Tuolsung:
‘CCPur for Nepal’ Donation Box  hawng
CCPur:  Kuki Women Organisation for Human Rights (KWOHR) GHQ in Nepal rama simkhawlei inhning leia harsatna tuortu hai thangpuina dinga thalawm (donation) pe nuom hai ta dinga  “Churachandpur for Nepal” ti hmingputa Donation box an siem chu zani zingkar khan Pu Lunminthang Haokip, IAS, DC, CCPur in Tuibuong Bazar­a Sumkong Kaimun, CCPur­ah a hawng. Hi taka thawlawm pe nuom han KSO/CCPur Information Centre­a Donation box­a hin May 15, 2015 chenin thawlawm pek thei ning a tih. Schools le Offices haia khawm Donation box an sie ding niin KWOHR chun an hril. Donation box hawngnaa hin KIC President bakah KKL le KSO thuoituhai khawm an thang.

CCPur­a inthawk Scrutiny­ah mi 1 char a tla
CCPur: Manipur Hill district haia ADCs 6 haia June 1, 2015 nia MDC election um dinga Nomination paper file­a um hai enfelna (Scrutiny) chu May 7, 2016 khan Lamphelpat­a Imphal West DC Office­ah nei a nih. Hi huna hin Churachandpur District­a ADC seats 24 um haia Nomination papers file mi 113 um hai laia pakhat chau a tla a, midang chu an fe thleng vawng. Scrutiny­a tla hi  17­New Lamka East biela nomination file Tombing Elwin (Independent) a nih. Chun, 8­Senvawn­a dinga nomination paper file hai lai khan Tlansang khawm a thangsa a, ama le hin scrutiny­a fethleng CCPur a inthawk mi 114 an nih. Demmang Haokip in 2-­Leimatak a dingin INC & Ind. bakah 18­Zenhang Lamka bielah Ginkhozam in LJP & Ind. in nomination an file a nih.
    
Manipur­a ADC 6 haia Nomination paper file hi an rengin 559 an ni a, hi laia 555 chu Scrutiny­ah an fethleng a nih. Candidate inhnukdawk nuom hai ta dinga inhnukdawk theina hun tawpna tak chu May 11, 2015 (Thaw­tanni) a nih.

JC Dental Care in Free Dental Camp an huoihawt
CCPur:  May 7, 2015 (Ningani) khan JC Dental Care chun Ngurte, CCPur hmuna Free Dental    Camp an huoihawt. Hi huna hin JC Dental Care neitu Dr Sangi, Dr Helhing Haokip le Dr Lalrotling Sinate hai bakah an assistant Pawli le Hrieti han Ha enkawl dan, ha enkawl that a pawimaw dan hai hrilhrietna an nei a. Mi 172 zet chu an Ha (teeth) hriselna an enfel bakah Ha nawtna hlo (toothpaste), Tootbrush le a dang dang hai a thlawn vawngin an sem bawk.

Free Dental Camp hi Oral Hygiene pawimawzie mipui han an hriet a, an ngaipawimaw zuol theina dinga huoihawt a nih tiin Dr Sangi chun a hril. Hiengang Free Dental Camp hi hmatieng khawm hmun dang dang haia la huoihawt nawk pei an tum thu Dr Sangi chun a hril bawk.

Reformed Choir Commissioning Service
CCPur:  Vawisun (May 9, 2015), 6:30PM hin Central Kristien Thalai Pawl, Reformed Presbyterian Church NEI chun Muolvaiphei, RPC  Chapel­ah Reformed Choir Commissioning Service nei an tih. Commissioning Service chu Rev. Saithanglur Joute, Secretary, Evangelism in nei a tih. Hi hun hmangpui dingin Rev. Jacob L. Hmar, Secretary, CKTP, RPCNEI chun mitin a fiel.

Free Mobile Medical camp
CCPur: May 12, 2015, 10:00AM khin District Health Society/CCPur huoihawtnain Kangvai Community Hall­ah ‘Free Mobile Medical camp” um a tih. Hi huna hin Dr Robinson, MO; Dr Donna Vungngaihching le Dr Lhingneithem Khongsai, MO han damnaw hai en an ta, ANM 3­ Chingbiaklun, Thiannem le Lamlhimpuii han thangpui an tih.

Essay le Painting Competition
CCPur:  Vawisun hin Vimala Raina High School, CCPur­ah Manipur Biodiversity Board Advocatng and Promoting Biodiversity Conservation sponsored­na le Divisional Forest Office, Southern Forest Division huoihawtnain Essay writing le Painting Competition for School Children um a tih. Hi taka thang nuom hai chu zing dar 9:45 a in register ding a nih.

Handloom Mela khar
CCPur:  Dist. Council Admn. Huoihawtnaa May 5, 2015 a inthawka B. Vengnom ­a tan ‘Handloom Mela’ chu zani zantieng 3PM khan DC CCPur Lunminthang Haokip in a khar. Hi huna hin CEO, ADCC chun Mela­a thang SHGs 25 hai kuoma incentive le citation/certificate an hlan tawl. Best SHG team pathum 7­Sister Enterprises, Nengngaichin Handloom, Salem Veng le Sinlung Handloom & Handicrafts hai Special Incentive inhlan an nih.

