Imunization thawna thlawp dingin a ngen
CCPUR: Mission Indradhanush Phase­III (Round I) April 7­14, 2016 sung Routine immunization in a cover lo tlangram khuo 204 vela naupang kum 2 hnuoitieng le nupui naupai 1000 vel bakah naupang kum 5 hnuoitieng Immunization thaw lo hai immunize thaw dinga remruotna siema um chu state sawrkar a inthawk fund hungnaw leiin a hun taka tan thei lovin a um a, sienkhawm DTF­I chun lampui dang dapin April 12, 2016 chenin Mission Indradhanush Phase­III (Roiund­I) thaw dingin MO, Nurses le staff hai tirdawk an ni ding chu Dr V.C. Pau, DFWO & Secy DTF­I chun zanikhan tuolsung chanchinbu reporter hai kuoma a hril.



Mission Indradhanush thiltum chu natna dang dang 9 vengtu ding routine immunization la thaw lo naupang hai kuoma pek a ni a, khuo, veng, lal, V/A, ASHA le Youth Club hai lo thlawp seng dingin DFWO chun a ngen.

Routine Immunization hi  natna chi 9­  Diphtheria, Pertussis (whooping cough), Tetanus, Tuberculosis, Polio, Hepatisis B, Measles, JE (Japanese Encephalitis) le HIB (Haemophilus Influenzae Type B) hai vengna dinga thaw a ni a; hieng natna hai dangna dinga kap khat/vial 1 hi a tlawm takah Rs. 1,500 man a ni a, sawrkarin a ngaipawimaw leiin tlangram biela cheng hai , a bikin nu le pa hai ngaipawimaw ding le Doctors, nurses le medical team hai hmalakna lo thlawp dingin DFWO chun a ngen.

Ni 3 sung chawl an zawm ding
CCPUR: Vawisun hi Manipur a cheng Meitei hai Sajibu Nongmapanba Cheiraoba Kut a ni leiin Banks thangin sawrkar offices le Institution hai chawl an tih. April 9, 2016 hi Second Saturday le April 10, 2016 Pathienni a ni leiin sawrkar office hai chu ni 3 sung a zawnin an chawl ding a nih.

Crime meeting nei
CCPUR: Zani zingkar khan SP, CCPur Office­ah SP, CCPur inrawinain Police Officer han Crime meeting an nei. Hi huna hin case pawimaw le lien deu hai sukfel dan ding le CCPur district­a case pending um hai sukfel dan ding, case um huna bawzui dan ding hai an hriltlang.

Inruithei thahnem tak an man nawk
CCPUR:  ZRO/ZRA Drugs  Cell chun  Mr  Lalzui (42) s/o (L) Sanglien of S. Munnuam chu No. 4 Khaini bur sip 5, plastic a infun packet 1, funte 50 dang; WY  mum 50 le SP mum iemzanizat leh an man a, zanikhan chanchinbumi hai hmuin an raw hmang. Inruithei raw hmanga um hi Rs. 80,000/­ vel manhu dinga h isap a nih. Mr Lalzui chun, inruithei hi Pa Lun of Kanan Veng, Tuibuong kuoma inthawk lasawngin New Bazar area­a Robin Hmar kuomah a peksawng hlak niin ZRO/ZRA kuomah an puong.


Manmasi Digest March­-April issue
CCPUR: Manmasi Digest March­April, 2016 issue chu a suok nawk tah. A dit hai chun CCPur khawpui sunga lekhabu/magazine zawrna le Agents hai kuoma inthawk Rs. 30/­a inchawk thei ni tang a tih. Tribal Movement 200 Days, 57th HNU General Assembly, HSA Conference, Thina rapthlak, Al­Qaeda Training camp; Mars ah hringna zawng dingin; Platinum Star Christina  Shakum interview­na le thu dang dang tiem nuom um tak tak tiem ding a um.

PwDs hai ta dinga Entrepreneurship training
CCPUR: Churachadpur District Disabled Union (CDDU) chun Mercy Home/FCC le thangruolin April 9, 2016, 10:30AM a inthawk hin EBC Mini Auditorium, Dorcas Jubilee Hall, New Lamka­ah ‘One Day Entrepreneurship Training for Persons with Disabilities’ huoihawt an tih. Sawrkar­a inthawk hamthatna dawng theina dingin Entrepreneurship training hi Persons with Disabilities (PwDs) hai ta dinga thil pawimaw tak a ni leiin PwDs member hai chu a kim thei ang taka thang dingin CDDU chun inhriettirna le ngenna a siem. “Opportunities for Entrepreneur ti thupui hmangin Pauneithang Valte, Chief Manager, SBI, CCPur in thu hril a ta, CT Lian, MDC in Entrepreneurship ti thupui hmangin thu hril a ta, HIV/AIDS awareness um bawk a tih.

