Financial Awareness Camp nei
CCPUR:  Zani zantieng 2:00PM khan DDM, NABARD le Saikawt Village Authority hai thangruola huoihawtnain Saikawt Youth Club Hall­ah Financial Awareness Camp nei a nih. Hi huna hin Saikawt le a se vela khuo dang danga mi thahnemtawk tak an thang. Thangchinkhup Guite, DDM, NABARD in Finaancial Planning, Financial Inclusion, Saving & Investment, Govt. Sponsored Schemes and Govt. Social Security Scheme tiengpang mipui hai hrilhrietna a nei a, Mr Pauneithang, Chief Manager SBI/CCPur Branch chun Cyber Crime le tulai khawvela inhlemna nasa tak hluor mek laka inveng dan le fimkhur a tulna hai mipui hai hrilhrietna a nei bawk.


Free Medical Assessment Camp huoihawt
CCPUR: Zani 10:00AM khan Synod Hall, IB Road, CCPur­ah SSA/ Inclusive Education for Disability (IED) huoihawt  Free Medical Assessment Camp for Children With Special Need nei a ni a, Mr T. Goukhomang, ZEO/CCPur in a hawng.

T. Goukhomang chun, piengphunga ruolbanlo han mi pangngai hai anga hringnun an hmang ve theina dinga nu le pa han enkawlna thalem (extra care) an pek a tul thu le sawrkar­a inthawk thangpuina hmu thei  a ni thu, block level assessment camp­ah a tam thei ang thang dingin a ngen.Assessment camp a hin Alex Thangjalet, Orthopadic; Chingboi, Clinical Psychologist; T.Ginsawnkhup, Optometrist le Ng.Brajachand, Audiologist han naupang kum 18 le a hnuoitieng harsatna nei an rengin mi 73 hai an enfel.



Hiengang Assessment Camp hi Jan. 22, 2016, 10AM khin Samulamlan Block a Renglerhoih Jr. H/S­ah nei ning a ta, January 23, 2016, 10AM in Henglep Block­a Munpi Primary School­ah nei ni bawk a tih.

PS ah 87Bn. CRPF platoon 1
CCPUR: CCPur Police Station­a 1st IRB um hai chu zanikhan an insawn dawk a, anni thlaktu ding hin 87 Bn. CRPF platoon 1 an hung lut. 87Bn. CRPF hai hi Jiribam thangsan an ni a, Bill 3 hai dodalna leiin CCPur khawpui sung hmun tum tuma Govt. Offices le Institutions hai vengtu dingin iemanizat zet CCPur­ an hung lut a nih.

Dist. Level Security meeting nei
CCPUR: January 26, 2016 nia Public Ground­a District Level Republic Day hmangna ding le inzawmin January 19, 2016, 11:00AM khan DC Office­a BRGF Resource Centre­ah Mr Lunminthang Haokip, IAS, DC/CCPur inrawinain District Level Security Coordination Committee meeting nei a nih. Meeting­a hin Police, IRB, Army, BSF le CRPF Officer hai an thang tawl a, Republic Day buoina um lova hmang a ni theina dinga thil thaw dan ding hai an hriltlang. Tribal Movement le inzawma JAC in Republic Day an boycott bakah mipui hai thang lo dinga an ngen leiin tukum CCPur­a Dist. Level Republic Day hmangna ding hmun hi sawn a ni ding le dingnaw hrietna ei la nei hri nawh.

Jan. 20 in Mata Mualtam ah Mobile Medical Camp
CCPUR: January 20, 2016z ingkara inthawk khin District Health Society/CCPur huoihawtnain Saikawt PHC hnuoia Mata Mualtam khuoah One Day Mobile Medical Camp Unit (MUU) um a tih. Hi huna hin Dr. Robinson Lalnunpuia, MO; Dr Bellamy Kom, MO; Dr Donna Vunghoihching, MO han medical check­up thawng an ta, Ruthy Lalbiekrem, ANM; Chingbiaklun, Pharmacist le Manasseh, Office Asstant han thangpui an ta, damdawi khawm a mamaw hai kuoma a thlawna pek ning an tih. Medical camp a thang ding hai hi 9:00AM in CMO Office campus­a inthawk suok an tih.

