Responsive Ad Slot

Hmasawnna Thar | 12 May, 2016

Thursday, May 12, 2016

/ Published by VIRTHLI
One Day Literary Programme nei
CCPUR: Zani 10:00AM khan Sahitya Akademi North­East Centre for Oral Literature (NECOL) huoihawtnain EBC Dorcas Jubilee Guest House, Dorcas Hall, New Lamka, CCPur­ah Contribution of Oral Literature of Tribes to the Development of the Contemporary Literature of Hmar, Paite, Tangkhul le Thadou­Kuki thuah One Day Literary Program hmang a nih. Hi huna hin Prof. Boikho Thadou & NT. Haokip, Ruoivel Pangamte, Secretary, Hmar Literature Society le Chinkhokam Hangshing, President, Paite Literature Society (PLS) han paper an present.



Prof. Boikho Thadou chun, ieng ieng society literature khawm oral literature a intan a ni thu hrilin sawrkar a inthawk Tribal hai literature promote­na ding fund mamaw tawk a um naw leiin writer tam takin lekhabu an publish thei naw a nih tiin a hril a, tuhin NECOL hmalaknain writer tam tak an hung suok  beisei a nih tiin a hril.

NT Haokip chun, Thadou Literature suk hmasawnna dingin Thadou folklore le a dang dang English­a inlet a pawimaw thu a hril.

Ruoivel Pangamte chun, Hmar han Kristien sakhuo an zui a inthawk tienlai pi le pu thu le hla tam tak  Kristienna leh inrem/inhme lova ngai leiin an lo hnawl thu, sienkhawm khawvel in hma a hung sawn pei dungzuiin tienlai huna thu le hla hai pawimawna le hlutna an hung hriet thar ta pei a nih tiin a hril. Paper presentation zo in hi huna thang han hriltlangna hun an hmang bawk.

Electric in mi 2 a man hliem, 1 a thi
CCPUR:May 10, 2016 zantieng 3:30PM vel khan Bukpi area le Vaipheimual area laia electric siema sinthaw Soikhochinthang (32) s/o Manvom of Sainoujang le a ruolpa Sangmuan (18) s/o Tungkholian of Sainoujang hai chu Vaipheimual, Thanlon Sub­Division­ah electric an siem laiin a man a, an pahni hin Thanlon khuoa BRTF Doctor hai panpui an ni a, sienkhawm Sangmuan hi zan dar 5:30 velin damzo lovin a thi a, zanikhan Thanlon Police le doctor han a ruong post­mortem thaw dingin Sainoujang an pan. Soikhochinthang hi zani zing dar 8:00 vel khan District Hospital, CCPur hung phurtlung a nih.



Ei thu dawngnain a hril danin electric hin Soikhochinthang a man hmasa a, chu huna a ruolpa Sangmuan hin va sansuok a tumnaah electric in a man ve nia hril a nih. An pahni hin Indo Power Company hnuoia Thanlon area­a electric siemnaa inhlaw an nih. Soikhochinthang hi a kut, awm le a lu hai a hliem a, a ke khawm na a ti sa bawk.

Inthuruol taka Martyrs’ Day hmang seng dingin
CCPUR: Hmar Inpui (HI) General Headquarters chun May 11, 2016 khan thusuok siemin, May 16 Hmar Martyrs’ Day a tum 26­na hi inthuruol tak le hlawtling taka hmang seng dingin hmuntina um Hmarnau hai ditsakna an hlan. HI Executive Committee Sitting No. 2 Resolution 2(a) dungzuiin Village Authority Chairman/Co­Ordination Committee inrawina hnuoia Hmar Martyrs’ Day, 2016 hi khawtin le biel tina mani remchang ang peia lo inser dingin an hriettir nawn nawk a, hi le prog. hmangna report Hmar Inpui GHQ Office/email: hmarinpui@yahoo.com ah  kim taka pelut dingin an hriettir bawk. Khawtin le biel tin ti hin Hmar Inpui Gen. Hqrts innghatna Tuithaphai biel ruok chu huomsa naw ni a, Tuithaphai biela chun HMARTOB huoihawtnain Saikawt playground­ah hmang ning a ta, hi huna hin Imphal laia mi hai khawm hung thang an tih.

