PTC GHQ kutah ruong vui hun suktluk dingin an pekdawk
CCPUR: Zani zantieng 11:00AM a inthawka Kuki Innpi, CCPur (KIC) Office, Tuibuong ah Inpis/ Tribe Councils, Philanthropic Organisations le Students organisation han joint meeting neiin, Tribal Martyrs hai ruong vui ding hun thua ngenna siema um chungthu ngaituo a ni a. Joint meeting in uluk taka an ngaituo le hriltlang hnungin Martyrs 9 hai ruong vuina ding hun thua thutlukna chu PTC GHQ le constituent unit han rel tlanga a vuini ding thuah thutlukna an siem dingin pekdawk dingin an rel a. November 14 le 15, 2015 haia Inpis, Joint Action Committee (JAC), Joint Philanthropic Organisations (JPO) le Church Leaders han joint meeting neia November 30, 2015 nia Tribal Martyrs hai ruong vui dinga lungruol taka thutlukna an lo siem ta sa mimal le pawl thenkhatin a dodal zawnga hma an lakna thuah  an ngaithiem naw thu joint meeting chun an puong a. Manipur Tribal Forum Delhi (MTFD) hmalakna chu lawmum an ti a, tuta inthawk chu an hmalakna ding haiah an Inpuis/Tribe council le an student bodies haia GHQ hai  rawn hmasa ta hlak dingin an ngen. Chun, Joint meeting chun November 30, 2015 hnungtienga inthawk mipuiin nundan pangngai taka an hmang nawk theina dinga JAC chu hma la dinga ngen dingin an rel bawk.
           
Meeting resolution­a hin Hmar Inpui President; Kuki Innpi/CCPur President; Vaiphei People Council President; Simte Tribe Council President; Consultant, Mizo People Convention; President, Tidim Chin Union; President Mate Tribe Council le President, Gangte Tribe Council han hming an ziek.
       
Nuhmei Pawl han ruong la vui lo dingin an ngen
CCPUR: All Tribal Women’s Union/CCPur  inti hai chun zani 11:00AM khan YPA Hall, New Lamka­ah inkhawmna an nei a, hi zo hin Tiddim Road zuia rally neiin KIC Office, Tuibuong­ah Inpuis, Tribe Leader le JPO thuoituhai an van hmupui a, Tribal Martyrs hai ruong November 30, 2015 nia vuiliem dinga thutlukna siema um chu ennawn ding le Manipur Tribal Forum Delhi (MTFD) hai ngenna pawm pek dingin Chief Convenor, JAC, Convenor, Inpuis/Tribe Leaders le Convenor, JPO hai kuoma ngenna lekha an pek. Chief Convenor, JAC chu meeting­a hin a thangnaw leiin a chengnain Bungmual­ah Memorandum hi an hang pek.
           

An memorandum a chun, Tribal martyrs hai vui dinga JAC/Inpui, JPO in thutlukna an lo siem ta chu MTFD ngenna anga Central Govt. a inthawk lungawium tawk dawnna hmu a ni hma chu la vui lo dinga an ngenna; Bill pathum hai chungthua ei thil ngen hai sukpuitling dinga thil iengkhawm a um hma chu martyrs hai ruong vui ding ti chu la ennawn hram dinga an ngenna; Central Govt. in Manipur­a tlangmi hai ta dinga thil iemani a hran lieua arrangement a hung siem hma chu Tribal martyrs hai ruong vui lo dinga an ngenna hai an ziek lang bakah Tribal martyrs hai vuina ding hmun 4 rawtna an siem a, chuonghai chu­ New Bazar Bus  station, Police station, Peace Ground le Kangvai pakhat tak  hmang dingin JAC, Inpuis, Tribe Council le JPO hai ngenin tribal martyrs hai vuina ding hmun thuah mipui ngaidan la lova thutlukna siem lo dingin an ngen bawk a nih.

Tribal Martyrs ralna a la lut zing
CCPUR: District Hospital­a Tribal Martyrs hai ralna le hliem hai thangpuina dingin mimal le organisation dang dang han zani le zani hmasa khan JPO kutah Rs. 19,000/­ an inhlan. Zani hmasa khan ECA Church, Hengkom village in Rs. 1,000/­ le Thangzading, Venuam, N. Lamka, tuta Guwahati a um mekin Rs. 1,000/­ a pek a, zanikhan Chassad Village, Ukhrul Dist. in Rs. 15,000/­; P. Zatun Zou of Gangpimual in Rs.100/­ le Vaiphei Insung Maicham Committee in Rs. 2,000/­ JPO kutah an inhlan.
             