Brake hrui intan leiin Auto a eksiden
CCPUR: Zani sun dar 12:00 vel khan Tipaimukh Road­a inthawk Tiddim Road­a hung tlan suk,  Diesel Auto MN01­2931 chu a brake hrui intan leiin Traffic Stand tuol lai a eksiden a, a sunga chuong passenger in hliemna a tuok met a, District Hospital phurtlung le dressing  thaw a ni hnungin Doctor han an infetir nawk. Auto hi a hmatieng darthlalang a se vawng a, Police Station­ah sie a nih.

EMI India Region Director Mr. Andy Kizee USA in a enfel mek
IMPHAL/CCPUR: For One Life (FOL) hmalakna le inzawmin Engineer Ministries International (EMI) Engineer le India Region a Director Mr. Andy Kizee USA  chun January 19, 2016 khan, January 4, 2016 nia  Manipur a Lirhningin a sawisiet Biekin 6 vel Imphal Area a mi hai a enfel. January 20, 2016 hin Leimakhong Area le 21/01/2016 hin CCPur Area laia Lirhnng suksiet hai enfelna sin thaw bawk a tih. Tuta hma khan FOL Asia Region Director Joseph R. Joute chun EMI (USA) chu Manipur a hunga Lirhning le inzawma a sawisiet a bikin Biekin, Mission/NGO In chi hran hran, School le Hostel thangsain a thlawna hung enfel le an thurawn lak thei dinga an inpei thu a lo hril ta kha a nih. EMI hi rawngbawltu ropui tak el, professional engineer le architect an nih. Hienganga hung inpe a ei rama hung nuom le an thiemna, an varna le an theina hai inro derloa a thlawn tawp a ei ram tadinga an hung inhlan el hi Pathien kuoma lawmthu hril el bakah ei tawngtaina a hai lo san ve mawl mawl tawl inla nuom a um.(­LRS Puruolte)

PM in Assam-ah IIIT Guwahati campus bawlna ding lungphun a hawng
GUWAHATI:  Prime Minister Narendra Modi chu zanikhan Assam­ah an zin a, Indian Institute of Information Technology (IIIT) Guwhati campus bawlna ding lungphun plaque hawngna a nei bakah Bodofa Nagar, Kokrajhar district­a public meeting huna mipui hmaah thuhrilna neiin Guwahati hmuna NE a higher education institutes 21 haia student hai inpawlpuina a nei.

Kokrajhar hmuna mipui hmaa thu a hrilnaah, harsatna iengkim sukfengna dinga pawimaw chu hmasawnna a nih tiin a hril a, Central Institute of Technology, Kokrajhar chu kum khat sungin deemed University a dawmsang a ni ding thu; Sealdah­Guwahati Kanchenjunga Express chu Barak Valley chena intlantir a ni ding thu le Dhubri a Rupsi Airporty chu Indian Air Force in an lak ding thu a hril.

Pu Modi chun India hmarsak biel suk hmasawnna dingin sawrkar thlungpuiin theitawpa hmaa laka thu, mipui kuoma thutiem an lo nei hai thaw hmai um lova sukpuitling vawng a tum thu; Bodoland Territorial Council area kawng iengkima hma sawn theina dinga thangpui a ni ding thu; thalai hai beiseina sukpuitlingna dinga Kokrajhar a hung a ni thu hrilin NE biela thalai hai Delhi Police a lak dinga inhriettir a ni angin process a fe mek a nih. Assam plains a cheng Karbi le Mikir hai le hills a cheng Bodos hai ST status pek ning an tih, hi thila ding hin process a fe  mek a nih tiin a hril. Hi huna thang ve BTC President Hangrama Mahilary chun Assam Assembly Election hung um dingah BJP an thlawp ding thu a puong.

 PM hin ani zingkaar khan East Sikkim­a Epics Gargen, Saramsa hmunah Sikkim OrganicFestival a hawng bawk. Organic festival a hin stalls 77 hawng a ni a, stalls h ai h I PM chun a dawt dawtin a en tawl.

