Lampui siemtu ding Tripper 3 tirdawk belsa
CCPUR: Anti­Tribal Bills 3 hai le inzawma indin JAC hnuoia Manipur Tribal Movement Road Construction hmalaknain Sinzawl­ Tuivai leilak inkar km. 14  a sei lampui siet zuolna hai siemthatna sin a fe mek a. Lampui siemna dinga hmang motor indai tawknaw leiin zanikhan Tripper motor 3 tirdawk sa an ni a, Tripper pathum hai hi zani zingkar 7:00AM khan Hmuia Veng­a YMA Complex­ah Rev. Thantluanga, Director, Gilead tlang, Khawnpui chun tawngtainain an thlasuok. Hi huna hin Thanga Tonsing, Spokesperson, MTMRC le H. Mangchinkhup, Chief Convenor, JAC le MTMRC thuoitu hai khawm an thang. Sinzawl­Tuivai leilak inkar lampui siemna hi JCB le Tripper motor hai hmanga siemthatna sin thaw mek a nih.


Hieng laizing hin JAC Against Anti­Tribal Bill inrawinaa CCPur Police Station tuola  sit­in­protest neia um chu sunzam pei a ni a, zanikhan Simveng, Dorcas veng le Sielmat an inthung. March 16, 2016 in Zenhang Lamka, Zomi Colony le Lhangnem inthung an ta, March 17, 2016 in  Zenhang Lamka, Saikawt, Zoumunnuam le New Zou Veng hai inthung an tih.

Hill District Sports thang ding hai vailiem
CCPUR: Hill Districts Sports Association, Manipur (HIDSAM) huoihawtnaa March 14­19, 2016 inkar sunga Tangkhul Naga Long Ground, Ukhrul­a 3rd Hill Districts Sports Meet, 2016 um dinga CCPur District­a inthawk va thang ding player le official hai zani sun dar 11:30 khan G. Thangkhosuanmung, EM, ADCC le Chief, Hiangtam Lamka in CDSA Office tuolah a vailiem.


Zanita vailiem hai hi Women’s Volley Ball players mi 10 le CDSA official hai an ni a, March 15, 2016 hin Men’s Football player hai suok nawk an tih.

Football (men) a champion in lawmman Rs. 1 lakh le Volley Ball (Women) champion in Rs. 30,000+ Certificate dawng an tih.

S. Serto oath taking an va uop
CCPUR/IMPHAL: Manipur High Court­a Additional Judge dinga ruot thar High Court of Manipur Registrar General Songkhupchong Serto (S.Serto) chun zanikhan Chief Justice, Manipur High Court LK Mohapatra hmaah Additional Judge dinga intiemkamna (oathtaking) a nei. Hi huna hin Churachandpur District Bar Association khawmin an va uop. CCPur Bar Association chun Additional Judge, Manipur High Court dinga ruot a nina thua an lawmpui thu an puuong. Ama le hin Manipur HC chun Judge 5 a nei ta a nih. Judges dang hai chu­ R.R. Prasad, N. Kotishwar, Kh. Nobin le Chief Justice L.K. Mohapatra hai an nih.

Relief and Rehabilitation board meeting
CCPUR:  March 17, 2016, 11:00AM khin DC Office chamber­ah District Level Criminal Injuries Relief and Rehabilitation Board meeting um a tih. Hi huna hin  nuhmei suolluina (rape) thua case lut thar hai hriltlang le sawkar­a inthawk thangpuina (financial assistance) hmu thei dan ding hriltlang ning a tih.

