Thli hrangin DC Office chung thangin In thahnem tak a suksiet
Thingkung tlu in electric a suksiet leiin CCPur khawpui sunga cheng han electric power an hmu nawh
CCPur: April 29, 2016, zingkar dar 1/ 2 lai vela thli, ruo le riel inthuoa a hrang sur le tlak lei khan Tuibuonga DC Office building sawng chung 2nd floor room 3 chung rangva a muthawk bakah CCPur khawpui sunga khuo tum tum haia In thahnemtawk tak a suksiet.
Zani zingkara thlihrang in thil a suksiet hi thu ei sut chena ei hriet thei hai chu Thingchom khuoah Mr Manglienpao; Mr Hangminthang; Mr Laltanthang; Zohuonmawi, Rebecca; Upa Lalkhawpau; Mr Thangrovung le Mr Hranga Infimate hai In le RPC Naupang Sunday School building hai a suksiet. HYA Thingchom Branch hmalaknain thil a suksiet hai siemthatna sin thaw a ni a, chengna tlak lo hiel khawpa In suksiet vawng ruok chu a um nawh tiin Thingchom Branch HYA a inthawk ei thu dawngna chun a hril.
Khominthang, New Lamkaah In 2, EBCC Khominthang Sunday School inchung rangva a suksiet bawk. Bieltu MDC M.Gouzamang Guite, EM chun In a suksiet hai zani zingkar khan a hmuna enfelna neiin G.Liansang s/o (late) Hauzathang’ chengna in thliin a sukseit chu thiek vawng a, bawr thar a tul ding leiin thangpuina Rs Rs.4000/ a pek bakah IAY/Rural Housing Scheme hung hmasa tak hnuoia scheme pakhat pek dingin a tiem.
YPA Khominthang Unit le Khominthang VDC member hai EM hin meeting a neipui a, G. Liansang In bawlzo a ni hma po SSA Residential School room 1a lo hluo phawt dingin an rel a. Sunday School chung thli in a suksiet chu YPA Khominthang inrawinain zanikhan an siemtha a, M. Gouzamang in thingpui man dingin Rs. 200 a pek.
Tuibuong Areaa khawm Lamthang Haokip, Inao Meitei, Letkhothang, Thagneivah hai In thlihrang in a su ksiet bakah Thangkholun Haokip, ECA Singhlup Biekin, Lamnu Mate, Tongchon le L. Paominthang Haokip hai dai (fencing ) a suksiet bawk.
Hieng hai baka hin hmun dang danga khawm thingkung a mut thluk bakah Electric a suksiet leiin zanikhan CCPur district/khawpui sung chun electric meivar a hmu nawh. Ei thu dawngnain a hril danin Khengjang Power SubStation le CCPur khawpui inkar hmun tam takah thingkung tluin Electric a suksiet a; Electricty Department chun electric sietna hai zawngsuokin zanikhan siemthatna sin nasa takin an thaw. Thingkung tluin a suksiet lei hin Khengjang a inthawk khawpui sunga electric power hung pekna IB Feeder le Singngat feeder haiah power a hung pek theinaw niin Department official hai chun an hril.
Hearing Assessment Camp
CCPur: April 30, 2016, 10:00AM hin Thangzam Road, Laitui Medico saka Inclusive Education for Disabled (IED)SSA/CCPur Resource Centreah Hearing Assessment Camp um a tih. Hi huna hin naupang kum 18 le a hnuoitieng, hrietna (hearing) tiengpanga harsatna nei hai thang thei an ta, Hearing Aid khawm sem ni nghal dingin ei thu dawngna chun a hril.
HIV/AIDS Awareness nei
CCPur: Zani 11:00AM khan District AIDS Prevention and Control Unit/CCPur huoihawtnaian Sielmat Christian Hospital and Research Centreah HIV/AIDS Awareness campaign nei a nih. Hi h una hin Dr Phirthanglien, DAO, CCpur chun welcome address a hril a, T. Benjamin, DIS le M. Liansonmang, PAcumM & E Assistant, DAPCU in Basic of Conselling le Reporting and Documentation (SIMS) thua Private Hospital le FICTC (24x7) hnuoia Nurses le Counsellor hai inchuktirna a nei a; M. Liansonmang chun SIMS (Strategic Information and Management System) hmanga report pek dan slide le projector hmangin an entir.