Lekhabu thar hawng
CCPUR: Langgin Tawmbing in “Talent Piak Hikei Leng”­ Book of Tribal Technology” ti hmingchawia lekhabu a ziek chu zani 7:30AM khan Rayburn Collge Auditourium­ah Mr Lunminthang Haokip, IAS, DC, CCPur in a hawng a, Rev. Khen P. Tombing in inhlanna a nei.


Pensioner mi 4 an inthla
CCPUR: Agriculture Department, CCPur hnuoia pensioner 4­ Tunzagin Tungnung, AAO, ST. Paulienvung, EO, T. Chinzalam Guite, VEW le T. Kaikhanthang, VEW hai inthlana zani 11:30AM khan DAO Office, Tuibuong­ah nei a ni a, inthlanain Rice Cooker 1 seng inhlan an nih. Pensioner 4 hai laia Tunzagin Tungnung,  AAO hin kum 39 sung active service a nei a, midang 3 hai hi kum 36 seng thawkin March 1, 2016 khan an pension a nih tiin Lalramlien, Head Clerk in keynote address a hrilna huna a hril.

Bangladesh Commerce Minister Tofail Ahmed in NE­ASEAN Business Summit a hawng
IMPHAL: Ni 2 sung aw ding North East ASEAN (Association of  Southeast Asian Nations)  Business Summit zanikhan Bangladesh Commerce Minister, Tofail Ahmed in khuollien ni pumin City Convention Centre, Imphal­ah a hawng. Hi huna hin Th. Lokeshwar Singh, Speaker Manipur Legislative Assembly functional president in a thang a, O. Nabakishore, Chief Secretary, Manipur le K.S. Kropha, Chief Secretary, Meghalaya hai Guest of Honour in an thang. Chun, hi Summit a hin Phillipines Ambassador, M.A. Teresita, Brunei Ambassador Dato Paduka Haji Sidek Ali, Vietnam   Ambassador Ton Sinh Thanh, Thailand Ambassador Chalit Manityakul, DoNER Secretary Naveen Verma, NEC Secretary Ram Muivah, Indian Chamber of  Commerce palai le mi pawimaw dang dang hai Presidium members in an thang tawl.

Khuollien Tofail Ahmed in thu a hrilnaa chun, NE ASEAN Business Summit hin ASEAN rambunghai ta dingin inlaichinna tha lem, insumdawngtuona tha lem le hmasawnna chi tum tum hai a hung intlun ngei a beisei thu a hril. Manipur mihai hme du zawng Nga a ni leiin Manipur sawrkar le Ngaa sumdawngtuhai chu Bangladesh Nga Manipur a laklut (import) dingin a ngen. Dum le Zu ti lo thil chi tum tum hai chu Bangladesh in India ramah a thawndawk bakah bu le bal thil lem chu rambung hran hran 107 haiah a thawndawk a nih tiin Toffail Ahmed chun a hril. Manipur CM le Manipur Commerce & Industries Minister hai chu Tofail Ahmed hin Bangladesh inzin dingin a fiel.

Hi Summit a Chief Host, Commerce & Industries Minister Govindas Konthoujam in thu a hrilnaa chun, South East Asian rambung­hai chu Manipur thangsain NE biel sunga hung inzin le hung sumdawng rawp hlak dingin a fiel.

Cheiraoba hmang dinghai ditsakna chibai
IMPHAL: Vawisun hin Manipur a cheng Meitei han Sajibu Nongmapanba Cheiraoba Kut hmang an tih. Hi Kut hi state sawrkarin public holiday­a a puong a nih. April 13, 2016 khin Cheiraoba hi hmang nawk an tih. Hi ni haia hin an thei ang ang senga hme inhnik suongin pansak­panthlang hme an inthurtuo hlak. Hi ni hi an Kum Thar Ni (New Year, 2016) a nih.

