CCpur, May 12, 2016 (VIRTHLI): Vawisun May 12, 2016 dar 10:30AM khan District Hospital, Churachanpur-ah International Nurses Day le inzawmin Bethesda School of Nursing (BSN), Muolvaiphei chun “Blood Connects Us All” ti thupuia hmangin Blood Donation Camp a huoihawt. Hi huna hin Rev. Lalneikhup Hmar, Secy., Finance, ICI le Adviser, BSN chun thisen pe dinga fekhawm BSN a Nurse inchuklaihai chu tawngtaipekna a nei a. A thuhrilna a chun anni hun laia thisen pe hlak hai chu thi dinga an lo ring hlak thu, a lo ninawzie le ama ngei khawma vawihni lai thisen a lo pek tah thu hai hril.

Hi Blood Donation camp a hin BSN a inchuklaihai le staff mi 43 ha’n an thisen hai phal takin an pek a nih.


Hi huna hin Blood Bank In-charge, Dr. Paulunmang Vaiphei chun hieng ang BSN in thisen mamaw le damnawhai ta dinga Blood Donation Camp a huoihawt chu lawmum a ti thu hrilin, inchuklai nurse hai chu damnawhai enkawlna sin chau thaw lova , an thisen hai chen pek an inhuom chu inpakum a ti thu le entawnthlak anni thu ursun takin a hril .

International Nurses Day hi kumtin khawvel huopin May 12 hin hmang hlak ani a. Kum 1820, May ni 12 a pieng, Nurse ropui Florence Nightangale piengchampha ni a inser hlak a nih. Tukum 2016 a International Nurses Day thupui chu, ‘Nurses: A Force for Change:Improving Health System Resilence’ ti a nih.’

BSN chun International Nurses Day hi kum tin BSN Campus ah hai hmang hlak sien khawm, tukum ruok chu damnawhai ta dingin Blood Donation Camp a huoihawt lem a nih. BSN thuoituhai chun hiengang hi a vawikhatna ani thu le hmatieng peia khawm huoihawt pei an nuom thu an hril.

Photos: Muona Infimate , Virthli

Post a Comment

Powered by Blogger.