, Janardan Singh Sangriwal, Pashupati Nath Singh, Rama Kishore Singh, Sunil Kumar Singh, Sushil Kumar Singh, Krupal Balaji Tumane hai bakah Rajya Sabha MPs M.J. Akbar, Anil Anwar Ansari, Dr Pradeep Kumar Balmuchu, Md. Nadimul Haque, BK Hariprasad, Dr Satyanarayan Jatiya, Jugal Kishore, Avinash Pande, Sanjay Raut le Delip Kumar Tirkey hai an nih.

IMC Corporates han sesamna June 16-ah
IMPHAL: IMC Corporators dinga thlang thar hai chun June 16, 2016 khin Deputy Commissioner, Imphal West hmaah Corporator dingin sesamna nei an tih. Hi ni hin IMC Mayor ding puonglangna le Mayor dinga sesamna a nei ve nghal el thei. IMC seats 27 a inthlangnaa khan Congress in seats 12, BJP in seat 10 le Independent in seats 5 an lak a, Independent a thlangtling mi 3 in Congress an zawm leiin Congress seats 15 an nei tling ta a nih. Congress corporator-hai hi Congress MLA N. Lokein in Sangaiprou-ah an in camp nia hril a nih. IMC Mayor post ni nuom mi pahni an um a, chuonghai chu Keishamthong A/C a Ward No. 9 a inthawka thlangtling Soram Sunil (Kaka) le Uripok A/C sunga Ward No. 4 a inthawka thlangtling Laishram Arunkumar (Gandhi) hai niin ei thu dawngna chun a hril.

Rangkachak kg. 7 chuong leh mi 2 man
AIZAWL: June 11, 2016 khan Rangvamual, Aizawlah Central Customs, Aizawl Division han Myanmar mi, pasal pahni hai chu rangkachak tlang 46 (kg. 7.650 chuong), Rs. 2.30 crore vel manhu leh an man. rangkachak hi Myanmar a inthawka an hung phur le Vairam tienga zawr an tum niin pasal pahnihai hi an inpuong. Aizawl-Guwahati Network Bus-a an chuong laia man an nih.

Bachcha Rai ni 14 jail-a intang phawt dingin
PATNA: Bihar merit scam le inzawma mawphurtu taka intum Bachcha Rai chu Court hmaa inlangtir a ni a, Court chun ni 14 sung  Judicial custody-a la um phawt dingin a rel. Bachcha Rai hi toppers hai exam-na (centre) Vishun Roy College, Vaishali principal a nih. Iemanichen an bihmang hnunga June 11, 2016 a kha hi case suitu Special Investigation team hmaa inpe a nih. Police chun hi case-a inrawlna neia intum Bihar School Examination Board chairman hlui Lalkeshwar Prasad Singh khawm man tumin an zawng mek. Hi case-ah tuchena hin Police han mi 8 an man tah. JDU MLA hlui  le a nuhmei Usha Sinha chun hi thil thawnaa hin a thangpui nia intum a ni a, suizui mek a nih.

MiG - 27 a tla thla, pilot himin a suok
JODHPUR: Zani sun dar 11:30 vel khan Indian Air Force (IAF) vuongna MiG-27 chu a khawl buoi leiin a tla thla a, Kuri Bhagtasni housing board –a In a del a, meichawk a suok bawk, sienkhawm  mihriem thi le hliemna tuok an um nawh. Pilot khawm an kapsuok hman leiin a him. MiG-27 hi Jodhpur Air Force station-a inthawka vuongsuok a nih.

Pakistan smuggler 2 kap hlum
AMRITSAR:  Border Security Force (BSF) chun  June 11 le 12, 2016 inkar zan khan Punjab-a India  le Pakistan inrina hmuna Pakistan mi a ruk a rala dan lova sumdawngtu 2 an kap hlum a, pakhat an kap hliem. Kap hlumaum hai kuta inthawk hin Herin No. 4 kg. 15, international market rate-ah Rs. 75 crores manhu ding, 12bore rifle 1 le magazine, Pistol 2 le magazines 4, Pakistan Mobile Phone 1 le SIM Card bakah silaimu 67 an man sa niin BSF IG, Frontier, Anil Paliwal chun a hril. BSF chun tuta kum fe mek sung hin Pakistan mi vawng inruithei le thil khap dang danga sumdawngtu 6 hai chu Heroin kg. 120 velleh an man ta a nih.