Chun, Thanlon Block hnuoia Gamhui V/A chun zanikhan Tribal martyrs hai ralna dingin JAC hnuoia Finance Sub­Committee kutah Rs. 2,000/­ an inhlan bawk.

Sin hmu thar
CCPUR: Rothanglien Joute S/o Ngurchunghnung, Bethel Churachandpur chun Department of Post, Ministry of Information & Communication Technology, Govt. of India hnuoiah Postal Assistant sin hmuin November ni 20 khan Meghalaya division hnuoiah a lo zawm fel tah. Tuhin Shillong GPO ah inhouse training nei mekin a post­na ding hmun hi sukfel vat beisei a nih. (Virthli)

Street light ban ding phun
CCPUR:  Electricity Department chun zanikhan CCPur Police Station bul traffic point lai Crane machine hmangin Street Light ban ding an phun. Hi hmuna streetlight ban hi Sangai Festival ding le inzawma Festival hmaa phun dinga ti, sienkhawm Sangai Festival tan a ni der hnunga phun a nih.


Malaysia­a intang mi 4 hung thuoitlung
CCPUR:  Malaysia rama sinthawa inhlaw dinga fe, sienkhawm sinthawa inhlaw thei lova van tang (Jailed) sansuoka um mi 4­ S. Mangkhansuan s/o Thongkhanhang of Muallum village; T.Kaisuanlian s/o Kamkhanlam of Tonjang village; Thongkholun Haokip @ Helun s/o Jangkholet Haokip of Teisalnang, Sangaikot Sub Divn le P.Thangminkhai s/o Kangpu of Suangphuh village, Singngat sub division hai chu zani zantieng 2:30PM khan CCPur hung thuoitlung an nih. Anni hi Zo Peoples for Human Rights and Empowerment (ZoHRE) hmalaknaa Malaysia rama inthawka thuoisuok an nih. Hieng mi 4 hai hi K. Zou In, Zoveng­ah Pastor khamchinkhai, Area Pastor, ZPCS in tawngtaipekna a nei.




Cold Storage  ni 3/ 4 hnungah Imphal a hungtlung  beisei
CCPUR: District Hospital, CCPur Morgue­a Tribal martyrs hai ruong siethatna ding Cold Storage/Cooler Machine chu tuta inthawk ni hni/ni 3 hnungah Imphal hung phur tlung thei dinga beisei niin ei thu dawngna chun a hril.
           
Cold Storage/Cooler Machine sie dinga ngenna hi Sept. 25, 2015­a kha JPO in CMO/CCPur kuoma an pek, CMO/CCPUr in State Mission Director, NHM kuoma a peksawng le State sawrkarin Cold Storage Unit 2 inchawkna ding Oct., 2015 thla sunga Rs. 16,24,750/­ a sanction tasa a nih. Amiruokchu tuchena Cold Storage/Cooler Machine a la hung tlung naw leiin Mr Langkhanpau Guite, Chairman, ADCC chun Nov. 21, 2015 khan Guwahati panin thil pawimaw hai buoipuiin a zu enfel a, Manipur sarwkarin a hung phurna dinga road permit Nov. 21, 2015 chena hmang thei ding Oct. 21, 2015 –a a peksuok chu November 20, 2015 khan Guwahati a tlung chau leia Machine hi la hung phur thei lova um  a nih ti hmusuok a ni a, Hi le inzawm hin Mr Langkhanpau Guite chun  road permit Dec. 14, 2015 chen dai dingin a buoipui nghal a, tuhin road permit a um ta leiin tuta inthawk ni 3/ 4 hnungah Imphal  a hung tlung thei ta dinga beisei a nih. Cold Storage machine hi M/s Cooling Appliances (authorized dealer M/s Blue Star Ltd. Guwahati) a inthawka lak ding a nih.

Thangmeiband le Thongju A/C haia Byelection­ah BJP candidate han hratna an chang ve ve
IMPHAL: November 21, 2015 nia Manipur­a Imphal West District sunga Thangmeiband A/C le Thongju A/C haia Assembly byelection neia uma vote tla hai zanikhan tiem a ni a. Bharatiya Janata Party (BJP) candidate han hratna an chang ve ve.
           
