Jameson Singh Jail­a thun a nitah
CCPUR: April 2, 2016 nia  Hotel Venus, New Lamka (G) Room No. 204 Bathroom sunga Nepali nuhmei pakhat Pampha Rai (32) d/o Tul Bahadur Rai of 2nd MR, Family Lane, Imphal a thisaa hmu a nina le inzawma tuolthattua intum Rikendrajit Singh of Lamching Achoba, Imphal West chu zanikhan CCPur Police Custody­a iemanichen a um hnungin zanikhan CJM hmaah an inlangtir a, Court in a rel  angin  zanikhan Police han Jail­ah an va sielut tah. Mr Jameson Singh chunga hin Police chun FIR No.21 (4) 2016 CCP­ PS U/S 376/302 IPC an registered a nih. Pampha Rai ruong hi a sung han an la lak naw a, RIMS, Imphal mogue­ah a la um.

Martyrs Trophy opening ceremony
CCPUR: April 12, 2016, 12:00noon hin Hmar Martyrs Trophy Organising Board (HMARTOB) huoihawtnain Saikawt playground­ah Manipur state level ‘13th Hmar Martyrs’ Trophy football Tournament­ 2016 Opening Ceremony hmang ning a tih. Hi huna hin Pu Joseph Lalrothang, President, Hmar Inpui GHQ Chief Guest in thang a ta,  Pu Laldawnlien Varte, President, HYA GHQ le Pu H. Samson, President, HYA Rengkai Branch hai Functional President le Guest of honour in thang an tih.

Nk. Lalengvari Sinate, Nk. Christina Shakum le Hmar Artiste Assn. han hla sak an ta, HYA Rengkai, HYA Muolvaiphei le HSA Saikawt Branch han hnam lam inentirna nei an tih. Hi huna hin mitin thang dinga fiel ei nih. Tukum hin teams 32 an thang a, Opening match a hin defending champion Hill Town FC le Rimawi Run Club (RRC) hai inkhel an tih.

ZRA in thusuok an siem 
CCPUR: August 31, 2016 a Manipur sawrkarin Bills 3 Assembly­a a pass­na le inawmin ZRO/RA demna, hrilsietna le intumna Facebook, Whatspp group etc haiah insuo ta lo dingin Moses, Director, Defence, PRO, ZRO in inhriettirna a siem. Hi inhriettirna pawisa lova la thaw an um leh hnam hmelma a ngaiin an chungah action lak ning a tih tiin ZRO thusuok chun a hril.

Chun, National Highway 102B, Guite road siemna sin sukbuoi lo ding le an hmangruohai la hmang lo dingin inhriettirna ZRO chun a siem bawk. Hi inhriettirna bawsetuhai chunga action lak ning a ta, tukhawm thlasie thei naw nihai tiin ZRO thusuok dang chun a hril bawk.

Dist. Level Quiz Competition final round nei; lawmman sem nghal
CCPUR: Zani 10:AM khan Synod Hall, IB Road, CCPur­ah RMSA/CCPur huoihawtnain Dist. Level  Quiz competition final round nei a ni a, hi huna hin team 5 an thang a, zantieng dar 2 khan Dist. Literary Meet & Science Exhibition lawmman semna nei a ni a, khuollien ding DC a remchangnaw leiin L.Nandakumar, MCS, Addl. State Project Director, RMSA/Manipur khuollienin a thang a, Functional President in Kaikhanlian Guite, DI of schools CCpur Block le Special Guest in Vunglallian, Principal, L.Foundation School & Member Dist. Level Committee, RMSA/CCPur a thang.



Quiz Competition­ah 1st Ngamkhothang Haokip le Michael Ngamminlen Baite of JNV Tuinom; 2nd Niangbiaksiam le Thiansangi of Savior Public School le 3rd. Ngamgin le Lhunkholal of Gandhi Memorial H/S hai an nih.

