Tuilien le thliin In a suksiet hai thangpuina Rs. 10,000 pek ding
CCPUR: Tukum sunga Ruo le thlihrangin In le lo a suksiet hai le inzawma District Disaster Management Authority in Manipur sawrkar kuoma thangpuina dinga Rs. 1,28,30,550/­ an ngen laiin sawrkarin Rs. 50 lakh vel chau a hung  pek a. Hi lei hin Thli le ruo leia tuilienin In a suksiet vawng (fully damaged/destroyed) neitu hai kuomah thangpuina Rs. 10,000/­ seng pek ning an ta, In le lo a suksiet met (partially damaged) hai Rs. 2000/­ seng pek ding; Tuilien leia thina tuok sungkuo hai kuoma Rs. 4 lakh pek ning a ta, Ngaizaniang, Peon DC Office in kang thangpuinain Rs. 20,300/­ pek ding le Sangaikot area­a IVR repair na dingin Rs. 5 lakh pek ning a tih.
 
Dist Disaster report dungzuiin thli, ruo le tuilien in Henglep Block a khuo 9 haia In 124 le CCPur Sub­Division a inthawk khuo 107 haia in 1097 a suksiet niin a hril.

Admit Card lak thei
CCPUR: Delhi Police hnuoia Constable lakna ding le inzawma SP/CCPur Office­a Application form la han November 27, 2015 a inthawk khin Tuibuong­a SP Office­ah Admit Card lak thei ning a ta, thu chieng lem SP Office­ah hriet thei ning a tih.

HSLC Application form lak thei
CCPUR: Board of Secondary Education, Manipur Office, Imphal­ah zanita inthawk khan HSLC Exam hung um ding le inzawmin Application form semdawk tan a nih. Form hi Headmaster/Headmistress le Principals han mani School chita ding la thei an tih. Form hi December 16, 2015 chenin BSEM Office, Imphal­a peklut nawk ding a nih.

Tribal martyrs ralna le thangpuina
CCPUR: Zanikhan Ngoiphai Village Authority chun Tribal Martyrs hai ralna dinga in tina Rs. 100 an dawlkhawm Rs. 5000/­ JAC hnuoia Finance Sub­Committee kutah an inhlan.
   
Chun, November 25, 2015 khan Zomi Community of Canada han M. Gouzamang, MDC, ADCC fethlengin JPO kutah Tribal Martyrs hai ralna dingin Rs. 47,036 an inhlan a, Zomi Agape Christian Church Scattle WA (USA) khawmin B.K. Suannou of Hmuia Veng fethelngin JPO kutah martyrs hai ralna dingin Rs. 43,580/­ an inhlan bawk. Zanita JPO kuta ralna sum lut hi a rengin Rs. 90,916 a ni a, Vumkhankhup of Zenhang Lamka in  Rs. 100/­ le S. Thanglian of Belam Veng HQ in Rs. 200/­ a pek bawk.

Work order sem  mek
CCPUR: MGNREGS 2015­16 , 2nd Phase hnuoia Job Card holder hai ni 7 sin thawna ding sum sanction a ni le inzawmin SDOs/BDOs han Village Authority hai kuomah work order an semdawk mek a, tuta kar annawleh kar thar sung khin labour& material cost khawm V/A hai kuoma SDOs/BDOs han sanction an tih.

PHC/PHSC hai an visit ding
CCPUR: Dr Liankhojam Guite, Dist. Malaria/Nodal Officer, NVBDCP, CCPur inrawinaa Malaria Dept. staff hai chun November 28, 2015 khin Behiang PHC, Geljang PHSC, Lamjang PHSC, Sumchinvum PHSC, Zezaw PHSC le Singngat PHC hai  supervisory visit nei an tih. Monitoring, evaluation and supervisory visit huna hin Dr. Liankhawjam Guite inrawinaa Malaria staff han MHS, MPW, MHW le ASHA hai leh Behiang PHC­ah awareness campaign of malaira and dengue nei bawk an tih.