PTC CWC meeting nei
CCPur: Zani 11:00AM khan PTC Central Working Committee (CWC) meeting PTC GHQ Office, Hiangtam Lamka hmuna nei a nih.Hi huna hin PTC CWC a Vice President (L) M. Ginzapau, ExMDC, April 23, 2016 nia motor eksidena thi sunna hun hmang a ni a, hi zo hin PTC GHQ thuoitu Mizorama inzin han an inzinna report an pek a, Mizoram PTC HQ term April, 2016 a tawp ta ding chu thla 3 sunga dinga la keisei le August, 2015 a election nei dingin an rel.
Motor inru pasal pakhat man
CCPur: April 28, 2016 zan khan Pu Lalditsang, MDC motor Vespa chu a chengna Sielmat Christian Hospital compound sunga inthawk inruk hmang a ni a, motor hi zanikhan Tuibuong a motor Workshop pakhata inthawk hmukir nawk le an rutu Tongminlien s/o Tongkholun of Behiang nia inhril chu man a nih. Motor inrutu hi zilna pek a ni zovin insuo nawk a nih. Motor Workshop neitu felna zara motor hi hmukir nawk le an rutu hi man theia um a nih.
NE Foodbanking
CCPur: Ms Mannuamching, IAS, CEO/ADCC chun SEDO Office, Sumkong Kaimun, Tuibuongah North East Foodbanking Network hawng a tih. Hi huna hin Khamlianlal, Founder & Director, Northeast Food Banking Network in keynote address hril a ta, N.Sukajit, Project Manager, NERCORMP/CCPur in Volunteer TShirt hawng a ta, Rev Hangminthang, Bishop MELC in Northeast Food Banking Network staff hai tawngtaipekna nei a tih.
AMWTSCPC in meeting
CCPur: All Manipur Written Test Successful Candidate of Police Constable (AMWTSCPC) Male 2013 CCPur district inrawinain zani 11:30AM khan Tuibuong Community hall –ah member han joint meeting an nei. Hi huna hin AMWTSCPC thuoituhai le sawrkar inbiekna report pek a nih. Sawrkar le an inbiekna dungzui hin May 2016 1st week or 2nd week a Viva Voce la thaw lo hai zo fel ding, June 2016 1st week/ 2nd week a 2013 batch result insuo ding le 2013 batch result puong a ni hma new recruitment thaw lo ding ti a nih.
Jetwings Written examah mi 225 an thang
CCPur: Jetwings, Guwahati in Diploma in Combined Crew Management & Airport Operation (DCMAO) le Diploma in Hospitality & Tourism Management (DHTM) kum 1 sung training ding CCPur districta inthawk mi 12 lak a tumna le inzawma written test exam chu zani 11:00AM khan Jetwings, Guwahati huoihawtnain Greenwood Academy, Tuibuongah nei a nih. Written exama hin candidates 225 an thang a, result chu May 12, 2016 khin en thei dinga tardawk ning a tih. Written a hlawtling hai ta dingin May 14, 2016 khin Imphal hmuna personal interview um a tih. Thlangsuoka um hai trainingna hi Department of Tribal Affairs, Govt. of Manipur in 100% a sponsor ding a nih.
BSN in 21st Capping & Lamp Lighting Ceremony an nei
CCPUR: April 29, 2016 11 am khan Bethesda School of Nursing (BSN), Muolvaiphei,CCPur chun 21st Capping & Lamp Lighting Ceremony an nei a, GNM (Nurse) training ding mi 40 laiin an Principal hmaah intiemkamna an nei bakah Pre Term Selection (PTS) Examnaa thaw tha bik 31st Priscilla Lalrempui d/o Mr. Vanlalsung of Hmarkhawlien,(Assam);2nd Rebecca N. Hanghal d/o Mr. H. Zamlianmang of Zenhang Lamka, (Manipur) le 3rd Ngaihbiakhoih d/o Mr. Khamkhansiamof Zion Veng, New Lamka, (Manipur) hai kuomah lawmman pek an nih.
