~ Rev. Mansang Songate

“Thu ka pek popo cheu kha pawm dingin inchuktir ro; chun, ngai ta u, kei kumkhuoin , khawvel tawp chen khawmin in kuomah um pei ka tih a ta. Amen” (Math 28:20)

Pathien hminga thilmak thaw le thil ropui taktak thaw hi ka ngaituo chet chet a, chuong beka lo harsa ding ani naw tawp el! A awlsamna san pahni hang hril inla. Pakhatna ah Pathien thupek ani leiin awi le ring el ding a nih. A pahnina ah, Pathien thaw dingah buoi lovin mani thawding chau kha thaw el ding alo nih! David Roper chun “Just do your part and He’ll do His” (I chan ding thaw la Ama’n a chan ding thaw el a tih). Nang le kei ei buoi rawpna hlak chu Pathien chan ah hin ani hlak. Mani chan ding buoipui lovin Pathien chan ding ei buoipui rawp hlak hi ei buoina le thil ei thaw thei nawna a nih. Entirna dingin­ ‘Tawngtai pek lang dam a ti’m aw’ ti dam, ‘hni lang hmung ka tim aw’ ti dam, ‘Tawngtai pek lang, a damnaw chun aw’ ti dam, ‘Ei hni a chu ei hmu ngai tak tak am aw?’ ti dam in ami sukbuoi hlak  a nih. Nang le kei a chan chu ‘Hni, tawngtai a, a thupek zawm, awi le zui’ chau kha   a nih. A result dinghai, ‘damna, thilpek, thilmak popo kha’ Pathien chan a nih. Pathien Bible thu thangsanin ring pumin ei hni ding a nih. Ring puma hni kha ei mawphurna ana, a dawnna kha Pathien chan ani lem. Lazar kha ei khuoa thi nisien a dam suok naw el thei! Isu’n “thlan lung kha dawm tawl ro”, a ti khan chier mur mur ei ta, a thini, a darkar le kuonga thun lai hun chen kha inzawt ei ta, Ui hmur vuok ang el ding ei nih! Ei thawthei tawk thaw le thu awi hi harsa ei ti em em. Pathien thilmak thaw hi hang hmu ding ziezang ei ni nawh. Chuleiin, I chan ding ho deu te kha ringum tak le feltakin thaw la, Pathienin a thawding chu nang a nekin a hriet lem dai! Ei tawngtaina dawn lova tamtak a umna san le thilmak ei ni lai ei dawng tlawmna tak chu “Pathien thupek” ei zawm tawk naw lei a nih. Pathien thu hi ei lawma, ei ngai nuom a, ei hril pei bawk a, inhman hun povah titi na takin ei hmang hlak a, a zawm ruok chu ei zawmnaw hulhuol a nih. Hi lei tak hin Thlarau thienghlimin eini lai sin a thaw theinaw a nih.
    
Mosie le David kha! Pathienin thlalera Israelhai dangchar beidawng sukchatna dingin Mosie kha Lung an vuoktir el a nih. Kha Lung vuok kha Israel lai patling nuoi ruk (lakh 6) khan an vuok thei seng. Tiemsa ve lo nuhmei le naupang nuoi sawmpahni neka tamhai khawm khan Lung kha an vuok thei seng! Mosie kha tir in a uma, tira a umna kha a pawm a, thu a awi a, a va vuok el a nih. Zuk inlak lienna ding le inti theina ding khawm iengkhawm a um nawh! Mi popo thawthei a thaw ve el a nih. Pathien thu a awi leiin Pathienin a thaw ding a hung thaw ve kha thilmak ani el a nih. Lung sunga tui lo sie kha an tak tak a nih a. Chuleiin, Pathienin a chan in a siem lem ani kha. Pathien chan ah lo buoi ta naw! Pathien chan inthlengpui tum ta ngai naw rawh! Mosie khan lung a vuok hma in ‘Tui hung put naw pal sien aw?’ ti dam ngaituo sien. “Tui a um tak tak ngut dim aw?” tiin lo nervous sien chu a hlawsam ding a nih. Pathien thupek ringhlel lo kha ‘thilmak’ dawngna a nih. David le a Saihli (sling) kha leh? Goliath hang that el nading chun ringzo ava um naw char char de! Vate perna dinga tha tawk chau an naw? David khan a Saihli le lungte panga am a ring­ Pathien? David in Goliath a vauna hang en ei tih “Nang chu kawlhnam dam, fei dam, phaw dam chawiin I hung inthawk a. Kei chu sipaihai LALPA Israel sipaihai PATHIEN, I cho hmingin ka hung inthawk lem a nih” (1Sam 17:45) a tih. A thu hi tha tel tel a nih! David khan a ‘Saihli’ (sling) kha a samsa der nawh! Lungte pangahai khawm kha a hrilsa der nawh! Thilmak tak a nih! Pathien hming in a do ringawt el a nih. Pathien ring pumin Pathien hming ngeiin a fe a, Pathien in a Saihli te kha alo hmang el a nih! Lungte panga a ruta chu pakhat chau a hmang hman! Lungte kha a rut rawn taluo hman hman a nih! A hne tawp el a nih! Pathien hnung ei zuina ahin ei thawding le Ama thawding thethawp ei thiem chun ei hlawtling pei ding a nih. Tul lo baksaka lungngaina le beidawngna (anxiety) hai ei fihlim thei bawk ding a nih. Pathien hi ei ring ding ang tawkin ring inla chu ei va vangnei awm char char de! Ringtu ni man a um hle ding a nih. Tukhawm ‘hnungtawl’ nuom um naw ma ni!
    
