HAA 6th Gen. Meet ­cum­ Election: 
President dingin Pu Lalvullien thlangtling

LRS Puruolte / Photo: Alan Famhoite
CCPUR : Hmar Artiste Association (HAA) chun zani 10:00AM khn Muolvaiphei Youth Club Hall­ah  6th General Meet­cum­Election an nei. Hi hun hmangna hi Hmar Inpui GHQ thangin hnam sunga Organisation tum tuma thuoitu hai  bakah Pu Lalhrilllien MDC, Pu Darsiemlien Ruolngul, Social Worker le Pu Lalnghet Hmar, President, Dist. Congress Committee, CCPur hai khawmin an uop bawk. Hi huna hin HAA chun artiste thenkhat le Adviser hai chawimawina thuziek an hlan tawl.


Kum 2016­2018 sungah HAA thuoitu ding thlangna Election nei hunah President dingin Pu Lalvullien; Vice President­ Pu Lalsuong Famhoite; Secy. Joseph M Pakhuongte; Asst Secy.  Tv. John L. Varte; Fin. Secy. Nk. Prisilla Lalliensing; Treasurer­ Edith C. Rohlupui le Secy. Inf. in Tv. Immanuel Lalthalien hai thlangtling an nih. Thuoitu thar hai hi Rev. Dr Lalhmuoklien in tawngtaipekna a nei.

HAA chun hmatieng peiah HAA puola plot inchawk a, chu hmuna hla le rimawi tienga talent nei tha hai sukhmasawnnaa hmang an tum thu, recording studio le music iengkim suktuo a, inman taka thaw thei a la ni ding thu an hril. Hi huna thuhriltuhai chun  hnam sunga pawl tum tum hai inthlawptuo a tulzie uor takin an hril a. Thangthar hlasaktuhai chu tawng tluk le lamrik dan thuah fimkhur ding le music video siem huna uluk zola thaw dingin an infui a, mipui hai khawm album siemtu hai sukhmasawn tumna lungril put dingin an ngen tawl. HAA Ex­President Pu Suozalien chun HI President Pu Joseph Lalrothang in HAA hai Inpuiin hmatieng a thei ang anga thlawp dinga a hril chu lawmum a ti thu a hril.

HAA in chawimawina an hlan hai chu ­ Pu H. Samson (Adviser);  HAA Member Lelte Chibil Award lo dawngtu; 2nd Runner Up, Mizo Idol le Zomi Idol, Sinlung Star, HSA Platinum Star a hai nina lo hautu, Hmar laia Audio Cassette siem rawn tak kuomah Chawimawina Thuziek inhlan an ni bawk. Chuonghai chu –Tv. Lalsanglien Zote, Pi Lalruotmoi, Pi Monica Lalhlimpui, Tv. John L. Varte, Nk. Emma L. Pachuau, Nk. Nienglawmkim, Nk. Gladys Lalparzo Sanate, Nk. Christina Shakum, Nk. Lawmnakim Hrangate, Nk. Lalengvari Sinate hai an nih.

Hi hun hmangnaa hin Nk. Gloria Khawlhring, Nk. Christina Shakum, Nk. Joslyn Infimate, Nk. Rotinkhawl, Pu Ramhluolien Khawbung, Tv. John L. Varte le Nk. Emma Pachuau han hla mawi tak takin mipui fekhawm hai an inawi bawk a, zantieng  huna thlakthleng  awttlang a nih.

HYA 31st founding day puithu taka hmang tum
CCPUR: Hmar Youth Association (HYA) GHQ chun March 7, 2016 khin General Headquarters Level in HYA 31st Founding Day puithu le ursun taka hmang a tum. Hi le inzawm hin Celebration Committee Information Office ding Pu Lalramsiem Zote (Elar Es ZoteNeitham Fhg) dawr, M/s Ger & Emma Hardware Store, Rengkai Bazar, CCPur (Manipur)­ah hawng a ni tah. Founding Day hi Saikawt playground­a hmang tum a nih.

Hi le inzawm hin “Thiltha thaw, Nundan mawi, Tlawmngaina”, ti thupui hmangin a nuom taphawt thang thei dingin Essay(thusep) ziek inelna buotsai a tum bawk. Thusep ziek inelnaa thang nuom hai chun March 3, 2016, 3:00PM chen khin information Office­ah annawleh Email: hyaghq@gmail.com­ah peklut thei ning a tih. Thusep hi ward 1500­2000 inkar a ni ding ti a nih.

