JAC in darkkar 15 Total Shutdown/bandh an thaw ding
CCPUR: Manipur Assembly in August 31, 2016 nia Anti Tribal Bills 3 a passed hai dodalna le inzawma indin Joint Action Committee (JAC) chun Tribal Movement fe mek  March 18, 2016­a ni 200 a tling na le inzawmin March 17, 2016 zanril­a inthawk March 18, 2016, 3:00PM sung darkar 15 CCPur khawpui sungah Total Shutdown/Bandh an thaw ding thu an puong a, Martyrs hai inzanain  Bandh sung hin khawpui sunga Dawr le bazar hai bakah establishment tin hai khar vawng ning a ta, motor inlawn phal ninaw nih. Chun, March 18, 2016, 9:00AM in Licensed silai nei tribal hai chu mani In chita silai hlo hmanga Tribal Martyrs hai inzanaa mani silai hai lo kappuok (Gun Salute) dinga ngen an nih. Zanting 5:00PM in Public Ground­ah Tribal hai sunna le mipui tawngtai ruolna hun hmang ni bawk a tih tiin JAC thusuok chun a hril.

Tribals hai thil ngen state le centre sawrkar han an sukpuitling hma chu movement fepui pei a ni ding thu JAC chun hrilin mipui hai thlawp seng dingin an ngen.

Khuo 6 hai kuomah Bawngte an sem
CCPUR: Dr Rosangzuol Khawlum, Joint Director, Vety. Dept., CCPur chun zani zantieng 1:30PM khan Tuibuong­a Vety Office­ah thlangsuok (selected) khuo 6 hai kuomah Bawngte (Jersey & Holstein Friecian) inhlanna a nei.



Dr Rosangzuol Khawlum chun, Saihenjang lal H. Doungel thangin Muolvaiphei, Kawnpui, Tangnuam, Rengkai le Thingkangphai  khuo haia beneficiaries hai kuoma bawngte hi inhlan a nih tiin a hril a; Bawngte hai hi Manipur Livestock Development Board fethlenga sem a ni thu a hril.

Dawrkai hai ta dinga awareness nei
CCPUR: Zani zantieng 2Pm khan Hiangtam Lamka YPA GHQ Hall­ah SBI/CCPur le LATSEA hmalaknain CCPur khawpui sunga Dawrkai hai ta dingin Bank hmang tangkai dan ding le hamthatna um hai chungthuah inhrilhrietna nei a nih. Hi huna hin Lunminthang Haokip, IAS, DC/CCPur; CT Lian Guite, Convenor, LATSEA; S.Thienlaljoy Gangte, SDO/CCPur; Thangchinkhup Guite, DDM, NABARD; S.Thangthiankham Ngaihte, RMME, SBI; Songliankhual Hangzo, Credit Officer, SBI  han thuhrilna hun an hmang.



DC/CCPur chun, Economy hmasawn na dingin Private Entrepreneurship  tamlem thaw a tul thu, chu dingin Bank­a loan lak ding; loan latu hai Bank hai ringzoa um ding a ni thu a hril. CCPur economy hma a sawn theinaw nasan chu law & order thatnaw leia dawr hai zan inthim hmaa khar hlak an ni lei a nih tiin a hril. PMEGP loan hni, training­a thang lo hai pek/thlang an ni tanaw ding thu a hril bawk.

1st Manipur Industrial Expo  
CCPUR: Make in Manipur campaign 2016 le inzawmin  April 4­10, 2016 inkar sung khin Lamboi Konang Khong, Imphal­ah ‘First Manipur Industrial Expo­2016’ a um ding a ni a, hi taka thang/dawr/stalls hawng nuom Weavers, Artisans, Entrepreneurs, Small & Medium Entrepeneurs Society, NGOs Association, Service Provider Hotel  le mimal hai ta dingin March 19, 2016 chenin www.dcimanipur.gov.in­ah online application peklut thei ning a ta, hard copy khawm district tina DIC office haia peklut thei ni bawk a tih. Thu chieng lem GM, DIG, CCPur Office­a hriet thei ning a tih.