SSPP FC Player hai inthlaliem
CCPUR: December 1­12, 2015 inkar sunga New Delhi­a Dr Ambedkar Stadium­a 9th North East Tamchon Memorial Football Tournament 2015 uma thang ding SSPP FC Player mi 15 hai  tawngtaipekna, inthla liemna le flagoff program zani 11:00AM khan SSPP Complex, Bungmual­ah nei a nih. Players hai hi Rev. Khamchinkhup in tawngtaipekna neiin discipline nei taka inkhel dingin players hai an fui. Ricky Vanllalawm in players hai hi an vailiem.


DCC Review meeting
CCPUR: Vawisun 11:30AM hin DC, CCPur inrawinain DC Office­a BRGF Resource Centre­ah Bank le inzawmin District Consultative Committee (DCC) District Level Review Committee (DLRC) June & Sept. 2015 quarter meeting um a tih. May 23, 2015 a meeting proceeding, June 30, 2015 chena CD Ratio, Govt. Sponsored Scheme/prog. sinthawhai, Govt. sponsored scheme le priority Sector advance (loan) recovery; CCPur Dist a SBI­RSETI sinthaw, CCPur Dist. a ATM booth chungthu, Bank tum tum sinthaw hai ennawnna nei an tih.

Parliament Winter Session tan: Lok Sabha-ah India Constitution chunchang hriltlang a nih
NEW DELHI: Parliament Winter Session chu zanikhan tan a ni a,  Lok Sabha­a chun India ram danpui induongtu hai laia pawimaw tak Drafting Committee Chairman Dr B. R. Ambedkar piengchampha a vawi 125­na le inzawmin India Constitution (India danpui) chungchang hriltlangna nei a nih. PM Narendra Modi chun, winter session sungin sawrkar chun ieng thu khawm hriltlang an pei tia hrilin Parliament neka hriltlangna ding platform lien lem a um nawh tiin a hril.
 

Constitution thuah, Lok Sabha Speaker Sumitra Mahajan chun, India Constitution chu India lekhabu thienghlim a ni thu hrilin  kum zabi iemanizat liemta sunga ram mipui hai duthusam le ngaituona hai tarlangna a nih tia hrilin Institution hran hran le India khuo le tui po po Constitution hin a pawm vawng a, mipui aiaw dinga thlang hai hin mipui harsatna chi tum tum hai chingfel dan an zawng chu an thaw ding a nih tiin a hril.
 
Constitution hriltlangna hunah thang Trinamool Congress leader Sudip Bandyopathyay chun Dr BR Ambedkar chu mi pasie le hnuoihnung hai dawmsangtu, untouchability sukbo dittu a nih tiin a hril a. BJD leader Tathagata Satpathy chun India rama tawng po po ngaipawimawa, dawmsang an tul thu a hril a, Shiv Sena leader Anand Rao Adsul chun, NDA sawrkarin Dr Ambedkar inzanain London hmuna a in chu lain memorial in a lo sie ta a nih tiin a hril.
   
NCP leader Tariz Anwar chun, iengleia writers, artists le filmmakers han an awards dawng hai an pekkir am a na ti sawrkarin a ngaituo a tul thu a hril a, RJD Jai Prakash Narayan Yadav chun  Caste­census data puongzar dingin a ngen a, Congress leader Mallikarjun Kharge chun SC le ST hai ta dinga promotion thuah reservation siem a ngen a, Labour Laws sukdanglam tha a tinaw thu a hrilin intolerance hi ei society le ram ta dinga tium a ni leiin chingfel a tul tiin a hril.
 
BJP leader le minister for Social Justice and Empowerment Thaawar Chand Gehlot chun, Narendra Modi inrawi NDA sawrkar chun SCs, STs, Disable le transgenders hai ta dinga schemes dang dang a fepui mek thu hrilin Congress in SCs/STs hai ta ding sub - plan allocation suktlawm a nih tia an intumna chu hnielin Congress inrawinaa UPA sawrkar hnuoia nekin fund an hmu rawn lem tia hrilin mitinin India Constitution ei zawm seng a pawimaw tiin a hril.
 