Debate­ah 1st Lenkhohao of H/M English School; 2nd Chiinneiching Zou of Chinkham Modern School; Thangliansiam of Dawn school le consolation prize Kimngaihmawi of VK Tawna High hai an nih. Science Exhibition ah 1st Jessica Chingthiansang le Nemlemkim of Ebenezar Academy; 2nd Ruthy Nianghatnuam Tungnung le Manneihoi Zou of Chinkham Modern School le 3rd Chonghoihkim le Niangngaihlian of Savior’s Public school hai an nih.

Quiz competition ah1st Rs.4,000/­;2nd Rs.3,000/­3rd Rs.2,600/­le consolation Rs.2,000/­ a ni a, .Debate –ah 1st Rs.2,000/­,2nd Rs.1,500/­;3rd Rs.1,300 le consolation Rs.1,000/­.Science exhibition ah 1st Rs.2,000/­,2nd  Rs.1,500/­ le  3rd Rs.1,300/­ a nih

NFSO guidelines thenkhat
CCPUR: National Food Security Ordinance (NFSO), 2013 guidelines dungzuia hamthatna dawng thei dinghai chu kum khatah sum hmusuok Rs. 1 lakh neka tlawm, piengphunga ruolbanlo, hmeithai, pasal tlansan nupuihai, HIV invawihai, naupang enkawltu ding neilo hai le nitina fakfawm zawnga inhlawfahai an ni a. Hi hamthatna dawng lo dinga tihai chu, motor ke 4 nei neihai, Schemd danga ration dawnghai, income tax pehai le sawrkar thawktu kum 1 ah income Rs. 1 lakh chungtieng neihai an nih tiin District Supply Officer, CCPur chun zanikhan inhriettirna an suo.

Dinner­ cum­ Confabulation thul
CCPUR: Cyber crime le Whatsapp hmangsuol ti thu le inzawma DC, CCPur in zanita Life Cafe, Rengkai Road­a Dinner­cum­Confabulation a ko chu nei thei lova thul a nih. Hi thil a kotu a hun ruotah a tlung naw bakah thil fe dan a buorchuor leia thul a ni deu tak. Chun, Life Cafe chun hi thil le inzawm hin information an dawng naw niin an hril.

HLS VC dingin Pi Zosangkim Pudaite
CCPUR: April 8, 2016 nia Hmar Literature Society (Manipur) Executive meeting inthung vawithumna chun Pi Zosangkim Pudaite chu HLS, Manipur Vice Chairman dingin lungruol takin an thlangtling. Pi Zosangkim Pudaite hi Retired Professor niin Hmar nuhmei laia lekha thiem insang hmasa a nih. Pi Zosangkim Pudaite hin Hmar Inpui President dinga thlangtlinga lo um ta HLS Vice Chairman Pu Joseph Lalrothang hmunruok a hung hluo ding a nih.

Free Medical Camp 
CCPUR: Lions Club of CCpur Greater le ADC/CCPur thangruolin April 11 & 12, 2016 inkar sung Thanlon Sub­Divn.a Palkhuang village ah “2­Days Free Medical Camp” nei ning a tih.  Medical team­a Doctor, Pharmacist, Nurse bakah ADC Ambulance thangin motor 7 hai chu zani zingkar  8:00 khan Mr Langkhanpau Guite, Chairman ADC/CCPur in a vailiem a, zantieng  2:00PM khan ADCC Chairman in  Medical camp hi a hawng.

(L) Rev. Lienrumhrietzingna lungdaw hawng
CCPUR:  April 8, 2016, zantieng 3:00PM khan Zohnathlak han ei sak lar em em “Ni tla ngainaw Zion Khawpui’ ti hla phuoktu (L) Rev. Lienrum hrietzingna ding lungdaw (memorial stone) le prayer cabin hawngna prog. Songsang khuoa hmang a ni a, lungdaw hi Pu Lunminthang Haokip, IAS, DC, CCPur in a hawng a, Rev (Ret.) Thangkholal Singson in tawngtainain an hlan. Hi thua hin Mr  Thangjang Haokip, President, KIC chun zani zantieng 4:30PM khan KIC Office­ah report a pek a;  Mr L. Mangkhogin Haokip, IPS, SP/CCPur in  Rev. Lienrum a ngainat  leia  hrietzingna ding le Pathien ropuina dinga lung hi a daw a ni thu hrilin prog. kha KIC le Singsit Organisation, NE India  in an buotsai a nih.