SC, ST le OBC ReservationPolicy sukbo ninaw nih: Arun Jaitley
NEW DELHI: March 13, 2016 nia Rashtriya Swayamsevak Sangh (RSS) thuoitu thenkhatin  Reservation Policy chungchanga hril an nei (remarks) chu zanikhan Rajya Sabha­ah Selkaltu members han an ngaimaw thu an hrillang. Hi chungthu hrilhai lai hin SP, BSP le JD(U) members hai an thang. SP thuoitu Ram Gopal Yadav chun reservation Policy sukbona dingin thu phierruk a nih tiin an tum. BSP thuoitu lu tak Ms Mayawati chun, ei ram Constitution­ah SC, ST le OBC hai ta dingin reservation  policy siem pek ding thu chieng takin zieklang a ni a. Amiruokchu, tuhin RSS thuoitu thenkhat chun Reservation policy chungchang hi Economic criteria dungzuia siem le pek dingin rawtna an siem tiin an tum. Hi thu hi zani hmasaa Nagpur, Rajasthan hmuna RSS Organisation’s camp huna RSS General Secretary Suresh Joshi in a hril a nih tiin Mayawati chun a hril.

Reservation chungchang hrillanga a umna le inzawm hin zanikhan Union Finance Minister Arun Jaitley in hrilfiena Rajya Sabha­ah a siem. Mi hausa le neinung hai ta dingin sin le lekha inchukna (jobs & Education) tiengpangah reservation policy um naw raw seh ti chu RSS pawl hril le ngaidan a nih. Reservation policy hi ngaituo nawn a ninaw a, tuta a fe pangngai ang hin fe pei a tih. Hi thil hi sawrkar policy a ni a, SC, ST le OBC reservation policy hi tuta a um ang ang le a fe dan pangngaiin la fe pei a tih tiin Union Finance Minister Arun Jaitley in hi chungchanga zanikhan hrilfiena siemin Rajya Sabha­ah a hril.

Union Minister of State for Parliamentary Affairs, Mukhtar Abbas Naqvi khawmin, reservation policy sukbo ding thu hi RSS khawmin an hril nawh. Reservation policy la fe pei a tih. SC/ST Reservation policy sukbona ding thu a um naw a, RSS khawmin sukbo nekin sukhrat pei a nuom a nih tiin zanikhan Rajya Sabha­ah a hril. RSS hi private organisation an ni a, ieng dinga hi thua hin in lungkham am a nia tiin P.J. Kurian, Dy. Chairman, Rajya Sabha khawmin a hril.

Govt. Polytechnic student han nuorna
IMPHAL: Govt. Polytechnic Students han tulai hin nuorna an nei a, an campus sungah furniture thenkhat an raw siet. Regular class nei ding le an Institute mamaw chi tum tum hai pe dinga sawrkar an ngennaa nuorna hi an nei a nih.

Rs. 50 lakh an ngen nia hril
IMPHAL:  Chief Medical Officer, Imphal West chu KCP(Mangal) group in Rs. 50 lakh an ngen nia hril a nih. Hi thil dodalnain zanikhan CMO, Imphal West Staff 100 velin Medical Directorate, Lamphelpat Gate bulah thungbuma nuorna an nei.

JAC thlawpnain UNC in shutdown
IMPHAL: United Naga Coouncil (UNC) chun March 14, 2016 a “Coffin Rally” nei an tum chu thulin le JAC Against 3 “Anti­Tribal Bills” thlawpnain March 17, 2016 zanrila inthawk darkar 15 sung Naga mihai chengna haiah total shutdown an thaw ta lem ding thu UNC chun an puonglang. JAC in total shutdown an puong hin Water Supply, Electricity, health care, Telecom le Board exam a thang students le zirtirtuhai chu a huomsa naw ding niin JAC chun an hril.

Truck eksiden­ah pasal 1 a thi
IMPHAL: Zani zingkar dar 8 vel khan NH­37, Tamenglong District a Lukhambi Part­II bulah Truck pakhat a eksiden a, lamthlang tienga ruom ft. 200 vela inthu kah a tla thla a, pasal 1 a thi a, midang 3 na takin an hliem. Thina tuok hi Truck Driver Khaidem Naoton, s/o Mocha of Kumbi Waithou Road a nih. Truck hi Rel lampui siemnaa pil phurtu a nih.

