PS Traffic point-ah Street light
CCPUR: Manipur Tourism Department, Govt. of Manipur huoihawtna hnuoia Imphal hmuna Sangai Festival 2015 hung um ding le inzawma Festival hmaa Imphal, CCPur, Senapati le Moreh khawpui haia 1st phase-a Street light inbunna ding Manipur CM in Order a lo insuo ta le inzawmin sin tan a nih. CCPur district-a chun Police station bul, Tiddim Road le Tipaimukh Road junction Traffic point lai Street light hi inbun tum a ni a, Electricity department chun October 27, 2015 a inthawk khan sin an tan.

CCPur district, Moreh le Senapati haiah 1 seng, le Imphal-ah Street light 3 inbun dinga ti a ni a, CCPur-a hi thil thawna dinga sum seng ding chu Rs. 1,10,000/- a nih. Street Light/lamp hi feet 60 a insang ding a nih.

“Henu Neingailou Hitam-2” Premier Show
CCPUR: Niso Film in an siem “Henu Neingailou Hitam-2” Premier Show chu zani 11:00AM khan B. Vengnom Community Hall, CCPur-ah nei a ni a, film ngainatu hmun tum tuma mi hai thangin film hi an en. Film Director Letthang Doungel in premier show huna hin film background/synopsis hrilin actor/actress le artistes hai mipuihai inhmelhriettirna a nei a, hi zo hin Certificate/memento inhlanna a nei nghal bawk. Hi huna hin Lunseh Kipgen, IPS, DIG (Range-IV) khuollienin a thang a, Functional President in Letjamang Haokip, APO, DRDA/CCPur a thang.


Truck in pasal pakhat a rawt hliem
CCPUR: Zani zantieng dar 6 vel khan Chiengkonpang-ah Truck pakhatin Pulser Bike-a chuong Mr Lamlalmuok s/o Munkholal of Phailien, Kashmir veng chu a baw fuk a, na taka a hliem leiin District Hospital panpui a ni a, sienkhawm a hliem inrik leiin doctor han Imphal tieng panpui dingin an an refer niin ei thu dawngna chun a hril. A bawtu Truck hin chawl chuong lovin a tlansan nia hril a nih. Lamlalmuok hi Donbosco a teacher sinthaw nia hril a nih. Truck hi mi thenkhatin an hnawtzui a, Torbung lai an va man phak niin ei thu dawngna chun a hril bawk.

Dengue+ hmu belsa lo
CCPUR: Churachandpur district-a chun tuta hmaa Dengue positive 23 hmua um hai ti lo Dengue positive hmu belsa an um tanaw niin NVBDCP/CCPur a inthawk ei thu dawngna chun a hril. Amiruokchu, Dengue ringhla hai thisen enfel dinga an thisen lakna ruok chu an la sunzawm zing thu hrilin, zanikhan mi 14 hai thisen enfel dinga lain Imphal tieng an thawn.

Police han mi man an la nei nawh
CCPUR: October 6, 2015 nia Mr Thangliansiam (20) s/o (L) Thonsong of College Veng, N. Lamka Pangjol le Thingkangphai khuo inkara thingkunga ringhla um taka inkhai hlum saa hmu a nina le inzawma YPA N. Lamka Block in tuolthattu hai man dinga thutawp an pek chu zani kha a nita a, sienkhawm Police chun hi thina thuah mi man an la nei nawh. Hun an pek tawp chena mi man an neinaw chun protest nei dingin zani hmasa khan YPA N. Lamka chun an lo puong ta a nih.

EFCI 93rd Executive Council
CCPUR: October 29, 2015 chen aw ding 93th EFCI Executive Council chu zanikhan Sielmat EFCI Biek-in-ah tan a nih. Mizoram, Assam, Tripura, Meghalaya, New Delhi le Manipur haia inthawk palai 90 vel an thang. Executive Council chun Kokbrorok Mission field hawng dingin an rel bakah Council chun vawisun hin Rev. Dr Rochunga Pudaite ralna nei an tih. Rev. Dr J. Huoplien Neitham chun (L) Rev. Dr Rochunga Pudaite ngirhmun EFCI Moderator sin kum 2016 chen a chel dinga ti a nih.

