Hmarkhawlien, June 12,2015 (Virthli News): June 2, 2015 ni a Chotokumpi (Rema punjee) Hmar khuo Khasi le Dimasa inkawpa an rûn na le inzawm'n Joint Organisation hai hmalakna le huoihawtna hnuoia Cachar pheia khuo 17 hai chu fekhawm in Peace Rally (lam hrawna) an nei.

Hi Rally hi Hmarkhawlien Community Hall a inthawkin zinga dar 11 ah mipui 2500 vel fekhawm hai chun an nei tana Lakhipur SDO (Civil) Office tuola suktawp niin thuoitu haiin Lakhipur SDO (Civil) le SDPO hai inbiekpuina an nei a nih. Hi an inbiek sung hin mipui hai chu tuola khek zingin, mipui so khawm an sang hle a nih.

Hun iemachen inbiekna hi a fe a, iengkhawm sawrkar tienga inthawka hmalakna la um naw nasan hai thuoitu haiin indawnna hai an neia, hi hun a hin memorandum khawm an pek thar nawk a nih. Ngenna siem angin SDO chun refugee hai fak le dawn ding chu pe ding'n an tiem a, thuoitu haiin FIR an thelut dungzuia hma la dingin an ngen baka FIR a tarlanga um mi pa 6 hai chu ni thum (3 days) sung ngeia man ding'n an hril bawk a nih. Chun man anni khawma nikhat nihni hnunga insuo zalen nawk el lovin IPC under Section 16/15 U/S 147/148/149/427, 379 IPC R/W Section Arms Act dungzuia action la dingin an ngen bawk a nih.

SDO hin ngenna siema um ang hin hma la ngei dingin an tiema, hi an tiemna hi thuoitu haiin mipui hmaa ngei puong dingin an ngena chu a puong nuom naw leiin a rawipa Circle Officer chu mipui hmaa hma an lak ding thu hi an puong tir a nih.

Hnam thuoitu hai chun Sawrkar thuneitu han an thutiem anga hma an lak naw ani chun hung tlung ding June 17 a DC rawia Peace Talk nei dinga ti khawm hi thang lo ding le National Highway 37 ah indefinite Strike huoihawt ding tiin an hril bawk a nih.

Hi buoina hi thawleni sûn 11:30 a tlung a ni a, Khasi le Dimasa inkawp'n mi 100 vel bawr ding, silai chawi hai chun Rema khuo hi an va rûn a. Khawhnawma inthawkin silai vawi tamtak an kâp a. Khuosunga nunrawng tak lutin inhai popo chu an phûrthluk vawng a. An thlai kak hai, in hmangruo, burlebelhai popo, puon le thosilenhai, Solar light­ hai chenin an sukksiet vawng bawk a nih.

Photograph: Joseph Darngawn



















Post a Comment

Powered by Blogger.