Churachandpur district sunga Loneitu hai chun tulai hin an Bu hai an at mek a, thenkhatin an vuok mek bawk. Kum dang neka van malsawmna ruotui an hmu that leiin loneitu hai chun nikum nekin bu an sik rawn lem beisei a nih.
--------------------------------------------------------------------------------------------------------------------
Changsan- ­Leiri pahnam han Dr Pudaite ralna an nei
CCPur: Zani zantieng 1:00PM khan Sadar Hills­a inthawk Changsan ­Leiri pahnam han a hran lieuin Rev. Dr (L) Rochunga Pudaite ralna PMS Bungalow, Sielmat­ah an nei. Hi huna hin Sadar Hills a inthawk Mr Manglien Changsan, Chief of Sadar Zote inrawinain mi 10 an hung a, Mr  Manglien Changsan le Ch Ajang Changsan hai irnawinain Rev. Dr (L) Rochunga Pudaite thlanah par inhlanna an nei bawk.
    

Hi huna Mr Manglien Changsan in thu a hrilnaa chun, Rochunga Pudaite in India le ramdang danga Pathien sin a thaw zo hnunga a hmangai Pathienin an chawlhadam tir ta a ni thu hrilin a sung le kuo hai chu an pa hnung zui dingin a ngen. Changsan Leiri pahnam han Rochunga Pudaite an sunzie inentirnain vawisun a hun an hmang chu Changsan­Leiri pahnam ralna ni lovin chawimawina a ni lem tiin a hril.
      
Hi huna hin Pu Joseph Lalrothang chun Rev. Dr. Rochunga Laibung thil tum le ama inzana; le Pu Upa L. Kiemlo Pulamte han Ngainat thu hrilna le le In neitu tienga inthawk thuhrilna hun hmang a ni bawk. Leiri­Changsan chun a damlai ngei khan ama puola programme puithu taka buotsaia Chawimawina inhlan an lo tum a, sienkhawm hunlo takin fam a lo changsan ta leia, a thi hnungin ama puola an ngainatna inentirnaa hi hun hi an buotsai a nih.

Hill House Counting operation 
CCPur: Tuta inthawk Churachandpur Sub­Division sunga khuo tin haia chun Lambus han Hill House Counting operation an thaw tan ding a nih tiin zanita SDO/Churachandpur thusuok chun a hril.
    
Hi le inzawm hin khuo Lal/Chairman hai chu Hill House Counting tha tak le suksuol um loa kim taka thaw a ni theina dingin officials/Lambus hai tha taka lo thlawp le thangpui seng dingin Mr S. Thienlaljoy Gangte, SDO/CCPur chun ngenin an hriettir.
           
Hill House counting hi thil pawimaw tak a ni leiin mitinin ei ngaipawimaw a, ei ngaiven thiltha ning a ta, Khuo lal le Village Authority hai khawma tha taka ei enkaipui nuom a um.

JAC le Tribe leaders han meeting
CCPur:  Vawisun November 12, 2015, 2:00PM hin JAC Against Anti­Tribal Bills members le Tribe Leaders han JAC Information Centre, KKL Complex, CCPur­ah meeting nei an tih. Hi huna hin Ministry of Home Affairs thusuok le Charter of Demands Manipur sawrkar kuoma peklut chungthu, hmatienga hmalak pei dan ding le thu pawimaw dang dang hai rel an tih.

Presbytery Office ding groundbreaking nei
CCPur:  Zani zingkar 7:30AM khan Zoveng, near Manmasi Society building lai EFCI Presbytery Office building thar bawlna ding lung phumna groundbreaking nei a nih.  Groundbreaking le lungphumna hi EFCI President hmasa tak Rev. Dr Lalthankhum Sinate in a nei a, Pathien kuomah tawng­tainaa inhlanna a nei nghal bawk. Groundbreaking neina hi Pastor le Kohran thuoitu iemanizat han an uop bawk.


Sawrkar thlungpuiinNE states haiah CSS 90:10 ratio funding pattern hmangzawm dingin remtina a nei tah
New Delhi: Centre­a NDA sawrkar chun India hmarsak biela core Centrally Sponsored Scheme (CSS) haia chun tuta hma ang bawkin 90:10 ratio funding fepui dingin remtina a nei ta niin zanita official thusuok chun a hril.
    