Martyrs Day May 16 a hmang ding sukbuoi thei zawnga hmalakna le program tukhawma siem lo dingin Hmar Inpui chun a ngen bakah Martyrs’ Day huna hmang dinga siem Flag tar seng dinga ngenin hnam ta dinga hringna lo inhlan ta hai mani thei ang tawka inzana suklang dingin LRS Puruolte, Jt. Secy. (Inf. & Media), HI GHQ in thusuok a siema chun an ziek.

HSA in an lawmpui
CCPUR: HSA CCPur Jt. Hqrts. chun, Manipur State Power Distribution Corporation Limited hnuoia Dy. General Manager ni lai  Pu Er. B. Lalneisang Saiate s/o C.N. Vunga General Manager (Commerce)­a a kaisang anlawmpui thu an puong.

ACIO­ II hmu thar
CCPUR/NEW DELHI: Tv. Darrolal Darngawn s/o Dardinglien Darngawn of CCPur chu Ministry of Home Affairs hnuoiah Assistant Central Intelligence Officer, Grade­II/ Executive (ACIO­II) sin an ziek tling.  Medical report a pek zoah May 30, 2016 khin training a neinghal ding niin ei thu dawngna chun a hril. Tv. Darrolal Darngawn hi UPSC huoihawtna hnuoia Combined Defence Services (CDS) exam a khawm written­ah hlawtling in Service Selection Board (SSB) hmaa interview hmasuon mek niin ei thu thu dawngna chun a hril. A hlawtlingna ei lawmpui hle a, interview khawm a paltlang ngei ei ditsak. (Virthli).

Naupang pakhat motor in a baw hliem
CCPUR: Mr Letkhosei (4) s/o Helmang of T. Kananphai, Sielmat Christian Hr. Sec. School­a KG­I inchuklai chu, school a fe lai mekin Bijang leilak bul lai Teddim Road­ah Honda Activa in a baw a, a lu­ah natakin a hliem. Inrang takin District Hospital panpui a ni a,sienkhawm a hliem inrik leiin Doctor han Imphal tieng panpui dingin an referred.

Relief material SDO/BDO dinga released
CCPUR: Churachandpur district­a thli, ruo le riel leia harsatna tuortu hai thangpuina ding relief material chu SDO/BDOs hai kuomah an semdawk dinga released a nita thu DC/CCPur and Chairman, Disaster Management Committee chun a hril.

Singngat Vision 2020 in May, 2016 sunga Singngat khuoa SDO/BDO Singngat Office in function tir dinga ngenna an siem le inzawmin DC, CCPur chun SDO/BDO kuomah office function theina dingin re­emburse dingin Rs. 1 lakh manhu vel infrastructure lakhawm dingin an hriettir.

Barricade an hmang tan
CCPUR: Traffic Police, CCPur chun CCPur khawpui sunga One Way traffic hmangna hmun haia lampui khartanna Barricae an hmang tan. Barricade hi Teddim Road a inthawk Thangzam Road (Bus Station) lutna bulah 1, Teddim Road­a inthawk IB Road lutna bulah 2, CCPur College tuol­a Tipaimukh Road a inthawk IB Road lai 1, Police station tuol Traffic stand­ah 1 sie a ni a, No Entry lien taka ziek tar a nih. Chun, Rengkai Road lutna bul lai 1 sie a ni a, No Entry Heavy Vehicles ti an ziek.

Aids& Appliances Camp a um ding
CCPUR: People Advanced in Social Services (PASS) chun ALIMCO Outreach Centre, Guwahati hnuoiah May 23, 2016 khin Synod Hall, IB Road, CCPur­ah  Aids & Appliances Camp huoihawt an tih. Hi huna hin Ortho& Locomotors han Tricycle, Wheelchair, Crutch, Walking Stick, Elbow Crutch etc; Hearing Aid; Mitdel hai ta dingin White Cane, Tablet, DV Player, Smart Phone hnina pelut thei an tih. Hnina petu han passport thlalak 2 (4x6 size for Ortho & Locomotors only) ; Disability Certificate (xerox); Income Certitricate le Residential Certirticate pelut ding a nih. Details 7085296909/ 8732021360/ 8732846033 ah indawn thei ning a tih.