Hi huna hin Chief Guest in Rev. Zathangsing Zate Executive Secy., ICI le Functional President in Pu Joseph Lalrothang President, Hmar Inpui, GHQ hai an thang.
Chief Guest chun, Nurse hai chu damnaw hai tadinga ruoltha an ni thu, khawtlang nun khawm Nurse bo a um theilo, nurse hai chu damnaw hai bula doctor hai neka um tamlem le an pawimaw zie thu a hril
Functional President chun nurse training ding hai chu infuina thu tha tak tak hrilin, nurse hai chu damnaw hai lungril suknat theina thil haia fimkhur hle ding le damnawhai le inlaichinna thatak an nei a pawimaw zie thu a hril.
BSN a training ding hai hi Principal le Tutor Capping an nei a, Rev. JL Songate Secy., Mission Dept., ICI in tawngtaipekna a n ei zoin Chief Guest in Lamp lighting neiin nurse training ding hai hin an sit sawng tawl.
BSN hi 1995a Muolvaiphei Rural Health & Research Centre (MRH & RC), Muolvaiphei, CCPur hnuoia indin niin hi hmuna inchuk suok India ram hmun tum tum haia Private le Government hnuoia thawkna nei le fakhmu an suok pha tah a nih.
Manipur le India rama khawm hi hmun a inchuk suok hai chu a thiem filawr le exam huna hai khawm Topper kai tam tak an lo um hlakna a nih. Ni kum (2015) khan mi 14 lai zet Manipur Nursing Council hnuoia Examnaah Top 10 ah an kai phak a nih. Hi BSN ainthawk hin tuchenah 676 lai zet sawrkar hrietpuia tlaktlai a pawm nurse (qualified registered nurses) an suok tah a nih.
Tulai hnai khan Indian Nursing Council (INC) hotu hai khawmin hi hmun enfelna hi an hung nei a, mamaw (infrastructure) a nei kim tawk a an hmu thu an hril niin BSN thuneituhai chun an hril a. Hmatieng ah B.Sc Nursing College a la hung ni thei ngei an beisei thu ei palai kuomah an hril bawk.
(LRS Puruolte/ Photo: Muona Infmate)
NFSA bufai dingin MT 11,796
Imphal: Tuta thla sunga Manipura NFSA hnuoia sem dingin sawrkar thlungpui chun bufai matric tonnes 11,796 a hung pek suok ta niin DIPR thusuok chun a hril. NFSA hi April 26, 2016 a intahwka kha Manipur state a hmang tan ta a nih. Harsatna umlo le hlawtling taka hmang a ni theina dingin NFSA hnuoia hamthatna dawngtu ding (beneficiaries) hai sukfel vawng a nita a, DSOs/SDOs hai fethlengin Ration Card semna sin tan mek a nih. State sawrkar chun NFSA hnuoia hamthatna dawng thei ding (genuine) tuta lista thang lo, hmai pal hai khawm la zieklut pei a tum a; tuchena digitized thaw zo tah beneficiary list chu www.pdsmanipur.nic.in a en thei ning a tih tiin DIPR thusuok chun a hril.
Driver le Truck hmu zo lovin
Imphal: April 26, 2016 khan Tamenglong district a Noney area sunga Ijei vadung a tui hung lien thutin Truck MN04A762 le a driver Keisham Ibocha Meitei (45), s/o (L) Gorchandi Meitei of Yairipok Molnom Village, Thoudal District hai chu a len hmang a, tuchen hin Truck le a driver hi hmuzo an la ni nawh tiin Keisham Ibocha Meitei sunghai chun Noney Police Stationah report an pek. Ruobawhawk a hung surt thut leia vadung tui hi a hung lien niin an hril.
Paona Bazara dawrhai khar
Imphal: Zani chawhnung dar 1 pel zova inthawk khan Paona Bazar, Imphala dawrkaihai chun an dawrhai an khar vawng. Polcie han dawrkai akhat, Ashok (44) , Readymade garment shop neitu an man a, hi thil hi dawrkai han an ditnaw a, a dodalnaa dawr hai hi an khar tawl a nih. Police thenkhatin dawrkaihai chu an dawr tuol sengah electric bulb pakhat seng sukvar dingin thu an pek a. Hi chungthua hin dawrkai thenkhatin Sagolband A/C MLA R.K. Imo kuomah report/complaint an va siem a, chu lungsena Police han Ashok hi an man nia hril a nih. Chun, Police han dawr nghaktu pahni Haobam Thoi (23) le Amit (23) hai an vuok bawk nia hril a nih.