Brand ambassador dingin Singhal a ruot
MEERUT: Kum 2015­a UPSC huoihawtnaa Civil Services Examination­a topper nina hautu Meerut nunghak piengphunga ruolbanlo Ira Singhal chu Ministry of Social Justice and Empowerment hnuoia Deparmtent of Empowerment of persons with disabilities Brand ambassador dinga ruot a nih. Singhal hi India rama piengphunga ruolbanlo nuhmei Civil services topper nina hautu hmasatak a ni a, Singhal in topper a hau kum hin top 4 chen chu nuhmei in an lak vawng a nih. Brand ambassador a ni angin Singhal hin departmental schemes le programmes hai promote na kawnga sin a thaw ding a nih.

Israel sawrkarin budget a sukpung
JERUSALEM: Israel sawrkar chun Mizoram le Manipur a Israel hnam (Manashe) intihai Israel rama an inpemlutnaa hmang dingin a budget a sukpung. Budget a sukpung hi 2.2 million Shekels (dollar 550,000 vel) niin Israel Immigration & Absorption minister Zeev Elkin chun a hril. Tu hin Israel ramah hiengang mi hi 3,000 vel an um ta a, tu kum hin 700 vel an inpem lut nawk ding nia hril a nih.  Nikum khan 260 an inpemlut. Israel a inpemlut tum hi Mizoram le Manipur­ah 7,000 vel an la u m a ahril a nih.

Assam­ah Nitish a campaign ding
GUWAHATI: Assam Assembly Election hung um ding le inzawmin JD(U) leader le Bihar Chief Minister Nitish Kumar chun JD(U) candidate hai ta dingin vote a hung campaign ding niin JD­U thusuok chun a hril. JD­U candidate ding hai sukfel dingin JD­U National General Secretary Arun Kumar Srivastav chu zanikhan Guwhati a hungtlung dinga ti a nih.

Israel sawrkarin budget a sukpung
JERUSALEM:  Israel sawrkar chun Mizoram le Manipur a Israel hnam (Manashe) intihai Israel rama an inpemlutnaa hmang dingin a budget a sukpung. Budget a sukpung hi 2.2 million Shekels (dollar 550,000 vel) niin Israel Immigration & Absorption minister Zeev Elkin chun a hril. Tu hin Israel ramah hiengang mi hi 3,000 vel an  um ta a, tu kum hin 700 vel an inpem lut nawk ding nia hril a nih.  Nikum khan 260 an inpemlut. Israel a inpemlut tum hi Mizoram le Manipur­ah 7,000 vel an la u m a ahril a nih.

India in Agni­I ballistic missile a ensin
BALASORE: India chun zani zingkar 9:15AM khan Odisha­a Integrated Test Range (ITR) Launch Pad­4, Abdul Kalam Island (Wheeler Island) a inthawk nuclear ralthuom phurtu surface­to­surface  Agni­I ballistic missile hlawtling takin a ensin. Agni­I hi kms.700 a hla kap phak ding, tonnes 12 a rik, metres 15 a sei a ni a, a thil phur sukzang chun hi neka hla kap phak thei a nih. Agni­I hi DRDO­a  Advanced  Systems Laboratory in Defence Research Development Laboratory le Research Centre Imarat le thangruola an siem Bharat Dynamics Limited, Hyderabad in a remkhawm a nih. November 27, 2015 khawm khan hi lai hmun bawka hin hlawtling taka ensin a lo ni tah.