Lekhabu tlangzar
CCPUR: Rev. Dr Dongzathong in a ziek ‘Tuikha apat Tuilhum (from bitter water to sweet water) ti chu zanikhan K. Salbung­a Discipleship Theological Seminary (DTS) Hall­ah tlangzar a nih. Rev. Ginkhosiem Singson, Principal, DTC chun, lekhabu ziek hi thil awlsam a ninaw a, lekhaziektu hai laia a tamlem hi social thila inhmang bek lo le thuhril thiem lo an ni tlangpui tiin a hril a, Master le Doctorate degree nei leia lekhabu hi awlsam taka ziek el thei a ninaw thu a hril.

Lungdaw hawngnaah an hung thang 
CCPUR: Mr L.M. Khaute, IPS, DGP, Manipur; Ibotombi Namoijam, Addl. Advocate General, Manipur; N. Kotishore Singh, Judge, High Court of Manipur le Kh. Nobin Singh, Judge, High Court, Manipur hai zanikhan CCPur­ah an hung a, Synod Hall IB Road­ah Justice T. Vaiphei, Acting Chief Justice, Gauhati High Court naupa lungdaw hawngna programme­ah an thang.

MBBS hnesaw takin a zo
CCPUR: Miss Hannah Lalremmawi, d/o Albert Thangthasiem of Lighhouse Lane chun tulai hnai el khan Manipur University hnuoia inthawk MBBS (Honour in Paediatrics) hnesaw takin a zo.  A hlawtlingna hi ei chanchinbu chun a lawmpui hle.

ZPCS in Silver Jubilee an hmang
CCPUR: Lailam Veng­a Zou Presbyterian Church  Synod (ZPCS) chun zani 11:00AM khan Silver Jubilee an hmang a, Rev. Hangpi Manlun, Lamka Dist. Pastor in Jubilee lungdaw hawngna a nei a, Jubilee darpui vawi 25 mi thlangsuok han vuokna an nei. Lailam Veng ZPCS a hin sungkuo 151 a inthawk members 841 vel an um a, Beulahlane, Lailam Veng, Simveng, V. Munhoih, New Lamka, Vengnuam New Lamka, New Lamka (G) le  Rengkai Bible Hills chen a huom a nih.


GYO kuoma thlanmuol ram ding a pek
CCPUR: D. Angam Gangte, President, Gangte Tribe Union (GTU) GHQ in Gangte Youth Organisation (GYO) CCPur kuoma thlanmuol ding ram a pek a, hi le inzawm hin zanikhan GYO Block chun GTU Office Tuibuong­ah lawmthu hrilna le ram inhlanna hun hmang a nih. Hi huna hin D. Angam Gangte chun GSO, GYO, GTC, GTU le GHQ level a Lal le upa hai hrietpuiin GYO CCPur kuoma thlanmuol ram ding an hlan. Thlanmuol ram dinga a pek hi plot 17 (50/100 feet) vel a lien a nih.

HSLC Exam Rehearsal nei: Candidates 3093 an um
CCPUR: March 1, 2016 a inthawk BSEM hnuoia HSLC Examination, 2016 hung um ding le inawmin zanikhan CCPur District Private Centre hnuoia Invigilators le officials han Don Bosco Hr. Sec. School Auditorium­ah Rehearsal an nei. 1st Session­ah M. Chaoba Stanley, AOC Head Office in Tips for successful conduct of examination ti thupui hmangin thu a hril a, Pumshong Hangshing, AOC Confidential in AOC hai le SI hai kuoma hmangruo pawimaw inhlanna a nei.


T. Goukhomang, ZEO, CCPur chun, kum dang ang bawka tukum HSLC Examination thienghlim taka nei a ni theina dingin teachers le invigilators hai theitawpa thang la dinga ngenin an  hriettir.

Regular candidates 2678 le External candidates 415, an rengin candidates 3093 an um.

Ebenezer Academy Main Centre A­Block­ah Roll No. 16812­ 17504; B Block­ah Roll No. 17505­ 18028 in­thung an tih.

Don Bosco Hr. Sec. Sub­Centre­a A­Block­ah Roll No. 18029­18628; B­Block­ah Roll No. 18629­ 19070 le C­Block­ah Roll No. 19071­ 19490 inkar hai inthung an tih.