3rd Hill Dist. Sports Meet
CCPUR:  March 14­19, 2016 inkar sung khin Tangkhul Naga Long Ground, Ukhrul­ah Hill District Sports Assn. Manipur huoihawtnain 3rd Hill District Sports Meet­2016 um a tih. March 15, 2016 12:00 in Opening Ceremony um a ta, Chief  Guest in Hrishikesh Modak Arvint, IAS, DC Ukhrul thang a ta, Guest of Honours in D.Gangmei, MCS, Addl DC Ukhrul; Col David S.Nehemiah, CO 47th Assam Rifles le Ningshem Vashum, IPS, SP/Ukhrul hai thang a ta Functional President in P.Raghumani Singh, President AMFA thang a tih.  Opening match ah Dist. Sports Assn.Ukhrul v/s Dist. Sports Assn. Sadar Hills inkhel an tih.

Review meeting 
CCPUR: March 16, 2016, 11:30AM khin DC Office­a BRGF Resource Centre­ah CCPur District­a Bank hai le inzawmin District Consultative Committee (DCC)/ Dist. Level  Review meeting um a tih. Hi huna hin Bank han Dec. 31, 2015 chena CD Radio le Dist. ACP 2015­16; Govt. Sponsored Scheme tum tum; Annual Credit Plan 2016­17; Dist.ATM ngirhmun; RSETI sinthawna le a dang dang ennawn an tih.

School tum tum inspection an thaw
CCPUR: Mr Kaikhanlian Guite, Dy. Inspector of School, CCPur Block le staff hai chun zanikhan St. Pauls Institute, Ebenezer Academy, Rayburn H/S le V.K. Tawna High bakah St. Peters H/S hai sirin inspection an thaw. Govt. teacher private school a thawk an um am, kangmei suok pal thuta hmang ding fire extinguisher an nei am ti le school infrastructure ngirhmun hai an enfel.

PM in Bill pawimaw hai pass a ni theina dinga thlawp dingin RS member hai a ngen; 
Opposition hai ngenna leiin Motion of Thanks amendment thawa pass a nih
NEW DELHI: Rajya Sabha­a chun zanikhan Parliament Joint Session­ah President thuhril motion of thanks hriltlang a nih. Hi huna Prime Minister Narendra Modi in thu a hrilnaah Goods and Services Tax (GST) Bill thanga Bill pawimaw tum tum Lok Sabha passed tasa hai pass le hmang vat an ni theina ding thlawp dingin Rajya Sabha member hai a ngen. President thuhril hriltlangna huna PM chun, President in member hai kuoma thurawn a pek chun ra tha tak an suo a, Lok Sabha le Rajya Sabha inthung khawm a fe tluong hle a nih tiin a hril. India rama education tiengpanga hmangruo that tawknaw chungchang ngaimaw a tul thu le hi kawnga chona um hai hneban a tul thu; state 5 haia Assembly election um dinga seats 100­ah 30 ziek le tiem thiemlo candidate hai ta dinga hau chungchang ngaituo dingin political party tum tum hai a ngen.

Hieng laizing hin sawrkarin President thuhril Motion of Thanks a ni ang anga pass dinga ngen a ni hnung khawma Opposition Leader Ghulam Nabi Azad in point pakhat­ local le panchayats elections a candidates hai minimum qualification chungthuah amendment thaw dinga a moved leiin vote lak a ni hunah amendment thlawp zawngin votes 94 le amendment thlawpnaw zawngin vote 61 a tla a, sawrkarna siemtu NDA chu Rajya Sabha­ah minority an ni si leiin Oppostion han hratna an chang a, President thuhril Motion of Thanks chu amendment thawin passed a nih. Amendment zanita passed­a um hi President kuoma thawn kir a ni ding a nih.

Panchayat le Local Bodies election­a ngir ding hai pawl ni ding zat bituka um chu, zani hmasaa Womens Day le inzawma Congress President  Sonia Gandhi in thu a hrilnaah dit lovin sawrkar chu ennawn dingin a lo ngen ta hrim a nih. Tuta tum hi Goverment Motion of Thanks amendment thaw­a a um vawi 5­ na a nitah. Nikum khan corruption le black money thuah Opposition han sawrkar chu Motion of Thanks amendment a lo inthawtir ta bakah kum 1980, 1989 le 2001 haia hawm khan  goverment’s motion of Thanks amendment thaw a lo nitah.