Home Minister Rajnath Singh chun India Constitution a ‘Secularism’ chu nasa taka hmangsuol a ni thu hrilin, Secularism hi khawvela hmang suol (misused) nasa tak a nih tiin a hril.
         
Sonia Gandhi chun intolerance thuah sawrkar khakin, Constitution ideals le principles nasa bei mek a ni leiin ngirhmun derthawng taka a um a nih tia hrilin message tha lo tak a peksuok leiin dem a phu  a nih tia hrilin  PM chu intolerance tlung mek ngaimaw dingin a ngen.

CM in project dang dang a hawng
IMPHAL: Manipur CM O.Ibobi Singh hun zani 10:30AM khan Sangaipat, Imphal East­a Manipur Sericulture Project Management­a Biometric Access Point le CCTV Networking a hawng bakah zani 11:10Am khan Wangkhei hmuna Pahthoibi Arcade a hawng a, 1:45PM khan Sericulture department­ah GTS Project Monitoring System a hawng bakah City Convention Centre, Imphal ah “Make in Manipur for Employment Generation” a hawng bawk. Hi huna hin Chief Secretary O. Nabakishore, Industries minister K. Govindas le Dy. CM hai khawm an thang.

War museum in mi ennuom  a hlaw
IMPHAL: Sangai Festival nei mekah le inzawmin Indopui  pakhatna le pahnina hun laia thil  lakkhawma um hai pholangna Imphal War museum sir tu an tam hle. War Museum a hin Indopui laia motor, hmangruo danglam tam tak, ralthuom, silaimu, vuongna engine, Arisaka gun barrel, a mu, Dakota aircraft radio compass, artillery shells, Allied khaki, war manuals, type 97 Japanese Grenade, type 91 Japanese grenade, pilot hai lo hmang hlak oxygen cylinders, pilot seat, silaimu bawm, map, documents le Indopui hun laia Japanese le British sipai hai hmangruo dang dang pholang a nih.
 
War museum hi Manipur GovernorV. Shanmuganathan, Manipur Governor O.Ibobi singh bakah high officials hai khawmin an va sir. Hi war memorial va sir tu Japanese hai chu an lungril a tawk hle a, pakhat lem chu a tap suok vang a hril a nih.

Nitish Kumar venghimna sin sukkhau
PATNA: Mobile SMS hmanga Nitish Kumar that dinga vauna private TV Channel in an dawng leiin Bihar Chief Minister Nitish Kumar venghimna sukkhau zuol a nih. SMS dawnga um le inzawm hin Police chun Section 387 of IPC hnuoia FIR registered a ni tah tiin Patna SP, Vikash Vaibhav chun a hril a, Police in an suizui mek. Nitish Kumar hi Z plus security hnuoia venghimtu dawng mek a nih.

Nagaland RS MP Khekiho Zhimomi a thi:  RS  in an sun
NEW DELHI: Nagaland Rajya Sabha NPF MP Khekiho Zhimomi chu zani zingkar 6:20AM khan lungphu chawlin All India Institute of Medical Sciences (AIIMS), New Delhi­ah kum 69 mi niin a thi. Khekiho Zhimomi hi Nagaland Legislative  Assembly­a term 3­ 1989 to 1992, 1993 to 1997 le 2003 to 2008 haia thlangtlinga lo um ta le Nagaland sawrkara Industry, Commerce, Mining and Border Affairs Cabinet minister sin hai lo thaw ta a nih. Ama hi Nagland Students’ Federation founding member ni bawk a nih.  A ruong hi zanikhan Dimapur, Nagaland tieng hung phur a ni a, vawisun hin a ruong vuiliem ning a tih.
 
Rajya Sabha chun zanikhan an member Khekiho Zhimomi thi sunna an nei bakah inzanain zanita dingin Rajya Sabha inthung chu suktawp a nih.  Khekiho Zhimomi hi Rajya Sabha term hni­ July 2008­April, 2010 le April 2010 a inthawk a thi chena MP ni lai a nih.

India in Prithvi II Missile hlawtling takin a ensin
BALASORE: India chun zanikhan Odisha­a Integrated Test Range (ITR), Chandipur a launch complex­3 a inthawk  nuclear ralthuom phur thei Prithvi­II missile hlawtling takin a ensin. Prithvi­II missile hin km. 350 a hla kap phak, warheads kg. 500­1,000 phur thei a nih.