External Candidates hai Don Bosco Hr. Sec. Sub­Centre D­Block­ah Roll No. (1039 to 1452) + 4531 inthung an tih.

Pensioners 11 hai in inthlana an nei ding
CCPUR: CCPur District Nurses Association (CDNA) chun March 4, 2016, 1:30PM khin OPD Hall, District Hospital­ah thawkpui pensioner mi 11 hai inthlana nei an tih. Hi huna hin CDNA President in lawmlutna thucha hril a ta, pensioners hai inhmelhriettirna neiin inthlana thilpek inhlan ning an tih. Pensioners inthla ding hai chu­ Chalsiam (Staff Nurse), Chinggohniang (Staff Nurse), Khanniang (ANM), Kimneiching (Staff Nurse), Lamning (Tutor), Ningmang (Staff Nurse), P. Demnem (Nursing Assistant), Thumchum (ANM), V. Suanniang (Dy. Nursing Superintendent), Zalianchhungi (Staff Nurse) le  Zolkhomawi (Staff Nurse)  hai an nih.

VIRTHLI in 6th e­North East Award 2016 a dawng
SHILLONG: The 6th e­North East Award 2016 lawmman semna ‘Digital North East for Digital India’ ti thupui hmangin February 26, 2016 khan North Eastern Council, Conference Hall, Shillong hmuna nei a nia, hi huna hin Northeast sunga Information Communication Technology (ICT) le inzawma kawng dang danga society in a tangkaipui le a hlawkpui thil thaw hai kuomah chawimawina (Award) category 14 ah inhlan a nia; Virthli khawm e­News & Media, Social Media for Empowerment category­ah Winner nina lain Award inhlan ani bakah hmun dang danga Hmar nau umchek hai ta dinga chanchin thedartu thatak a nina chu Special Recognition Award inhlan sa ani bawk a nih.

Hi e­North East Award a ding hin Category dang dang ah sawrkar, NGO le private enterprise finalist kai 60 lai an um a. Virthli chu News Network pakhat ang chau ni lova platform tamtak hieng Discussion Forum, Football Club, App Developer le Video Channel hai hmun khata khaikhawmtu anga ngaiin, Chin­Kuki­Mizo hnam hai laia lienpawl tak le mipui in an hlawkpui le an tangkaipui pawltak nia hril a ni bawk a nih.

Hi lawmman hi Virthli Team members mi 7 hai chun Virthli aiawin an laka, lawmman an lak huna chun hi lawmman lak theia an um hi Virthli ngainatu hai lei liu liu a nih tiin Virthli members hai kuoma an inhlan thu an hril.

Hi huna category dang danga lawmman la ve hai chu: 1. E­Governance & Citizen Services Delivery: Nagaland Police SMS Based Vehicle Monitoring System, Nagaland Police; 2. E­Health: ICT Solutions including real tume monitoring using mobile phones to address health systems gaps in Assam, India, UNICEF; 3. E­Learning & Education: Design & Delivery of e­Education in Health & Medical Sciences to the Medical Colleges of North East Region [Implemented by Centre for Development of Advanced Computing (CDAC Noida) & All India Institute of Medical Sciences (AIIMS New Delhi); 4. E­Culture & Heritage: Xondhan.com, Xondhan, Assam; 5. E­Livelihood & Enterprise: iLEAD, Assam; 6. E­Commerce & Business: e­ASNES, Assam; 7. E­Environment & Tourism: Design and Development of Bioresources Database for Indian region of Indo­Burma Biodiversity Hotspot, Institute of Bioresources and Sustainable Development, Manipur; 8. E­Inclusion: Brahmaputra Community Radio Station,90.4 FM,Assam; 9. Mobiles for Social Services Delivery: Online Approvals and Sanctions Information System (OASIS) Mobile Version, NIC, Meghalaya le 10. E­ News & Media, Social Media for Empowerment: VIRTHLI; Category pali (4) ah lawmman la an um nawh.

e­North East Award hi North Eastern Council (NEC) le NGO lien tak tak hai le inzawma Northeast huopa electronics, Information Communication Technology (ICT) tieng panga hmalatu pakhat, society in a hlawkpui project le ramtin hai thlang dawkin chawimawina hi an hlan hlak a nih. Kum nawk hi Award semna hi Agartala khawpuia um dinga ring a nih.