Lungdaw hi Rev. Lienrum in Pathien thu hrila an zin huna Suongsang khaw­a riek thei lo dinga Suongsang khaw lal in a hnawtdawk leia khawhnawma Theipalingkaw bula zalhmun rema, Ni Tla Ngainaw Zion Khawpui ti hla a phuokna hmun ngeia phun a nih.

Pa hme suol leiin Parvachawm­ah naupang 2 an thi
CCPUR: Parvachawm, Tipaimukh Sub­Division, Churachandpur district, Manipur­a sungkuo pakhata unau pahni hai chu Pa an hme ngeinaw leiin an thi. Ei thu dawngnain a hril danin  April 9, 2016, 12:00AM  khan Ms Lalnipui (9) d/o Benjoy Hrangchal chu damzo lovin a thi a, April 10, 2016, 8AM khan a sangnu Vaninmawi (6) s/o Benjoy chu a thi nawk a, an ruong hi April 10, 2016 zantieng khan Parvachawm thlanmuolah vuiliem an nih. Pa hme lei hin Benjoy nuhmei le a naupa Obadia hai khawm an damnaw ve a, sienkhawm that tieng an pan pei ta niin ei thu dawngna chun a hril.  Pu Benjoy le a naupa ramriek­a um hai ruok chun Pa hi an hme ve naw leiin an him. Pa an hme hi Papar ei ti ang hmelput niin ei thu dawngna chun a hril.

Hieng laizing hin Mizoram­a Mamit  hmuna Pu Saikhuma (35)  hai sungkuo in Pa an hme leia a nuhmei Ramdinmawii (34) a thi ve nawk leiin  sungkhata Pa hme leia thi chu mi 4 an  ni tah. A hma khan Pu Saikhuma le a naupasal hai pahni Biakrinawma (10) le Malsawmtluanga (8) hai an lo thi ta a, tuhin an naupa Saihmingthanga (12), an naunu Miriami  (3) le an mikhuolpa V.L. Hriata hai chu  Aizawl Civil hospital­a enkawl mek an la nih.

ICI KTP khawmpui liena lawmman latuhai
NEW DELHI/CCPUR: April 8 – 10, 2016 inkar sunga ICI Central Kristien Thalai Pawl (CKTP) General Conference vawi 32­na neia um chu a lo tumtiek tah. Hi hun sunga competition dang dang haia lawmman latuhai chu hieng hai hi an nih­
Choir Competition (Presbyteries):
1st (*Buonglienkung Award): Assam Hills Presbytery
2nd: Guwahati City Church
3rd: Jiribam Presbytery
Choir Competition (Mission Fields):
1st: Assam Mission Field
2nd: North Tripura & Karimganj (NTK) Mission Field
Solo Competition (Presbyteries):
1st (*Rev. Thangngur Award): Nk. Lalhmunmawi @ Neithangveng, Cachar Presbytery
2nd: Nk. Lalbiekkim Bapui @ Muolhoi, Assam Hills Presbytery
3rd: Nk. Mari Tuolor @ Guwahati City Church
Solo Competition (Mission Fields):
1st: Vinod, Tripura Mission Field
2nd: Mercy, North India Mission Field
3rd: Mala, Arunachal Mission Field

ManipurCM in Governoran hmupui, ministry reshuffle hun ding la bituk lo
IMPHAL: April 10, 2016 khan Manipur CM O.Ibobi Singh chun Raj Bhawan, Imphal­ah Manipur Governor V. Shanmuganathan an hmupui a, minutes 15 vel inbiekna an nei a, an thu hril chieng taka hriet  ninaw sienkhawm Manipur Ministry reshuffle ding thu an hriltlang le CM in minister thara laklut dinghai list a pek ring a nih. Manipur Ministry chungthua New Delhi inzin Dy. CM le MPCC President hai khawm Imphal an hungtlung tah. CM chu an ni pahni hungtlung hmaa Imphal lo hung tlung a nih.