Hindu nunghak neuhmeia a nei leiin Dalit tlangval vuok hlum
TIRUPUR/CHENNAI:  Tamil Nadu­a Tirupur district, Udumalpet hmuna chun March 13, 2016 khan  Dalit  tlangval V. Shanker (22) chu  pasal pathum han bazar mipui tamna hmunah Dawr tuolah  an sawisak hlum. V. Shankar beitu hai hi pasal pathum motorcycle­a chuong an ni a, hi thil tlunga hin a nuhmei S. Kausalya (19) khawm na takin a hliem. V.  Sanker hin Hindu nunghak  nuhmeia a nei leia  vuokhlum ni dinga ring a nih (honour killing). Sanker hi hospital panpui lai meka thi a ni a, a nuhmei hi a luah na taka a hliem leiin Coimbatore Govt. Hospital­a admit a nih. Sanker le a nuhmei hai beinaa hin an innei ding remtilotu a nu le pa hai khawm an inrawl ring a nih. Sanker hi Kumaralingam, Dindigul district mi a ni a, Pollachi­a private engineering college a inchuklai  niin a nuhmei nu le pa han an remtinaw saa thla iemanizat liemtaa kha innei an nih. Hi thil tlung thua hin a nuhmei (Kaushalya) pa chu Police kuta an pe ta a, mi thattu hai hi CCTV a record vawng a ni leiin man vat an ni beisei a nih. Tuolthattu hai man dinga ngenin a ruong hi a sung han an la lak nuom nawh.

NPF candidate khingtu um lova tlinga puong
KOHIMA: Nagaland­a Rajya seat 1 uma inthlangna um dinga nomination paper file­tu umsun NPF candidate KG Kenye chu khingtu um lovin thlangtlinga puong a nih. Withdrawal hun a tawp le inzawma state Assembly secretariat a Secretary le Commissioner N. Benjamin Newmai in KG Kenye hi khingtu um lova  tlinga zanita a puong a nih.

TMC supporter a ke pahni tanbawng pek
KOLKATA: West Bengal­a chun Trinamool Congress (TMC) supporter le Councillor hlui Sambhunath Kaw inthlawppui Rahul Roy (38) chu group thenkhat han thirtluon hmanga vawin an sawisak bakah a ke an tanbawng pek. Roy hi Tangra Police station huom sung­a Debendra Dey Road­a cheng a nih. Police chun party sunga inremnawna leia tlung a nih tiin an hril. Roy hi Seladah le Ulatdanga hmuna Rel lampui sir laia March 13, 2016 a kha hmu a ni a, a ke pahni hai chu a khup hnuoi chara inthawk tanbawng a ni a, NRS Medical College and Hospital panpui niin hi hmuna hin enkawl mek a ni a, a ngirhmun a thanaw hle a hril a nih.

Rahul Roy hi tuta hmain tuolthatna case le inzawma man le jail­a intang, tulai hnaia bail­a suok a nih.

LS Ethics committee in Rahul kuomah notice
NEW DELHI: Lok Sabha Ethics Committee chun Congress Vice President Rahul Gandhi chu a nationality issue thuah notice an pek.Nikum November thla khan BJP leader Subramanian Swamy chun hi thua hin document a lo puongdar ta a, chu dungzui chun Rahul Gandhi hin UK a company indinna dingin British mi nina a nei niin a ziek. Hi thua hin Committee chun legal papers­ah Rahul hi British citizen niin a lo insal  ta le  insal naw hrilfie/dawnna pe dingin an hrietir a nih.

Sungkuo 21 an chengna in hai an suoksan
RAIPUR: Chhattisgarh­a Narayanpur district sunga khuo tum tuma cheng sungkuo 21 hai chu Maoist hai vauna leiin thla khat le a chanve liemta sung khan sungkuo 21 han an chengnain hai an suoksan tawl. Maoist hai hin hi khuoa cheng hai chu Police­a thu pesawngtu an nih tia intuma an khuo suoksan dinga an vau leia an chengnain hai suoksan an nih.

Pak. in Ngamantu 86 a hung insuo nawk ding
AHMEDABAB:  Pakistan chun March 21, 2016 khin India Ngamantu a hrentang 86 hai Karachi prison(jail) a inthawk a hung insuo nawk ding niin Gujarat goverment official thusuok chun a hril a, March 22, 2016 khin Wagah border hung tlung an tih tiin a hril. Hieng Ngamantu hai hi the Pakistan Marine Security Agency (PMSA) in International Maritime Boundary Line dan bawsiea Pakistan tuipuiah Nga an man ti leia a man le hrentang a nih. March 7, 2016 khan Pakistan chun India Ngamantu 87 hai a lo hung insuo ta bawk a nih.