Kuki Helpawl group 38 an tling tah
Imphal: Kuki helpawl group thum a thara indin nawk a ni leiin Kuki helpawl umzat chu group 38 an tling ta nia hril a nih. Kum 2015 chen khan chu group 35 an nih. Kum 2016 a Kuki helpawl grou thar pathum indin hai chu, Thadou People Libertion Army (TPLA), Aimol Defence Force (ADF) le United Kuki Liberation Force (UKLFMC) niin state sawrkar thusuok chun a hril.
Meghachandra Kongbam in Director sin
Imphal: Zanita inthawk khan Mr Meghachandra Kongbam chun Director, Department of Information & Public Relation (DIPR) sin incharge a chel tan. Hi Department mi hrim, Director, DIPR sin chel hmasa tak la nia hril a nih. A hma chun Senior MCS or IAS Officer han h i sin hi an lo chel hlak a nih. Meghachandra Kongbam hi Additional Director, DIPR sin chel hlak a nih.
Assamah thli le tek leiin mi 5 an thi
Guwahati: Assama chun zani hmasa zana thli, ruo intuoa a sur lei le Tek tla leiin mi 5 in thina an tuok. Thina tuok hai laia 3 hai chu Tinsukia districta Margherita hmuna thingkung tlu in a del hlum an nih. Hailakandi le Dibrugarh hmuna mi pakhat ve ve Tekin a deng hlum bawk a nih. Hi baka hin thlipui le ruo leiin Lower le Upper Assam haia chun In tam tak a suksiet bakah Thingkung le electric ban tam tak a sukthluk pha bawk.
Corporator tham a tum leiin Dy. Director man
Thane: Vasai Virar Municipal Corporation (VVMC)a Town Planning Departmenta Deputy Director YS Reddy (48) chu Rs. 25 lakha Corporator pakhat tham a tum leiin zani hmasa zan khan man a nih tiin AntiCorruption Bureau (ACB), Thanea Police Inspector Anil Honrao chun a hril a, thamna hi pek a tum lai taka an man niin a hril. Corporator hin sum chawkchawrawina thuah YS Reddy chunga complaint a peklut a, a complaint peklut lakkir dinga thlemin Rs. 1 crore pek dingin a tiem a, Rs. 25 lakh hi first instalmenta pek a tum nia hril a nih. Reddy hi VVMCa a lut hmain City and Industrial Development Corporation of Maharashtra (CIDCO) a lo thawk a nih.
Kohima Smokefree City a puong
Kohima: Nagaland state khawpui tak Kohima chu Smokefree City (meikhu um lona khawpui) a puong a nih. Hi thil hi zani hmasaa Kohima khawpuia Smoke Free Kohima campaign nei huna Kohima Deputy Commission, Rovilatuo Mor in a puong a nih. Campaign hi Department of Health and Family Welfare hnuoia District Tobacco Control Cell in an buotsai a nih. Nagaland hi India rama duma siem (tobacco) thil chingzawngsak tam natak state pahnina a ni a, mihriem 100ah 57% han duma siem thil hawpin an fak nia record a ni bakah school naupang hai laia 28% han duma siem thil an thaw/ching a record a ni bawk.
Nomination paperfile thina hun a tawp
Chennai: May 16, 2016 nia Tamil Nadu, Puducherry le Kerala haia phase khata Assembly election hung um ding le inzawma nomination paper file theina hun chu zani zantieng khan a tawp tah. Tamil Nadu Assemblya hin members 234 an um a, Puducherryah 30 le Keralaah 140 an um a nih. Vote tla hai tiemna May 19, 2016 khin nei a ni ding a nih. Tamil Nadua chun nomination paper file 3,800 chuong an um a, Keralaah nomination file 900 chuong an um bawk.
