Tuolsung
JAC in tribal MLA hai Public Boycott an puong
CCPur:  Manipur Assembly in Bill 3 a passed leia Manipur tlangram biela nuorna le helna tlung mek le inzawma indin JAC chun zanikhan JAC Information Centre­ah Emergency meeting an nei.  Hi huna an rel dungzuiin Manipur­a Tribal MLAs hai chu thuthar um nawk hma khata dingin ‘Public Boycott’ puong a ni thu zanikhan JAC chun thusuok an siem.
           
ATSUM in Aug. 30 khan tribal MLA hai Bill pathum passed na dinga special session­a thang lo dingin an ti a, sienkhawm an thang lui a. Sept. 1, 2015 a Kuki Innpi, Hmr Inpui le Zomi Council han Bill 3 hai passed a nina thuah HAC chu ni 10 sung meeting ko a, hma la dinga ti an ni a, sienkhawm dawnna hmu a ninaw a; Sept. 2, 2015 khan JAC KKL Complex a JAC indin a ni a, Sept. 7 khan JAC chun tribal MLA hai ni 10 sunga inban ding le an inban naw chun public boycott puong dinga rel a ni a, dawnna hmu a ni chuong naw a. Tribal MLA thenkhat an inban ti hrilrik a ni thua enfel dingin Sept. 12, 2015 khan Media team tir an ni a, sienkhawm an inban ngei ti fiena hmu a ni naw bakah MLA haia inthawk ATSUM annawleh JAC in thu iengkhawm a hmunaw leiin JAC chun Public boycott hi a puong dinga a rel a nih tiin zanita JAC thusuok chun a hril.

JPO in ralna le thangpuina sum an pek
Zing dar 5­10AM bandh inthlazal ding
CCPur: Joint Philanthropic Organisation (JPO) chun zanikhan Tribal Martyrs 9 sunghai kuomah ralnain Rs. 50,000/­ seng le District Hospital­a hliem enkawla um mi 6 hai thangpuina dingin Rs. 5,000/­ seng an pek. Hieng sum hai hi District Hospital, CCPur campus­a JPO in donation box a daw a mi­thahnemngai han ralna an pek haia inthawka an sem a nih. JPO chun, tuta mi hi a tawpna ni lovin ralna a ni phawt thu an hril a, JAC in Tribal Martyrs 9 hai a vui huna Organisations le mimal tum tumin ralna le tuomna puon an pek hai mithi sung hai kuomah inhlan a ni ding thu an hril.
   

Chun, Imphal hmuna hliem enkawla um mi 4 hai khawm vawisun hin JPO chun thangpuinain Rs. 5,000/­ seng inhlan an tih. Chun, hliem 19 khawsakna harsa zuol hai thangpuinain bufai half bag 1 seng an pek bawk.
           
Vawisun Sept. 13, 2015, zingkar 5AM­10AM sungin CCPur khawpui sunga chun Bandh inthlazal ning a ta, 10AM a inthawk sit­in protest sunzawm nawk ning a tih tiin zanita JAC thusuok chun a hril. Sept. 14, 2015 (Thawtanni) khawm hiengang bawk hin bandh inthlazal ni nawk a tih.

JPO donation box­ah Rs. 12,64,066 a lut tah
CCPur: District Hospital campus­a JPO in donation box an dawa chun nitin mithi ralna le  ruong tuomna puon a lut zing a, zanikhan YPA New Lamka Block hnuoia Unit 11 han Tribal martyrs 9 hai ralnain JPO kutah Paite puondum 9 le Rs. 28,000/­ an pek. September 1­11, 2015 inkar sung chena khan JPO donation box a hin Organisation tum tum, Kohran le mi inphal han donation an pek chu Rs. 12,64,066 a tling tah.

EBC hotu han mithi hai ralna in Rs.1 lakh an pek; hliem hai an kan
CCPur: Rev. S. Vung Minthang, Gen. Secy., EBC inrawinaa EBC hotu le Pastor mi 20 vuong hai chun zani zingkar khan District hospital, CCPur­a tribal martyrs 9 hai tuomna Puondum 9 le sumfaiin Rs. 1 lakh JPO kutah an inhlan a. District Hospital­a hliem enkawla um mi 6 hai khawm Rs. 5000/­ sengin thangpuina an pek bakah an lu chunga kut innghatin tawngtaipekna an nei.
   