CM in Administrative Block, Auditorium le Mirror Magic Gallery hai a hawng
IMPHAL: Zanikhan Manipur CM O.Ibobi Singh in Lamphelpat­a Directorate of Economics and Statistics ­ah Administrative Block le Auditorium a hawng. Hi huna hin Dy. CM Gaikhangam; RD & PR, Economics and Statistics minister Francis Ngajokpa, A.H. Khan, Principal Secretary, Economics & Statistics le Moses Chalai, Principal Secretary (Corporation hai khawm an thang. Hi huna hin CM, O.Ibobi Singh chun “Economic Survey Manipur, 2015­16” ti hmingchawia lekhabu siema  um a hawng. Economics & Statistics Deparment Manipr hnuoia Contract basis a Primary Investigators sinthawhai chu CM in an sin suknghet pek a tiem a, Economic & Statisics Deparment chu Deparment pawimaw em em el, ei state a data chi tum tum hai lakhawmtu le insuotu an nih tiin O.Ibobi  Singh in hi huna thu a hrilna huna a hrillang.

Hi zo hin CM O.Ibobi Singh chun Manipur Science Centre, Takyelpat hmuna Mirror Magic Gallery a hawng nawk. Hi huna hin Social Welfare Minister A.K. Mirabhai khawm a thang.  Hi hmuna hin Science Cenres 6 a um. CM chun Department of Science & Technology, Manipur kutsuok Softwares pathum a tlangzar bawk. Mirror Gallery a hmu thei le en theia um hai hi Manipur State a ding chun thil thar an nih. Churachandpur le Ukhrul District haia khawm District Science Centre hawng vat ni tang an tih. State sawrkar chun District tinah Science Centre hawng dingin riruong a siem. Manipur Science Centre a hin Seats 50 umna Digital Planetarium le Innovation Hub Manipur Science Centre  campus dungah hawng la ning a ta, IBSD in Green Building la hung bawl bawk an tih. Softwares pathum hai hmang hin Manipuri (Bengali Script) tiem thei lo state dang mihai khawmin English, Tamil, Oriya, Telugu etc haiin an hung tiem thei ta ding a nih tiin O.Ibobi Singh in Mirror Magic  Gallery a hawng huna a hril.

Toy Gun hmanga mi vautu man
IMPHAL: Zani hmasa zan dar 1:30 vel khan Lamphel; Police Station h uop sunga Tera Wangthonbi hmuna pasal pathumin Toy Gun hmangin Thangjam Kumarjit (31) s/o (L) Thangjam Bihari Singh of Tera Wangthonbi Leikai le a nuhmei Thangjam (O) Sandya Devi (29) hai chu an vau . Hi thil tlung an hriet le inruolin a veng mi han an va thangpui a, mi vautu pathum hai laia 2 an man a, pakhat chu a tlan hmang hman a, an chuongna Activa motor chu mipui lungsenin an suksiet pek.

Cabinet meeting nei a nih
IMPHAL: Zani zantieng dar 3 a inthawk khan CM O.Ibobi Singh inrawinain Cabinet meeting nei a nih. Cabinet meeting  a hin Self Attestation le Manipur Municipality Act, 1994 chungthu le thu dang dang hai an hriltlang niin ei thu dawngna chun a hril.

MTDC le Vety. & AH in MoU an ziek
IMPHAL: Director of Tribal Affairs/Hills & SC le Managing Director MTDC S. Minlianthang Vaiphei IAS le Dr Rajendro Singh, Director, Veterinary & Animal Husbandary hai chun zanikhan MoU an ziek. Hi dungzui hin MTDC chun Veterinary & animal Husbandary hnuoia um Cow, Poultry, Piggery shed le Dept. Staff quarter ding bawl an tih. Chun, MDTC Managing Dirctor  le Union HRD Official han  Manipur­a JNV  Schools hai repair le staff quarters hai  bawl dingin MoU an ziek bawk. JNV school siemthat ding hai lai hin CCPUr, Senapati le Ukhrul hai a thangsa tiin ei thu dawngna chun a hril.

President in IPC siemthat tul a tih
KOCHI:  President Pranab Mukherjee in zanita Kochi khawpuia Directorate of Prosecution huoihawtna IPC kum 155 tling lawmna an buotsai kharna huna thu a hrilnaah; Dan bawsie le thil suol thawtu hai chunga hmang inrim tak Indian Penal Code (IPC) chu siemthat tul a ti thu; British han India ram an awp laia an ta dinga tha ding dan an lo siem hai chu tuchen hin Court­ah hmang an la ni a, kum zabi 21 ei hmang mek le enmila ennawn le siemthat a tul ta hle a nih tiin a hril. IPC hi January 1, 1862 a hmang tan a nih.