Lalu Court hmaah
RANCHI: RJD Chief Lalu Prasad Yadav chu multi-crore Fodder Scam thuah zanikhan Court hmaah anlang. Ran bu ding inchawkna sum Rs. 3.31 crores zet indiklo taka laksuok a nina le inzawma inrawlna neia intum Lalu Prasad thangin mi 38 hai  hu June 2, 2016 a kha Court in June 13, 2016-a inlang dinga a ko a nih. Lalu hi thiemnaw inchangtira um le October, 2013 a kha kum 5 intang dinga a chungthu rel, tuta bail-a suok mek a nih.

President rambung 3 sir dingin an zin suok
NEW DELHI: President Pranab Mukherjee chu ni 5 sung thanga Africa rambung -Ghana, Ivory Coast le Namibia hai sir dingin June 12, 2016 khan an zinsuok.President hi Ghana khawpuia a cham mek a, zanikhan Ghana president John Mahama leh inbiekna neiin an ram pahni hai thawtlangna ding agreements 3 an ziek. Pranab Mukherjee hi India President hai laia Ghana ram inzin hmasa tak a la nih.

Cross-voting leiin JD(S) in MLA 8 a suspended
BENGALURU:  Rajya Sabha biennial election nei zo hlima Karnataka-a Rajya Sabha seat 4 haia inthlangna um huna party official candidate vote lo a Congress candidate vote an pek (cross voting) leiin JD(S) chun party a inthawka hel MLA 8 hai chu JD(S) a inthawk a suspended. JD(S) member 40 an um laiin election huna cross voting leiin an party candidate BM Farooq chun votes 33 chau a hmu a nih. Congress candidate KC Ramamurthy an vote lei hin Congress in hratna an chang pha a nih.

Hospital 5 hai fine Rs. 600 crores inchawitir
NEW DELHI: Delhi sawrkar chun private hospitals 5 hai chu inenkawl ding hai deposit tam tak an ngen hlak leiin mirethei le pasie hai an enkawl (treatment) pe nuom loa intumin July 9, 2016 chenah fine Rs. 600 crores chuong chawi dingin thu a pek. Fine chawi dinga Delhi sawrkarin a ti hai chu- Max Super Specialty Hospital (Saket), Fortis Escorts Heart Institute, Shanti Mukand Hospital, Dharamshila Cancer Hospital le Pushpawatib Singhania Research Institute hai an nih. Hieng hospital hai hi mirethei le pasie hai a thlawna enkawl dinga an intiem leia consessional rates-a ram pek an ni a, sienkhawm inremsiemna dan an bawsiet leia fine hi pe dinga an hriettir a nih. Fine an peknaw chun an chungah action lak ni dingin ei thu dawngna chun a hril.

------------------------------------------------------------------------------------------------------
VAWISUN THUPUI
Sodom le Gomorra khuohai chu anla ngaisaknaw la hung um dinghai inentirna dingin a hmang a, vuta inchangtirin, sukbohmangin thiemnaw an changtir tah a.- 2 Peter 2:6

Editorial: Tuithapui vadung hi

Churachandpur town le a se vela chenghai ta ding chun Tuithapui vadung hi vadung pawimaw takel a nih ti chu a hretu seng ei nih. Hi lei hin duot taka ei enkawl le ei vawng thienghlim a tul takzet a nih. Ei enkawl thanaw a, ei sukpawrche chun a tuortu ding le a dawk ding chu a bul hnai le a se vela cheng mipuihai ei ni ding a nih. Tuithapui vadung pawimawna le tangkaina hi ei lo ngaituo ve ngainaw a lo ni khawma tuta inthawk bek hin chu ngaipawimawna chang hre ta inla nuom a um. Pawl thenkhatin tur hmanga Nga man le hmunhnawk dehawnnaa hmang lo dingin tuolsung chanchinbu haiah khapna thupek siem hlak hai sienkhawm an zanaw, a bawsetu le namnultu ei la um zing hi a pawi hle. Khapna thusuok bawsetuhai chungah hin hremna khau le na tak pek a ni ngainaw leia khapna thupek insuo a um hi namnul le zawm lova um niin anlang. Hi lei hin khapna thupek bawsetuhai chungah hin hremna khau tak pek ni ta sienla chu khapna thupek insuoa um hai hin inza le zui a hlaw deu ring a um.