Thi le hliem hai an ral zo hin EBC hotu hai chun KKL Complex­ah JAC for Anti­Tribal Bills hai an inhmupui. Rev. S. Vung Minthang chun, ni 1 sung chau thila Manipur­a tlangmi hai popo inthuruol taka ei um chu thilmak (miracle) a nih tiin hi huna hin a hril a, tuta tum ei thawsuol a ni chun ei hma kum 100 hnunga khawm hienganga Manipur­a tlangmi hai inthuruolna a um nawk tanaw el thei a nih. Pathien chau hi ei bel le innghatna ding a ni thu hrilin JAC hai chu Kohran han tawng­tainaah an thlawp pei ding thu a hril.
   
JAC­a Chief Coordinator chun, Singngat khuo bakah Sadar Hills, Jiribam a khawm JAC indina  thei ang tawka hma lak zing a ni thu hrilin JAC hmalakna report a pek a, Kohran hai chu tawngtainaa hre zing dingin a ngen. Legal Cell indina um chun Assembly bills 3 hai chipchier takin an enfel mek thu a hril bawk.

Mass Open Air Prayer
CCPur: Ram sunga inremna le muongna a um theina dingin Churachandpur District Christian Goodwill Council huoihawtnain September 14, 2015, 2:00PM 3:00PM inkar sung khing Churachandpur Public Ground­ah Church Leaders (Upa le Pastors han) Mass Open Air Prayer meeting nei dinga ti a ni a, Uniform  nei han Uniform inbelin thang seng dingin Rev. Vanmawia, Secretary, CDCGC chun inhriettirna a siem.

Thadou thuoi­tu han an hung ral
CCPur: Sadar Hills­a inthawk Thadou Tribe Council (TTC) GHQ President James Jamthang;  Thadou Students Assn. GHQ President Nehminthang Kipgen le Thadou Youth Assn. GHQ Presidnt Josh Kipgen bakah Impahl­a JPO thuoitu mi 40 vel hai chu zanikhan CCPur­ah an hung a, tribal martyrs 9 hai an hung ral. Tlangmi hai ram humhimna dinga hringna inhlantu hai an sun thu, hliem hai an tuorpui thu le dam vat dinga an ditsakna thu hai an hril a, tuta ei buoina hi district pakhat chau ni loin Manipur a tlangmi hai popo buoina a ni leiin district tina tlangmi han nuorna an nei seng thu an hril a, ralna in JPO kuomah Saipikhup puon 9 an inhlan.

Thingpui dawntlangna an nei
CCPur:  Zanikhan HYA, YPA, YVA le TYA hotu han Hiangtam Lamka a YPA GHQ Hall­ah thingpui dawn­tlangna le inhmelhrietuona an nei. Thadou Youth Assn. a Gen Secy Henkhokai Singsit chun kum 2005 a Sadar Hills ah TYA indin a ni thu, Philanthrophic Organisation tum tum hai sinthaw thuhmun, tukhawm inenhrang thei ding um lo, sungkhat, nuhmei le pasala innei pawl ei ni thu a hril. YPA GHQ President S. Chin Ngaihpau chun, Society hranin um inla khawm tukhawm mihran ei um naw a, tawng inhrepaw vawng le khawtlang thatna dinga sin thaw seng ei nih tiin a hril. 

Headline
MP­a Jhabua Restaurant­a Cylinder puok  leiin mi 100 chuong an thi;
Thi hai zangnadawmna Rs. 2 lakh le hliem hai Rs. 50,000 seng pek dingin MP CM in a puong
Jhabua: Zani zingkar 8:30AM vel khan Madhya Pradesh­a Jhabua district sunga Petlawad hmuna Sethiya Restaurant a inthawk Gas Cylinder puok leiin sawng 2 a insang Restaurant building a chim leiin hi thu ei ziek chena thi mi 104 an tling ta bakah mi 100 velin hiemna an tuok. Hliem hai laia 20 chu an hliem inrik hle a hril a ni a, hi lei hin mithi hi tuta nek hin an la hung tam ring a nih.
   