NSCN(IM) an zawm niin a hril
Dimapur: NSCNUnification le NSCNReformation a hotu thenkhat chun NSCNIM an zawm niin NSCNIM thusuok chun a hril. NSCNIM zawma an hril hai chu Tahnei Konyak, Tatar (Unification), Capt. Khoayun Konyak (Unification), 2nd Lt. Hawen Wancho (Reformation), 2nd Lt Akash Konyak (Unification) le Corporal Ali Lainung (Reformation) hai niin NSCN –IM thusuok chun a hril.
Kum 2 bek Mizoramah an thawk ding
Aizawl: Mizoram state quotaa India rama Medical colleges haia postgraduate inchukzo hai chu, an inchuk zo hnungah kum 2 bek Mizoram state sungah an thawk ngei ding a nih tiin Mizoram Health Minister Lalthanzara chun zani hmasaa Mizoram Government Doctors’ Association conference huna thu a hrilnaah a hril. Hi thil hi medical departmenta doctor indainaw leia thaw tum a nih tiin Lal Thanzara chun a hril a, Doctors hai chu damnaw hai zaidam le ngilnei taka enkawl dingin an fui.
Telanganaah lum leia thi 137; Odishaah 119
Telangana: Telangana a chun boruok lum tuorzo lova thi 15 an um belsa nawk leiin tuchena lum tuor lova mihriem thina tuok chu 137 an tling tah. Boruok lumna hi kiem nekin a la lum sap pei ding niin MeT official thusuok chun a hril. Telanganaa boruok lumna tak chu Hanmakonda niin 44.1 degree Celsius a kai phak a, Nalgonda a chun 43.8 degree Celsius a ni bawk. Telangana Chief Minister Chandrasekhara Rao chun zanikhan District Collectors hai ko khawmin khaw inthal chungthu ennawnna a neipui bakah boruok lum leia mihriem thina a tlung belsa ta nawna dinga hmalak dan ding hai an hriltlang.
Odisha a khawm boruok a la lum zing a, zani hmasa khan Bhubaneswar khawpui lum dan chu 45.3 degree Celsius a tling phak. Tuchena hin Odisha state a chun boruok lum tuorzo lova mihriem thina tuok 119 an um ta niin Special Relief Commissioner’s Office thusuok chun a hril.
Pranjit Choudhury bail ngenna hnawl
Guwahati: Assama Congress leader Pranjit Choudhury in anticipatory bail a ngenna chu zani hmasa khan Gauhati High Court in a hnawl pek. Pranjit Choudhary hi mi hlem, nuhmei suollui le thawluina hmanga nau insuktlak tirna thu haia case siem khum, chawlkar thum lai zet inbihmang ta a nih. Tuta hma met khan Assam Police chun notices vawihni an lo pek ta bakah Guwahati le Kamalpur haia chengnain hai khawm an lo dap ta a nih. Assam Pradesh Congress Committeea general secretaries nuhmei pakhatin Policea complaint a file le inzawma case hi siem khum a nih. Pranjit hin inneipui dinga intiemin sex a lo hmangpui bakah a nei nuom sinaw leiin a thu le hla lovin a naupai an sukthlak tir niin nuhmeinu hin Policeah complain a peklut a nih.
CISF constable ama le ama an kap hlum
Canning: West Bengala south Pargana district sunga Mondolpara hmuna school building tuolah CISF consbable Jasai Hansda (32) chu zanikhan a service silai hmangin a lu takah ama le ama an kap hlum. Jasai Hansda hi Jharkhand mi niin West Bengala Assembly election fe mekah April 30, 2016 nia fifth phase election hung um dinga Gosaba (SC) Assembly Constituencya S S K School Polling Booth No. 45 a duty dinga ruot a nih.
ITBP HQ Shillonga inthawk Itanagarah
New Delhi: Arunachal Pradesh ram sunga China sipai hai an hung lut rawp hlak chu India sawrkarin a ngaimaw hle a, hi le inzawm hin Shillonga innghat ITBP headquarters chu Arunachal Pradesh khawpui Itanagar tieng sawn mek a nih. Sawrkar thlungpui chun Arunachal Pradesha ITBP battalions 8 sielut belsana ding thangin kum 2014 khan Arunachal Pradesh kuomah infrastructure package Rs. 175 crores a lo pek ta a nih. ITBP Director General Krishna Chaudhary chun, Meghalaya khawpui Shillonga inthawk Itanagar tieng ITBP HQ sawn a ni ngei thu hrilin thla thar khin insawn fel zo hman beisei a nih tiin a hril.