India hmarsak biel states 8 haia Chief Minsiters hai chun tuta hma khan Prime Minister Narendra Modi kuomah Special Category Status hlip­a um chu suta hmangzawm nawk dingin a nawn a nawnin an lo ngen ta a nih.
    
Special status category hnuoia funding ratio hi 90:10 a ni a, 90 percent chu sawrkar thlungpuiin a hung tum/pek le 10 percent chu state sawrkar tin han an tum (state share) a nih.
    
India rama Special status category hnuoia sie hi an rengin states 11 an ni a, hi laia 8 hai chu NE states­ Arunachal Pradesh, Assam, Manipur, Meghalaya, Mizoram, Nagaland, Tripura le Sikkim hai chu an ni a, a dang hai chu Himachal Pradesh, Jammu and Kashmir le Uttarakhand hai an nih.
    
Union Minister of State for Finance Jayant Sinha chun, sawrkar thlungpuiin NE­ah core Centrally Sponsored Scheme (CSS) 17 haiah funding pattern 90:10 ratio le non­core Centrally Sponsored Scheme (CSS) scheme haiah 80:20 ratio pattern hmang zawm dingin a remti niin a hril a, NE biela funding pattern study thawtu Shivraj Singh Committee recommendation dungzuia hmang zawm pei ding a nih tiin a hril.   
    
Union Minister hin zani hmasa khan NE states 8 haia senior officials hai, NEC, Ministry of  Development of North Eeastern Region (DoNER) hai Meghalaya khawpui Shillong hmuna thawtanni khan an hmupui a, hi huna hin Pradhan Mantri Jan Dhan Yojna, CSS le Centrally sponsored programmes le projects hai thaw dan ennawnna an nei.
           
Union minister chun, Northeast­a development sin thawna dingin sum le paiah harsatna a um naw a, DoNER ministry chun fund Rs. 2,369 crore a nei a, World Bank khawm NE a development sin thawna ding sum hung pe dinga inpeisa zing a nih tiin a hril.(IANS)
Byelection campaign thaw tan mek
Imphal: November 21, 2015 nia Thangmeiban le Thongju A/C haia Assembly Byelection hung um dingah  ngir ding political party hai chun campaign an nei tan mek a, zanikhan  Thungju biela BJP candidate Th. Bishwajit ta dinga vote campaign/political conference  Khongman Zone III Community Hall­ah nei a nih. Hi huna hin BJP Manipur President Th. Chaoba, Dr Nimaichan Luwang le BJP zawm thar MLA hlui O. Joy hai khawm an thang.
    
Hi huna Okram Joy (O. Joy) in thu a hrilnaa chun, Th. Bishwajit hi MLA dinga thlangtling  a hung ni chun Manipur­ah Opposition party sukhrat a ta, BJP chun Manipur­a corruption sukbo dinga an intiemna an sukpuitling thei ding a nih tiin a hril.

MSAD in Md Hasmad Ali thattu hai an dem
Imphal: Manipur Students’ Association of Delhi (MSAD) chun Keirao a primary School headmaster Muhammad Hasmad Ali @ Babu Bawng inrua intuma thattu hai nasa taka an dem thu an puong. Hiengang indiklo taka intumna le inthatna Manipur­a a tlung rawpna san chu state sawrkar in a ngaitha lei le thil suol thawtu hai chunga dan anga hremna a pek ngainaw lei a nih tiin an hril.
    
MSAD chun, media thenkhat Hindustan Times le New York Times han tulai hnaia Dadri hmuna Bawngsa faka intumna leia inthatna tlung chungthu le hi thil inzawmna nei anga an zieklang chu an dem bawk.

AR han tui sekkhawlna an sem
Imphal: 8­Assam Rifles chun November 10, 2015 khan Military Civic Action Project hnuoiah Tamenglong District­a Wapang le Haochong khuo hai kuomah Tui sekkhawlna ding (water storage tanks) 4 an pek. Hieng khuo haia tui harsatna nasa taka a sawkzangkhai beiseina leia tui sekkhawlna syntax hi an pek a nih. Hieng khuo haia Chairman le Secretary hai chun Assam Rifles hai chungah lawmthu an hril.