Police thusuokin a hril danin,Cylinder puokdarna bul chara In pakhat chu thilpuokthei (explosive) Geletin sekkhawlna hmun a ni leiin thil puok hi nasa takin a sukhrat zuol niin an hril.  Hi thil puokna building bula building um hai khawm a suksiet nuol tawl. Restaurant le Geletin sekhawlna building hai chu a sukchim vawng a nih. Sethiya Restaurant, Petlawad hi Bhopal khawpuia inthawka km. 300 vela hla a ni a, building chim hnuoiah thenkhat an intang a, mithi hai laksuok le sansuokna sin thaw zing a nih. Mithi hai laia 82 hai ruong postmortem thaw a ni tah tiin ML Gond, Inspector, Jhabua Police control room chun a hril.
   
Madhya Pradesh Chief Minister Shivraj Singh Chouhan chun thina tuok sungkuo hai kuomah zangnadawmna Rs. 2 lakh seng pek ding le hliem hai thangpuina Rs. 50,000 seng pek dingin a puong. PM Narendra Modi chun Jhabua hmuna cylinder puoka thi hai a sun thu a puong a, Madhya Pradesh Home Minister Babulal Gaur chun hi thil tlung hi high­level inquiry thaw dingin order an suo.
   
Hi thil puok huna hin Restaurant sungah nitina inhlawfa mi (labourers) tam tak an inthung bakah hi lai biela dingin hi restaurant hi bu le thil fakna taka an hmang a ni leiin hi thil tlung huna restaurant­a hin mi an tam niin ei thu dawngna chun a hril. Hi thil puok le lei hin motor ke pahni nei tam tak a suksiet a, lampui lai an dar neng nung el a nih.

AR han PREPAK cadre 1 an man
Imphal:  Sept. 11, 2015 khan 22­Assam Rifles chun Thoubal district­a Sekmaijing bazar ah PREPAK cadre SS Pvt Yumnam Rajen Singh (50) s/o Yumnam Dijamani Singh of Langmeidong Mamang Leikai, Thoubal District chu an man a, Kakching Police Station­ah an peklut.

Inthlangna a thara nei dingin
Imphal:  Manipur sawrkar chun a tharin September 14, 2015 a ADC, Chandel Chairman thar ding thlangna nei dingin Order an suo. September 9, 2015 a Chairman thlangna chu state sawrkarin a pawm naw niin sawrkar thusuok chun a hril.
           
Hieng laizing hin Chandel ADC Chairman election a thara nei dinga sawrkarin order an suo dodalin Committee on Protection of Tribal Rights (CoPoTR), Chandel chun zanikhan Manipur Governor kuomah Memorandum an pek a, hi chungthua kut rawl dingin an ngen. Election a thara nei ding hi sawrkarin a fethlengpuia, Imphal­a inthawk an function tir chun Chandel mipui han helna tum tum an thaw ding thu  an ziek.

Sangai Festival ah Intl. Theatre Troupes
Imphal: November 21­30, 2015 inkar sung khin Department of Art and Culture, Government of Manipur huoihawtnain chawlkarkhat sung aw Sangai Festival, 2015 chu Chandrakirti Auditorium, Palace Compund­ah hmang ning a tih. Tukum Sangai Festival a hin Manipur chau ni lovin Interntional theatre troupes hai khawm an perform ding niin Ningthouja Deepak, Director, Asian Theater Festival chun a hril. Central Academy of Drama, China khawmin (Romeo and Juliet) lemchang an inentir ding niin a hril.

NSCN(K) le AR hai an inkaptuo nia hril
Dimapur: September 10, 2015 zan khan India le Myanmar inrinaa Myanmar ram sunga Shera le Shashen village haia Assam Rifles hai luta dappui an va thawna huna NSCN(K) hai leh nasa takin an inkaptuo niin ei thu dawngna chun a hril. Hieng khuo pahni haia hin NSCN(K) 10 vel an inbiruk nia hril leia Assam Rifles hai hi va fe an ni a, inkaptuonaa hin a tu tieng tieng khawm thi le hliemna tuok an um thu hriet a ni nawh.
   
National Investigation Agency (NIA) chun NSCN(K) hotu tak S.S. Khaplang le military Chief  Niki Sumi hai that annawleh man a ni theina dinga information pe theitu hai kuomah Rs. 17 lakh lawmman pek dingin tulai hnai el khan a lo puong ta a nih.

Naupang 2 thattu Court hmaa inlangtir
Aizawl: August 28, 2015 nia Chhingchhip khuoa unau nuhmei naupang pahni thattua intum Lalchhantlunga chu zani hmasa khan Court hmaah inlangtir a ni a, unau naupang pahni hai chu a that ngei a ni thu puongin a thilthaw an sir thu Court hmaah a hril.
   
