Service kum 31 tling lawmna a buotsai
CCPUR: Upa J. Lhungdim, IDAS, Chief of M. Songgel chun zani 11:00AM khan M. Songgel Community Hall­ah Goverment Service kum 31 sung sin a thaw Pathien kuoma lawmthu hrilna hun a buotsai a, hi huna hin Rev LB Angam, General Director, ECCI chun Upa J. Lhungdim, IDAS ta dinga tawngtaipekna le infuina thu a hril. Upa J. Lhungdim hi Integrated Financial Adviser (IFA) Army Ordinance New Delhi sin thaw lai a nih. Siel 1 thatin ruoi the a nih.


Officer sin hmu thar
CCPUR: Intelligence Bureau, Union Ministry of Home Affairs hnuoia Assistant Central Intelligence Officer (ACIO) Examination, 2014 a khan Ms Betsy Lalsiempui d/o L. Rokhum Infimate of Sielmat chun hlawtlingna a chang a, December 28, 2015 khan joining report pein Training Centre­ah a lut tah. A hlawtlingna hi ei Chanchinbu chun a lawmpui hle. Ama hi RES a Coaching lo la ve hlak a ni a, RES hotu hai chungah a nu le pa han lawmthu an hril.

DC le a team hai an hungtlung
CCPUR: December 29, 2015 nia Vangai area­a Ankhasuo le Thanlon Sub­Division­a Sinzawl khuo haia Manipur CM O.Ibobi Singh in 33/11 KV Power Sub­Station a hawngna hai uopa inzin DC/CCPur le a team hai chu zani hmasa zan khan Tuithaphai an hung tlung a, zanikhan Office an kai nawk nghal. Sinzawl­a inzin SP/CCPur le a team hai chu zani zingkar inhmatak khan an hungtlung a, office an kai nghal bawk.

Motor inhmang thuah FIR file
CCPUR:  December 23, 2015 zingkar 1:00­4:00AM inkar sung khan Mr Ramthienghlim Hmar s/o Lalpui of Muolvaiphei motor Bolero (Pick­up) white MN01G/1401, Chesis No. MAIZC4GHICFIE50902, Engine No. GHFLE35989 rukru han an inrukhmang a, Dec. 29, 2015 nia report pek a ni angin CCPur Police chun FIR No. 99 (12) 2015 CCP­PS U/S 379/34 IPC  an registered.

FHG Get Together 2015 hmang
CCPUR: Zanikhan Hmar Facebook Group (FHG) chun Mr Eric Infimate hai in, Sielmat­ah Annual FHG Get Together­2015 an hmang. Hi hun hi ElarEs Neitham Zoute in a keithuoi a, member fekhawm han self­introduction neiin Eric Infimate in Pathien kuoma tawngtaina neiin thlaithleng an awt tlang.


FHG Facebook group hi Chanchin thedartu le inpawltlangna chau ni lovin thangpui ngaihai thangpui hlaktu, damnaw, accident thisen pek tul hai thangpui hlaktu le sum­le­pai a tul anga tlawmngai mihai sawmdawl hlaktu a nih. Hi huna hin fiel an ni angin Joshua L. Amo @ Jr Amo (Fox Journal) le LRS Puruolte, Chief Admin ( Virthli Online news portal) hai khawma uopin thuhrilna hun an hmang baka  member fekhawm hai laia FHG founder senior member le Advisers ­ Pu Lalchungsiem Thlawngate, Pu Lalvulthang Khawbung, Pu Enok Ngamhaulien Songate, Pu Ngama Khawbung le Alan Famhoite hai khawmin thuhrilna hun an hmang.

INDIA­IN MYANMAR­A TRILATERAL HIGHWAY SECTION­AH RS. 371.58 CRORES SENGIN LEILAK 69 A DAW DING

MUMBAI: Zanikhan PM Narendra Modi inrawinain Union Cabinet meeting nei a ni a,  Union Cabinet chun Tamu­Kyigone­Kelewa (TKK) approach road thangin Myanmar­a Trilateral highway huop sungah Rs. 371.58 crore senga Leilak 69 daw dingin remtina a nei tah.  Leilak dawna hi Imphal­Mandalay bus service tumna le inzawm a ni bawk a nih. Hi thil hin Myanmar le India ram inkara infepawna lampui changtlung lem a hung intlun ding bakah insumdawngtuona nasa takin a sukhrat pha ding a nih.