Thangmeiband A/C a chun Khumukcham Joykishan (BJP) chun votes 12,104 hmuin thlangtlinga puong a ni a, ama hnaitu tak Congress candidate Jyotin Waikhom chun votes 10,197 a hmu a, Jyokishan chun votes 1907 in a hmu rawn lem a nih.
           
Thongju A/C a chun BJP candidate Thongam Bishwajit in votes 14,606 hmuin thlangtlinga puong a ni a, ama hnaitu tak Congress Candidate Bijoy Koijam chun votes 11,393 a hmu a, an inthlauna chu votes 3123 zet a nih.
           
Thangmeiband le Thongju biela ngir ve ve Manipur Democratic People’s Front (MDPF) candidate candidate Dr  G. Tonsana Sharma chun Thangmeiband biela hin votes 155 a hmu a, Thongu bielah Votes 54 a hmu. Chun, Thangmeiband A/C ah NOTA (none of the above) 72 le Thongju­ah 78 a um bawk.
           
Manipur Legislative Assembly Speaker Thokchom Lokeshwar Singh in May 27, 2015 nia  Anti­Defection Law dungzuia Trinamool Congress MLAs 3 hai a disqualified leia Thangmeiband le Thongju biel haia byelection hi neia hung um a ni a. Disqualified­a um pakhat dang Oinam Lukhoi Singh ruok chun Manipur High Court­ah a zuolko leiin Court in disqualify a nina hi a cheltang mek a nih. Sienkhawm Khumukcham Joykishan le Thongam Bishwajit hai ruok chun BJP ticket a ngir­a byelection hmasawn an thlang lem leia election hi a hung um a nih.
           
Thangmeiband le Thongju biel haia ngir ve ve TA Tonsana Sharma hin Security deposit lakkir nawk theina dinga vote hmu ding zat a hmuzonaw leiin hieng constituency pahni haia a security deposit hai a chan ve ve a nih.

Pawan Hans Helicoper tuoksiet a tuok
NEW DELHI/KOHIMA: Zanikhan Pawan Hans Helicopter chu Mellur, Nagaland­a helipad­a a tum lai a changsuol a, a sunga chuong passenger 4 le pilots pahni hai ruok chu dam le himin an suokdawk. Helicopter hi a se nasa hle a, sienkhawm a sunga chuong hai ruok chu hliem na inrik taluo um lovin an suok vawng a nih. Helipad a hin pilvut a lo tam taluo leiin  a hang tum ding lai hin pilvut a khu nasa taluo a, pilot in khuo a hmu theinaw leia changsuol niin Pawan Hans Limited (PHL) Spokesman MS Boora chun a hril. 

Lal Thanzara bawk thlangtling nawk
AIZAWL: November 21, 2015 nia Mizoram­a Aizawl North­III A/C a byelection neia um vote tla hai zanikhan tiem a ni a. Congress party candidate Lal Thanzara chun votes 6,175 hmuin thlangtling nawk a nih. Ama hnaitu tak Mizo National Front (MNF) candidate K. Vanlalvena chun votes 3,385 a hmu a, BJP­Zoram Nationalist Party (ZNP) Nationalist Democratic Alliance (NDA) candidate Lalduhawma chun votes 1887 a hmu. Hi biela MLA ni lai mek Lal Thanzara August 18, 2015 nia corruption thila intumna leia an ban leia byelection hi neia hung um a nih.

Meghalaya­ah HSPDP candidate thlangtling
SHILLONG: Methalaya­a Nongstoin A/C a Nov. 21, 2015 nia byelection neia um zanita result puong a chun Opposition Hill State Democratic Party (HSPDP) candidate Diostar Jyndiang chun votes 11,179 hmuin thlangtling a nih. Ama hnaitu tak Congress candidate Gabriel Wahlang chun votes 8,416 a hmu a, Opposition UDP candidate Mosklandar Margar in votes 1,257 le nuhmei candidate  Fenella Nonglait chun votes 3,128 a hmu.

