-LRS Puruolte

Manipur Tribal hai ngaituo ding: Ei Bible ah ei en chun, Roreltuhai 17:6 - "Chuong lai huna chun Israel ramah lal an um naw a, mani sengin tha an ti zawng zawngin an thaw el a nih." ti le Roreltuhai 21:25 - "Chuong lai chun Israelhai lai lal hrimhrim an um naw a, mi tinin mani tha tizawng zawngin an thaw el a nih." ti ei hmu. Tutaka Tribal Movement nei mekhai hin hi thu hi ei in enfiena nisien nuom a um. Lal ei nei naw leia buoi am? Lal ei hau taluo leia buoi lem? Tu am ei Lal a ni a? Iengleia mani tha tizawng zawnga ei thaw el tawl am ning a ta?!

Nikhat chu ka khawlai lengin Tuithaphai lai vela lampui sira um, Tribal Martyr 9 hai inzana le anni hai sûnnaa puonzar (flag) dum le banner tar suok a um hai chu ka zuk thlir vel a. A then chu an rawng hai khawm a da zo tawl ta a. An lo inek tiek hman der ta a. Thenkhat nawk ruokchu la thar em em el khawm an um bawk a. Chuongang bawk te chun mi thenkhat lungrilah Manipur a Tribal Movement chu lo hlui hman ta in, zawi ngawi ngawi pawl lo um hman der ta hai sienlakhawm, Takchapa! ti a theitawp la suo tal tal ka ni annawm, inti pawl chu an bo bik der nawh ti a mi zuk inngaituo suok tir nal a. Politics khel dan chi hran hran a um si a, ieng Politics tak am a ni tawl ta ding maw, ei khel ta hih?! tia ngaituona ka seng zo sawtnawte a chun August 31, 2015 ni a Manipur Legislative Assembly in Anti-Tribal Bills a ngai pathum (3) zet a pasi le Act (dan zam) zui le zawm ngei ngei dinga la puitling tak tak nilo chu ka ngaituo zawm nawk ta peia, Manipur State sung chau ni lovin khawvela “Unau ei ni an nawm” in ti thei bawk si, Tlangmi atawm-ahlawma inkona tlanglawn (nomenclature) bik tak um theilo (tawng inhrepaw le inhrepawlo abikin sathu, sithu, bekanthu, ngathu le changalhme hme hlak hnam hai) nasatakin lungril a suknain, a kheia, iemanichenah a kei khawma, sawrkar laka nuorna le nawrnain mak tak elin ni za (100 days) a pel ta hnung le Ministry of Home Affairs (MHA), Govt. of India in Manipur a cheng Phairam le Tlangram a mihai le hi thila inhnikna nei le a'nzawmpui hai remtina thang lo chun hi Bills hi a fethleng thei naw ding thu, "ti ziek a nih" ti thei ngei dinga ziek,"Assurance" (inringzona dinga sukchiengna thupuong lekha ziek) a pek hnung meu khawma ringzo chuong lo, ngaidan, hriet dan, dit dan le nuom dan inang lo, Remna Lalpa-in remna palai sin a thaw a ni ngawt naw chun inrem theilo dinga inlangin mani tha ti dan sengin Tribal hai chun hun chu ei lo hmang nawk ta zing el chu a ni hih! tiin ka ngaituona chu a buoi map map hle. Mithi sungkuo, mipui, kohran, ram le hnam thuoitu hai lungril ding awm dam ka ngaituo sin a, an mi hriet phak ni der silovin ka lo lunginsiet ruk tawl hle el a nih! Bills pathum (3) hai sukpuitling ngei dinga sawrkar nawrtu hai hlak chun chawlsan tum bik chuonglo, hun iemani chen an ri an la suk dei hri a, hmatieng ding chu ngaituoum tak a nih. Manipur Tribal le Kristienhai ta ding chun Pathien kuoma tawngtai el naw chu thaw thei ding a vang hle.