Imphal­ah bomb a puok
IMPHAL: Zani zantieng dar dar 7 vel khan Imphal­a Khoyathong hmuna Punya Activa Shoroom, near ABC Godown bulah bomb a puok a, sienkhawm thi le hliem an um thu hriet a ni nawh. Dawr kawrkhar Shutter a suksiet met bakah showroom sunga two wheeler window glass panel thenkhat a sukkawi met. Hi thil tlung huna hin showroom sunga tukhawm an um nawh.

Education (U) Office an kal  
IMPHAL:  Thoubal College Stduent hai chun zani zantieng 12:30 khan Department of Education (U) Office an kal. Thoubal College Students’ Union (TCSU) General Secretary, Oinam Arjun Singh chun, an thil ngen hai sukpuitling pek an ninaw leia Office gate hi an kal a ni thu a hril a; an College in nuhmei le pasal hai ta dingin a hrana toilet an neinaw leiin harsatna an tuok hlak  bakah thuneitu hai chu department tina staff indaitawk pe dingin kum 4 liemtaa inthawk khan TCSU chun a lo ngen ta a, sienkhawm tuchena an thil ngen deparment in a la ngaisaknaw dodalnaa hi thil hi an thaw niin a hril. Director of Education (U) tuolah sit­in­protest an nei iemanichen hnungah Director an inhmupui a, Dirctyor chun an thil ngen toilet hran an hmatienga bawl dingin a tiem bakah zantieng khan College Principal O. Chaoba Devi le Education Minister hai khawm an inhmupui.

State Level Farmers Exhibition tan
IMPHAL: Ni 3 sung aw ding State Level Farmers Exhibition chu zanikhan Iboyaima Sumang Leela Sanglen, Palace Compound­ah tan a nih. Hi huna hin Undustries minister Govindas Konthoujam  khuolliena thangin  exhibition hi a hawng. Tuta financial year sung hin Manipur­ah Honey processing Unit indin a ni ding thu Govindas Konthoujam chun a hril.

KSA in musician le singers thenkhat an ban
IMPHAL: Kangleipak Students’Association (KSA) chun Class X le XII exam fe meka student hai sukbuoi thei ding  musical event le dang dang hai exam zo hma chu tukhawma thaw lo dinga an khapna bawse­a zani hmasa zana hmun tum tuma musical event nei a ni le inzamin singers, musicians le band thenkhat ban an puong. Ban an puong hai lai Sadananda,Kunjabihari, Tingku, Chitra, Kajal, Payal, Laxmi, Jina, Bomber, Rupachandra, musical bands­KoG Music, SIM music, Samu Salai le equipment firms­ Imo Sound, Pari Sound and Ema hai an thang a. Ni 2 sung ngei  Sega Road­a an office a volunteers hai inhmupui ananwleh 8415990587 a biepawp dingin an inhriettir.

Riel leiin Rajasthan­ah mi 5 an thi
JAIPUR: Rajasthan­a chun tulai hnaia nasa taka ruo le riel inthuo a sur le tlak leiin  district tum tu ma  khuo 1007 haia thlai nasa takin a suksiet bakah mi 5 in thina an tuok a, midang 2 Tekin a deng hliem tiin state Disaster Management and Relief Minister Gulabchand Kataria chun zanikhan a hril. Thina tuok sungkuo 4 hai kuomah zangnadawmna Rs. 4 lakh seng pek an ni a, thina tuok pakhat chu a sunghai hrietchieng an ni huna pek ning a tih tiin a hril.

PM in Bangladesh­a power supply­na a hawng ding
AGARTALA:  Prime Minister Narendra Modi chun March 23, 2016 khin Tripura­a inthawk  Bangladesh kuoma electrict power 100MW supply­na ding remote control hmangin hawng a tih. Hi ni ma hin Bangladesh Prime Minister Sheikh Hasina chun India kuomah 10GB Internet bandwidth  pe ve thung a tih tiin Tripura Power le Communication minister Manik Dey chun zanikhan reporter hai kuoma a hril.