SAARC ministerial meet­ah Sushma Swaraj 
NEW DELHI:  March 14­17, 2016 inkar sunga Nepal rama SAARC ministerial meet­a thang dingin External Affairs Minister Sushma Swaraj chu March 16, 2016 khin Nepal­ah inzin a tih. Ministerial meet nei hma hin Pokhara (Nepal) hmuna Programming Committee of SAARC session um a ta, March 16, 2016 in Standing Committee of SAARC (Foreign Secretaries­level Forum) meeting um a tih. Ministerial meet­a hin SAARC rambung tum tum haia Foreign Ministers hai thang an tih.

Pak.­ah ruosur leiin mi 31 an thi
ISLAMABAD: Pakistan­a chun tulai hnaia ruo nasa taka a sur leiin mi 31  in thina an tuok bakah midang 47 in hliemna an tuok. Ruosur leia thi hai laia 17 hai chu Balochistan a thi an ni a, 13 dang hai chu Khyber­Pakhtunkhwa province a thi an nih tiin Pakistan Disaster Management Authority thusuok chun a hril. Ruosur hin In 53 a suksiet ta bakah South Punjab­a chun thlai nasa takin a suksiet bawk.

Ankara­a bomb puokah mi 44 an thi
ANKARA: Zani hmasa khan Turkey khawpui Ankara hmuna thichil bomb puok leiin mi 44 an thi bakah midang 125 in hliemna an tuok. February 17, 2016 khawm khan sipai hai bei tuma thichil bomb sukpuok a ni leiin mi 29 in thina an lo tuok ta bawk a nih.

VAWISUN THUPUI
Nangni khawm inring zingin um ro, in ring naw hunah Mihriem Naupa  chu a hung ding a ni sih a,” a ta.~ Luka 12:40


Editorial: Nun uluka hmang tha ding ei nih

Khawvel mihriem hai hi ei hmel put dan an ang naw ang bawkin ei dit dan, ei nuom dan, ei ngaidan, tha, mawi le nal ei tizawng hai khawm an ang naw seng a. Hiengang bawk hin ei nun dan khawm an ang tawl naw hle. Thenkhat chun mihriem nundan pangngaia um le khawsak ei nuom a, thenkhat chun mihriem nundan pangngai ni lo le mihai neka danglam deu a um le khawsak hi ei nuom zawng niin an lang. Tulaia thalai le tleirawl hai lai hin nun uluk tam tak an um laiin, nun uluk lo, nun inthlada tak tak, mani hmakhuo ding le hun sawt a seia ding ngaituona nei der lova khawsa an tam deu deu el hi a pawi em em el a nih. Nun luluk le mani nun hmang that a tulzie le nun uluk lo, nun inthlada le nun hmang suol a pawi zie hai hi uor taka ei inhril hriet a tul bek bek a nih.

Nun uluk lova hmang suol ei tam ta leiin nu le pa tam lem hai chu beidang takin an tap tlawk tlawk el ta a nih. Thaw ding mumal tak nei lova nitin a khawlaia invak vel mei mei, zan a sawt le sawt lo ngaituo lova khawlaia invak invak kuol thalai hmu ding an tam dana inthawk hin thalai han ei nun ei uluk nawzie a suklang chieng hle. Thaw ding mumal nei lova khawlaia invak hrut mei mei le zan sawt tak tak chena khawlaidunga hmu theia um hlak hai hi chu a tlangpuiin mi tha le mi fel pangngai an ni ngai nawh. Hi lei hin khawtin le veng tin hin khawlai leng mei mei, a bikin zan sawt hnunga khawlai leng hi khap nisienla chu suolna le rukrukna thil hai lakah ei him pha lem ngei ring a um.