Manipur Ministry Reshuffle le minister thar ding hai laklut hun ding hi bituk a la ni nawh. Ministers le dissident Congress MLA­hai inkara insekhekna a la um leia minister thar dinghai sesamna hun ding (searing in ceremony) hi la ruot thei lova um nia hril a nih. Ministers le Dissident MLA­hai insekhekna hi chingfel thei a ni chun swearing in ceremony hi vawisun (12/4/2016) hin a um el thei a, sienkhawm insekhekna hi chingfel vat a ninaw chun  swearing in ceremony hi April 13, 2016 zo tieng a um el thei niin CM le inhnai tienga thu dawngnain a hril tiin ei thu laksawngna chun a hril.

Ministry Resuffle a hung ni chun T. Manga Vaiphei, Ksh Biren, Victor Keishing le D.K. Korungthang han Cabinet minister chanvo an chang el theia hril rik a nih. Hieng laizing hin April 10, 2016 a CM le an inhmu zo sawtnawte hnungah Manipur Governor V. Shanmuganathan chu Imphal suoksanin Shillong a pan nghal a, hi lei hin vawisun ela swearing in ceremony chu nei a ni ring a um nawh tiin ei thu dawngna chun a hril. V. Shanmuganathan hi Meghalaya Governor a ni a, Manipur Governnor in­charge a chelsa a nih.

April 21 a inthawk Economic Blocade 
IMPHAL: April 20, 2016 chena Manipur sawrkarin All Maniupr Written Test Successful Candidates of Police Constables (Male), 2013 thil ngen a sukpuitling naw chun April 21, 2016 a inthawk National Highway haiah Economic Blockade kan thaw tan ding a nih tiin Konthoujam Johnson chun zanita Imphal­a Chanchinbumihai an hmupui huna a hril.

Pawl pahni inbeituonaah mi 6 an hliem  
IMPHAL: Zani zing dar 10 vel khan Imphal West District sunga Mayang Imphal Bengoon area­a bandh thlawptu le bandh dodaltu hai inkarah inbeituona a tlung a, silai hmetpuok a ni leiin mi 6 an hliem a, In 7 raw le motor thenkhat suksiet a nih. Hliemhai laia mi 4 hai chu an hliem na leiin Shija Hospital panpui an nih. Buoina tlungna hmun police han inrang taka panin buoina suok hi an va thunun thei hram. Hi th il tlu ng le inzawm hin District Magistrate, Imphal West chun zani 1PM a intahwk thuthar um nawk hmakhata dinginWangoi Sub­Division hup sungah Curfew a puong.

Electric in mi 11 a man hlum
TINSUKIA: Zanikhan Asam state­a Tinsuka district, Pangeree hmuna electric in mi 10 a man hlum a, midang 20 na takin an hliem. Mipuiin police staion an va tawng a, Police han mipui hnawtdarna dinga silai an hmetpuokin electric hrui a kap tan a, electric hrui hung tla thla leia hi thil hi tlung a nih.

Assam-ah 82% le WB-ah 79% vote a tla
GUWAHATI/KOLKATA: Zanikhan Assam­a Assembly constituency 61 haiah second phase le final Assembly election nei a ni a, votes 82% chuong a tla tiin Deputy Election Commissioner Sandeep Saxena chun a hril. Barpeta hmuna chun election le inzawma buoina suokah mi 1 a thi niin Mr Saxena chun a hril a, hi thu a hin magisterial inquiry thaw dinga Order insuo a nih tiin a hril. PM hlui Dr Manmohan Singh khawmin zanita Assam Assembly election­a hin vote an thlak ve.