Nitish in April 1 a inthawk Zu khap a tum
PATNA: Bihar Chief Minister Nitish Kumar chun election campaign huna an tiemna angin Bihar­a chun April 1, 2015 a inthawk Zu khap (ban) a ni ding thu zanita Prohibition Day hmangna huna a hril. Mi pasie tak chenin zu an dawn leiin an insung khawsakna le an nau hai lekha inchukna nasa takin a sukbuoi a nih tiin Nitish Kumar chun a hril a, Zu dawn hung pung pei hi insunga nuhmei chunga suolna le suolna dang dang hung pung nasan a nih tiin a hril. Nitish Kumar hin tukum July thla khan Bihar Assembly Election­ah sawrkarna siem thei khawpa thlanglal an ni chun Zu khapna dan hmang dingin a lo puong ta a nih.

Russia Helicopter tuoksiet tuokah mi 10 an thi
MOSCOW: Zanikhan Russian Mi­8 Helicopter chu Krasnoyarsk region­ah tuoksiet tuokin a tla thla a, mi 10 a thi bakah hliemna tuok 15 Hospital­a admit an nih. Helicopter a hin crew member 3 le passengers 22, an rengin mi 25 an chuong niin West Siberian Transport Prosecutor’s Office thusuok chun a hril. Tuoksiet a tuok nasan hriet a ninaw a, sienkhawm a khawl buoi lei ni dinga ring a nih.

Russia in S­400 Missile System Syria airbase­ah
MOSCOW: Russia sawrkar chu Turkish Air Force han a fighter jet an kapthlak pek le inzawmin Syria rama a airbase a chun ralthuom tha a seklut zing a, zanikhan hi­teh air defence system S­400 missile system Syria rama a airbase­ah a thawnlut. Russia chun northwestern Syria –a air group um hai venghimtu dinga S­400 anti­aircraft missile hi a thawnlut niin a hril.

Myanmar mi inruithei leh man
AIZAWL: Zani hmasa zan khan Mizoram Excise and Narcotics Department official han Khawpuar, Myanmar mi Sangneihi (43) chu Heroin grams 109,  tuolsung rate­ah Rs. 3.5 lakh manhu leh an man.
 
Chun,  November 24 le 25, 2015 hai khan  Excise­a Anti­- Narcotic Squad han  Lalchhanhima (33) s/o Lalnunpuia, Tiddim (Khampat), Myanmar chu heroin gram 29 leh an man bakah Lalremruati (27) d/o Rokunga, Bairabi North chu heroin gram 43 leh an man.

Finance Ministry in Implementation Cell
NEW DELHI: Finance Ministry chun Seventh Pay Commission recommendation sukpuitlingna ding le inzawmin Joint Secretary level inrawi Implementation Cell an din. Implementation Cell hi November 20, 2015 a inthawk kum khat sunga dinga Department of Expenditure in an din a nih. Implementation Cell hin Director level officer le under­secretary level officer pahni thangin officials 9 an um. Justice AK Mathur inrawinaa 7th Pay Commission chun November 19, 2015 khan Finance Minister Arun Jaitley kuoma recommendation a lo pek ta a, hi pay commission recommendation hi January 1, 2016 a inthawk hmang tan dinga ti a nih.

VAWISUN THUPUI
Chuongchun, ram sukhning ruollo ei chang leiin, lawm takin um ei tiu, chu zara chun inza le tidek pumin Pathien lawm zawngin rawng ei bawl thei ding a nih; ei Pathien hi mi kangbohmang mei a ni sih a.  ­Hebrai 12:28­29