Mr Lalchhantluanga chun, August 28, 2015 ni khan nuhmei naupang pahni school tin in pana fe hai chu Dendrite an rui leia manin a upa lem chu a suollui a, a thil thaw mi kuoma an hril dawk ding an lau leia a that ve ve niin Magistrate indawnna dawnin Court hmaah a hril. Lalchhuantluanga chun, nu le pa kara seilien a ninaw lei bakah a nun danin a zirnaw leiin a umna in a inthawk hnawtdawk a ni rawp hlak thu hrilin khawtlang thuoitu hai khawmin home­ah sie hlak hai sienkhawm a suok huna thil suol thaw a sunzawm nawk el hlak thu a hrilin, naupang pahni a that ta hai panthlanga in bawl lai mekah a riek hlak niin a hril.

Bihar election um dingah BJP seat 160 ah
New Delhi: Bihar­a Assembly election hung um ding le inzawmin seat insem dan ding thuah Hindustani Awam Morcha Chief Jitan Ram Manjhi le Rashtriya Lok Samata Party Chief Upendra Kushwaha han zanikhan BJP President Amit Shah chu New Delhi­ah an inhmupui. Ei thu dawngnain a hril danin Bihar Assembly seats 243 uma inthlangna hung um dinga hin BJP le an thlawppui party LJP, RLSP le HAM han zani hmasa khan meeting an nei a, chu huna chun BJP seats 160 a ngir ding, LJP seats 40, RLSP seat 25 le HAM seat 8 a ngir dingin an sukfel niin ei thu dawngna chun a hril. Bihar Assembly election hi phase 5 in Oct. 12, 16, 28; November 1 le 5 haia nei ding a ni a, Bihar Assembly hi November 29, 2015 a tawp ta ding a nih.

NDA first anniversary Adtv. in Rs. 8 crore a seng
New Delhi: Centre­a NDA in sawrkar an siem a kum khatna le inzawma PM Narendra Modi in May 26, 2015 nia Open letter an suona Advertisement in sawrkar thlungpui chun nikhat sungin Rs. 8.29 crore a seng tiin Mumbai­a um Anil Galgali in RTI hmanga indawnna a siem dawnin Information & Broadcasting ministry chun a hril. NDA kum 1 tlingna le inzawm hin advertisement 4,094 insuo a ni a, advertisement hi I&B ministry hnuoia Directorate of Advertising and Visual Publicity (DAVP) in an siem a nih.


Left Parties seats 221 a ngir an tum
Patna: Bihar Assembly election ung um dinga hin Assembly seats 243 umah left parties chu seats 221 a ngir dingin thutlukna an siem. Hi dungzui hin CPI seats 91, CPI­M seats 78, CPI 38, SUCI seats 6, Forward block seat 5 le RSP seat 3 a ngir an tih tiin Satya Narain Singh, State  Secretary, CPI chun Chanchinbumihai kuomah a hril. Seats 22 la bak haia candidate nei ding le ding naw chu a hnungah la rel ning a ta, left parties chun Samajwadi party le NCP pawl inthlawppui naw nih tiin Satya Narain Singh chun a hril.

FGN/NNC cadre kap hlum
Dimapur: Sept. 11, 2015 khan 23rd BN Assam  Rifles patrolling­a fe hai chu KT colony, Tuensang hmuna tu ti hrietlo han silaiin an lo kap a, Assam Rifles han an kap let naah FGN/NNC (NA) cadre ‘sgt’ Chaang bushie Chang s/o (L) Basumunghe Chang chu an kap hlum. Assam rifles han in pakhat an dapnaah FGN/NNC (N/A) capt Tiameren Chang (36) s/o Chuba Chang of KT Colony, Tuensang chu an man a, Police kuta an peklut  niin Assam Rifles thusuok chun a hril.

Duronto Express Rel eksiden­ah mi 2 an thi
Bangalore: Zani zingkar inhma tak khan Karnataka state sunga Martur Railway station­ah Duronto Express Rel hrat taka tlan chu a eksiden a, nuhmei 2 an thi bakah midang 8 an hliem. Rel hi Zirtawpni zana kha Secunderabad­a inthawka hung suok le Lok Manya Tilak terminus, Mumbai pan a nih. Hi Rel eksiden lei hin South Central Railway hnuoia Rel tlan ding thenkhat cancel pha a nih.