West Bengal a chun constituencies 31 haiah election nei a ni a, zani zantieng dar 5 chen khan votes 79.51 percent a tla niin Mr Saxena chun a hril.

Kum 5 sung Kangmei leiin mi 1.13 lakh 
NEW DELHI:  India rama chun kum 2010­2014 kum 5 liemta sung khan kangmei suok leiin mi 1.13 lakh chuongin thina an tuok niin Union Home Ministry hnuoia National Crime Records Bureau (NCRB) report chun a hril. Kum 2014 sung khan India ram pumpuiah kangmei suok cases 20377 a um a, hieng kangmei suok haia hin mi 19,513 an thi baka midang 1,889 in hliemna an tuok. Kum 2010 khan kangmei suok leiin mi 24,414 an thi a, kum 2011 khan  224,576 ; kum 2012 in mi  23,281 le kum 2013 khan kangmei suok leiin mi  22,177  an thi.

Khaw lum leiin School hai khar dingin
KOLKATA: West Bengal sawrkar chun tulaia nasa taka boruok le khaw lum leiin state sunga primary le Seconday Schools hai chu thuthar um nawk hma khat khar/ chawl puong dingin an hriettir. Met Office chun zani le zinga Kolkata khawpui le a se vel boruok lum dan ding chu 40 degree Celsius niin a hril. Boruok lum lei hin Kolkata khawpui sunga tuola duty city Police hai duty hun khawm darkar 8 ni hlak chu darkar 6 sung dinga suktawi a ni bakah tight uniform norms khawm relaxed a nih.

NLFT helpawl 12 an ralthuom hai leh an inpe
AGARTALA: North Tripura district­a Sewarampara hmuna chun zani hmasa khan National Liberation Front of Tripura (NLFT) cadres 12 hai chu an ralthuom hai leh thuneituhai kuomah an inpe. Ralthuom an inpeklutpui hai lai SLR 2, AK­47 rifle 1, Insas Rifle 1, G­3 rifle 1, Grenades 2, silaimu 369 le document thenkhat a thang tiin SP (Police Control) Uttam Bhaumik chun a hril. NLFT inpe hai hi an thu le hla lova NLFT base camp, Sapchhari, Rangmati district, Chittagong Hill Tract (CHT) Bangladesh le ramri laia an thuoilui an ni a. Hi taka inthawk ralthuom le hung tlansuoka inpe an nih tiin Uttam Bhaumik chun a hril.

Kerala­a Temple kanga thi mi 110 an tling tah
THIRUVANANTHAPURAM: April 9, 2016 nia Kerala­a Puttingal Devi Temple­a kangmei suok leia mihriem thina tuok chu 110 an tling ta bakah hliemna tuok mi 380 chuong an um niin AIR report chun a hril. Kerala sawrkar chun hi thil tlung le inzawm hin inquiry thaw dingin order an suo ta bakah dan in a phal bak let 10­a tam firecrackers sekkhawl a nina thuah Police han case an registered bawk. Prime Minister Narendra Modi chun zani hmasa khan hi thil tlungna hi a hmuna a va enfel bakah thi sunghai Rs. 2 lakh seng le hliem hai Rs. 50,000 seng pek dingin a puong bakah Kerala CM Oomen Chandi chun, thina tuok sunghai Rs. 10 lakh seng le hliem hai kuoma thangpuina Rs. 2 lakh seng pek an ni ding thu a lo puong ta a nih.

Pawisa thienghlim lo Rs. 53 crore man
NEW DELHI: Pawisa thienghlim lo, election huna dan kala hmang tum (illegal cash) Rs. 53 crore lai zet state 5 haia inthawk flying squads le surveilance teams han an man ta niin Election Commission of India (ECI) thusuok chun a hril. ECI in election huna pawisa inlengvel dan le hmang dan enkaitu dinga Flying squads le surveilance teams hai hi an duty tir a nih. Assembly election nei mek le la nei ding hai chu, Assam, West Bengal, Kerala, Tamil Nadu le Puducherry hai an nih. Pawisa thienghlim lo tuchena man tamna tak chu Tamil Nadu niin Rs. 21.45 crore man a ni ta a, a dawttu chu Assam a ni a, Rs. 11.66 crore man a ni tah. Kerala ah Rs. 9.65 crore, West Bengal­ah Rs. 9.61 crore le Puducherry­ah Rs. 60.88 lakh man a ni ta tiin EC thusuok chun a hril.