Assam University hnuoia Hmar MIL
GUWAHATI: November 23, 2015 nia Assam University Conference Hall­a University Grant Commission, New Delhi thusuok dungzuiin Hmar MIL Graduate level a inchuk mek Syllabus siemthatna nei a ni a. Hi le inzawm hin kum 2016 June thlaa inthawk chun Assam University hnuoia 3rd sem le 4th sem a ei inchuk hlak kha inchuk ta lovin TDC 1st Semester le Second Semester a Hmar MIL inchuk lem a ni ta ding a nih. TDC (Honours any subject) Hmar nunghak le tlangval haiin an lak khawma Hmar MIL TDC 1st Sem le 2nd Sem ah lasa thei an ta,percentage nasa takin a suksang beisei a nih. (suorce FB @ Vanllallien Pulamte)

Tarun Gogoi in Prashant Kishore a beisei ve
GUWAHATI: Assam Chief Minister Tarun Gogoi chun kum 2016­a Assam Assembly election hung um dinga khin tulai hnaia Bihar Assembly Election­a Nitish Kumar hlawtling taka thangpuitu political strategist Prashant Kishor thawpui a beisei ve nia hril a nih. Mr Gogoi chun Prashant Kishor hi Assam Assembly Election hung um dinga thangpui dingin a fiel ngei thu a hril a, sienkhawm a hung ding le dingnaw chu ama chunga innghat a ni tah tiin Gogoi chun a hril. Mr Prashant Kishor hi kum 2014 Lok Sabha Election­a Narendra Modi inrawi BJP hnena lo changpuitu a ni bawk a nih.

Naxalites cadre 4 man an nih
RAIPUR: Chhattisgarh­a Kanker district a chun zanikhan nuhmei pakhat thangin Maoist cadre 4 man an nih. Mana um hai chu Ramesh Vetti (22), Faguram Mandavi (21), Panchlal Usendi @ Baiga le Sumitra Darro @ Guddi (20) hai an ni a, BSF le district Police thangruol han an man a nih tiin Kanker SP Jitendra Singh Meena chun a hril. Mana um hai hi October 30, 2015 nia Chargaon hmuna motor rawnaa inrawlna neia intum an nih.

Intang a tlansuok leiin constable 3 suspended
DEHRADUN: Tuolthatna case­a Tehri Jail­a intang mek Sanjay Singh (30) Haldwani hmuna hospital panpui a ni huna a tlansuok leiin a vengtu Police constables 3 hai chu an sina inthawk suspended an nih. Mr Sanjay Singh hi lungril tiengpang buoina a nei leia Hospital­a enkawl dinga thuoi, bu fa dinga constable pahni han hospital an suoksan kar in tehlem insira ama lo nghaktu constable dang pakhat in ngaimuong taka a lo in (sleep) san kara Sanjay Singh hi tlan hmang nia hril a nih.


Hmar FC players han Practice an tan
NEW DELHI: 9th NE Tamchon Football Tournament 2015 Trophy a khel ding Hmar FC players hai chun zanikhan Vasant Kunj Rugby Ground­ah practice an nei tan a, hi huna hin Indian Spinal Injuries Centre­a inthawk Sports Physiotherapist, Ms Smiti Chakraborty le Mr Nitin Jadu han fitness test an neipui nghal bakah FIFA dan ang taka Fitness Training pek ding le a tul anga player hai fitness tips pe dingin an intiem. Fitness test a hin players han 90% above deu vawng an hmu tawl.
           
Nov. 23, 2015 zantienga CCPur­ Imphal & Guwahati a inthawka Delhi pan Hmar FC Player hai chu Delhi an tlung hun ah Chairman Hmar FC, John Ruolngul in a lawmlutna a nei a. Manager Hmar FC James Pusing in thuhrilna hun hmangin, Pastor HCFD, Pastor Lalditsak in tawngtai pekna le lawmthu hrilna hun a hmang a, Secy Hmar FC, Joseph Lalramlien in player hai hriet dinga pawimaw zuol hai hrilna a nei bawk.(LRS Puruolte)

VAWISUN THUPUI
Nisienlakhawm, ka mi fel chu Ringnain hring a tih; A hnungtawl ruok chun, Ka lungrilin amaa chun lawmna hrim nei naw ni, ­Hebrai 10:38

Editorial
BJP in Manipur-ah kuo an suot tan

Assembly Byelection haia hin a tlangpuiin sawrkarna siemtu party candidate hai thlangtling an ni hlak a. November 21, 2015 nia Imphal West district sunga Thangmeiband le Thongju A/C haia Assembly byelection result zanita puonga chun BJP candidate ve ve thlangtlingin an hung um ta hlau el. Manipur Assembly seats 60 umah kum 2012­a 10th Legistive Assembly Election­a khan Congress chun seats 42 zet an lak a. Tuta Byelection­a an hrat le hratnaw hin Congress sawrkarah kawngro chu suk naw nih, sienkhawm sawrkarna siem laizing nisia hratna an chang zonaw ruok hin chu tlakhnuoi tieng an pan ti a sukchieng a. Manipur­a Congress sawrkar ta ding chun hmaimawkna nasa tak a nih.
           