Isu hun laia hai: Jaira naunu dam dan khawm hi a ho ang reng! Isu tawngbau a awi a, a fe nal nal a, a lo dam el chu a nih! “Thu chau hril rawh, dam el a tih” ati a nih. Jaira khan lampui ah a felai ringhlel thut el ta sien la le! La hung kirnawk sien chu a naunu kha damnaw tawp a tih! A hringna buoi a ta, a naunu chan pha bawk a tih! Eini rawi damnaw le chu an thlau hle el. Doctor hming ei hriet popo ei hrut kim vawng a, a hme tekem ding le a maru marang dingin ei tawngtai tawk hlak!Damsuok dinga ei ringnaw pha leh, beidawng tawpkhawk ah; pastor tawngtai dingin ei ko hlak! Dampui ei tih ti inlau a um bak el! Kum 38 Zengpa kha eini rawi ka hang in ni sin tir a, ei va tho awm naw char char de! “I pienghma a damnaw a zal kan ta hi I hriet naw?”, “Tho thei lang, hilai hmun ah hin iem ka hung zalpui ding?” ti’ng ei ta, ei ha rawt ei ta, Isu tawngbau damna kha ei thipui lem ding a nih! Ringna le thu awina an kawp tlat hlak a nih. Pentecost nia Peter thuhril kha hang en sin ta u! Ieng bek an nawh. Ei nupui ruol in kha neka nasa khan an hlap thei vawng! Amiruokchu, ‘hlap thei le hlap hring’ kha a danglam tlat! Chu nek hmanin Pathien thupek ang chara hril kha a pawimaw nawk zuol. Peter khan Pathien thupek a nghak a, a awi a, thi ngamin huoisen takin a hril leiin Thlarau thienghlim a hung tlunga, damna a hung sawm sa ani kha. Hmur pilip le dangnal lei ni lovin, Pathien, aring a, a thu a awi leiin thilthawtheina in azui a nih. Bible a entirna ding tamtak hai ei hril seng nawh. Tulai hun chena khawm Pathien ringtuhai chun ‘thilmak’ an la hmu zinga, a ring mumal raklo hai chun iengkhawm an hmu belsa bawk nawh. Pathien ringzona ding le beltlak a nina intempui phaklo ringtu ei tam emem leiin ei tisa mi a, hma ei siel a, ei depde a, ei vangduoi hle a nih. Bu tehlem hring dup angin ei to hring dup ringawt el a nih!
    
Chuleiin, Pathien rongbawlna ah thil Pahni (2) inthe theilo a um a, chuonghai chu­(i) Ringtlak Pathien, a thaw ding thaw hlak le (ii) A hnung zuitu ringum hai inkawp tlat hi an nih. Hieng pahnihai (partners) hi inthuruol taka rawng an bawl kawp chun iengkhawmin a hne thei nawh a, a dang thei bawk nawh a, mi hai tadinga malsawmna, damna, inremna, hmangaina in ra tirtu an ni hlak. Chuleiin, Pathienin thil khirkhan tak le harsatak, ei thawtheinaw ding thaw dingin ami ko nawh a, mi popo thawthei awlsam taluo ringawt thaw dingin ami ko ani lem. Ditsakna lei chauin, nang le kei iengkhawm nilo kha ‘thilthawtheina’ nei dingin ami ko tawp el a nih. Chuleiin, ei chan dinga ruothai thaw naw pal ei tih ti inlau a um hle a nih. Amiruokchu, mani thawding chin hriet fie le Ami tirtu thawding chin hriet fie le chieng a ngai. Chuleiin, unau, I thawding kha taima takin, thu awi takin, lawm pumin thawpei raw khai. Thilthawtheina le Thilmakin zui pei a che! Amen.

HT/Sunday Sermon, June 12, 2016




Post a Comment

Powered by Blogger.