Union Minister hlui  Dr C. Silvera a thi
AIZAWL: Union Health & Family Welfare Minister lo ni tah Dr C. Silvera chu April 9, 2016 zan khan lungphu chawlin a thi. Dr C. Silvera hi a thi hin kum 81 mi a ni ta a, a nuhmei Lallawmzuali le a naupasal 3 hai a thisan. May 6, 1935 khan a pieng a, Christian Medical College, Vellor­a inthawk MBBS a zo a, hun iemanichen Baptist Church of Mizoram hnuoiah Medical Officer sin a thaw a, kum 1985 khan Rajya Sabha member dinga thlangtling niin,  kum 1989 le 1991 hai khan Mizoram Lok Sabha member dinga thlangtling nawk a ni a, PV Narasimha Rao PM a ni lai February 17, 1994 khan Union Minister of State for Health and Family Welfare a chel a, kum 1995 a inthawk Union Minister of state for Industries incheltir  nawk a nih. Dr C. Silvera hi Mizo hnam hai laia Union Council of Minister hmasatak le la umsun a nih.

India le Maldives han agreement 6 an ziek
NEW DELHI: India rama cham mek Maldives President Abdullah Yameen Abdul Gayoom le PM Narendra Modi chun zanikhan Hyderabad House, New Delhi hmuna inhmuin an ram pahni hai thawtlangna ding agreements 6 an ziek. Agreement an ziek lai hin tourism le defence tiengpang thawtlangna ding a thangsa.

India Student pahni sun hlum
NEW DELHI: April 10, 2016 khan Ukraine ramah India mi student 3 hai chu Ukraine mi pathum han an sun hliem a, anni laia Pranav Shaindilya le Ankur Singh hai chu an hliemna tuorzo lovin an thi a, pakhat dang Indrajeet  Chauhan ruok chu a la dam niin zanita Ukraine­a Ministry of External Affairs (MEA) thusuok chun a hril. Dama la um Mr Chauhan inpuongnaa inthawk Ukraine Police chun hi thil thawtuhai hi an man ta niin MEA thusuok chun a hril bawk.

VAWISUN THUPUI
Pathiena chun a thu inpak ka ta, Lalpaa chun a thu inpak ka tih.  ­ Sam 56:10


Editorial: Pa hme leia thina

Hme dinga inhnik thil chi tum tum a um a, Sa le Nga ti lova chun Pa (Mushroom) ei ti hi an hnik pawl a ni ngei ring a um. Pa hi chi hni a um a, chuonghai chu Wild Mushroom le siemfawm (artificial mushroom) hai an nih. Wild Mushroom le artificial mushroom hai hi fak suol chun (food poisoning) thi theina ve ve an nih. Amiruokchu, ei thipui tak chu Wild Mushroom hi a nih. Wild Mushrom ei ti hi khawvelin an siengpui, ramhnuoia pil, thing le ruo haia inthawka hung mawng le to dawk an nih. Wild Mushroom­hai lai  hin hme thei chi le hme thei lo chi an um a, hi lei hin wild mushroom hme le fak thuah ei fimkhur hle nuom a um. Ramhnuoia mawng Pa hai lem hi chu fak mei mei chi an ni nawh. Hriet chieng lo, la hmu ngai lo le pa danglam bik deu hai chu hme lo a thain a him tak. Inhnik hmel a put lei ela fak le hme mei mei lo ding a nih.