SAkhi sawnin a ruolpa a kap hlum
AIZAWL: Zani hmas zan khan Lawngtlai district, Mizorama Mampui khuo mi Jerry Lalumpuia le a ruolpa Lalhmangpuia hai chu ramsuokin an fe a, zan thimtham hnuoiah Jerry Lalupuia chun a ruolpa Lalhmangpuia chu Sakhi sawnin a kap hlum pal. Lalhmangpui ruong hi zanikhan an khuo thlanmuolah vuiliem a nih.

ST list­ah Castes 18 zieklut belsa dingin
RANCHI: India ram state hran hran haia Communities/Castes tum tum 18 hai chu Scheduled  Tribes list a zieklut belsa dingin National Commission for Scheduled Tribes chun a recommend a, hi thil hi Union Cabinet meeting in a pawmpui vat ta beisei a nih.  Scheduled Tribe list a zieklut belsa dinga recommed­a u m hai lai hin Jharkhand state a inthawk Bhokta le Puran community hai an thangsa tiin Rameshwar Oraon, Chairman, National Commission for Scheduled  Tribes chun zanita Ranchi hmuna  reporter hai an hmupui huna a hril.

Coast Guard DG dingin Rajendra Singh
NEW DELHI:  Mr Rajendra Singh chu Indian Coast Guard Director General (DG) tha dinga ruot a nih. Singh hi Indian Coast Guard 1980 first batch a ni a, Navy Officer ni lo (non­navy officer) hiengang ngirhmun chel dinga hlangkai hmasatak a la nih. A hma chun Coast Guard hotu tak nina hi Indian Navy Officer han an hung chel hlak a nih. Singh hi a sin thaw that leiin August 15, 1990 khan India President in Tatrakshak Medal (TM) a lo inhlan ta bakah   August 15, 2002 khan  Presidents’s Tatrakshak Medal (PTM) inhlan a lo ni ta bawk a nih.

Digvijay Court hmaah an lang
BHOPAL: Madhya Pradesh Assembly Secretariat­a thawktu ding lakna ‘recruitment’ scam le inzawmin Congress General Secretary Digvijay Singh chu zanikhan C Madhya Pradesh­a Special District and Session Judge Kashinath Singh hmaah an lang. Recruitment Scam hi Madhya Pradesh Chief Minister a chel laia tlung a nih. Hi recruitment scam thuah hin zani hmasa khan K.K. Kaushal le A.K. Pyasi hai thangin mi 7 Court hmaah inlangtir an ni a, Court chun personal security bond Rs. 30,000 seng in bail­in a lo insuo ta a nih. Anni pahni hi Secretariat thawktu an nih. Digvijay Singh hi Court chun bail­a suok a phal pek.

Odisha HC CJ dingin intiemkamna a nei
CUTTACK:  Justice Vineet  Saran chun zanikhan Orissa High Court Chief Justice dingin Odisha  Governor  SC Jamir hmaah intiemkamna (oathtaking) a nei. Oath taking ceremony a hin Odisha Chief Minister Naveen Patnaik le a cabinet hai bakah MP thenkhat le Odisha High Court­a Judges, Judges hlui, Advocate General SP Mishra le Bar members hai an thang.

Excise officer le a nuhmei kum 3 jail intang dingin
CHENNAI: Coimbatore­a Additional District Judge and special Judge for CBI cases N. Muralidharan chun Disproportionate assets case­ah zanikhan Central Excise­a Superintendent K. Subramanian le a nuhmei Kathuri hai chu an sum lamsuokna le inhme lova an hausak leiin kum 3 sung jail intang dingin a rel. CBI chun kum 2007­a kha case an lo file ta a nih. Court chun fine Rs. 10,000 ve ve chawi dingin an hriettir bakah Fixed deposit­a an sie Rs. 18 lakh chu hrentang dingin Court chun Order an suo bawk.