Harish Rawat in hnena a chang; 
Union Cabinet meeting in Uttarakhand a PR hlip dingin a recommend
NEW DELHI: Supreme Court chun zanikhan Uttarakhand Assembly floor test result a puong a, Uttarakhand CM a inthawka peithlak Harish Rawat chun hnena a chang. Harish Rawat in votes 61 umah votes 33 a hmu a, a khingtu BJP in votes 28 an hmu. Hi floor test result hi a thienghlimin an dik a nih tiin Attorney General, Mukul Rohatgi chun a hril. BJP chun hi thil lei hin kan party in hnungtawl pha naw nih tiin an hril. Congress chun Democracy in hnena a changna a nih tiin an hril.

Union Cabinet chun zanikhan Uttarakhand President Rule hnuoia siea um chu hlip dingin a recommends. President in zani zan, zan sawt hnung khan President Rule hlipna Order an suo ring a nih. President Rule hlip a ni charin Harish Rawat chun Uttarakhand Chief Minister sin a chel zawm nawk nghal ding a nih.

Sawrkar thlungpuiin Uttarakhand a President Rule hlip dinga thutlukna a siem chu lawmum a ti thu  Mr Harish Rawat chun a hril a. Zanita Press Conference Mr Harish Rawat in thu a hril huna, Judiciary, thlawptu MLA­hai le an party mi le sa hai kuomah lawmthu a hril. Apex Court rorel dan hin India mipuihai ringzo a hung hlaw ding a nih tiin a hril. Horse trading sting CD chungchanga CBI hmalakna khawm a thlawp pei ding thu Rawat hin a hril bawk.

Union MoS Tribal Affairs in
IMPHAL:  ILPS le inzawma Manipur Assembly in August 31, 2015 a bills 3 a pasina le inzawmin CCPur mi 9 han  thina an tuokna thuah National Commission for Scheduled Tribes  (NCST) chun Manipur sawrkar kuomah comment pe dingin an hriettir. Hi thil hi November 11, 2015 a Manipur Tribal Forum, Delhi in hi Commission­a complaint a thelut leia hung um a nih tiin PIB thusuok chun a hril. Tribal Affairs Hills and SC Development Department, Government of Manipur chun State Home Department in Magisterial Inquiry thaw dingin Order an suo a, Inquiry Officer chun JAC le tuolsung mi han magisterial Inquiry thaw an phal nawh tiin report a pek a. State sawrkar chun hi thu hi tuolsung mihai leh chingfel tumin hma a lak tiin report a hmu a nih tiin zanikhan Union Minister of state for Tribal Affairs, Mansukbhai Dhanjibhai Vasava chunziekin Rajya Sabha­ah dawnna a pek  niin PIB thusuok chun a hril.

Science Centre CCPur le Ukhrul haiah
IMPHAL: Zanikhan Science & Technology Minister T. Manga Vaiphei in NIELIT Akhampat­ah “Science Meet, 2016” a hawng. North Eastern Council (NEC) remtina le NEC sum hmangin Churachandpur le Ukhrul haiah Science Centre indin vat a ni ta ding thu T. Manga Vaiphei chun hi huna thu a hril huna a hrillang.

Dy.CM in training hall a hawng
IMPHAL: Zanikhan Dy. CM Gaikhangam in Horticulture Farm, Khonghampat hmuna bawlzo thar hlim “Farmers Training Hall” le “Training of Farmers under MIDH­2015­16” hai a hawng. Lo le huon neihai chu Organic Farming le suma inchangtir thei thlai, bu le bal hai ching uor dingin Gaikhangam chun ngenna a siem. Chun, tlangram lo nei chu a thei chinah bandan dingin a ngen tawl bawk. Hi huna hin Vungzagin VAlte, Parliamentary Secy (HSC) le W. Brajabidhu, MLA hai khawm an thang.

B.Sc (Nursing) Application form
IMPHAL: Manipur Paramedical and B.Sc. Nursing Entrance Examination, 2016 a dinga Application form chu Rs. 450/­ pekin 21­05­2016 chen khin Medical Directorate, Lamphelpat­ah lak thei ning a tih. Thu chieng lem  chu Directorate website: www.manipurhealthdirectorate.in ah hmu thei ning a tih tiin Dr O. Ibomcha Singh, Director,Health Services, Govt. of Manipur chun inhriettirna a siem.