Editorial
Mitin mamaw ruoltha le hmangaitu

Pathienin a mihriem siem hmasa tak Adam (pasal) khawsawt taka a um ding a phalnaw leia a ruol dinga Evi (nuhmei) a siem khan  mihriem hai hi Pathienin mani khata um ding ni lo, um tlang a, harsatna, beidawngna le lungngaina ei tuok changa insawmdawltuo a, in hnemtuo dinga a mi siem  ei nizie  chieng takin a suklang. Lusun thei, chau thei, beidawng  le lungngai thei dinga  Pathienin a mi siem a ni  leiin mihriem hringnun  lamtluong hi tuipui damduoi ang chu a ni nawh. Hlim le lawm zinga um thei ei ninaw ang bawkin lungngai le beidawng zinga hringnun hmang dinga siem ei ninaw bawk. Tap hun a um ang bawkin innui hun a um a; lawm hun a um ang bawkin beidawng le lungngaina hai khawm hi mitin tuok dinga Pathienin a lo ruot sa diem a nih.
 
Mihriem hai hih a tul hun huna insawmdawl­tuo a,  in­thangpuituo dinga Pathienin ami siem a ni laizingin a tlangpuiin ei that lai le  khawsak thei huna hmangaitu ding, sung le kuo, laina le ruol­tha tiem senglo an um hlak a, sienkhawm ei ngirhmun a hung se a, ei chan a hung chau pha chun hmangaitu le ruoltha an vang nuom vieu a, ei mamaw zuol hun, ei chan a hung chau huna ruoltha le hmangaitu nia ei ngai hai khawma an mi tinsan  hlau thung hlak  ruok hi chu hrietthiem a harsa hle hlak a. Siemtu Pathien mawsiet ei nuom rum rum chang a um hlak.
 
Pasaltha chu sahrang hmaah a hung inlang hlak angin, hmangaitu le ruoltha indik tak hai ruok chu harsatna le beidawngna tawpkhawk ei tuok huna an hung inlang hlak a; chuongang harsatna le beidawngna tawpkhawk ei tuok huna hmangaitu hmel hung inlang tluka mawi chu khawvel­a a um ngai nawh. Hmangaitu indiktak chun hma a siel naw a, a dawthei a, harsatna le mangangna tuok a, chaua ei ngir zonaw lai khawma mi chel ngirin duot taka mi pawmin thangpuina kut a phar zing  hlak. Sienkhawm hmangaitu der, ruol tha lo le ringum lo hai chun ei par thlan ding a um lai po an mi bawr hluom a, ngirhmun a hung inphet pha ruok chun anni hlawkna ding a ni phawt chun ei sietna le thina ding khawm an thaw ngam hlak  thung a nih.
 
Mi hausa le khawsa thei hai hin misie le rethei hai nekin a tlangpuiin ruoltha le hmangaitu an hau  hlak a, sienkhawm chuongang nina le neinungna leia ruoltha le hmangaitu hai chu an tlonaw nuom vieu. Hi lei hin hausak le khawsakthei hun annawleh that ni le lawm huna chun hmangaitu le ruoltha indik tak hi thlierhran thiem an tak rawp hlak a, chuongang bawkin nunghak­tlangval pang mar that lai chun hmangaitu indik hi thlierhran thiem an tak hlak leiin nunghak­tlangval tam takin nuhmei­pasal zawngna kawnga khawm buoina an tuok rawp hlak a nih.
         

Harsatna le mangangna ei tuok changa mi sawmdawltu ding chau ni lovin mihriem han hlawtlingna le lawmna ei tuok changa mi lawmpuitu dingin midang hmangaitu le ruoltha ei mamaw a, an hlu hle bawk a nih. A san chu, Ieng­anga hlawtlingna le ropuina khawm chang inla ei lawmna kimna chu a mi hmangaitu le ruoltha hai an ni rawp hlak lei a nih. Hieng a ni lei hin mihriem han Pathienin a mi siem ang taka ei that lai le vul lai chau ni lovin, ei harsat beidawng hun haia khawm insawmdawltuo dan thiem inla chu khawvel hi nasa takin ei hmang inhawi pha lem ngei ring a um.  Chu leiin ngirhmun le nina leia ruoltha le hmangaitu chau ni lovin, Pathiena inthawk hmangaina indik taka ei khuo le veng, u le nau, thenum hai hmangaitu ni seng dingin mi tinin  hma la seng ei tiu.

Post a Comment

Powered by Blogger.