Haryana in sa zawr a khap ve
New Delhi: Haryana chun Jain hnam hai festival Paryushan hun sung ni 8 sung a state sunga Sa hrim hrim zawr a khap. BJP rorelna state hai laia Sa zawr khaptu state 5­na a nih. September 11­18 inkar sung sa hrim hrim zawr khapna hi Haryana sawrkarin an suo a ni a. Tuta hma khan Gujarat, Maharashtra, Rajasthan le Jammu & Kashmir han Paryushan lein sa zawr an lo khap ta bawk.

DUSU election­ah ABVP an hrat
New Delhi: Zani hmasa Delhi University Students Union (DUSU) election a chun ABVP in seat 4 haiah hratna an chang. ABVP a Satinder Awana chu President, Sunny Dedha chu Vice President, Anjali Rana chu Secretary le Chhattarpal Yadav chu joint Secretary dinga thlang tling an nih. DUSU election­a hin student 43% in vote an thlak a nih. Congress affiliated National Students Union of India (NSUI) chun colleges 18 haiah member 5; BJP Youth Wing Akhil Bhartiya Vidyarthi Parishad (ABVP) chun Colleges 13 haiah hratna an chang a nih.

Inruk hmanga um Budha lim hmukir
Itanagar: 15th Century Budha Statue, Rs. 300 crore manhu vel ding, August 20, 2015 a inruk hmanga um chu hmukir nawk a ni tah. Budha lim hi Shoktsen village, Tawang District, Arunachal Pradesh a inthawka inrukhmang a nih. September 10, 2015 khan Budha lim le an rutu Dorjee Sonam chu Arunachal Pradesh Police hnuoia Inspector Anand Mondal han Guwahati a Guest Houst pakhata inthawk an man niin Police thusuok chun a hril. Budha lim hi a ram mihai chun a hmingah “Jowa Thunghar Dondop up” an inbuk.

ECI in Bihar Home Secretary sawn dingin
Patna: Bihar Assembly Election hung um ding leiin  Election Commission of India (ECI) chun Bihar Home Secretary Amir Subhani bakah District Magistrates 9 le SP thangin Police officials 7 hai chun sawn (transfer) dingin an hriettir a, hieng official hai hi election le inzawm sin hrim hrim transfer an nina a pek lo ding ti a ni bawk. Hi le inzawm hin ECI chun 1983 batch IAS Officer Sudhir Kumar Rakesh chu Bihar Home Secretary thar dingin a ruot.

JMM seats 243 ah an ngir vawng ding
Ranchi: October 12, 2015 a inthawka Bihar Assembly election phases 5 a nei dinga hin seat um po po seats 243 ah Jharkhand Mukti Morcha (JMM) chun candidate nei an tih tiin Supriyo Bhattarcharya, General Secretary, JMM chun a hril. An party candidates dinghai hming chu September 17, 2015 zo tieng puonglang chau ni dingin Bhattarya chun a hril.

Mecca hmuan crane tluk leiin mi 107 an thi
Mecca: Zani hmasa khan Saudi Arabia rama Mecca­a Muslim biekin bawl mek Grand Mosque a hmangruo hai khai kangna ‘crane’ a tlu leiin mi 107 an thi a, mi 238 an hliem. Crane hi hmun thienghlim, khawvela Muslim hai sakhuo biekna lien tak Masjit al­Haram, Grand Mosque an ti bawk sunga an umkhawm laia tlu a nih. Thi hai hi khawvel rambung tum tuma inthawk sakhuona thila inzin an ni tawl. Crane tlu hin Grand Mosque a del nia hril a nih. Ruo nasa taka a sur bakah thla a hrang leia Crane hi chim niin Mosques spokeman Ahmed bin Mohammad al­­Mansoori chun a hril. Mecca region governor Prince Khaled al­Faisal chun hi thil tlung hi a hmuna fein a va enfel bakah hi thil tlung hi investigaton thaw dingin order an suo. 
   