May, 2012­a a hun laia PM Dr Manmohan Singh Myanmar­ an zin huna khan Myanmar sawrkar ngenna angin India sawrkar chun Trilateral Highway section­a Tamu - Kyigone ­ Kalewa (TKK) ah leilak 71 daw dingin remti a ni a, Myanmar sawrkar chun tuhin ama khatin  Leilak pahni dawna sin a thaw tan mek a, sawrkarin ngaipawimaw hmasa tula a hriet leia India sawrkar thangpuinaa Leilak dang 69 hai dang hai hi daw dinga cabinet in remtina a nei a  nih.

Leilak dawna sin hi Project Management Consultant (PMC) mode­in Engineering Procuring and Construction (EPC) in thawng an ta, Yangon hmuna Indian Embassy, PMC le Ministry of External Affairs in ngun takin an enkai ding ti a nih. Hi project hi kum 2019 kum lailung vela zo fel hman dinga ti a ni bawk.

Hi baka hin Union Cabinet chun Taxes thuah Maldives, Slovenia hai le agreement ziek ding;  Smart Cities thuah Urban Development Ministry le Bloomberg Philanthropies (BP) New York han MoU ziek ding; Canada leh Higher Education tienga thangruolna MoU sukthar dingin remtina an nei bakah India­Australia Civil Nuclear Cooperation Agreement sukpuitling dan ding le thu pawimaw dang dang hriltlang a nih.

BJP Parliamentary team an hung inzin
IMPHAL: India Sports Sangh National President le senior BJP leader Sunil Gupta thangin BJP Parliamentary team chu Manipur­ah an hung inzin a, zanikhan Naoriya Pakhanglakpa constituency­a development sin thawna an va enfel. BJP parliamentary team hi Social activist le member BJP Naoriya, Pakhanglakpa S. Manaoton le midang dang han an tawiawm. Mr Sunil Gupta chun Naoria Pakhanglakpa Constituency sunga  Dec. 31, 2015 nia India Sports Sangh uop ding hung a ni thu a hril.

Excise Dept. in Zu tam tak suksiet
IMPHAL: Manipur Excise Department chun April­December, 2015 sunga hmun hran hrana Zu mana um hai zanizantieng 1:30PM khan Lamphel­a an Office campus­ah Chanchinbumihai hmuhawin an suksiet. Zu suksieta um hai lai hin Country made liquor litres 23,175 le foreign liquor botles 375 a thangsa. Excise Dept. Asst. Commissioner K. Joykumar chun, Army le Paramilitary haia inthawk Zu­ah Revenue Rs. 6,63,09,300/­ le local liquor­ah revenue Rs. 15, 62,700/­ an hmu niin a hril a, revenue an hmu hai hi State sawrkar kuta an peklut pei thu a hril.

Sadu Chiru Waterfall­ah fakthei khap
IMPHAL: Sadu  Chiru village Authority chun Sadu Chiru Waterfall area sungah fakthei thil chi tum tum fak le chawi a khap. Hi thil hi waterfall biel sunga pollution pung pei dangna dinga thaw a nih tiin General Secretary, Village Authority chun a hril. Chun, visitors hai sukbuoi khawpa gambling le thil dang dang thawtu hai  chunga action lak le fine inchawitir an ni ding thu a hril bawk.

PREPAK cadre 1 man
IMPHAL: December 29, 2015 khan 12­Bihar regiment chun Bishnupur Police Commandos hai le thanruola Malom hmuna dappui an thawnaah PREPAK cadre pakhat R Chongsing Koirang @ Totot (28) S/o (L) R Kachun Koireng  of Thangmaiband Hiadm Leikai an man a, Nambol Police kutah an peklut. Chun, 12­Bihar Regiment han Dec. 23, 2015 khan Lairenjam village­a rul in na taka a chuk hliem Jillangamea (22) chu Rul tur thatna damdawi kapin an sanhim.