Vawisuna Manipur state­a Sajibu Nongma Panba Cheiraoba Kut hmang dinghai po po Manipur Governor V. Shanmuganathan, CM O.Ibobi Singh, Dy. CM Gaikhangam, Assembly Speaker Th. Lokeshwar Singh, MPCC President T.N. Haokip le Inner Lok Sabha MP Dr Th. Meinya han hlim le hlawtling taka hmang dingin ditsakna chibai an buk tawl.

Khongjom Day­ah President khuollienin
IMPHAL: May 23, 2016 khin Manipur State sawrkar chun kum dang ang bawkin Khongjom Day ropui taka hmagn dingin an singsa mek. Khongjom Day hmangna huna hin India President Pranab Mukherjee chu khuollien in a thang ding niin DIPR thusuok chun a hril.

Simkhawlei inhning le inzawma workshop
IMPHAL: Jawaharlal Nehru University (JNU), New Delhi le Manipur University (MU) hai thangruolin April 9­11, 2016 inkar sung khin Manipur University­ah Workshop on “Earthquake and Landslides in the Vulnerable Zones Around Manipur” ti thupui hmangin huoihawt an tih. Hi Workshop a thang ve dingin Kh. Siile, Anthony, Director, Human Resource Development and Education, Government of India, New Delhi chu Imphal a hungtlung tah.

Assam 2nd phase election-a candidates hai lai Crorepatis 125  
GUWAHATI: April 11, 2016 nia Assembly seats 61 haia second phase Assam Assembly Election hung um dinga khin candidates 523 an um a, hienghai laia candidates 125 (24%) hai chu crorepatis an nih tiin Assam Election Watch le Association for Democratic Reforms report chun a hril.

A hausa tak chu South Salmara biela AIUDF candidate Badrudin Ajmal niin affidavit­a a zieklang danin a hausakna chu Rs. 54 crore a nih. A dawttu chu Bongaigaon biela Indepdendent candieate  Itesh Bordoloi niin a hausakna chu Rs. 50 crore le pathumna chu Barkhetry biela BJP candidate  Narayan Deka niin a hausakna chu Rs. 17 crore a nih. Report dungzui hin INC candidaetes 57 hai laia 30 (53%); BJP candidates 35 laia 19 (54%); AGP candidates 19 laia 12 (47%); AIUDF candidates 47 hai laia 12 (26%); BPF candidates 10 um laia 6 (60%) le Independent candidates 216 um laia 39 (18%) hai chun an hausakna Rs. 1 crore chuong niin affidavit­ah an zielang. Hi dungzui hin second phase­a canidates 523 hai hausakna chawkruol in candidate hai hausakna hi Rs. 1.26 crore peia hisap a nih.

INC candidates 57 hai hausakna chawkruol Rs. 2.64 crore; BJP candidate 35 haihausakna chawkruol Rs. 2.46 crores; AIUDF candidates hai Rs. 2.44 crores; SUCI(C) candidates 11 hai hausakna chawkruol Rs. 26.43 cfores, AGP candidates 19 hai hausakna chawkruol Rs. 1.37 crores; CPI(M candidates 9 hai hausakna chawkruol Rs.82.64 lakh, CPI candidates 5 hai hausakna chawkruol Rs. 10.88 lakh le Independent candidates 216 hai hausakna chawkruol Rs. 96.94 lakh pei a nih.

J&K­ah helpawl 2 kap hlum
JAMMU: Jammu and Kashmir­a Shopian district, Vehil area­a security forces han dappui an thawnaah Hizbul Mujahideen helpawl 2 an kap hlum. Hi thil tlungna hmun hi Srinagar­a inthawk km. 55 a hla a nih. Helpawl kap hluma um hai chu Naseer Ahmad Pandit le Waseem Ahmad Malla hai an ni a, Hizbul Mujahideen Commander Burhan Wani’s group a mi an nih. An kuta inthawk Rifles 2 le a mu man a nih. Naseer Pandit hi State Public Works Minister hlui Altaf Bukhari Personal Security Officer (PSO) lo ni hlak, Rifle le tlanhmanga Hizbul helpawl zawm a nih tiin security thusuok chun a hril.

World Health Day hmang
NEW DELHI:  Zanikhan World Health Day hmang a nih. Taksa hriselna ngaipawimaw a tulzie hrilhrietna dinga hi ni hi hmang hlak a ni a,  tukum World Health Day thupui chu ‘Beat Diabetes’ ti a nih. World Health Organisation (WHO) report dungzuiin puitling kum 35 le a chungtieng 422 million velin Diebetes an nei niin a hril a, khawvela mihriem 11 peia 1 in Diabetes an nei anga hisap a nih tiin a hril. Sugar level insang hi khawvel mihriem tam tak thipui a ni a, kum tinin 3.7 million vel an thi zie a hisap a nih tiin WHO report chun a hril.