Hi thila ding hin formal taka function um naw ni a, video­conferencing fethlengin program hi hmang ning a tih tiin Dey chun a hril. 10GB Internet bandwidth India rama Mumbai le Chennai thangin Tripura chu India rama hiengang international gateway (internet) nei state pathumna ding a nih. Hi thil hin NE a Telecom service nasa takin a sukhrat pha ding niin Telecom minister Ravi Shankar Prasad chun a hril. Hi thil hi BSNL le Bangladesh Submarine CableCompany Ltd. han agreement an nei dungzuia thaw ding a ni a,Agartala hmuna broadband connectivity indin ning a ta, hi thila ding hin Rs. 19.1 crore seng dinga riruong a nih.

June 18­ah nuhmei fighter pilot 3 IAF­ah
NEW DELHI:  June 18, 2016 khin nuhmei fighter pilots 3 hai chu Indian Air Force (IAF) ah laklut ning an tih. Anni 3 hi India rama nuhmei Fighter Pilots, IAF a laklut hmasa tak ding an nih tiin Air Marshal Arup Raha chun a hril. Nuhmei pathum hai hin second phase training an nei mek a, June 2016 khin training zo fel an tih. IAF hin nuhmei officers 1,350, Army Officers 1,300 le Navy officers 450 a nei mek. India sawrkarin sipai a neizat chu 1.3 million a ni a, hi laia 59,400 chu Officer an nih tiin official thusuok chun a hril.

Enthlatua thang Army 3 man
NEW DELHI:  Kum 3 liemta khan India ramah Pakistan ram ta dinga enthlatu sin thaw, Army a thanglai pathum bakah enthlatua intum sipai pension mi 7 man an ni ta tiin Union Defence Minister Manohar Parrikar chun zanikhan Rajya Sabha an hriettir. Enthlatu­a thang hai hin India rama army umna hmun, an training dan, an invak vel dan, senior army officer hai hming, tactical number le a dang dang hai Pakistan kuomah an hrilsawng hlak niin Parrikar chun a hril.

Miz. in nuhmei MLA 3 an nei tah
AIZAWL: Mizoram chun nuhmei MLAs 3 an nei ta a, Nagaland ruok chun nuhmei MLA pakhat khawm an la nei naw a, Rajya Sabha a ruok chun nuhmei MP pakhat an lo nei ta ve thung. Mizoram Union Territory a ni lai kum 1984 khan Mizorama nuhmei MLA hmasa tak dingin K. Thansiami chu MPC ticket in thlangtling a ni a. Kum 1986­a state puitling a hmu hnung 1987 khan C. Lalhlimpuii chu MLA a thlangtling nawk a ni a, Laldenga sawrkara khan Cabinet minister a ruot a nih. Chun, kum 2014 khan C. Lalawmpuii (35) chu Congress t6icket in MLA a thlangtling nawk a nih. Kum 1963 a state puitling hmu tah Nagaland chun nuhmei MLA an la thlangtling der naw a, kum 1970 khan Ms Rano Shaiza chu Nagaland­a inthawk nuhmei MP (RS) hmasa tak dinga thlangtling a nih.

Mamata khingtu dingin BJP in  NC Bose tupa
NEW DELHI: West Bengal Assembly Election hung um dinga hin BJP chun Chief Minister  Ms Mamata Banerjee khingtu dingin Netaji Subhas Chandra Bose tu/tusawng Chandra Kumar Bose ruot an tum thu zanikhan Union H RD minister Ms Smriti Irani chun a hril.

Mr Bose (55) hin Kolkata­a  party president Amit Shah in rally a nei huna Amit Shah an hmupui zo January thla tawp laia kha BJP zawm a ni a, BJP CM candidate a ni el thei bawk tiin Irani chun a hril a, party in thutlukna la siem a tih tiin a hril. Ms Mamata Banerjee hi Bhawanipur A/C a ngir tum a nih.

SPUNER Office bawlna dingin Rs. 23.25 crore a sanctioned
NEW DELHI: Ministry of Women & Child Development chun, Delhi Police Special Unit for North East Region (SPUNER) office, Nanakpura, New Delhi hmuna indinna dingin Rs. 23.25 crore a sanctioned tah. Hi thila ding hin sawrkar thlungpui chun ram 1.21 hectares a lien a pek taa, office building hi NBCCL in an design a nih.