January 7 le 8 haiah General strike
IMPHAL: December 29, 2015 nia Moirang Ningthou Khonjengbam Ibohal Shanglen­a Joint Committee Tiddim Convenor in Press meet an huoihawt ah, January 7, 2016 in Manipur pumpui huopin General Strike an thaw tum thu, general strike  thangsain nuorna chi tum tum an sunzawm pei ding thu an hril. State sawrkarin Thangjing ti hming Thangting tia thlakthleng a tum dodalnaa general strike hi an thaw tum a nih. Chun, KCP­MC (Liberation) chun RIMS hnuoia Staff nurse lakna ding le inzawma written test a question paper leaked chungthuah RIMS thuneitu han anni inrawl thupna dinga misuol (gang)  pawl khat an hmang tia intum le dodalnaa General strike  thaw an tum.

Missile hlawtling taka ensin
KOLKATA: India chun zanikhan INS Kolkata a intahwk Long Range Surface to Air Missile LR SAM hlawtling takin ensinnain a kapsuok. LR SAM ensinna hi Indian Navy, DRDO le Israel Aerospace Industries hai le thangruola nei a nih. Hi missile hi DRDL, Hyderabad­ a DRDO Lab le Israel Aerospace Industries han thangruola an siem a nih.

PM in project tum tum  sinthawna a ennawn
NEW DELHLI: PM Narendra Modi chun zanikhan India rama state tum tum haia road, railway, metro rail, power le food processing sectors haia infrastructure projects sin thawna hai a ennawn a, Myammar­a Kaladan Multi­Modal Transit Transport le Rih­Tedim road project hai chu India’s Act East Policy­a lungpawimaw a ni leiin an hmatienga zo dingin an hriettir a, MGNREGA hnuoia Direct Benefit Transfer PDS computerization sinthawna khawm a ennawn bawk.

J&K CM ICU­ah a um mek
NEW DELHI: Jammu and Kashmir Chief Minister Mufti Mohammad Sayeed chu All India Institute of Medical Sciences (AIIMS), New Delhi­a Intensive Care Unit (ICU) ah enkawl mek a nih. Mr Sayeed (79) hi December 24, 2015 a inthawka kha a damnaw leia AB8 Intensive Care Unit a sie a ni a, sienkhawm a ngirhmun a derthawng naw niin AIIMS thuneithu hai chun an hril. Union Home Minister Rajnath Singh chun zani hmasa khan hospital­ah a va kan.


KUMTHAR CHIBAI
Kum Thar lawm hmangtu ding hai po po Kum Thar Chibai kan hung buk cheu. Kum hung thar hin mitin ta dinga malsawmna, hriselna le hlawtlingna hung thar suok pui ngei sien tiin ditsakna kan hung inhlan cheu.

Manipur Hill Journalists Union (MHJU) hnuoia Holiday list dungzuiin December 31, 2015, January 1, 2 & 3 2016 hai hi Chawl a ni leiin MHJU hnuoia Tuolsung Chanchinbu Office hai chu hieng ni haia hin khar ning an tih. January 4, 2016 in Office hawng nawk ning a ta, January 5, 2015 a inthawk Hmasawnna Thar hung suok nawk a nih.

Sd/­ Lalmalsawm Sellate
Editor & Publisher, Hmasawnna Thar Daily

ST status pek tumna an dodal
GUWAHATI: Assam rama indigenous Tribal organisation tum tum 19 hai umna Coordination Committee of Tribals Assam chun, Assam rama hnam 6 ­ Koch Rajbongshi, Tai Ahom, Chutia, Moran, Motok le Tea tribe hai Scheduled Tribe (ST) status pek tumna chu an dodal. Committee chun Koch Rajbongshi, Tai Ahom le Tea tribes hai chu hnam lien tham, Koch Rajbongshis Tai Ahoms hai chu hnam advance takel politics le economic tienga khawm insang tak an ni leiin ST a zieklut an ni chun NE a ST hai ta dingin harsatna an tlun ding a nih tia an dodal a nih.