Workshop on NTCP
CCPUR: State Health Society (NHM), Manipur huoihawtnain Hotel Nirmala, Imphal-ah October 30, 2015; 10:00 khin One Day Workshop on National Tobacco Control Program um a tih. Hi huna hin Govt Deptt tum tum 11- Police department, Chief Medical Officer, District Education Officer, Exise department, Labour department, Agriculture department, Food Safety Officer, District Information Officer, PRI/ADC, Block Development Officer le Medical Officer i/c of DH/CHC/PHC haia representative pakhat seng tir dingin Dr. O. Ibomcha Singh, Director (Health)/State Health Society, NHM, Manipur in DC/CCpur kuoma inhriettirna a hung pek.

JAC le JPO kutah ralna Rs. 7,500/-
CCPUR: Zanikhan Thanlon Block-a T. Maojang khuo han Tribal martyrs hai ralna dingin JAC hnuoia Finance Sub-Committee kuomah In tina Rs. 100/- an dawlkhawm Rs. 1200/- an peklut nawk a, khuo tam lem han ralna sum an peklut tawl tah. Chun, zanikhan mimal le organisation 6 han tribal martyrs hai ralna le thangpuina Rs. 6,300/- le Maibal pum 18 JPO kutah an inhlan. Zanita JAC le JPO kuta ralna le thangpuina sum lut belkhawm hi Rs. 7,500/- a nih.

Zanita JPO kuta ralna/-thangpuina petuhai chu -H. Khanching of Pearsonmun Rs 500, D. Lhingboi, Bijang in Rs 1000, Kh. Lalrinawma, Nghathal in JPO hai tulnaa hmang dingin Rs 500, Dr. S. Thianlalmuan Ngaihte of Shillong in Rs 1000, Baptist Dorcas Fellowship, EBCC ,Phailian in Rs 1000, PAPAA Inkuan in Rs 2000, + Maipuang 18 le JPO tulnaa hmang dinga an pek Rs 300/- hai a nih.

ANM, GNM Regular Exam 2015
CCPUR: Zanikhan Female Health Worker (FHW) Training School, CMO campus-ah ANM, GNM Regular Examination, 2015 tan a nih. Bethesda School of Nursing (BSN), Muolvaiphei-a 1st years 40, 2nd year 39 le 3rd year 33 an rengin mi 112 bakah FHW a ANM inchuklai 1st year 29 le 2nd year 28 ( 57) exam-a hin an thang. Nurses hai exam-na hi Nalini Devi, Officer in-charge, Med. Dept le Tutor, Nurshing Institute, Imphal inrawinaa official han an hung enfel. Exam hi zingkar 9AM-12 le zantieng 1-4PM inkar haia nei a nih.


Assembly seat 2 haia byelection notification insuo; Congress le BJP an inbeituo ding
IMPHAL: Election Commission of India (ECI) in a lo puong lawk ta angin Chief Electoral Officer (CEO) Manipur chun November 21, 2015-a Manipur-a Assembly seat pahni Thangmeiband A/C le Thongju A/C haia byelection Notification zanikhan an suo. Nomination paper November 4, 2015 chen file thei ning a ta, Scrutiny November 5, 2015 in nei ning a tih. Inhnukdawk nuom han November 7, 2015 chen inhnukdawk thei an ta, vote tla hai November 24, 2015 in tiem ning a tih.

BJP Central Election Committee Secretary, Jagat Prakash Nada chun zanikhan official-in Thongju A/C a BJP candidate dingin Khumukcham Joykishan le Thangmeiband A/C a BJP Candidate dingin Thongam Bishwajit hai ruot an ni thu official in a puong.

BJP Manipur President Th. Chaoba chun, an party candidate han hratna an chang ngei theina dingin campaign nasa taka thaw a ni ding thu zanita an BJP office Nityapat Chuthek hmuna press conference huna a hril. Ticket pekna thuah party sunga inremnawna a um nawh tiin a hril bawk.

Manipur State Congress Committee chun Thangmeiband A/C-a Congress (I) candidate dingin Jotin Waikhom le Thongju A/C a dingin minister hlui Bijoy Koijom hai an lo ruot ta bawk leiin party dang candidate nei tum an um hriet a ninaw leiin Manipur Assembly seats 2-a byelection um dinga hin Congress le BJP chau an inkhing (straight fight) ding a nih ti a chieng ta a nih.

Thangmeiband A/C a hin voter 25,114 (nuhmei 13,687, pasal 12570) le Thongju A/C-ah voters 28,214 (nuhmei 14,564 le pasal 13,650) an um a nih. Anti-Defection law hnuoia hieng A/C pahnia MLA hai Spreaker in a disqualify leia byelection hi nei a hung tul a nih.