TET, 2016 Application Form
IMPHAL: Board of Secondary Education, Manipur chun June 8, 2016 khin Teacher Eligibility Test (TET), 2016 huoihawt a tih. Hi test a thang nuomhai ta dingin Application Form May 17, 2016 a inthawk Board Office, Imphal­ah semsuok tan ning a tih. Application Form peklut theina hun nuhnung tak 31­05­2016 ning a ta, Hall ticket June 2­8, 2016 inkar sungin semsuok ning a tih tiin Secretary, Board of Secondary Education, Manipur chun inhriettirna a siem.

Additional Govt. Advocates 4 lak belsa
IMPHAL: May 10, 2016 khan High Court of Manipur a dingin Manipur sawrkar chun Additional Government Advocates 4 a lak belsa. Chuonghai chu, Advocates Rajkumar Umakanta Singh, s/o (L) Jayantakumar Singh of Khoyathong Pukhri Achouba Mapal; Athouba Khaidem s/o (L) Tomchou of Takyel Kolom Leikai, Somarjit Hawaibam, s/o Kumar Singh of Basikhong Kitna Parung le Shimraishang Yangya (35) s/o Phungsin Yangya of Paorei Village, Ukhrul District hai an nih. Kum 2 sung Probation in sin an thaw ding a nih. MPSC vite letter No. 7/7/2015 MPSC (DR) dungzuia appointment pek an nih.

A pumpuia pass percentage 76.80
AIZAWL: Zanikhan Mizoram Board of Secondary Education (MBSE) chun HSSLC Examination, 2016 result an suo. Mi 11389 an exam a, mi 8747 an pasi a, mi 214 in Compartmental an hmu a, mi 2428 an failed.  Candidate pase vawngna schols 30 le a pasi um der lona schools 6 an um a, a pumpuia pass percentage chu 76.80 niin MBSE thusuok chun a hril.

LS tiemchin um lova suktawp a nitah
NEW DELHI: April 25, 2016 a inthawka tan 16th Lok Sabha 8th Session chu inthung ding ni 2 la bakin zanikhan tiemchin um lova suktawp a nitah. Lok Sabha sitting vawi 13 nei a ni a, hi hun sung hin Insolvency and Bankruptcy Code, 2016 le Anti­Hijacking Bill thangin Bills 10 passed a nih. Lok Sabha Session hi May 13, 2016 chena nei dinga ti a ni laiin zanikhan suktawp thut a nih.

SF han ralthuom an dapdawk
JAMMU: Security Forces hai chun zanikhan Jammu and Kashmir­a Belni forest, Poonch Sector­a dappui an thawnaah Helpawl hai inbikrukna hmun an hlukhum a, AK Universal Machine Gun 1 le Drum magazine, Pistol 1, Foreign Grenades, high power radio transceivers, RPC head, Detonators,  thilpuokthei le thil dang dang dapdawkin an man.

Hieng laizing hin zanikhan Jammu & Kashmir­a Kupwara district sunga ramhnuoiah security forces le helpawlhai an inkaptuo a, inkaptuonaa hin army jawan pakhat a thi.

DMK candidate le naupa inah Rs. 2 crore dapdawk
CHENNAI: Tamil Nadu­a Karur hmuna chun Assembly Election hung um dinga DMK candidate KC Palanichamy le a naupa KCP Shivaraman hai chengna in Income Tax thuneitu han an dap hunah Rs. 2 crores zet dapdawk in an man niin zanita senior electoral official thusuok chun a hril. Election hung um ding lei hin IT officials hai chun pawisaa mipui vote inchawkna dangna dingin hmun tum tum hai an dap zing a nih.

State pathum in HC Chief Justices thar
NEW DELHI/AGARTALA: Gauhati High Court­a inthawk Justice Tinlianthang Vaiphei chu  Tripura High Court acting Chief Justice dingin a ruot bakah Chhattisgarh High Court Chief Justice, Justice Navin Sinha chu Rajasthan High Court Chief Justice thar dinga ruot a ni a; Tripura HC Chief Justice Justice Deepak Kumar Gupta chu Chhattisgarh High Court Chief Justice thar dinga ruot a nih. Justice Vaiphei (60) hin May 16, 2016 khin a zawm beisei a nih. Delhi High Court a Justice Ved Prakash Vaish chu Meghalaya tienga sawn a ni a, Madras High Court­a Justice Satish Kumar Agnihotri chu Sikkim tieng sawn a ni bawk. Chief Justices thar dinga ruot hai hin May 23, 2016 chenin an sin thar ding hai zawm dinga inhriettir an nih.