Nodal Officer for NE region le IGP Robin Hibu, IPS chun, office building bakah auditorium, counselling hall, legal aid centre, research and library, self defence training hall bakah information and social media centre hi khawm a um vawng ding thu a hril. Delhi Police chun Women Police commandos hai enkawlnain anti­eve teasing flying squad indin a tum thu Robin Hibu chun a hril bawk. Office complex bawlna ding lung phumna nei vat ni tang a tih tiin a hril.

Hieng laizing hin NE mi hai ta dinga special recruitment neia uma thlangsuok thalai 450 hai chun sin an zawm vat ta ding a ni a, hi le inzawm hin candidates hai kuomah formal appointment letters thawn an ni tah thu le April 4, 2016 chena mani training–na ding hmun haia report dinga inhriettir anni thu Robin Hibu chun a hril bawk. Pasal hai Delhi Police Training School, Wazirabad, North Delhi­ah training an ta, nuhmei candiate hai Delhi Police Female Training School, Dwarka hmuna training an tih.

Bank­a inthawk Rs. 1.27 lakh inrukhmang
JOWAI: Meghalaya­a Jowai hmuna Punjab National Bank, Saipung Branch chu tu ti hrietlo ralthuom chawi han silai le chuktuoin an rawk a, Bank­a inthawk Rs. 1.27 lakh an lak hnungin an inrelhmang.  Branch Manager Paban Kumar Das chun, hmaituom ralthuom chawi han thawktu hai silai leh chuktuoin vau a, an thu le hla lova pawisa hi an lakpek a ni thu a hril a, hi pawisa hi an customer pakhatin bank­a a hung thun a ni thu a hril bawk.

Ganja kg. 5.98 leh  man
AIZAWL: Mizoram Excise and Narcotics Department officials hai chun zani hmasa khan Rangvamual­ah nuhmei pakhat Ganja kg. 5.98 a rik leh an man a, ND&PS Act hnuoia case an siem khum. Ganja le mana um hi Bisno Rong (38) of Naisingpara Bru Relief Camp, North Tripura district a ni a, Ganja mana um hi Rs. 9,000 manhu vela hisap a nih.

Pvt. Bus Driver le conductor in   kum 28 mi an suollui
BAREILLY: March 7, 2016 zan khan Bareilly­a Sheeshgarh village a chun private Bus driver le conductor hai chun nupui kum 28 mi an suolhrawn a, a naute thla 14 mi chu hnuoi dengnaa hmangin an sukhlum. Nupui hi Rampur mi a ni a, Khapuriya hmuna an sungkuo function­a va thang a hung kir tieng a tumna ding hmun a tlung ta leia Bus sukchawl dinga a ti hunah driver le conductor hai hin mana an suolhrawn, a naute chu hnuoi dengnaa an hmang thu nupui hin Police kuomah a hril. Nupui nu hi a pasal le khawsung mi han nasa taka an zang hnunga bus station bula khaw hrel lova uma an va hmu a nih. Hi le inzawm hin Police chun FIR an registered bakah driver Ishwari Lal le conductor Pannu hai an man a, nuhmei suolluina le tuolthatna case an siem khum.

VAWISUN THUPUI
Mi fel famkim chu a felna chun a lampui kawkhmung a ta, Mi khawhlo ruok chu a khawhlonaa ngei chun tlu lem a tih. ~ Thuvarhai 11:5

Editorial: Ei dan le rights hai hi

Ei hriet seng angin sawrkar, khawtlang, pawl, Companies, educational institutions le a dang dang hai hin dan zawm ding (Acts/Rules) an nei seng. Hieng dan hai hi zui le zawm dinga siem an nih. Hieng dan hai hi mi tha pangngai hai chun an zuiin an zawm hlak. Dan siem sa zui le zawm nuom lo hai chu misuol, mi lulul le mi hnawksak an ni tlangpui hlak. Chun, rights, dan le order hai hrim hrim hi mithiemhai le sawrkar ei ti han ngun taka an ngaituo hnunga tha ngei dinga an hriet leia an siem a nih. Dan le dun annawleh order ei ti hai hi mi tha pangngai hai ta dinga siem ninaw sienkhawm a pawina ding a um nawh. Amiruokchu, mi tha lo le suol an um hlak leia siem an nih ti inla ei hril suol taluo ring a um nawh. Khawvel a ni a, a famkim nawna lai chu um thei a tih. Amiruokchu, dan hnuoia kun num naw chu mi tha an ni thei naw tlangpui.