Manipur-a byelection nei ding le inruol hin Jharkhand-a 72-Lohardaga ST A/C; Madhya Pradesh –a 71- Devas A/C; Mizoram-a 12 – Aizawl North – III (ST) A/C le Meghalaya –a 32- Nongstoin ST A/C haia khawm byelection nei a ni ding a nih. Byelection h aia hin EVM hmang vawng ning a tih.

Centre-a sawrkarna siemtu BJP anni laiin state-a sawrkarna siemtu Congress an ni a. Byelection hi kum 2017-a Manipur Assembly election ding thlirlawkna a ni ding a nih tiin Political analyst hai chun an hril.

Photo Contest cum Exhibition and Photography Workshop
IMPHAL: Directorate of information & Public Relations, Govt. of Manipur huoihawtnain zanikhan DIPR Complex, Moirangkhom, Imphal-ah Photography Contest cum Exhibition and 3 Day Photography Workshop tan a nih. Hi huna hin Manipur Dy. CM Gaikhangam; K. Meghachandra Singh, Parliamentary Secy. (IPR) le Letkhogin Haokip, IAS, Principal Secretary hai chief Guest, guest of honour le functional president in an thang. Deputy Director General, Film Division, Ministry of Information and Broadcasting, Govt. of India Shri Joshy Joseph chu hi huna hin special guest in a thang bawk.

Gaikhangam chun, thlalak hi thilthaw thei takel, Journalism-a dinga thil pawimaw a ni thu a hril a. K. Meghachandra chun, hiengang exhibition le contest kum tina huoihawt a ni theina dingin sawrkarin fund a hran lieuin siem sien a nuom thu a hril. DIPR Director Shri Somorjit Salam chun, thlalak tienga inhnik hai technical skills sukpungna dinga buotsai a ni thu a hril.

Photo contest –cum-exhibition a hin applications mi 100 vel han thlalak dang dang 500 chuong an peklut a, result chu exhibition tawp ni DIPR Day Nov. 1, 2015 a puong ning a tih.

Silai leh chuktuoin bike an lakpek
IMPHAL: Zani zingkar khan Singjamei police station huop sunga Kakwa Khongnangpheidekpi area-ah misuol thenkhatin R-15 bike-a chuong Y. Gyanendro s/o Jatishwor of Khongnang Pheidekpi chu silai leh chuktuoin an sukchawl a, motor a inthawk intum tirin a motor hi lapekin an tlanhmang. Gyanendro hi a kut khit pek an tum a, sienkhawm dam le himin a tlansuok. A ruolpa a van thla zo zani zingkar 3AM vela in pana a fe mek laia hi thil hi a tuok a nih.

Loktak Day hmang
IMPHAL: Loktak Lake Development Organisation huoihawtnain zanikhan Loktak Lairembi Lampak hmuna 26th Loktak Day hmang a ni a, Commerce & Industries minister K. Govindas khuollienin a thang a, ; MLA S. Bira Singh functional president le minister hlui H. Sanayaima Singh, le Project Director LDA L. Ghagaton hai guest of honours in an thang.

IED dapdawk
IMPHAL: Zani hmasa zan khan Singjamei Thong hmunah Improvised Explosive Device (IED) hmu a ni a, Police-a bomb disposal group le Imphal West Police Commando han zani zingkar dar 3 vel khan pawi tawklo dingin an suksiet.

KCP(N) demand letter leh an man
IMPHAL: October 27, 2015 khan 11-Assam Rifles han Moreh hmuna KCP(N) overground worker Mrs Premila Devi (42), Nurse, w/o (L) Ojit Sharma, of village Bamon Leikai, Imphal East chu Rs. 3,00,000/- ngenna KCP demand letter pahni leh an m an a, Moreh Police station-ah an peklut niin zanita PRO Assam Rifle thusuok chun a hril.

Swachh Bharat Sunder Bharat campaign rally
IMPHAL: Manipur State Bharat Scouts and Guides huoihawtnain zanikhan “Swachh Bharat” “Sunder Bharat” thupui hmangin campaign rally nei a ni a, rally hi IMC office-a inthawk tan a ni a, IMC Chairman in rally hi a vai liem. Peer Educators cum Campaigners Workshop on “Swachh Bharat” “Sunder Bharat”, NE Region hi Oct. 26, 2015 a tan le Oct. 30, 2015 chen aw ding a nih, zanita rally a hin NE state tum tuma scouts and guides 120 vel an thang.