Naupang kum 5 mi kap hliem pal
Imphal: Chakpikarong, Chandel district­a Porohish village lalpa chun a silai sukfai a tumnaah a sukpuok pal leiin a naunu kum 5 mi Wahengbam Thoi d/o W. Nanao chu silaimu in a dengfuk a, inrang takin RIMS panpui a ni a, zani zingkar khan operation thaw a nih. Naupang hi a ngirhmun a derthawng nawh tiin ei thu dawngna chun a hril. Silaimu hin a ke changtieng pang a dengfuk a nih. Hi thil hi November 9, 2015, 2:30PM a kha tlung a nih.


Suu Kyi Kawhmu biela a tling; NLD in seat tam lemah hratna an chang
Yangon: November 8, 2015 nia Myanmar  General election neia um vote tiemna chu a fe mek a, Myanmar pro­democracy  leader le National League for Democracy (NLD) hotu Aung San Suu Kyi chun a ngirna biel Kawhmu (rural) ah a tling (hratna) a chang niin zanikhan Election Commission chun a puong. Myanmar General Election vote tla hai tiem meka hin Myanmar Parliament Upper le Lower house haia tuchena result puong haiah 90% deuthawa hratna an chang leiin NLD hin Myanmar­ah sawrkarna an hung siem thei ngei ring a nih.
    
Hieng laizing hin Army thangpui Union Solidarity and Development Party (USDP) chu an che naw hle a, an Parliamentary speaker Shwe Mann le party Chairman Htay Oo hai khawm party leader tlingzo ta lo hai lai an thang.
    
Suu Kyi hi Burma sipai rorelna hnuoia kum 15 sung zet House Arrest­a lo um tah, house arrest­a inthawk insuo zalen a ni kum 2 hnung, kum 2012 byelection­a Kawhmu (rural) a inthawk parliament member dinga thlangtlinga hung um a nih.
    
NLD hin hratna an chang ding niin inlang sien khawm kum 1990 laia NLD in hratna an chang hnunga Myanmar sipai han rorelna incheltir loa an um ang kha a hung tlung nawk el dim ti Suu Kyi supporter hai lungrilah a la um zing leiin lung himawna lien tak an la nei a nih.
           
Election Commission of India chun Myanmar election neia khan Election observers 3 a tir ve a nih. Myanmar Election buoina um lova zo theia a umna thuah Myanmar mipui hai a lawmpui thu India chun a puong.

Bangladesh in Anup Chetia India kutah an hlan
New Delhi: Bangladesh in kum tam tak a lo hrentang ta le Jail­a a khum ULFA leader Anup Chetia (48) chu zani hmasa zan khan New Delhi hmuna Bangladesh in CBI kutah an hlan. Chetia hi Bangladesh jail­a kum 7 chuong zet intang ta a ni a, ULFA pro­talk group Chairman Arabinda Rajkhowa chun Anup hi hung insuo dingin vawi tam tak an lo ngen ta a ni bakah India khawmin vawi tam tak hung pedawk dinga Bangladesh kuoma a lo ngen ta hlak, sienkhawm India leh Extradition Treaty an neinaw suonlama a hung pekdawk lo a nih. Amiruokchu, Chetia in India ram tienga hung kir a nuom leia Bangladesh­a Sheikh Hasina sawrkarin India kuta hung pekdawk a remti dungzuia a hung pekdawk a nih.
    
Anup Chetia India kuta hung pekdawk a nina thuah India sarkar chun Bangladesh sawrkar chungah lawmthu a hril. Minister of state for Home Kiren Rijiju chun, Anup Cheta India kuta hung pek dawka um hin case tam tak sukfel theia a hung um a beisei thu a hril a, CBI le Assam Police han a chungthu hi an suizui ding thu a hril.
    
Chetia hi ULFA founder general secretary a ni a, mi thatna, mi thuoihmangna, bank rawkna le suolna dang dang haia case nei mek a nih. A hming indik tak chu Golap Baruah a ni a, kum 1990s laia Bangladesh rama tlanlut, kum 1997 a Dhaka khawpuia man a nih.
    
Pro­Talk ULFA leader Pradip Gogoi chun Anup Chetia India kuoma hung inhlan a nina hin sawrkar thlungpui le ULFA inbiekna fe mek nasa takin a sukhrat pha a beisei thu a hril.
    