India hmarsakbiel­a hin BJP chun kum tam tak riva an nei tanaw a, Manipur a lek lem chun MLA an neinawna hi kum tam tak a ni tah. Amiruokchu, Mr Narendra Modi inrawina hnuoia kum 2014 Lok Sabha Election­a BJP inrawi NDA in hrat filawrna an hung changa inthawk khan nasa takin hma an hung lak tan nawk a. BJP Manipur ngei khawm hung tal thar nawkin hma nasa takin an lak a, mipui lungril hne theina dingin Manipur phairam mi hai ngaipawimaw tak pakhat, Armed Forces (Special Powers) Act, 1958 chu sawrkarna chel thei khawpa hratna an hung chang chun Manipur­a inthawk hlip dingin mipui kuomah intiemna an lo nei hiel ta a nih. Manipur­a ADCs 6 haia MDC election­a khawm khan BJP candidate iemanizat in hratna an hung chang a, tuta byelection­a BJP candidate pahni han sawrkarna siemtu Congress Candidate hai hnesaw taka an hung hneban nawk hin BJP chun Manipur­ah hma an sawn pei ti a suklang a nih.
           
Tuta Manipur Assembly byelection­a Thangmeiband biela thlangtling Kh. Joykishan le Thongju biela Th. Bishwajit hai hi kum 2012 Manipur Assembly Election­a kha MLA dinga thlangtling ve ve, sienkhawm Anti Defection Law hnuoia disqualified an ni a; sawrkarna siemtu Congress candidate hai hnea thlangtlinga an hung um nasan hi BJP candidate an ni lei annawleh hieng biel haia MLA nilai an ni leia candidate dang hai neka an buk a la rik lem lei khawm a ni thei bawk.  Kum 2012 Assembly election­a khan  Thongju A/C ah Th. Bishwajit hin votes 10,299 hmuin ama hnaitu tak Congress candidate Bijoy Koijam chun votes 9696 a hmu a, Thangmeiband A/C ah Kh. Joykishan hin votes 7670 hmuin tlinga puong a lo ni a, ama hnaitu tak  Congress candidate Jyotin Waikhom hin votes 6680 a lo hmu a nih. Tuta Byelection­a an vote hmu le 2012 election­a an vote hmu inthlauna enkhi khawmin Bishwajit le Joykishan hai hi an buk a la rik hle ti an lang a nih.
           
Hieng A/C pahni haia byelection nei ding le inzawma CM O.Ibobi in Thongju le Thangmeiband A/C haiah Congress candidate hai thlanglal an ni chun a sawrkar in priority  basis a hmu thei khawpa hmasawnna sin thaw a ni ding thu mipui hmaa a hril a, sienkhawm  mipui lungril an hmin hnenaw a nih ti chu election result hin a sukchieng hle a, sawrkarna siemtu ni bawk hnena chang zo lova an um hi Congress sawrkar ta ding chun thil inzakum tak, inennawn a, mani thilthaw dan suikir vawng vawng na khawp chu a tling a nih.
           
Manipur BJP ta ding ruok chun sawrkarna siemtu Congress hnebana BJP candidate hai thlangtlinga an hung um ve ve el hi lawmna nasa tak le an tha suktho thartu a hung ni ngei ring a um. Political analyst hai chun, hienganga BJP in damte tea hma an hung sawn pei chun kum 2017 Manipur Assembly election­ah BJP in hratna an hung chang ngei an ring. India hmarsak biel­a states hai hi a tlangpuiin state pasie ei ni leiin Sawrkar thlungpui khuong ben dan dana lam hlak ei ni angin Centre­a sawrkarna siemtu party izira state election­ah vote tling hlak ei ni tlangpui bawk leiin buoina nei lova an um pei chun BJP ta ding chun kum 2017 hi chance a tha hle a ngai a nih.
           


Ei thu dawngna thenkhat chun CM ni lai mek O.Ibobi Singh chu election nawka hin a hriselna thatnaw leiin  a ngir ding le dingnaw a chieng naw  niin a hril a, a lo ngir tanaw a ni lem chun Congress keihruoi theitu ding leaders inchunain nasa takin a hung sukchau ring a ni bawk. Hieng a ninaw khawma Assam rama tlung angin Congress sunga lungawi lo MLA thenkhat chun BJP an baw ring a ni bawk.

Post a Comment

Powered by Blogger.