Naxal commander 2 an inpe
RANCHI: Jarkhand­a Latehar district a chun zani hmasa khan Ranchi hmuna Police Headquarters­ah Naxalites commander pahni­ Sub Zonal Commander, CPI Maoist Kuldeep Mehta le area commander Gajendra Sao @ Gajju Sao hai DGP DK Pandey hmaah an inpe. Gajendra Sau hi case 32 nei mek niin security force an kap hlum phingsunga bomb kamnaa inrawlna nei ve, sawrkarin luman Rs. 5 lakh neia a lo puong ta a nih.

SULFA in ralthuom chelek nawk dingin
NEW DELHI: All Assam Surrendered ULFA Committee (SULFA) chun zani hmasa khan Jantar Mantar hmuna nikhat sung aw demonstration an nei a, sawrkarin an thil ngen hai a ngaisaknaw chun ralthuom an chelek nawk ding thu an President Raj Kumar Duara chun a hril. SULFA cadres 800 vel hai chun kum 1998 khan an ralthuom hai siethlain sawrkar kuta an inpe a, sienkhawm sawrkarin sawmdawlna pek an la ninaw bakah case nei hai khawm an ngenna anga hlip pek an la ninaw thu Duara chun a hril. SULFA hin Assam rama dan lova Bangladesh mi um hai zawngsuok ding le ILP hmang ding bakah Assam chu Tribal state a puong dingin an ngen bawk a nih.

VAWISUN THUPUI
Kan dam sûng nihai tiem dan ding min chuktir la, Varna lungril kan  nei pha hielna dingin.  ­Sâm 90:12

Editorial
Kum hlui mangtha; Kum Thar Chibai

Mihriem sukdanglam thei lo hun le ni hai a ngaia fe peiin, hunbi ei tiem dan angin a chang leh ei hmuok a, a chang leh ei inthla hlak angin kum 2015 sunga ni tawpna (Kumhlui inhlaliem ni) tak December 31 ei lo chuongkai nawk der ta a; Hmasawnna Thar Chanchinbu khawm tukum a dinga a suok nuhnung tak ni a ni tah. Kum 2015 chun kir rel lovin a mi liemsan vung vung el nawk ta ding a ni a; kum 2015 kha mi tam tak ta dingin malsawmna kum a ni laiin mi thenkhat ta ding chun beidawngna, vangduoina le lusun kum ni ngei a tih. Hi lei hin Kum hlui (2015) liem ding ei ngai dan le ei thlakhla dan khawm inang vawng  naw nih. Iengkhawm ni sien, hring le dama la um hai ta dingin, Kum 2015 ni tawpna tak chen tlung thei ding le Kum Thar hmuok thei dinga ei hringna mi hlapektu Pathien chunga a hmasa takin lawmthu ei hril a nih.

Hmasawnna Thar Chanchinbu chun hun harsa le sum le paia harsatna tam tak paltlangin, ditsaktu hai le Pathien thuoina zarin tuhin kum 31 hmel a hmu mek a nih. Kum 2015 sung khan thu tam tak ei insuo a, chuong ei thu insuo hai lai ziek suol le sut zuol pal annawleh mi thenkhat nakhei deu  thil ei ziek khawm tam tak um ngei a tih. Sienkhawm chuong thil haiah inngaidamtuoa theinghilin, kum 2016 hung thar hin lungril thar leh bul ei tan thar seng nuom a um. Chun, Article (thuziek) bengvar le thutha tak tak hung ziektu hai popo chunga le Advertisement hung insuotu hai popo chunga Hmasawnna Thar chun lawmthu a hril a, khang in thuziek hai le Advertisement in hung insuo hai kha ei chanchinbu sukhlua, sukbukimtu  le Chanchinbu fepeina dinga thangpuitu an ni leiin kum hung thara khawm hin hung sunzawm nawk pei dingin ei in ngen a nih. Article annawleh thuziek thenkhat insuo lo khawm a um zeu zeu a, insuo remchangnawna um leia insuo lo an nih ti ziektu hai hrietthiemna ei hung ngen bawk. Eini laia Chanchinbu hai hi a tlangpuiin a man (fee) a inenkawl ei nitawl leiin Chanchinbu tha taka a fe pei theina ding le an thanglien theina ding hin latu han a man ei pek that a tul a. Mi tam takin tha taka a man ei pek laiin mi tam tak  a ngaisaklo le ngaitha ei la um leiin pawi ei ti a. Kum hung thar dinga inthawk hin chu latu han tha taka a man lo pe zat zat dingin ei in ngen a nih.