Bank in Mallya rawtna a hnawl
NEW DELHI:  Sumdawngtu hausa Vijay Mallya in Kingfisher Airlines hminga Bank hran hrana inthawk Rs. 900 crore loan a lak, thung lova a umna thua case a nei mek le inzawma Mr Mallya in September, 2016 chenah Banks 17 hai kuomah a bat Rs. 4,000 crores thungkir dinga rawtna a siem chu Bank han an hnawl. Supreme Court chun Vijay Mallya le Kingfisher Airlines chu an hausakna/thil nei April 21, 2016 chena puonglang/ Supreme Court­a pelut dingin an hriettir a, hi thua hearing nawk chu April 26, 2016 in nei ning a tih.

IITs fee sukpung Rs. 2 lakh a sukpung
NEW DELHI:  IITs haia undergraduate course kum khat fee chu academic session thara inthawk Rs. 90,000­ Rs. 2 lakh a sukpung a nih. Hi thil hi kar hmasaa IIT panel meeting nei huna sukthluk a nih tiin Ministry of Human Resources Development official thusuok chun a hril. Hi chungthua hin  Committees chun IIT students tin hai interest bo le security um lova educational loans pek dan ding ngaituo a ni bakah Scheduled Castes/Scheduled Tribe, piengphunga ruolbanlo le insung khawsak harsaa inthawk student hai chun fee an chawi a tul naw el thei tiin ei thu dawngna chun a hril.

Marijuana 1,060 Kg leh mi 3 man
NEW DELHI:  Inruithei chi khat Marijuana a sumdawng  pasal 3, Rohit (22), Sunny (22) of Delhi le Naga Vankat Kumar (33) of Andhra Pradesh hai chu Naraina, South West Delhi le Vijaywada, Andhra Pradesh haiah Police han an man. Rohit le Sunny hai hi Truck hmanga Marijuana 1,060 kg an phur leia man an nih. Mana um Marijuana hi Rs. 1 crore manhu vel a nih tiin Ravindra Yadav, Joint Commissioner of Police (Crime Branch) chun a hril. Marijuana a sumdangnaa lukhaitu tak, Dharambir an ti chu man a ni hmain a lo tlan hmang hman.


Vietnam PM dingin Nguyen Xuan Phuc
HANOI: Vietnam chun zanikhan Nguyen Xuan Phuc chu Prime Minister dingin an thlantling. National Assembly members 490 umah members 446 han Phuc (61) thlawp zawngin vote an pek.  Phuc hi Quang Nam central Province­a Governor lo ni hlak, kum 5 liemtaa inthawk deputy prime minister hung ni a ni a, Communist party’s congress in tukum January thlaa Nguyen Tan Dung thlakthlengtu dinga an lo thlang ta a nih. Tan Dung hi zani hmasa khan a sina inthawk ban a ni tah.

VAWISUN THUPUI
Chuongchun, chi ropuitakah  siem ka ti cheh a, mal khawm sawm ka ti cheh a, i hming sukropui bawk ka tih; nang malsawmna ni rawh.  Genesis 12:2

EDITORIAL: National Food Security Act (NFSA)

Manipur sawrkar chun April, 2016 a inthawk Manipur  a khawm National Food Security Act (NFSA) hmang tan ning a tih tiin a lo puong a. Amiruokchu, tuta Manipur state sawrakr ngirhmun enin tuta  April, 2016 thla sung hin chu hmag hman ni dingin an lang nawh. NFSA hmang theia a la um nawna san bulpui tak chu sum harsatna lei le hi Act hnuoia hamthatna dawngtu dinghai (beneficiaries list) siem fel zo a la ninaw lei niin ei thu dawngna chun a hril. Hi Act hnuoia hamthatna dawng thei dinghai chu Below Poverty Line (BPL) category­a um hai an nih. Hi Act hi hmang a hung ni pha chun mirethei han bufai, chini, khawnvartui le a dang danghai inman takin an inchawk thei ding a ni leiin BPL category a um hai ta ding chun  hi Act a taka hmang thei hun ding nghakhla um takel a nih. Hi lei hin ei state sawrkar le hi thil buoipuituhai hin sukfel tul hai hung sukfel vat vat sienla nuom a um hle.