HP Cong. MLA kum 1 jail intang dingin
SHIMLA: Himachal Pradesh­a All India Congress Committee (AICC) Secrtary le Dalhousie MLA Asha Kumari chu Chamba court special Judge Padam Singh in land grab case­ah kum 1 sung jail intang ding le midang pahni Pushap Gulati le Prakash Chand hai chu kum 4 le kum 3 sung jail intang ding le fine Rs. 5,000 chawi dingin zani hmasa khan an chungthu a rel. Municipal Councillor hlui Kuldeep Kumar in sawrkar ram bighas 67.3 a lien chu revenue records sukdanglamin anni hmingin an sie tia intumna a siem le inzawma hieng thil hi hung um a nih. Asha Kumarhi hi kum 2003­05 sung khan HP education minister lo chel a nih.

Primary School raw, mi 9 man
AIZAWL: Zani hmasa khan Lunglei District, Mizoram sunga Chakma Tribe h ai chengna Tuichawngchhua khuoa Primary Scool chu a su nga thil um hai laksuok hman um lovin raw ut vawng a nih. Hi thil tlung le inzawm hin Mizoram Police han Mizo Student’s Union (MSU) thuoitu 8 an man a, Police Custody­ah an sie. Tuichangchhuah khawsunga hin mihriem chengna In 49 a um a hienghai laia pakhat suksiet a ni bawk.

Sapeltu 2 kap hlum 
GUWAHATI: Zani hmasa zan khan Assam State a Kaziranga National park­ah sapeltu le hi park vengtuhai an inkaptuo a, sapeltu pahni kap hlum an ni a, sapeltu midang 3 himin an tlanhmang hman. Kap hluma um hai kuta inthawk AK­47 Rifle 1 le magazine 1, .303 Rifle 1 le a magazine 1 hmu a nih tiin Police thusuok chun a hril.

Bazar hmuna dumziel hawp a khap
AIZAWL: Smoking in Public Place Rules, 2008 dungzuiin Mizoram­a Trade& Commerce Department chun Mizorama district tina bazar hmun le a sevel haiah dumziel hawp a khap. Hi khapna dan bawsetu hai chu Tobacco Products (Prohibition of Advertisement& Regulation of Trade & Commerce, Production, Supply & Distribtion) Act 2003 hmangin fine inchawitir ning an tih tiin thusuok chun a hril.

Chitrakoot massacre case­ah mi 9 thi dingin
LUCKNOW: Uttar Pradesh­a Chitrakoot district Court chun July 17, 2015 nia In iemanizat zet raw le mi 7 lai zet a hringpuma raw hlum an nina thuah zanikhan mi 9 hai chu thi dingin an chungthu a rel bakah midang 2 hai chu damsung lungin intang dingin  thiemnaw an changtir. An reng hin Jail­a thun an nih.

FIFA President dingin Gianni Infantino
ZURICH: Switzerland mi Gianni Infantino chu second­round vote lak a ni hnungin khawvel football­a thuneitu insang tak FIFA President dinga thlangtling a nih. Infantino hin votes 207 umah votes 115 a hmu a, an khingpui hnai tak Sheik Salman of Bahrain chun votes 88 a hmu. Prince Ali of Jordan in vote 4 le Jerome Champagne of France chun vote hmu nawh. First round­ah Infantino in votes 88, Sheikh Salman in votes 85, Prince Ali in 27 le Champagne in 7 an lo hmu a nih.

Gianni Infantino (45) hi UEFA General Secretary a ni a, kum 1998 a inthawk FIFA President lo cheltu Sepp Blatter (79) a hung thlakthleng a nih.

VAWISUN THUPUI
Nisienlakhawm, ka mi fel chu Ringnain hring a tih; A hnungtawl ruok chun, Ka lungrilin amaa chun lawmna hrim nei naw ni,” ­ Hebrai 10:38

Editorial
Nu le pa hai kut le ke

Khawvela nuhmei le pasal ei hung piengin, Nunghak le tlangval ei hung ni a. Hi huna hin nunghakin pasal a hung nei a tul a, chuongang bawkin tlangval khawmin nuhmei a hung nei a tul hlak. Nunghak le tlangval han pasal an neina san le tlangval han nuhmei an nei nasan tak chu nau le te nei an nuom lei a nih. Nau le te ei nei nuomna san tak chu ei tar huna a mi chawmtu ding le a mi enkawltu ding ei dit chau ni lovin ei mamaw lei a nih. Hi lei hin mitin elin suonmawnga um chu ei nuom naw a, nau nei thei lo hai chun pawisa tam tak sengin nau an nei theina dingin doctor an pan hlak. Chu hnunga nau an la nei theinaw rawp chun an tar huna enkawltu ding mi nau ditnaw le an sung le kuo hai nau lain an chin le an tuoi a inthawk an nau tak tak dingin duot takin an enkawl hlak. Nauhai an hung puitling huna chun nauhai chu nu le pa kut le ke tak an hung ni hlak.