Manipur­a um po po Manipuri an nih: CM
IMPHAL: Imphal: Zanikhan Longa Koireng Village, Senapati district­ah Ni 5 sung aw ding Koireng Youth Organisation Golden Jubilee­cum­46th General Conference tan a ni a, Manipur CM O.Ibobi Singh chu khuolliena thangin KYO Jubilee le Conference hawngna a nei. Hi huna hin IFCD Minister bakah Senapati DC Ms Jacintha Lazarus, top Police officials le hnam tum tum tuma thuoitu hai an thang.

Hi huna Manipur CM O.Ibobi Singh in thu a hrilna chun, Manipur­a hnam tum tum um hai sakhuona in a mi thendar a nih tia ngaina um chu thudiklo a ni thu a hril. Hnam lien le hnam chin an um naw a, Manipur­a um le cheng hai po po Manipuri vawng an nih. Minister ei ni am, ei ninaw am; Officer lien khawm ni inla khawvela um sawng ding tukhawm ei um naw a; Pathienin I hun a tawp ta ie a ti huna chun milien ka nih, mi chin ka nih tiin inla khawm tukhawmin a pumpel thei ei umnaw thu, inrem le inhmangai taka um tlang a pawimaw thu; tharum insuona in iengkhawm chingfel thei a ninaw thu, inbieka chingfel tu ei tiu tiin a hril a. Patsoi Lamkhai a inthawk Chiru Lamkhai inkar lampui siemthat vat a ni ta ding thu le Longa Koireng­ah PHC indin a ni ding thu a hril.

BJP Manipur President lim an raw
IMPHAL: Congress workers hai chun zanikhan Ningthoukhong area­ah BJP Manipur Pradesh member le an President Th. Chaoba  hai dodalnain protest rally an nei bakah BJP Manipur President Th. Chaoba in Commerce and Industries minister Govindas Konthoujam chu Bishunupur Police station­a  nuhmei 1 thanga mi 3 sawisaktua an tumna chungthuah a (Th. Chaoba) lim (effigy) an raw bawk. Ningthoukhong Bazar­a inthawk Loktak project gate chen rally an fe a, Th. Chaoba lim hi Ningthoukhong Bazar hmuna an raw a nih.

Financial Assistance hni thei
IMPHAL: Scheduled Tribes, Below Poverty Line (BPL) sungkuo a um, Women Societies/Voluntary Organisations/Self Help Groups, Small Scale Industries thaw hai ta dingin Directorate of Tribal Affairs Hills and SC Development, Manipur (Tribal Affairs Division) hnuoiah kum 2015­16 a dingin financial Assistance hni thei a nih. Hnina lekha Feb. 20, 2016 chenin hi Directorate a hin peklut thei ning a tih. Thu chieng lem Directorate website: www.tahmanipur.gov.in ah hriet thei ning a tih.

Multi Tasking Staff sin a ruok
IMPHAL: RIMS, Imphal hnuoia thawk ding Multi Tasking Staff post 134 a ruok. Thiemna Matriculate le a chungtieng ni a tul. Hnina lekha Feb. 8, 2016 chenin peklut thei ning a tih. Thu chieng lem le a thaw dan ding RIMS website: www.rims.edu.in ah hriet thei ning a tih.

Organic Farming uor a pawimaw thu a  hril
GANGTOK: PM Narendra Modi chun zani hmasa khan Sikkim­a Gangtok khawpui­a Agriculture Minister Conference a hmangpui a, hi huna thu a hrilnaah, Agriculture sector her danglamna dingin damdawi hmanga siem hnuoithatna hmang lo ‘Organic farming’ India ram pumpuia uor pei a pawimaw thu hrilin; hi thila ding hin State sawrkar tin hai chu a ensinna dinga Block khat amani beka hmang dinga ngenin an hriettir.