PM Modi in US Congress Joint sessionah thu a hril ding
Washington: Prime Minister Narendra Modi chun June 8, 2016 khin US Congress joint sessionah thu a hril ding niin US House of Representative Speaker Paul Ryan chun a hril. PM Modi hi US President Barack Obama in a fiel anga US inzin ding a ni a. Kum 2005 a inthawk US Congress joint session –a India Prime Minister thuhrilna hun hmang a 5na ding a nih. July 19, 2005 khan PM Manmohan Singh in US Congress Joint sessionah thu a lo hril ta bakah September 14, 2000 khan Atal Behari Vajpayee; May 18, 1994 khan PV Narasimha Rao le July 13, 1985 khan Rajiv Gandhi han US Congress joint sessionah thu an lo hril ta bawk.
India le PNG han MoUs 4 an ziek
Port Moresby: Papua New Guinea (PNG) a cham mek President Pranab Mukherjee le PNG Prime Minister Peter O’Neil hai hrietpuinain India le Papua New Guinea hai chun thawtlangna ding Memorandum of Understandings (MoU) 4 an ziek. MoU an ziek hai lai hin Health, Information Technology le Infrastructure tiengpang haia thawtlangna ding a thang. MoU dungzui hin India chun Transport and infrastructure sectors a dingin Line of Credit dollar 100 million a pek ding a nih. MoU hin Public Health, Health Research, Human Resources and Training, Medical Services, Disease Control and Prevention, Drug and Health Care Technologies le Environmental Health hai a huomsa vawng a nih.
President Pranab Mukherjee hin zani zan khan Papua New Guinea suoksanin New Zealand ram a pan nawk tah.
Kum 10 sung rimsi taka intang dingin
Pyongyang: KoreanAmerican Kim Dongchul (62) chu South Korea ta dinga North Korea rama enthlatu sinthawa intumin North Korea Supreme Court chun kum 10 sung rimsi taka lungin intang dingin thiemnaw an changtir. Kim DongChul hi South Korea rama pieng, US ram mi nina nei a ni a, October, 2015 a kha man a nih. Kim hin enthlatu sin a thawna kawnga hin South Korean intelligence officers haia inthawk pawisa a dawng hlak niin thla hmasa khan an puong a nih. North Korea rama chun ramdangmi thawluina hmangin indiklo taka intum le an thaw lopui khawm thawluina hmangin an thaw ni anga inpuong tir an lo ni rawp ta hlak a nih.
VAWISUN THUPUI
I thuruothai chu kan chuk thiem theina dinga, Sukrinuma ka lo um kha ka ta dingin a tha a nih. Rangkachak le tangka sang tam tak nek chun, I baua dan suok chu ka ta dingin a thalem. Sam 119:7273
Editorial: Tleirawl le thalai han nun hmang uluk a tul
Zalenna famkim le hlimna tluontling zawngin h ringnun mawina le hlutna chu sirdein ei tisa chakna thuoina lampuiah ei inherliem vut vut hlak. Ei nun lampui ei sut chieng ngai naw a, ei inchawmna ding hmun le ei tlakna hmun ding ei en chieng ngai bawk nawh. Ei fena lampui chu ei hraw buon buon a, tium le thina chang khawm thlier hran thiem der lo dinga zilna le thuawina nun ei tlaksam tlat leiin ei tuor tlawk tlawk hlak. Zilna le thununna chu ei theida em em a, lainatna le ditsakna nun chu midanghai chungah ei inlangtir ngai der nawh. Zalenna lampui chu hrawin a mi del theitu hrim hrim chu thina khawp hiela thanaw le tium khawm nisien, ei hringnun mawina le hlutna ei sut el hlak. Ei hringnun thunun lo tumtu le zalenna lampui mi daltuhai chu ei hmelma angin ei en hlak. Hi thil hi a hung umna san chu ‘ka nun chu ka nun a nawm’ (It’s my life) ti lei a nih.