Assam chief minister Tarun Gogoi chun Chetia hi Assam sawrkar kuta pedawk dingin India sawrkar kuoma a ngen bakah ULFA le sawrkar thlungpui inbieknaah Chetia hi inthangsatir ve dingin a ngen bawk.

GSAT­15 satellite hlawtling taka kapsuok
Kourou: India Communication Satellite GSAT­15 chu zani zingkar khan French Guiana­a Kourou a inthawk Arian­5 hmangin Indian Space Research Organisation (ISRO) chun hlawtling taka kapsuok a nih. Hi Satellite hin Radio signal 24 dawnga thawndawk thei chi Ku Band a phursa a, hi thil hi thu puondarna hmangruo le VSAT broadband mamaw phuruktu dinga ruot a nih. Chun, thil umna hmun hai suina hmangruo a thawsa bawk ding a nih. Hi Satellite hi kg. 3164 a rik niin kum 12 sung sin thaw thei dinga siem a nih. Hi satellite hin India television signal kapsuokna le khawvel pumpuia hmun tum tum hai suina tieng Global Positioning System (GPS) a dingin sin a thaw ding a nih.

Tamil Nadu­ah ruosur leiin mi 19 an thi tah
Chennai: Tamil Nadu a chun ni 2 liemta sung khan ruosur leia tuilien le sietna dang dang tlung leiin mi 19 in thina an tuok ta niin Tamil Nadu sawrkar thusuok chun a hril a, ruosur leia harsatna tuortu hai sawmdawlna dingin Rs. 76 lakh pek a ni ding thu a pong bawk. Tamil Nadu Chief Minister Ms J. Jayalalitha chun thina tuok 19 sung hai chu a sunpui thu a hril a, Disaster Relief Fund­a inthawk mi 19 thi sunghai zangnadawmna Rs. 4 lakh seng pek an ni ding thu a puong bawk. Mi 19 thi hai laia 16 hai chu Cuddalore hmuna thi an ni a, hi laia 15 hai chu tuia tla hlum le pakhat chu bang chimin a del hlum a nih.

Ex­Servicemen han “Black Diwali’ Protest an nei
New Delhi: Sawrkar thlungpuiin One Rank One Pension (OROP) thua Notification an suo an dittawknaw leia an lungawinaw zie suklangnain Ex­servicemen hai chun zanikhan Delhi­ah ‘Black Diwali’ ti hming chawiin protest an nei. Ex­servicement protest a thang hai hin rally neiin India President chengna in va lut an tum a, sienkhawm Police han an dangchat.
      
Ex­servicemen hai hin zani hmasa khan an medal hai an lo pekkir ta a nih. Sawrkarin OROP  Notification an suo chu “ dilution of the definition of OROP” a nih tiin an hril a, sukdanglam iengkhawm um lova OROP hmang dingin Ex­servicemen nuor hai chun an phut a nih. OROP Notification an suo dungzui chun kum 5 dan peia pension equalised thaw ding ti a ni a, Ex­servicemen hai ruok chun kum tina pensions equalized thaw dingin an phut a nih. Hi baka hin OROP notification insuoa umin pension hun tlung hmaa pension la le thawk ding chen thawk loa lo chawl ta hai a huomsa naw chu an dodal bawk a nih.
      
Ex­servicemen thenkhat chun an medal hai Jantar hmuna raw an tum a, sienkhawm protest a thang an ruol thenkhat han an dang leiin an raw nawh.

Mamata in a beisei ve
Patna/Kolkata: Bihar Assembly Election­a Bihar Chief Minister Nitish Kumar in hnena a changna le inzawmin a campaign strategist Prashant Kishor chu kum thara West Bengal Assembly election hung um dingah Trinamool Congress khawmin thawpui dingin an fiel ve niin ei thu dawngna chun a hril. Mr Prashant Kishor chun Ms Mamata Banerjee office­a inthawk telephone a dawng ngei a, sienkhawm Ms Banerjee le direct­a inbiekna ruok chu a la um naw niin ei thu dawngna chun a hril. 
    
Mr Kishor (37) hi Africa­a United Nations hnuoia sinthaw, kum 2011­a a sin chawlsana India rama hung kir a ni a; kum 2014 General Election huna tuta Prime Minister ni tah Narendra Modi  campaign na “chai pe charcha” (chat over tea) le 3D hologram rallies hai ngaituo suoktu tak a nih. Amiruokchu, Mr Kishor hin BJP tlansanin Bihar Election­a khan Nitish Kumar a thangpui nawk ta lem a nih.