PM chun loneitu hai hmang tangkai ding bik Mobile phone application siemsuok a pawimaw thu hrilin boruok sik le sa mumalnaw leia Loneitu han harsatna nasa tak an tuok hlak chungthuah  Loneitu hai chu thlai ching dan chi thuma then dingin an fui. Damdawi hmanga siem hnuoi thatna   ni lova Organic farming a uor na thuah PM in Sikkim chu an pak hle.

Hyderabad Unversity­ah boruok a la sosang
HYDERABAD:  Ph.D inchuklai Dalit mi Rohit Vermula January 17, 2016 nia hostel­a ama le ama an khaihlumna le inzawmin Hyderabad Central University a chun zani khawm khan boruok a la sosang hle. Protest a thang student unions le political parties tum tum hai chun University thuneitu hai le Union HRD Minister bakah Labour minister chunga action na tak la dingin an ngen a nih. Union Labour minister Bandaru Dattatreya chu ABVP leader sawisakna thuah Rohit Vermula thanga mi 5 hai chunga action la dingin HRD minister Smrithi Irani kuoma lekha ziektu a intum a nih.

National Commission for Schedule Caste Chairman Dr Punia chun  zanikhan University hi va sirin student hai an hmupui a, thil umdan sawrkar thlungpui an tlun ding thu a hril. Congress Vice President Rahul Gandhi khawmin zanikhan University hi a va sir. Dalit Scholar thina thuah University Vice Chancellor chu inban dingin a phut Congress leader Kumari Selja khawmin Labour minister hi ban dingin PM kuoma a ngen.

Tripura­ah IIIT indin  a ni ding
AGARTALA: Tripura Higher Education Minister Tapan Chakraborty chun, Tripura­ah thalai hai ta dingin Rs. 128 crore sengin Indian Institute of Information Technology (IIIT) indin a ni ding thu zanikhan a hril a, IIIT indinna ding hin state­owned Oil and Natural Gas Corporation, Northeastern Electric Power Corporation le National Building Construction Company hai khawmin partners a thang an nuom tiin a hril bawk. IIIT indinna ding hin Human Resource Development (HRD) Ministry le Tripura sawrkar han kar hmasa khan agreement an ziek ta thu, HRD Ministry chun not­for­profit public­private partnership (N­PPP) basis in India rama IIITs 20 indin a tum a, Assam bakah Senapati District, Manipur­a khawm IIIT indin tum a ni thu Mr Chakraborty chun a hril.

Assam­ah Crorepati MLA 40% an um
GUWAHATI: Assam rama MLA 126 um hai laia 40% hai chu Crorepati an nih tiin Assam Election Watch (AEW) le Association for Democratic Reforms (ADR) report chun a hril. Chun, MLA hai laia 10 % han criminal cases an nei a, party ang zawng chun criminal cases nei hai laia 33% chu AIUDF MLA an ni a, 5% chu Congress MLA an nih. MLA hausa tak chu Congress MLA Anjan Dutta niin Rs. 10.89 crore, a dawttu AIUDF MLA Abdur Rahim Ajmal niin Rs. 10.15 crore le a pathumna chu Hitesh Basumatary (BPF) Rs. 7.50 crores a nih. Chief Minister ni lai mek Tarun Gogoi chun Rs. 4.94 crore anghu rothil a nei niin a affidavit­ah a zieklang a nih. Assam MLA hai laia 27% chu Class XII le a hnuoitieng an ni a, 71% hai chu Graduates le a chungtieng thiemna nei an nih.

Rajnath in NIA thuneina insang lem pek a tul thu
NEW DELHI: Union Home Minister Rajnath Singh chun, terrorism hi India ram ta ding chau ni lovin khawvel pumpui ta dinga chona a ni leiin National Investigation Agency (NIA) chu thuneina insang lem pek an tul thu  zanita New Delhi hmuna NIA raising day function­a thu a hrilna huna a hril. Jammu and Kashmir Governor N.N. Vohrah chun, India rama National Security Administration Services cadre hran nei tha le tul a ti thu keynote address a hrilna huna a hril bawk.