Churachandpur town sunga hin drugs addict, Zu ngawlinvawi, nu le pa nei lo, sungkuo kawidar le sawnnau an pung pei a, ngaimaw tham an um ta a nih. Ngaimawna chang ei hriet naw a, ei en liem mei mei el chu a la ni si hi! Hi thil hin ei insung, ei khawtlang le ei hnamah kakhawk thalo tak el an tlun mek a, tosan el chi a ni naw a, ngaimaw a ei nei a hun ta takzet a nih. Ei ram le town sunga cheng hnam dang hai hi ei ni rawi angin an khawsa ve naw a, an nun an uluk a, zingkar inhma taka thoin nisa tlak chenin sin an thaw a nih. Khawlai leng mei mei le zalen taka nun hmang an um nawh. Ei ni rawi chu inhnu takin ei ei zal a, inhnu takin ei tho nawk hlak. Thalaihai le tleirawlhai hi ei kut le ke ngeia ei ngir hun a la hungtlung ding a ni a; ei hmakhuo ding ngaituona chang hriet ve a hun ta takzet a nih.

Tattoo ei ti dam hin thalai tam tak lungril a lak a, a thatna le tangkaina um der naw sienkhawm thalai le tleirawl hai lai hin tattoo nei le ngaisang an tam ta hle a, hi thil khawm hi ngaitha el chi a ni ta nawh. Tattoo neihai chu sipai le Police ding khawma dit an ni nawh ti hi tattoo ngainatu thalai le tleirawl hai hin an hriet a, tattoo laka an inthier filhlim a tul a nih. Tattoo tam deu neihai hi hang en le hmu ringawt khawm hin mi tha pangngai chu niin an inlang thei nawh. Mi inlar, celebrities han an thaw hi a huntawkah ei ngai a tul. Film star, singer etc inlar tak tak han an thaw ve lei ela lo entawn chi a ni nawh. An ni rawi ta ding chun a pawina a umnaw el thei. Amiruokchu, ei ni rawi ta ding chun a hmangna ding a um der nawh. Ei harsatpui lem a nih. Sin la zawng dinghai lem chun tattoo hi thaw lo tawp ding a nih. Sin zawngnaah harsatna siemtu chau ni lovin tling nawna thei a nih ti hriet ding a nih.

Punk deuva inchei dam hi thalai le tleirawl thenkhatin an uor a. Ei thalai le tleirawl hai lai khawm hi thil hin bu a khuor mek. Hi thil hi ngaisang chi a ninaw leiin nu le pa hai khawmin ei ngaimaw hle nuom a um. Ei nauhai punk deuva an inchei ta chun indiknawna an nei ta ti hriet ding a nih. Mihriem nun suksetu pakhat a nih ti inla ei hril suol taluo ring a um nawh. Punk deu a inchei hlak hai hrim hrim hi mi tha pangngai an ninaw a, nu le pa hai thunun zo ta lo an ni tlangpui hlak. Punk hung suok tanna khawm mi um tha nuomlo haia inthawk a nih. Mi nungchang tha le mi tha hai punk deua inchei an um ngai nawh. Nun uluk lo le mi lepler hai incheina a nih.

Thalai le tleirawl hai nun dan tha lo hi ngaimaw ding a nih. Ei thalai le tleirawl hai hi san tlak an la nih. Amiruokchu, hi thila hin ei thangruol a, thiem taka a thatnaw zie ei hril hriet a tul em em a nih. Khawvela hin mi tha lo nekin mi tha ei la tam lem a nih ti hi hriet ding a nih. Khawvel hi mi tha lo hai leiin a ralmuong naw a, mi thenkhat ringumnawna leiin ei khawtlang, ei ram, ei insung a rinum pha a nih ti ruok chu a chieng. Ei nun hi ei hmang uluk phawt chun mi tha le fel tam tak an la hung suok pei ding a nih.Thil tha lo le suol ei tihai hi nun uluk lo lei, nun dan hrietnaw lei le nun inthlada leia hung um hlak a ni leiin ei nun hi uluk seng ei tiu.

Post a Comment

Powered by Blogger.