Mithiemhai chun Pa hi chi hran hran 300 lai zet (wild mushroom) a um niin an hril. Pa chi hran hran u m hai laia  chi 100 hai chu mihriem fak le hme chi ni lo an ni a; ramhnuoia mawng pa chi 14 hai lem chu mihriem thipui thei an nih tiin Pa chanchin inchuk a, research thawtu hai chun an hril. Chun, Pa chi hran hran hai laia 100 ah 95 hai chu hriet chieng lova mihriem han  ei hme le fak hlak niin an hril bawk. Hi lei hin Pa hriet chieng lo hrim hrim chu hme lo le fak lo phawt el ding niin mithiemhai chun thurawn an siem.

Haptakar liemta khan Mamit Bazar veng thara cheng sungkuo pakhatin Wild Mushroom an hme leiin an pa le nuhai thangin sungkuo pakhata mi 4 zetin an thipui a, mi pahni damnawin hospital­a enkawl mek an nih. Hi chau hi ni lovin zani hmasa April 10, 2016 khan Churachandpur District, Tipaimukh Sub­Division sunga Parvachawm khaw mi, sungkhat in Wild Mushroom an hme a, an ngeinaw leiin sungkhata mi 2 in an thipui bakah mi 2 an damnaw pha ti thu hriet a hung ni nawk a. Hieng thu hai hin ei lung a thawng hle tawl ngei ring a um. Mizoram a Wild Mushroom hme leia thi han  Pa an hme hi papar ei ti ang hmelput a ni ang bawkin Parvachawm khaw mi han an thipui khawm hiengang hmelput tho nia hril a nih. Ei ni rama ding chun Papar mawng hun chu a la ninaw deu. Hi lei hin papar hme ding kawngah ei fimkhur hle nuom a um.

Tulai hin Churachandpur town sunga hmeruo bazar haia khawm Wild Mushroom chi tum tum, hmel mak le danglam tak tak zawr a ni a. Pa duhai chun an inchawk sup sup a, hieng Pa chi tum tum hme leia thi le damnaw pha chu ei la um naw a, ei vangnei kawngkhat hle. Amiruokchu, Pa inchawk le hme thuah ei fimkhur hle nuom a um. Sukdamna nekin invengna a tha lem ti thu kha hrietzing ding a nih. Thipui ding le natpui ding nek chun ei lo du hle khawma hme lo le fak lo el ding a nih. Fak le dawn thuah ei fimkhur zonaw lei le ei insum zonaw leiin mi thenkhat chun ei thipui hlak a nih. Pa hme lo khawma um thei a ni leiin Wild Mushroom, a bikin hriet chieng lo le ei la hme ngai lo hai chu inchawk lo le hme lo a damdawi tha tak ning a tih.

Parvachawm khaw mi thenkhatin an thipui Pa hi, ieng Pa am a nia ti hriet chieng nuom a um a. Hi lei hin District Administration in a zu hrie chieng le zu enfel dingin Medical team  annawleh expert team tir ngei sienla nuom a um. Papar pangngai chu ei du seng a, hme khawm ei hme hlak. Tuta papar an fak hi papar pangngai a ni le ninaw sukfie chu thil tul a nih.  Chuleiin, a hmuna zu enfelna sin hi thuneitu han ngaipawimaw ngei hai sienla nuom a um khawp el. Enfel a ninaw chun papar indik tak um huna khawm a mi sukti ding a nih.

Wild Mushroom hme leia thina tlung hi a vawikhatna a ni tanaw a, vawi tam tak a tlung ta hlak. Manipur le Mizoram state chauva hiengang thil hi a tlung naw a, India hmarsak biela state dang, India rama state le UT dang dang hai bakah khawvel rambung hran hran haia khawm a tlung rawp hlak. Amiruokchu, a tlangpuiin Wild Mushroom hme annawleh fak leia thina tuok hi tribal hai ei tam lem ngei ring a um. Hnam hnufuol le hnam mawl hai chun Wild Mushroom hi ei tuorhla deu a nih. Hi lei hin tribal­hai hi Wild Mushroom hme chungchanga hin fimkhurin insum thei inla nuom a um.

Post a Comment

Powered by Blogger.