SL in India Ngamantu 29 an suo
COLOMBO: Sri Lanka­a Trincomalee magistrate chun zanikhan India Ngamantu 29 hai insuona ding Order an suo a, Jaffana Court­ah Ngamantu14 hai insuona ding process a fe mek. Tuta hma khan India Ngamantu 55 hai insuona ding local court dang dang han an lo insuo ta bawk. Sri Lanka sawrkar chun tuta kar sung hin India Ngamantu106 a hrentang hai hung insuo a tum a, tuta kar tawp tieng hin India ram hung phurtlung hman an ni beisei a nih.

Eagles guitarist Glenn Frey a thi
NEW YORK:  An hun laia khawvela inlar phak ‘Eagles’ band a guitarist  le co­founder Glenn Frey chu zani hmasa khan New York khawpuiah rheumatoid arthritis, colitis le pnemonia natna hai leiin  kum 67 mi niin a thi. Eagles hi  1970s laia khawvela band inlar le hlawtling takel lo ni hlak  an ni a,  kum 1976­a an hla Hotel  California ti hla thangin hla hit tam tak nei an nih. Glenn hi ‘Take It Easy,” le ‘Lyin’ ti hla hai saktu niin ‘Hotel  California”,“Desparado”, “Tequila Sunrise” le “Heartache Tonight,” ti hla hai phuok/siemnaa thluok thaw vetu (co­write) a nih.

November 6, 1048 khan Detroit­ah a pieng a, kum 1970 khan Henley leh inkawpin Linda Ronstad in backup band a dinga ruiin kum 1971 khan a tuor zui ve dingin a fiel a, a hnungin Randy Meisner le Bernie Leadon hai leh  ‘Eagles’ Bandh an hung indin ta a nih. Kum 1980 khan Frey le Don Felder hai Concert lai inhriethiemnawna an nei leiin an inthedar a, sienkhawm kum 1990 khan an inzawmkhawm nawk a, kum 1998 khan Eagles Band hi Rock & Roll Holl of  Fame a laklut an ni bakah Glenn hi kum 2011 khan Songwriter Hall of Fame a laklut a ni bawk. A solo 5­na le tawpna tak “After Hours” chu kum 2012 khan release a nih. Glenn Frey hin a nuhmei Cindy (25) le anauhai pathum Taylor, Deacon le Otis hai a thisan.

Khawvela pasal dama um laia upa tak  kum 112 in a thi
TOKYO: Khawvela pasal hring le dama la um hai laia upa tak Japan mi Yasutaro Koide chu January 19, 2016 khan kum 112 mi niin  a thi. Mr Koide hi March 13, 1903 a pieng a ni a, kum 113 birthday a  hmangna ding thla 2 vel la bakin a thi a nih. A damsawtna thuruk chu Zu a dawnnaw bakah dumziel a hawp naw a, thil  a taluoin iengkhawm a thaw naw lei a ni thu a dam lai khan a lo hril a nih. Mr Koide hi August, 2015­a kha Guiness Book of World Records in khawvela pasal hring le dama la um hai laia upa taka a lo record a nih. Lung tiengpang harsatna leia Nagoya hmuna hospital­a thi niin Ministry of Health, Labour and welfare thusuok chun a hril.

Mr Koide thi lei hin Japan rama pasal dama la um laia upa tak chu May 30, 1904 a pieng Masamitsu Yoshida niin kum 111 a upa a ni ta a, Tokyo a um a nih. Yoshida hi khawvela pasal dama la um hai laia upa tak a ni le ninaw hrietna ei la nei hri nawh. Japan rama hin Centenarians 61,000 chuong an um a, hi laia 90% deuthaw chu  nuhmei an nih.

Khawvela nuhmei dama la um hai laia upa tak chu America mi Susannah Mushatt Jone of Brooklyn, New York niin tuhin kum 116 a upa a ni tah.