3rd Phase Bihar election-ah votes 53.32 % a tla
PATNA: Zanita Bihar Assembly 3rd phase election district 6-a Constituencies 50 haia neia chun votes 53.32% a tla. Chun, zanikhan October 12, 2015 nia first phase election neina polling booth pahni No. 131 le no. 118 haiah repoll nei a ni bawk. Zanita 3rd Phase election neia uma khan candidates 808 an u m a, chu laia 71 nuhmei an nih.

Meghalaya-ah Sipai lak runpui
SHILLONG: November 16-18, 2015 inkar sung khin Meghalaya-a Assam Regimental Centre, Shillong hmuna North East state mi hai ta dingin Soldier/ Clerk/ Store Keeper, Technical/ Inventory management, Soldier Technical category haia Indian Army a thang ding sipai lak runpui (recruitment rally) um a tih. Manipur mi, hi recruitment-a thang nuom hai chun November 16 le 17, 2015 haiah a hmuna in report ding a nih. Thu chieng lem hre nuom han Recruiting Headquarter, Shillong Contact Number 0364-2506581-ah kanchieng thei ning a ta, Army Recruiting Office, Rangapahar telephone No 03862-248845 a khawm kan chieng thei ni bawk a tih. (Virthli)

Mawlynnong khuo in PM an khuoa inzin dingin
SHILLONG: Meghalaya state sunga khuo fai taka record “God’s own garden’ tia ko Mawlynnong khuo hai chun Prime Minister Narendra Modi chu an khuoa inzin dingin an fiel. PM Narendra Modi in monthly radio talk – Mann ki Baat Pathienni nuhnung taka a nei hunah faina kawnga hi khuo (Mawlynnong) hming sam meua an pak thu a saksuok hnunga an khuoa inzin dinga an fiel a nih. PM in an khuo hming hmer meua thu a hril hi Mawlynnong khaw mi hai chu an lawm hle a, nasa takin phurna a pek thar niin Mawlynnong village headman Thomlin Khongthohrem chun a hril.

Tripura HRC January 1 a inthawk
AGARTALA: Tripura Human Rights Commission (THRC) chu January 1, 2016 a inthawk function tan a ta, Andhra Pradesh Chief Justice hlui Kalyanjyoti Sengupta chu Chairman hmasa tak ning a tih tiin Tripura Law minister Tapan Chakraborty chun a hril. Principal Secretary hlui RP Meena le Law Secretary hlui Samiraan Das hai chu hi Commission-a member ning an tih. Supreme court chun Delhi, Himachal Pradesh le India hmarsak states 7 hai chu January, 2016 chenah Human Rights Commission indin seng dingin an hriettir a nih.

GNLA han Chokpot BDO an thuoihmang
TURA: Zani hmasa zantieng khan GNLA helpawl ni dinga ringhla han South Garo Hills district-ah Chokpot Block Development Officer (BDO) Jude Rangku T. Sangma an thuoihmang. Rangku T. Sangma hi 2010 batch Meghalaya Civil service officer a ni a, Chokpot a inthawk Deku Deganggre village-a a mithi rala a fenaa an lo man le thuoihmang a nih. Rangku T. Sangma hin official motor Mahindra Armada Jeep ML01-1570 ama in a khal le midang pahni motor-a hin an chuong a, a motor a chuong mi pahni hai chu an tir hmangin motor hi lampui sir lai maksana an thuoihmang a nih. Sum ngenna le inzawmin GNLA chun Rangku T. Sangma hi vauna an lo pek rawp ta hlak a nih.
------------------------------------------------------------------------------
VAWISUN THUPUI
I thununna thuhai chu iengtika khawm theinghil naw ning, Nangin chuong chun mi i sukhar ta sih a. I ta ka ni hi, mi sandam rawh, I thununna thuhai chu ka zawng sih a.
- Sâm 119:93-94

Editorial
Tribal movement ni 60 a upa a ni tah

Manipur Assembly in August 31, 2015 nia Anti –Tribal Bills 3- ‘Protection of Manipur People Bill, 2015’, ‘The Manipur Land Revenue and Land Reforms (Seventh Amendment) Bill, 2015 le ‘The Manipur Shops and establishment (Second Amendment ) Bill, 2015’ a passed leia Manipur tlangram district, a bik takin Churachandpur district sunga hieng bills 3 hai dodalnaa Tribal Movement ei fepui mek chuh Bill passed ni leh tiemin vawisun hi ni 60 a tlingna char a nitah. Anti-Tribal Bills hai hnukkir nawk an ni theina ding hin Tribal hnam tum tum han inthuruol taka hma lain Manipur Tribal Forum Delhi (MTFD) khawma theitawp suoin Central leaders tum tum hai an lo inhmupui ta bakah Manipur-a inthawk JAC inrawinaa ATSUM le Student Organisation tum tuma thuoitu hai khawm Delhi-a fein Central thuoitu hai an zun hmupui ta a nih.