Ei rama vadunghai hi vawng thienghlim naw chun a turotu le a chaw ding chu a rama cheng mipuihai tho ei ni ding a nih. Thing le ruo duotna chang ei hriet naw leiin tui hnar ei sukchat vawng a, tui dawn ding le hmang ding thuah khawm harsatna nasa tak ei tuok pha ta a nih. Churachandpur town sunga cheng, ni danga tui inchaw der lova khawsa thei hai khan thal huna chun tui ei inchawk sup sup el ta a nih. Tuithapui vadung chau ni lovin tlangrama ei vadunghai khawm duot taka ei enkawl an tul. Dawn le hmang ding chau ni lovin ei hme ding le ei fak zawngna anni leiin tur annawleh damdawi hrat chi hmanga Nga le Ai man hi chu sim hmak ding a nih.

Tur le damdawi chi tum tum hmanga Nga ei man leiin ei vadung tuia cheng Nga, chengkawl, Ai le a dang dang hai chu ei that nasa taluo leiin man ding an vang ta hle. Hienga ei che pei chun ei vadunga Nga, Ai, Chengkawl le a dang dang hai hi a hung insieng nawk ding khawm um lovin ei suot ram vawng ding a nih. Ei chet dan hi suonmawng rorel an hril ang el ni takin an lang. Tur le damdawi hmanga Nga man ei bansan naw chun vadung tuia cheng hme ding inhnik, taksa hriselna dinga pawimaw em em el hai hi ei la chan vawng el ding a nih. Chu bakah ei sumdawngna le fakzawngna ei sukbo  ang a hung ni ding a nih. Pathien thilthlawnpek ropui le hlawk takel hai hi duot seng ei tiu.

India rama vadung lien, hming inthang le pawimaw em em el, Ganga vadung chu sukpawrche a ni leiin, India sawrkar chun a sukfai le a tui sukthienghlimna dingin sum cheng vaibelsie tel sengin  hma a lak mek, tuta inthawk hun sawtnawte hnunga chun Ganga vadung chu vadung thienghlim le tui thienghlim hnar a la hung ni nawk ding a nih. Hi bakah hin Ganga vadung kamhai chu cheimawi hung ning a ta, tourist spot tha tak a la hung ni bawk ding a nih. Churachandpur town le a se vela chenghai ruok chun Tuithapui vadung sukfai le a tui sukthienghlimna ding hin pawisa ei thawlawm nuom awm si nawh. Hi lei hin Tuithapui vadung hmabak hi an thim a nih ti inla ei hril suol taluo ring a um nawh.

Churachandpur town le a se vela chenghai ta dingin Tuithapui vadung hi ei fak zawngna, hme ding zawngna le in bawlna ding hmangruo ei lakna hmun a ni leiin duot taka ei enkawl le sukthienghlim a pawimaw a nih. Hi lei hin Tuithapui enkaitu ding bik hin Protection and Development Committee indin thei inla thiltha tak ning a tih. Hi Committee a hin Civil Society Organisation le sawrkar tiengpanga Department hran hrana hotuhai chu office bearers le Committee members haiah thang  ngeihai sienla chu protection le development chungthuah umzie tha tak a hung nei ngei ring a um. Tuithapui vadung hi a enkaitu ding bik pawl a um naw chun vadung pawrche le hmangtlak lo a la hung ni ding a nih.

Ei tui dawn tak, insilna le insawpfaina taka ei hmang Tuithapui vadung hi tutak hin chu hmunhnawk dehawnnaa ei hmang a ni tah. Hi hi thil pawi takel, ei lan sirna ding a ni leiin a hun lai hin a enkaitu ding pawl, makmawa ei indin ngei ngei nuom a um. Mipuihai hi a neitu seng ei ni a, a neitu, a chawngpu le a sawr tangkaitu seng ei ni ang bawkin a enkai le vengna kawngah khawm a mawphurtu seng ei nih. Ei ni, a neitu han ei thaw naw chun hmun danga mihai hungin Tuithapui vadung enkaina sin hi hung thaw der naw nihai. Ei mawphurna hi ei thaw naw chun hun la hung um pei dinga ei thalaihai chun thiemnaw an mi la hung inchangtir ngei ring a um.



Post a Comment

Powered by Blogger.