Ni e, ei nun chu ei ni ta a nih. Ei nu le ei pa, ei u le nauhai khawmin thu an nei nawh. Thuawina ei ngainep a, zilna ei theida hluo hluo hlak. Midang ngaisakna hrim hrim ei nei nawh. Amiruokchu , an mi ngaisak naw nia ei hriet chun an chungah ei lungsenna ei buok khum a, an ngaidan le dit dana um tum hlawl si loin ei dit dan le ngaidana in umtir ei tum tlat thung hlak. Hi lei hin lungawinawna le chierna, thikthu sietna le lawmnawna vawngin ei lungril a hluosip a, ei chunga tawngbau tha hmang dinga ei phut tlat laiin tawngbau feikibarin ei khaw zuoi zuoi bawk si a. Hiengang hi tulai thangthar, tleirawl le thalaihai lungril put dan chu a nih.
Hieng hi a ni leiin tleirawl le thalaihai lungril put dan (moral) sukdanglam a tul ta bek bek el a nih. Tleirawl le thalaihai moral siemthatna dinga pawimaw tak chu ei society in ei ngaisang zawng ei thlakthleng hi ni dingin an lang. Indiklo taka hausak nek chun mani chantawka lungawi thei hai dam, indikna leia sirdea umhai dam hi ngaisang lemna chang ei hriet a hun tah. Car le Bikea hrat tak taka tlan hlak, sawrtlak thiem dang nei hran chuong lohai nek chun mi lekhathiem, tlawm tak le inhnuoi taka khawsa hlakhai hi ropuina lallukhum inkhumtir nachang ei hriet a, ei harsuok vat a hun ta a nih. Ei rama tleirawl le thalai han moral reformation chau ni lovin moral transformation an mamaw takzet a nih.
Ienganga hmeltha, lekha thiem, hausa le inchuk sang khawm ni inla, ei nunah ringumna, indikna le inzaumna ei nei si naw chun hlutna nei ngawng ei ta, mihai nuizatbur le fiemthu thawna mei mei ei ni ding a nih. Chuleiin, ei lungril put dan thlakthleng a, nun dan tha le mawi nei thei dinga ei insiem that mawl mawl a tul a nih. Ei lungril put dan thlakthlenga, a hung danglam theina ding a ni phawt chun tia chan a tul leh chan ngam, muolphopui a lo tul khawma muolphopui ngam tleirawl le thalai ei ram le ei hnam hin a mamaw ngawi ngawi el a nih.
Ei ramah suolna a pungin khawtlangah hlemletnain nasa takin bu a khuor ei ti rawpna san chu tleirawl le thalai hai hin ei hlutna ei hriet tawk naw lei khawm hi a ni ring a um. Tleirawl le thalaihai lai inthladana suol le zawmthawna a pung nasain, indikna le titakna nun ei tlasam tiel tiel leiin a beidawng thlak hle. Thil pawi takel chu tleirawl le thalai tam lem hai lai dawtheina, indikna, ringumna, taimakna le thuawina hai sirdea a um ta tlat el hi a nih. Hi thil in a hung rasuok thalo tak chu ‘Ka nun chu ka nun an nawm” tia suol palamna hi a nih. A rasuok dang tha lo tak chu thabona le um awl nuomna lungril a min puttir hi a nih.
Ei rama tleirawl le thalai tam takhai hin sie le tha hrietna (conscience) tak taka nun puitling le inzaum nei nuomna lungril hi ei nei tawk naw am a ni ding aw ti thei a nih. Pathien tina tak tak le khawvel thila khawm tum mumal tak nei lo hi a tam lem ei ni el ta naw ding maw ti theiin a um bawk.Ngaituo le invawi em em nei lo, hi khawvela ei damsan le ei lekha inchukna san khawm ngaituo lem lova khawsa mei mei, a pawngapuia insuk changkang em em el hi tiem senglo an um nuk el ta a nih. Hi lei hin tleirawl le thalai hai hin ei lampui hraw hi ei sut ngun hle nuom a um. Nun uluk taka ei hmang a ni phawt chun ei insung, khawtlang, ram le hnamah ra tha ditum tak a la hung insuo ngei ding a nih.