Health officials 18 Rs. 30 lakh sukchavai a intum
Srinagar: Jammu and Kashmir­a chun health department officials 18 hai chu department sum Rs. 30 lakh zet indiklo taka ladawk le sukchavai a intum an ni a, hi le inzawm hin J&K State Vigilance Organisation (SVO) chun case an registered. Case siem khum hai lai hin Uri a Block Medical Officer (BMO), Treasury Officer le Medical officers 3 an thang a, an reng hin Prevention of Corruption Act hnuoia case siem khum niin SVO chun preliminary inquiry an thaw mek. Preliminary inquirty dungzui chun Uri BMO Sheikh Farooq Nazir le a Clerk hai chun  sawrkar thusuok bawse in contractual employees 13 hai pay revision arrears dingin Rs. 30,70,200 an lakdawk niin a hril.

PM in Diwali a hmangpui
New Delhi: Prime Minister Narendra Modi chun zanikhan Dograi war Memorial, Amritsar Cantt. hmuna India sipai hai Diwali hmang a uop in a hmangpui bakah kum 1965­a Dograi indona (war) a India sipai thi hai inzannain par inhlanna a nei. Tuta tum hi PM Narendra Modi in hi lai hmuna sipai hai Diwali a hmangpui a vawihnina a ni tah.
-----------------------------------------------------------------------------------
VAWISUN THUPUI
Ka hung tlai hin inphat ka ti cheh a “Lalpa chu tu am a na?” ti hlau rawi ka tih, Annawleh, ka hung pasiet hin inru rawi ka ta, Ka Pathien hming hi hrilsietnain hmang rawi ka tih.  -­ Thuvarhai 30:9

Editorial
Intodel dan lampui dap a tul
14th Finance Commission recommendation le Union Budget 2015­16 dungzuia sawrkar thlungpuiin January, 2015 a inthawk India rama state thenkhat Special Category status pek hai a hung lakdawk leiin state intodel lo le hnufuol hai chun sum le pai thuah harsatna nasa tak an  tuok a, chu lai chun Manipur khawm ei thang ve a, Special Category status (SCS) hlip leia  harsatna nasa tak an tuok ding zie an hriet leiin state sawrkar hai chun SCS pekir nawk dingin sawrkar thlungpui an nawr a, sawrkar thlungpuiin an rawl a ngaithlak peknaw mani ti hnunga  NE state haia a hma ang bawkin Centrally Sponsored Scheme (CSS) haiah 90:10 ratio funding hmang zawm remtina a hung nei hi thil lawmum tak a nih.
    
Manipur­a chu Special Category status hlip lei el nei lo Bandh, Blockades le nuorna dang dang um rawp hlak leiin a economy an hning rawp hlak. Central in funding pattern a hung sukdanglam lei hin Manipur chun sum le pai thuah harsatna namenlo ei tuok hman a, Development sinthawna hai khawm state share Manipur sawrkarin a pek theinaw leiin mumal takin sin a fe thei tanaw a nih. Ei state sum ngirhmun thatnaw zie hi hriea Finance Department in economy tluksiet ding chelngir hram tumin theitawp an suo lai hienganga funding ratio pangngai hmang zawm nawk dinga Center in remtina a hung nei hi lawm a um takzet. 
    
Hieng laizizing hin state sawrkar le mipui han mania intodel dan lampui ngaituo hi ei thaw ding makmaw a nih. Manipur hin sum le paia lamsuok theina resource tam tak ei nei a, chuonghai ei hmang thiem a ni phawt chun sawrkar thlungpui sum mi pek thang lo khawma harsa taluo lova um thei ding a nih. Amiruokchu, ei state –a resource hai hmang tangkai tumna le thil thawsuok nei tumna ei neinaw leia hiengang harsatna hi ei tuok hlak a nih.
    