Journalist tehlem inruithei leh man
DIBRUGARH:  Itanagar, Arunachal Pradesh­a ‘The Dawnlit Post’ Chanchinbu reporter nia inhril Rahul Verma (30) s/o Hari Vinod Verma of  PN Road, Shantipara chu zani hmasa khan Police han inruithei Brown sugar grams 70 leh  Dibrugarh hmuna Rel station­ah an man. A kuta inthawk The Dawnlit Post chanchinbu hminga siem Identity Card khawm mansa a ni bawk. Police han thil umdan an suizui hunah The Dawnlit Post, Itanagar chun Mr Verma hi an chanchinbu le inzawmna a neinaw bakah I­Card khawm an peknaw niin an hril.

CRPF officer training lai ama le ama an that
GURGAON:Kadarpur­a Central Reserve Police Force (CRPF) training academy hmuna training lai mek CRPF Officer M.M. Mullah (31) chu zani zingkar 4AM vel khan an hostel room sungah ama le ama inkhaihlum saa hmu a nih. Mullah hi Karnataka­a Belgaum a cheng niin UPSC huoihawtna hnuoia Paramilitary forces tum tum haia Assistant Commandant lakna dinga Competitive Exam fethlenga nikuma kha Assistant Commandant (AC) hmu niin 47th AC course hnuoia training laimek a nih. Hiengang thil a thaw el nasan hriet a ni naw a, a batch chanpui hai chu thu indawnna nei an nih.

JeI Chief Motiur Rahman khai hlum
DHAKA: Bangladesh chun zani hmasa zanril lai khan fundamentalist Jamaat­e­Islami chief Motiur Rahman Nizami chu Dhaka Central Jail­ah a khaihlum. Kum 1971 laia Bangladesh Liberation War huna mi tam tak sukhlumna le inzawma Bangladesh Court in thi dinga a chungthu a lo rel tasa a nih. Nizami hi kum 2010 a inthawka kha jail­a intang niin, Bangladesh war crimes leia khaihluma um hai laia upa tak a ni a, Pakistan­a inthawk Bangladesh in zalenna a suol leia indo huna mi 450 chuong zet that an nina le inzawma  kum 2014 a kha thi dinga Court in a chungthu a lo rel ta a nih.

VAWISUN THUPUI
Pathien thu tin chu sukthiengin a um a, Ama ringtuhai ta ding chun ama chu phaw a nih.  ­ Thuvarhai 30:5

Editorial: Pasal tluk lo nuhmei

Union Public Service Commission (UPSC) hnuoia Civil Services Examination, 2015 result a hung suok a. Manipur a inthawk khawmin mi 7 laiin hlawtlingna an chang a, lawm a um ei ti seng ring a um. Hi result hi ei state le a mipuihai ta dinga chanchin tha le lawmum a tling a nih. Hi neka tam lem hi exam­a hin ei tling theina dingin ei state sawrkar khawmin ei thenum state sawrkar hai thaw angin Civil Services Coaching Centre hi indin/huoihawt ve sienla nuom a um hle. Vai rama IAS Coaching Centre haiah Civil services Examination (Preliminary) a tling hai po po insung khawsak harsatna leiin an zu thang thei ngai naw a, hiengang mihai ta ding hin ei state sawrkarin Coaching Centre hi ngaipawimaw ve a, an hmatienga a hawng ve hi thil tul ni tain an lang. Hiengang exam­a hlawtlingna hi ram hmasawnna sirbi pakhat a nih. Iengang mi khawm an lo hlawtling chun sawrkar le mimal khawmin sawr tangkaina ei lo nei el hlak.

India rama Competitive Exam chi tum tum um hlak haia hin pasal nekin nuhmeihai hi an thaw tha lem pei el ta niin an lang. Kum 2015 Civil Services exam a khawm nuhmei bawk topper a hung ni nawk. Kum iemanizat zet el hi exam­a hin nuhmei han topper nina an lak ta a nih. Civil services exam chau ni lovin Competitive Exam dang dang, Class X, Class XII, College le University Exam haia khawm pasal nekin nuhmeihai an thaw tha lem pei el ta a, pasal tluk lo nuhmei anni deu tak ta niin an lang. Pasal hai ta dingin chona tha takel a ni leiin pasal hai takchapa tia kampet meua thang ei lak tak tak a hun ta hle. Chona tha a ni leiin pasalhai ta dingin taimakna le tumruna nasa lem petu hung nisienla nuom a um ngei el.