Awleh, a hmaa ei hril ta angin kum hlui liem ding hi mi thenkhat ta ding chun inro um tak, zuk liem vung vung el ding ngaituoa, nunhlui ram fang tuhai ta ding chun khawsawt um le mitthli tlakna ding tam tak um ngei a tih. Sienkhawm hun le ni hai hi ei chelngir ruol a ni sinaw leiin  ienganga ngaiin thlakhla inlakhawm second khat khawm ei chelngir theilo a ni leiin hun liem ta hai dawnkira indawmkun nekin hmatieng thlira ei hun hmang dan dinga inbuotsai chu hring dama ni thar le hun thar hmutu han ei thaw ding a nih. A khawsawt um zawnga thlir chun nunhlui ngailo mihriem hi ei um ring a um nawh. Thenkhat ta dingin kum liemta kha hmangai lungdit hai le hi khawvela ei inthena kum a ni leiin kum liem ding hi lusun purdo taka sun le inthlaliem thei khawm ning a tih. Sienkhawm ei ngai le hmangai lo fe ta hai kha hi khawvela hin ei hmu nawk tanaw ding a ni leiin ei ngai a, hmu nawk ei nuom a ni chun an fena hmun ei tlungve theina dinga Pathien bel chu ei thaw thei umsun a nih ti ei hriet nuom a um.

Mi tam tak Kum hlui inthla dinga nasa taka inpuocha khawm um ei ta, Kum thar lawm dinga nasa taka inpuocha le Kum Thar Resolution siem tawk khawm ei um ngei ring a um. Kum hlui hi ei inthla nasat leiin thlakhla a um sawt chuongnaw ang bawkin Kum Thar nasa taka lo hmuok hin a ropui sawt  chuong bawk naw a; a pawimaw tak chu  ni le kum a hung thar ang peia ngaituona le lungril thar neia, nunthara nun hi a ni lem. Unaunu Lalramthang chun, ‘Hun le kum hlui inher liemin... hlimlai nun a liempui.. kum thar thingtin hna an hung thar, kan nuhlui thar si lo’ tia hlain a lo saksuok angin mi tam tak chun Kum thar resolution tha tak tak ei siem hlak a, sienkhawm  kum liemtaa ei thaw suol le ei thaw indiknaw hai hnawl le bansan harsa ei ti tlangpui hlak. Hi lei tak hin mi tam tak chun ‘pasie kum tiem’ thawin ‘kum nawk chu’ tiin ei hun le ni le ei hringnun ei hmangliem rawp hlak.

Pasie kum tiem an hril ei thaw nawna dingin mitinin kum 2016 hung thar ding hi hmuok loin ‘Ni Thar’ hmuok dingin ei lungril le ngaituona sûngin, ei hun hmang dan ulukin, tumruna, taimakna, indikna, ringumna hai leh hmuok seng tum ei tiu. Chuonghai popo leh kum 2016 ni thar ei lo hmuok a ni phawt chun kum 2016 hi malsawmna le hlawtlingna kum hung ni ngei a tih. Kum hlui a liem le inruola Kum a hung thar ang bawka mitinin lungril thar putin, a tha tiengah thar­pui nei seng inla; ei thil ching thanaw hai bansanin kum 2016 hi mitin ta dinga malsawmna kum hung ni ngei dingin tiemtuhai popo ditsakna chibai ka hung buk cheu.

Post a Comment

Powered by Blogger.