Ei state in sum lamsuokna ding tha tak a nei pakhat chu Tourism hi a nih. Tourism hi state dang hai sum lamsuokna tak a nih. Manipur hi a ram leilung le boruok sik le sa inhawi tak;   khuolzinmi tam tak hip thei ding a ni lai zingin sawrkarin a ngaipawimaw tawknaw leiin Tourism tiengpangah sum hril tham ei laklut naw a nih. Hi lai zing hin ei rama tourism in hma a sawn theina ding chun muongna a um a tul a, chu ding khawm chun state sawrkar hin mawphurna lientak a nei. Muongna a um theina ding chun sawrkar tha ei mamaw a nih. Sawrkar tha ei neinaw leiin ei rama buoina le harsatna inzing utin a tlung a nih ti inla ei hril suol taluo ring a um nawh. Sawrkarin langtlang taka thil a thaw ngainaw bakah development sinthawna khuongruol taka an fetir naw lei, corruption nasa taka a hluor leia mipui ngirhmun inchennaw taluo (economic imbalance), inthlierhranna hai hi ei rama muongna le inremna suksetu an ni a; Manipur sawrkarin mipui lunginruolna zawng lova a nuom thu thua hmasawnna sin a fepui rawp hlak khawm hi ei rama buoina intlun rawptu a nih.
    
Ei hriet seng angin Manipur hi hnam tum tum tam tak cheng khawmna a ni leiin sawrkarin thil a thaw ding hrim hrimin ei ngirhmun ‘sensitive’ zie hre zing an chawmna ding a en hmasak rawp a tul. Development ei ti lai zing mimal annawleh hnam thenkhat ta dinga sietna amani annawleh an dikna chanvo lakpek an ni chun development ni thei ngainaw nih. Development sin hrim hrim chu a mipui cheng hai inlungruolna le remtina a thang ngei ding ti a nih. Hi lei hin Tourism tieng hma ei sawna; mi ram hai anga Tourism sum lamsuokna taka ei hmang theina ding chun development sin khuongruol taka thaw a ei rama muongna le inremna inumtir chu a lampui umsun a nih.
    
Chun, state sawrkarin revenue tamlem a hmu theina dinga pawimaw chu Zu zawr khapna hlip hi a nih. Zu hi ei khap a, sienkhawm a dawn mi hai ta dingin an dawn a thul chuong naw a, an dit zat zat dawn ding an hmu tho. Khap si, khap hne bawk si lo nek chun Zawr phal a, a zawrtu haia inthawka tax (sie) lak teu hi ei ta dingin a thalem. Zu khap leia Zu mana um haia inthawk fine tlawmte te lak ringawt nekin zawr phal law law sienla state sawrkar hin hlawkpui lem a tih. Chun, a dawntu hai ta dingin hrisel lem bawk a tih. Tulai hnai ela Excise han Zu le drugs mana um hai an suksiet tuma Excise department official in, Zu le inruithei mantu hai raw hmang el lova state sawrkar ta dinga sum an hmu theina dinga Department kuta pedawk hlak dinga mipui kuoma ngenna a siem dam kha kawngkhat ngaituo chun lungsiet a umin a tlawm tlak hle. Zu hi ei hrilmawi nawh, sienkhawm ei zu khap hin umzie a neinaw a, ei ram hmasawnna dinga thangmawbawk ‘corruption’ sukzuoltu a ni lem. Ei zu khap dan hi ‘a ruka inzawr’ ei nih.
           
Hienghai lo khawm state hin sum lamsuok theina tam tak resource a nei a, zuk hril seng el ding ninaw nih. Iengtiklai khawma Centre khuongben dan dana lam dinga ei inpei sung chun ei ram hi intodel ni ngainaw mani a, state inzaum ni ngai bawk naw manih. Hi lei hin Centre sum mi pek le peknaw thua ei economy an hning ngai nawna dinga sawrkar tha siem dinga ram thuoitu han hma an hung lak hi a tul a; mani intodel chau ni lova, state dang le ram danga thawndawk khawp nei dinga lampui dap a tul hle a nih. Ei economy ngirhmun a that naw sung chu ei rama helna, nuorna le ei harsatna tum tum hai hi chingfel thei ni ngainaw nih. Hieng a ni lei hin ei economy siemthatna dinga sawrkarin theitawp suoa hma a lak a tul takzet. US President hlui fam tah John F. Kenedy in ‘ka ramin iem a mi thaw pek thei a ti loin, ka ram ta dingin iem ka thaw thei a’ ti indawn lem ro a lo ti anga mipui hai khawmin sawrkar thau s├ówk ringawt tum lovin sawrkar thangpui tum lem ei tiu.


Post a Comment

Powered by Blogger.