Ministry of External Affairs spokesperson Vikas Swarup chun, Jedda hmuna India consulate chun thil umdan a enkai zing a, tuchena hin hliemna tuok hai lai India mi 15 an thang ti hriet a nit a a bakah thi hai lai India mi 2 an thang niin a hril.
----------------------------------------------------------------------------------------------------------------
VAWISUN THUPUI
Kei chun an kuomah, “Sin ropuitak a thawh a, ka hung thla thei nawh, ieng dingin am i kuomah ka hung thlak karin sin chu chawl el a ta?” tiin mi ka tir a.   Nehemia 6:3

Editorial
Ei aiaw zo ding thlang tang ei tiu

Ram le hnam humhalna kawngah tulai hin Manipur­a Zohnathlakhai ei thanghar nasa hle a, lawm a um. Ram le hnam thilah hartharna runpui a chang lai a ni a, ei inthuruolna khawm a tha a, a hrat vang lai tak a ni awm ie. Thuvarin “thangruol hi hratna a nih” a ti hi chel tlat a, inthlada lova hma ei lak pei nuom a um. Ram le hnam humhal chungchanga hin iengchen am inhuomtir ei ta, ieng chen am  a huop sa ding tihai hi chik taka ngaituo veng veng a, thiem taka hma ei lak a tulin an lang. Ram hin ramri a nei a, hnam ruok chun ramri a nei nawh ti hi lungrilah nei inla nuom a um. State le UT hran chu ei nei hri naw a, sienkhawm chengna ram ei nei leiin Manipur a tribal hai hin humhal a, a hran a rorelna nei theina state annawleh Union Territory hai chu ei dit le duthusam a nih.
   
India ram hi mipui hai sawrkar, mipuihai ta dinga thlang (Government of the people and for the people) Democracy a nih. Political party system­ah innghatin pakhat neka tam an um a, Party tin han sawrkar siem tumin mipuihai lai an inzawr hlak. Sawrkarna an chang huna ram le mipuihai ta dinga thaw ding programme, project, Scheme le Policy tha tak tak siem hlak hai sienla khawm a hlawtling mumal ngai nawh.
   
Mihriem khawsak phungah pa le pa, no khat fa seng seng hai hi ei inthlau ta bek bek lei hin Manipur­a tribal­hai hin ei khawtlang le ei chengna ram humhal a, sukhmasawn nachang ei hriet ta leia ram le hnamah hartharna hi ei chang mek niin an lang. A var le remhrie lem chu ni inla a thaw dan dan a u m thei a, amiruokchu, a harsa le a rethei lem hai hi a mawl mawl, mani ta dinga thatna ding khawm thlir thiem lo ei ni leiin ei aiaw zo ding, ei ram le hnam humhal ngamtu ding ei thlangtling naw tawl an ta el an naw maw? Ei hmabak hi a eng hran naw a, a lan thim a nih.
   
Shakespeare in “khawvel hi lemchangna hmun a ni a, a sunga chenghai hi a lem chang vawng ei nih” ti thu a ziek ding zan khan a mangah Zohnathlakhai nun le um dan ding a lo hmulawk annawleh a lo hrietlawk an naw ding mani aw ti theiin a um. Ei Politician var verver tak tak hai h i inthlang tawm le vote thlak nikhuo haiah an tawngbau a tha a, sienkhawm thlangtling anni hnung chun anni zui ta kher ngainaw leiin ei hmabak a hung var ur ta anga ei ngai hi a hung inthim khup nawk hlak. Chuleiin, ei phak tawkah hmathlir ei nei thiem naw chun ‘ka tapna khuo a sei taluo’ ei ti el ding a nih.
   
Inthlang hun lai hin mipui tieng khawm lem ei chang kuol vel a, election chu fakzawngna, sumdawngna le pawisa zawngna takin ei hmang a, candidates han cheng nuoitel an seng pha a, mipuihai chu inchawksa angin an inngai hlak niin an lang. Hi lei hin mipui rawl iengah an ngai naw a ni hi tie! Tuta tuma an inban an ti khawm hi mipuihai an mi simbu dawi niin an lang. An inban thu chu mipui lungril sukbuoitu chau a ni a, lawmna ding hrim a la um nawh.
   

Thuoitu tha, rorelna indik fepui ngam, indik taka rorel ngam, ram le hnam ta dinga mani nina inban ngam, ram le hnam ta dinga a tul ang peia inpe ngam le hma la thei hlak ding, ei aiaw zotu ding thlangtling a hun. Ei aiaw zotu ding ei thlang thei hmakhat chu ei ram le hnamin hma sawn ngai naw ni a, thil ngen ei nei khawmin ngaisak ni ngai nawng ei tih. Tuta tuma Zohnathlak han politics a hartharna ei chang hin aiawtu ding thlang dan min thiemtir ngei sienla nuom a um khawp el.

Post a Comment

Powered by Blogger.