NFSA hmang a ni huna thla tina Manipur in Food Corporation of India (FCI) bufai a mamaw dingzat le ei state sunga a phurlut tul zat chu metric tonnes 12,000 nia hril a nih. Metric tonne khat chu kg. 1,000 a ni a, chuong a ni chun thla khata FCI bufai ei mamaw zat chu kilograms 1,20,00,000 a hung ni ding tina a nih. Hieng zozai FCI bufai phurtlutna ding chun sum cheng nuoitel le hun tam tak a lut ding a nih. NFSA hlawtling taka hmang a hung ni theina ding chun ei state sawrkarin sum le pai tam tak a mamaw bakah National Highway haiah bandh le economic blockade tihai thaw lo a hung tul bawk ding a nih.

NFSA hmang tan tum a ni leiin FCI bufai state danga inthawk Truck tam tawk takel phurtlung a ni ta a. Amiruokchu, state sawrkarin  FCI bufai man ding hi sum a pek theinaw leiin thla khat deuthaw FCI bufai phur Truck zakhat chuong hai chun an bufai phur Godown haiah an load thlak el thei naw leiin lamlienpui sirah an innghat el a, Truck Drivers le handyman han harsatna namen lo takel an tuok a nih. Hi thil hi state sawrkar ta ding chun thil inzakum le muolphona pakhat niin an lang. Hi chungthua hin sawrkar a chet vat vat a hun hle. Ei thenum Mizoram sawrkarin NFSA tha taka a hmang thei laia iengleia Mizoram neka lien lem le mipui tamlemna Manipur ah ei hmang le sukpuitling theinaw ding am a na ti hi mipuihai indawnna lien takel pakhat a hung ni ta a nih.

Tulaia Manipur ministry buoi  khawm hi NFSA sukpuitling a hung ni theina dinga hmalakna sukhratnawtu a ni el thei. Sawrkar office dawrtuhai chun Department tinah sin thaw a fe hrat thei naw niin an hril. Hi thil khawm hi Manipur ministry buoi hung rasuok a nih. Ministry a buoi a, sawrkar a nghet naw chun sawrkar sin thawna le hmalakna hai a hung tawk buoi hlak a nih. Hi lei hin AICC le MPCC han Manipur Ministry buoina hi an hung chingfel vat a tul a nih. Congress MLA minister chanvo la chang lo hai po po hlak minister chanvo pek kim vawng thei an ninaw ding an leiin lottery system hmangin minister chanvo chang dinghai chu zawng el sienla chu an party le Manipur Congess sawrkar ta dinga thiltha a hung ni el thei. Manipur ministry hi sawidanglam a ni le ninaw khawma harsatna hi chu an party le an ministry in a tuok tho tho ding niin an lang. Hi lei hin an thaw ding ding chu an thaw vat vat thiltha a ni lem ring a um.

NFSA hmang theia a hung um na ding chun state sawrkarin sum tam tak a mamaw a. Hi lei hin ei state a BJP thuoituhai khawmin inhrilsiet le insawisel el lovin Central­a sawrkarna cheltu BJP sawrkar kuomah sum tamlem hung pesuok dingin zu ngenpui sienla thiltha le Manipur mipui hai lawmzawng ning a tih. Hienganga thil thaw hi mipui le ram hmangaitu indik tak hai hmalak dan ding niin an lang. Tawngbau thiem le hmur mistiri ringawt hi chu mipui han an lem thei ta naw a, a nghawkin an nghawk takzet ta a nih.

BPL tia ei hriet hi miretheiah khawm a rethei zuol tak tak, khawsak harsa em em, nitina fakzawnga inhlawfa el chau ni lo, ni khata bu vawikhat fak ding hmu mumal theinaw hai sawmdawlna dinga sawrkar thlungpuiin an duong a ni a. India ram pumpuiah BPL sungkuo tlak hnuoi tieng an pan tiel tiel laiin ei ni state a chun ei pung tuol tuol el hi a pawi a, inzak a um bawk a nih. Kristienhai lem chu hi thila hin khela thil thaw ding ei ni nawh ti hi hriet tlat ding a nih. BPL ni si lo, BPL sungkuo ni nuom a, BPL sungkuo anga inzieklut ei tam taluo leiin ei state a NFSA  hmanga hamthatna dawng dinghai ei sukharsa pha a nih ti inla ei hril suol taluo ring a um nawh.

Post a Comment

Powered by Blogger.