India rama hin dan tha tak tak el ei nei bakah mipui hmakhuo ngaina leiin sawrkarin rights chi tum tum a mi pek a, thiltha le thil lawmum tak a ni laiin hmang suol hi a um hlak leiin a pawi a, hi hmang suolna lei hin mi thenkhatin harsatna le rinumna an tuor pha hlak. Dan le rights hmang suol hi thil tha lo, mihriem ta dinga harsatna le sietna intlun thei a ni leiin hmang fimkhur chu a tul takzet a nih. Ei rama democracy le power ei ti hai khawm hi hmang suol a ni rawp hlak.

Naupang han rights an nei hi a tha a, lawmpui an um hle. Amiruokchu, ei rama ngei khawm hi rights hi hmang suol chang a um hlak niin an lang. Hmangsuol a ni hlak leiin a chang chun educational institution le zirtirtu han harsatna, hmingsietna le muolphona hai chen an tuok pha hlak. Naupang annawleh students han rights an nei ang bawk hin inchuknain neitu le Zitirtuhai khawmin rights an nei ve ti hi hrie a, ei right neihai hi inpektuo hlak ding ei nih. Mani right hmang indiklo khawm hi suol a ni ve ti hriet bawk ding a nih. Hmang suol a ni pha chun ei rights neihai hi ei siet pha hlak niin an lang. Hi lei hin mitinin ei rights neihai hi fimkhur tak le indik taka ei hmang seng nuom a um.

Kum tinin sarwkar thawktuhai office kai hun, nipui le thlasik laia dingin Order insuo zie a ni a. Tha taka zui le zawm nekin a zui le zawm tha lo hi an tam lem hlak niin an lang. Order insuotuhai khau tawk naw leiin hi thil hi a um thei leiin an suotuhai khawma Order hi an enzui a, thawktu han tha le indik taka an zui le zawm ngei theina dinga hma an lak a tul. Chuong a ninaw chun an order insuo hi order inzaum lo le hmangtlak lo a hung inchang el ding a nih. Ei rama hin order inzaum lo hi iengzat am insuo a ni ta ding ti khawm hi ngaituo tham a tling a nih. Sawrkar thawktuhai hi conduct Rules hnuoia um vawng an nih. Chu taka chun sawrkar thawktuhai chun political party awn bik nei lovin neutrality an suklang ding ti a nih. Nisienlakhawm uoulau taka party mi le sa ni ngam, an posting le promotion chena hamthatna hmu pha hmu le hriet ding tam tak an um.

Suol hremna dan khawm a um sa vawng a nih. Hremna phu ngawi ngawi, evidence tha tawk tak nei khawm hrem lova um tam tak an um hlak. A chang lem chun tuolthattu, court in khai hlum dinga  thiemnaw an changtir ta hnung khawm khai hlum lova an um chang a um hlak. Hi lei hin ei ram dan hi siem that le sukkhau a tulna lai khawm a um hlak niin an lang. Mi rama chun dan a khau a, hremna khawm a rikin a na a, chuleiin lungin a intang annawleh hrem hi misuol han an ti hle hlak.

Muslim hnam hai chengna ram haia chun hremna hi a na bik zuol hle. Tuolthattu, Drugs a sumdawng, nuhmei le naupang suolluitu, terrorist ei tihai, an ram le hnam phatsantuhai chu an khaihlum el hlak. Ei rama ruok chun dan le dun a tam taluo a, misuol ei tihai hi hrem hlei thei lovin an um rawp hlak. Mi ramhai chun Jail hi inhremnain an hmang a, kum 10, 12, 20 dam rinum taka sin inthawtirin an intangtir a, ei rama ruok chun Jail hi inhremna ni lovin nun siemthatna hmun a nih ei ti nuom hlak. Hi lei hin jail intang hi rinum ei tinaw mani ding aw ti theiin a um. Dan kala che hai chu danin a phut angin hrem nihai sienla a tha ring a um.

Post a Comment

Powered by Blogger.