Iengpo khawm lo ni ta sien, Remna Lalpa pieng champha le Kristienhai ni pawimaw, Krismas (Mimtukthla/December 25) hlak chu hun sawtnawte ah ei lo tlung nawk el ta ding chu a ni a. Krismas le Kum Thar lawm hun ding le Tribal Movement boruok inkarah inveng deka rorel el naw chu ram le hnam/kohran thuoitu tam tak haiin thaw thei an nei ta naw khawm nisien a hawi. Ka ngaituona a chun, tulai sik-le-sat inthlakdanglam (climate change) ang bawkin ei Kristien nun le Remna Lalpa nauhai ei nina khawm hi an thlakdanglam ve chu an ta awm hi tie maw?! Phalbi tieu sum zing neka buoithlakum buoina sumpui zing hlakin inkiengzai reng reng rel tum ta lo… Tukum Krismas boruok chu iem a ang ding maw? tiin lungril inthuk takah a lo um hman der ta a nih.

Chuonga ka ngaituona a um hman der tah lai chun Dec. 1, 2015 zana Christmas Kick-Off (Krismas boruok hun hawngna hunser) Programme ICI KTP Sielmat-in an huoihawt huna Special taka fielna (Special Invitation) an mi hung pek ve ngat chu ka ngaituo suok a. Hlawtling taka kha hun kan hmang thei kha Pathien malsawmna ropui tak a niin ka hriet a, vangnei le lawmum ka ti hle. Kha huna khan ruol leh kan thang ve thei a, Gospel Singer inlar tak tak haiin Pathien inpakna hla mawi tak tak sakin, Unaupa David Kakaap (Instructor, Rock Guitar Training Centre) in Thiemthil suklangna (Artistic Presentation) hun hmang vein, Remna Lalpa Pathienin a pek, a talent ngaisangum, danglam tak le khawvel inelna huna show ding khawma insitum derlo, Guitar- zut, per le hmet rik a show bawk a (Ka bulhnaia um hai chun Keyboard ama tading chun a ngai hran naw leiin Keyboard a ngai naw maw! an lo ti hiel a nih). Guitar hmanga ri mawi em em el a hung rem suok leia mipuiin kan mit, kan nakawr, kan bau, kan kut le ke hai induthaw taka kan lo hmang ve zak el le insumzoloa a then kan lo lam zak el chu "Joy to the world" (Lalpa a hung khawvel hlim sien...) ti hla kha a ni a. Inhawi kan ti tlang hle a nih. Kei khawm ka talent nia ka hriet chu an programme a thang ve a, thawlawm ka thei ang tawk pek kha a ni leiin nuom zat le ka duthusam a tam pe phak naw hle lang khawm khangang programme huoihawttuhai le Pathien kuomah lawmum ka ti hle a. Kha huna an hmusuok ang ang kha Christmas Present-in fahra le thangpui ngai hai an pek ding a la hang ni nawk kha ropui le lawmum ka tina a suk zuolin mitin entawn tlak tak niin ka hriet.

Hun harsa tak kara cheng khawm lo ni inla Krismas hmang indik le hmang hlawtling ni ei nuom a, Remna Lalpa neitu indik tak ei inti ngam a nisi chun Remna Lalpa pieng champha hi a chunghnung taka Pathien ropui taka siein, hlim le lawm takin lawm thei inla, an rem nawhai inrem inla, chu neka Krismas hmang indik le hmang hlawtling ei um chuong di'm a nih? Sa inhnik tak tak le sa chitinreng amani BJP sawrkarin a sa fak a khap mi tam takin ei lo inlau rawp hlak, Bawngsa fak teu le ruoithe a taksa insuk khawpna el kha ni naw sien; BJP in Bawng that an khap le khap naw a buoi naw bawk inla, Bawngsa ienganga inhnik le sa tam tak, Krismas lawmna tiin fa inla khawm unau ei inrem si naw chun iengam thangkai chuong a ta? ti dam ka ngaituo a. Mani hmasielna le duamna ram Khawvela cheng ni inla khawm Remna Lalpa neitu indik tak hai ei nisi chun “Lalpa a hung khawvel hlim sien, hnuoiin a lal lawm sien…” ti ang hrimin , ei Lalpa ei tadinga a hung na hi hrefuin ei nun ah Remna Lalpa hnungzuitu ei nina tak inlang mawl raw seh. Tulai boruok, Manipur Tribal Movement a ei khawsak dan hai hih enin Remna Lalpa neitu indik tak ei ni thei ding am? tiin ka ngaituona chu a lo buoi hle a nih!


Post a Comment

Powered by Blogger.