In tin deuthaw a chabi pawimaw kawltu chu nuhai an nih. Hi taka inthawk hin pasal nekin nuhmeihai chu sum le pai chungchangah an ringumin sum inret le hmang an thiem lem ti chu hmu le hriet theiin a hung inlang. Pahai khawmin nuhai hi ei ringzo tawk hle ti hi thil hin a suklang. Nauhai khawmin Pahai nekin nuhai hi an nel lem a, an thil dit le mamawhai khawm hi Pahai nekin nuhai kuomah anhrilin an ngen hmasa lem hlak. Hi taka inthawk khawm hin sum le pai chungchanga chau ni lovin nelumna tiengpanga khawm Pahai nek chun Nu han nelumna an nei lem ti a suklang chieng hle.Nau han Pahai an nelnaw leiin sungkuo thenkhatah Pa le nauhai inbiek le thil pawimaw tititlangna a um ngai naw leiin sungkuoah harsatna chi tum tum a tlung hlak.

Nuhmeihai hi sumdawngna kawnga khawm pasalhai nekin an thiemin an hlawtling lem hlak. Thuthlunghlui huna inthawk ta khan nawchizawr hi an lo um der ta a nih. Pasal inzawr an um thu thuthlunghlui huna khan hriet a ni nawin anlang. Hek thei lo sumdawngna anlo hriet khawm hi kawngkhat ngaituo chun varna tak an lo nei niin an lang. Manipur a ngei khawm hin pasal sumdawng nekin nuhmei sumdawng, dawr nghak, Bazar inthung le a dang dang thaw hi nuhmei an tam lem. Thil fe dan suituhai chun dawr nghak le sumdawnghai laia 90% neka tam lem hi nuhmei niin an hril. Sawrkar sin le contractor tiengpangah khawm an duoi bik nawh. Pasal nekin nuhmeihai lai a che thei an tam lem ti a nih. International trade a khawm pasalhai nekin nuhmei an tam lem a, che khawm an che thei lem ti a ni bawk. Pasalhai tluk lo nuhmei hi an tam ta hle a nih.

Nuhmeihai hin pasalhai nekin tling le tlak hi an hau lem a, kawng iengkimah pasalhai thawthei ang chu an thaw ve thei ni takin an lang. North Pole tlung, tlanglawn, vansang tiengpang, infiemna tiengpang, politics le thawkna tiengpang haiah khawm nuhmeihai hi tluk lo rim an innam a nih. Rambung tam takah President dam, Prime Minister dam an lo um fer fur ta hlak. Tuchen khawm hin khawvel rambung hran hranah nuhmei Prime Minister ni laizing iemanizat an um mek a, India thenum Bangladesh PM ni laizing khawm hi nuhmei a nih. UNO Chairperson a khawm an lo thang ta a, chu chu Gro Harlem kha a nih.

Ram thuoitu ropui chu hril lo, Kohran le khawtlang thuoitu ropui tak tak khawm an bo bik nawh. Insung vawng uptu, pasalhai adviser chu nuhmeihai, a bikin nuhai an nih. Khawvela mi ropui le huoisena an lo hril hlak Hitler, Abraham Lincoln, Napoleon, Joe Louis, Chiang Kaishek, Bill Clinton etc. hai khawm kha thaibawi vawng nia hril an nih. Ei ni rawi khawm hi ei nuom tawl naw a chu thaibawi deu seng ei ni awm ie. Minister le sawrkar officer lien tak tak hai hi thaibawi bawia thang lem nia hril anni bawk. Nuhai an nuor annawleh an lungsen a, an intum bur ta hin chu insung a buoi el hlak. Milien le milal biek ding khawma an pasalhai nekin an nuhmeihai ei biek lungawi hmasa a, ei thil ngen ei hlawtling lem hlak. Hi thu hi khel ni der lo, thudik a ni tlat. Nuhmeihai ku hi pasal tluk lo an nih.

Don't Miss
© all rights reserved
made with by Simon L Infimate