Tribal movement ei fepui ni 60 a tling chena khawm ei MLA hai chun ei phutna an la sukpuitlingnaw bakah state sawrkar khawmin duthusamin Tribal hai khekri hi a la ngaisak tawknaw nia an lang leiin ei hmalakna ei sukhrat zuol sau thil tulin an lang. Midang le ramdanga mipui palai han an nauhai thil suksuola khawm mani thiemnaw inchanga an silfen an hlip ngam lai; an mipui chu hril lo, an tlingna ram leilung chen tawk dinga thil an suksuol hnung khawma mani inthiemnawna nei lova muong muta an lang thung el hi a san um ngei ding a ni a, chu chu mipui hriet chak em em a nih.

Tribal Movement fe mek le inzawma hmalak pei dan ding ngaituo le hriltlang dingin Joint Action Committee (JAC) Against Anti-Tribal Bills chun October 29, 2015, 11AM hin YPA GHQ Hall, Hiangtam Lamka hmunah Joint Consultative meeting um a tih. Hi huna hin Inpui hai/Tribe Councils, Philanthropic Organisations, student bodies le Church leaders hai joint meeting neipui dingin a ko a. Hi huna hin ei movement fepui mek le inzawma ei hmadawm dan ding, sawrkarin tuta neka a mi ngaisak lem theina ding thil thar le lampui thar an hung rawt dawk ngei chu mipui beiseina a nih.

Hieng laizing hin Manipur Tribal Forum Delhi (MTFD) Core Committee in October 26, 2015 nia meeting an nei hunah Anti-Tribal Bills 3 hai chungthua state sawrkar, central sawrkar le tribal leaders han tripartite talks nei dinga an phutna an hmatienga nei a ni theina dinga nawrna le Tribal Martyrs 9 hai ruong tuchena vui lova an la um nain India ram pumpui a dengsuok theina ding bakah Tribal martyrs hai leia Tlangmi hai pumkhata ngir an nizie tarlangna dingin Jantar Mantar, New Delhi hmunah November 4, 2015-a Mass Rally nei dingin an rel a. Mass Rally hin ra tha lem a hung insuo ngei ei beisei a nih.

Tribal movement ei fepui mek le inzawm hin nuorna le helna chi dang dang hai neiin thil tam tak suksiet le Torch rally hai chen khawm nei a lo nita bakah hmun hran hran haia tuchen hin Dharna /sit in protest ei la fepui zing a, sienkhawm ei movement ni 60 a tling chena khawm sawrkar tienga inthawk dawnna lungawitlak tak ei la hmunaw ruok hi chu tuornat a um hle. Hi lei hin sawrkar in ei thil ngiet a ngaisak zuol theina dinga hmalak dan thar ei dap suok a tul takzet in an lang. MTFD in New Delhi hmuna Mass rally an buotsai ang bawk hin Imphal hmuna khawm Mass Peacefull rally nei inla umzie a nei thei deu dim ti dam hi thuoitu han hung ngaituo in hriltlang hai sien a tha el am!. Tuta ei fe dan ringawt hin chu sawrkar na a ver tawknaw ti chu tu chena khawm hin an lang a. Hi lei hin thaw dan dang, lampui dang ei dap chu a tul a nih.

Ei unau Naga han kum 60 chuong zet an suol hnung khawma tuchena an duthusam an la hmu thei nawna san chu anni sunga inthuruolna le inlungruolna an neinaw lei a nih ti ei hriet a, Peace Accord an ziek khawm hi a kawr chau, a tak la umlo a ni a, anni sunga inlungruolna tha tak an neinaw chun an beisei ang rawk chun an hlawtling beiseipui a um nawh. Hi lei hin ei movement a hlawtling ngei theina dingin tlangmi hnam tum tum hai hin ei inthuruolna sukse thei ding thil hrim hrim chu hnawl in, ei inthuruolna hi chel tlat tum ei tiu.

Post a Comment

Powered by Blogger.