Hiengang hi thil fe dan a ni leiin nau hin nu le pa kut le ke ni thei dinga thang ei lak a tul takzet a nih. Mihriem puitling, kut le ke kim, piengsuol le mi invet ei ni si naw chun nauhai mawphurna chu nu le pa hai enkawl hi a nih. Hi lei hin nu le pa hai thiltum le beiseina h i nau han sukpuitling ngei dinga theitawp tak meu suo a thang ei lak fan fan nuom a um. Nauhai mawphurna chu nu le pa hai an tar annawleh an damnaw huna khawm enkawl theitu mi puitling ni hi a nih. Nauhai hi nu le pa kut le ke ni dinga siemtu Pathienin a mi siem ei nih.

Nauhai an puitling naw chun nu le pa h ai kut le ke nei lo, piengsuolah ei siem a nih ti hi nau le te ni taphat han ei hriet a pawimaw bek bek a nih. Hi hnuoia Pathienin nau le te hai a mi pek le a siemna san khawm nu le pahai sinthaw sunzawmtu ding le sukpuitlingtu ding a nih. Nu le pa hai hnung thuol zo lo nauhai chu mihai en dan a dang a, mihai hmusit le sirde an hung ni hlak. Nu le pa hai tlukzo hi intak hle sienkhawm tum hram hram ding a nih. Tumna ei nei phawt chun an ni ang ngirhmuna chuongkai phak naw inlakhawm sungkuo tha le thuawi le inza hi ei ta dingin a tha el chau ni lovin malsawmna hnar le hi hnuoia khawm damsawtna a nih ti hi nau han hriet tlat ding a nih.

Mihriem taksa bung hran hran haia hin iem a tangkai taka ti indawn ta inla, dawn thiem le dawn indik harsa hleng a tih. An rengin an pawimaw seng a, an pawimaw dan ruok chu a hun le a hmun izirin a dang el a nih. Chuong laizing chun an rim le a phusa deu bika inlang chu kut le ke hai hi an nih. Hiengang deu hin sungkuoa khawm hin nau iemanizat an um hlak a, an pawimawna, an thil thiem le thaw thei zawng an ang naw seng. Hi lai taka hin nauhai hi sungkuo hmel inlangna an ni leiin sungkuo a ei pawimawna seng hi hrietchieng a pawimaw khawp el. Chuong a ninaw chun sungkuo annawleh nu le pa hai ta dingin kut le ke ni thei ngai nawng ei ta, nu le pa hai thiltum le beiseina a hung hlawsam der ding tina hung ning a tih.

Nauhai hi sungkuo sukphuisuitu, nu le pa hai sukhming­thatu, chawimawitu, nu le pa hai sinthaw sukpuitlingtu ni dinga ei inbuotsai seng nuom a um. Nauhai hi nu le pa hai hmel sukthatu, sukmawitu, sukhmelhem theitu le sukse let der theitu, ei ni leiin ei nun dan le khawsak dan haiah ei fimkhur le ei uluk takzet a tul a nih. Ei nu le pa hai hi mihai laia fe a, van paka va hrilmawi nekin ei nun dan le khawsak dan hai hin nasa takin a chawimawiin a sukhming tha lem hlak ti hriet tlat ding a nih.

Mihriem taksa haia khawm kut le ke hi lungrila ngaituona sukpuitlingtu an nih. Fe tulna hmuna fein a mi thuoi a, thaw ding le lak dinghai kutin a thaw hlak. Chuleiin, lungril le ngaituona hai sukpuitlingtu tak chu kut le ke an ni hlak. Sunguo khawm nu le pahai thu rel bawzuia sukpuitling theitu chu nauhai ei nih. An kut le ke ei ni tlat leiin sungkuoah nau le tehai hi ei pawimaw takzet a nih. Ei lo ngaituo fuk lo le ei lo hriet ngai naw pal a lo ni khawmin, nau le te hai hin nu le pa hai kut le ke tak ei nih ti hi tuta inthawk hin a thar taka ei hriet nuom a um. Ei lungril ngaituona, ei hrietna, ei thiemna le varna hai po po hi nu le pa kut le ke ni thei ngei dingin nau han thang la sup sup seng ei tiu.

Post a Comment

Powered by Blogger.