VAWISUN THUPUI
Lalpa naw chu tu am Pathien an um? Ei Pathien naw chu tu am lungpui an um a? Pathien chu ka kulpui nghettak a na, Mi tha famkim chu a lampiah a thuoi hlak.~ Sâm 22:32

Editorial
Inang senga Pathien mi pek hringna

Dam tak le harsatna iengkhawm nei lova kum 2015 hmang­tuhai ta ding chun a sawt naw de ei ti el thei. Amiruokchu, lusunna, vangduoina le harsatna tuor hai ta ding ruok chun kum dang neka sawt le rinum a ni thung awm ie. A hun tak tak ruok chu kum dang neka a sawtna hrim hrim a um chuong nawh. Nisienlakhawm a hun hmangtuhai hin ngaidan le hriet dan ei nei hran ve tlat hlak leiin ei hriet sawtin ei hriet sawt naw el a nih. Kum khat hun chu ni 365 seng a nih. Leap year kum ruok chun ni 366 a um ve thung hlak. Vangduoina le harsatna hai hin hun a suksawt nuom a, hlimna le lawmna ruok hin chu hun a suktawi nuom niin an lang.

Iengkhawm nisienla hun fe liemta hnung chu ngaiin ko ko inlakhawm hung kir ta naw ni a, ngai khawm a tangkaina a um ta der nawh. Amiruokchu, thenkhat ta ding  chun ei hun  muol liem ta annawleh an hawi lai tak lungrila hang chen vang vang dam hi an hawi a. Hunawl hmangral naa nun hlui hang dawnkir vang vang el chu, hmatieng beisei ding tha tak hmasuon ding nei lem naw hai ta ding chun a tluka inhawi le hadamthlak a um naw el thei. Chuleiin nun hlui ngaia lo tap ruoi ruoi khawm um hai sienla dem ngawt chi chu ninaw nih.

Amiruokchu, hril ta angin hun liemtain ei ta dinga thil­tha an tlun thei chu ei hmatienga tha amani, ei nun indiklo le tha lo siem thatnaa hmang amani, hun liemta a ei thaw neka thaw nasa sau sau tumna chang hrietna mi petu annawleh ei inchangtir thiem hlau amani hi a ni ngei ding a nih. Iengkhawm ni lo nek chun thil iemani bek nipui hi ei ta dinga thiltha a ni rawp hlak.

Tuta kum thar a inthawka suiletin, ei kum hmang ral ta zathai, ei thawsuok zathai, harsatna ei tuok dan hai, ei hlawtlingna hai le ei nunphung hung danglam tak danhai an ang naw hle el thei. Amiruokchu, thil pakhat inang senga Pathienin a mi pek a um a, chu chu hringna a nih. Khawvela mi ropui le neinung tak tak, thi ta han an nei phak lo hringna ei la nei bik hi ei vangneina a nih.

Awle, chu vangneina chu iengangin am ei ngai tawl a leh. Ei ngaihlut dan  an ang naw tawl hle el thei.  Hi vangneina hun hlu tak el hi, a tlung phak lo hai iengang chiein am ei hlep ve tawl a? Buoina le lungril sawlna dam, inruithei thawna dam, sum le pai ringawt buoipuina dam, hmangaihai leh hun engthawl le inhawi, inpawl hlimna khawm hmang hman lova puotieng programme vawnga dam a ni ei hmang hlak.

Annawleh ei hun liemtahai kha hang sut kir inla, ei nundan le miziea hin ei lung a awi tawk am? Kum hung thar ding hi tlung zo tanaw inla, ei sunghai, ei venghai, Kohranhai le nitina ei sinthawpuihai ta ding hin hrietzing tlak le ngai tlakin ei hun hlu tak hai kha ei hmang am? Ei taksa le thlarau nuna khawm a hma nek chun tu hun hi a pawimaw lem. A hmain mi hausa, hmeltha, thil thaw thei le hlim thei ni inlakhawm tuhin ei ni ta si naw chun iengkhawm a tangkaina a um nawh. Hiengang bawk hin  misuol, thabo, inruithei ngai le faru khawm lo ni hlak inla; tuhin ei sim a, ei ni ta sinaw chun iem ei lungngaina ding a um a? Taksa le thlarau nuna sim nei hi a tul a nih.

Post a Comment

Powered by Blogger.