Inbiekremna nei a nih
TuiThaphai: May 7, 2015 (Thursday) Tarik 3­05­15 Pathienni zana Patpuihmuna HPC(D) Cadre tlanhmang (Deserter) Mr Ruola s/o Remthanga of Saipum, Mizoram in pawi tawklo J.T.Road­a leilak siemna le inzawma sinthaw mek (Labours) hai chu a silai tlanhmangpui in mi pahni Pu Lalbieklien Sinate (39) s/o Lalbuonthang, Salem Veng, CCPur le Tv Darlienthang Hrangchal s/o Tlangkhumvel, Lungthulien hai chu kaphlum in, Tv Lala Famhoite s/o Pana Famhoite le Elisa Chawnghmunte s/o Pastor Hrangdang, Sielmat chu na takin a kap hliem a. May 5, 2015; 2PM khan Salem Veng­ah thi sungkuo, Pu Lalbieklien Sinate sunghai leh HYA GHQ chu hnam aiaw a ngirin inbiekna nei ani a. Hi huna hin Pu Lalbieklien Sinate sung­le­kuo hai chun suksuoltu chu Pathien hmingin iengkhawm phut nei lovin HPC(D) an ngaidam. Pu Lalbieklien ruong hi May 5 zana vui nghal ani a. A ralna huna hin HYA GHQ chun puon an khum a, Hnam aiaw in cheng 1.5 Lakh thi sungkuo an hlan bawk. Hmar Inpui, HSA GHQ le HSA Churachandpur Jt Hqrts khawma hnam puon an in khum bawk. Program hmang zo ani hnungin District Hospital­a um, hliem laia thangve Tv Lala Famhoite s/o Pana Famhoite chu HYA GHQ in hnam aiaw in a hang en a, an enkawlna ding pawisa an hlan bawk. Lala hi a ban vawitieng, a dar hnuoiah silaimu in a deng thleng anih. (Alan)

MGNREGS sinthawna a hung enfel
CCPur: NIRD, Hyderabad­a Research Associate, NIRD D. Sivakumar chu zanikhan CCPur­ah a hung inzin a, MGNREGS hnuoia sinthawna hmun tum tum a enfel. D. Sivakumar hin Zenhang Lamka, Lamka Block sunga Ringwell siema um hai a enfel a, PO, DRDA le staff  hai bakah Lamka BDO/PO le staff han an tawiawm.


Headline:
Medical College thar 17 le Medical Colleges 70 dawmsang ning a tih­ J.P. Nadda
New  Delhi: Universal Health Coverage (UHC) hnuoiah sawrkar thlungpuiin Medical Colleges thar 17 indin ding, Medical Colleges um tasa 70 hai chu dawmsang le All India Institute of Medical Sciences (AIIMS), New Delhi angpui 9 indin belsa dingin sawrkar thlungpui chun a remti tah. Tuhin India ram hmun tum tum ah AIIMS, New Delhi angpui 6 indin le an sin ding an thaw tan ta a, kum khat vel liemta khan District Hospitals 22 hai chu Medical College a hlangkai an nih tiin Union Health Minister J.P. Nadda chun zanikhan Lok Sabha an hriettir.
    
States le UTs tin haia khawm Universal Health Coverage hi tha taka thaw ning a tih. Chu ding chun States le UTs tum tu ma sawrkarhai khawm hma lo la tan seng dinga inhriettir vawng an ni tah. Hi programme hi a bat bata thaw pei dinga sawrkarin a remruot a nih. Chun, National Health Mission (NHM) hnuoia khawm a thlawnin damdawi sem, diagnostics tul hai thaw, a thlawna nau nei le  Below Poverty Line (BPL) sungkuohai chu kum khatah Rs. 30,000 manhu ang pei damdawi annawleh hamthatna pek an nih tiin J.P. Nadda chun a hril.

Imphal
Union Minister V.K. Singh a hung inzin  ding
Imphal: Vawisun hin Union Minister of state for Statistics & Programme Implementation, External Affairs le Indian Overseas Affairs (Independent Charge), V.K. Singh Imphal­ah hung inzin a ta, Social Security and  Pension Schemes 3 hawng a tih. Hieng Schemes 3 hai hi PM Narendra Modi khawmin vawisun hin Kolkata hmuna hawng a ta, India ram hmun hran hran 116 haia khawm Chief Ministers le Union Ministers han hawng an tih.

Journalists 4  ADC election­ah
Imphal:  June 1, 2015 a ADC election hung um dinga khin Manipur tlangram biela Journalists 4 hai chun nomination paper an file ve tawl. Chuong hai chu, Ramkung Pamei, Editor, The Cham   Daily (Rongmei dialect), Tamenglong; Th. Benlian Vaiphei, Editor, Nisin Thuhiltu (Vaiphei dialect), CCPur; S.N. John, Jt. Editor, Manipur Express (Paite dialect) lo ni hlak hai A.S. Pamreiso Shimray, Ukhrul, Huiyen Lanpao English Daily Correspondent hlui hai an nih.

VDF han an nuorna an tawpsan
Imphal: An sinthaw chawlsana nuorna nei VDF pawl le State sawrkarin inbiekremna an nei ta leiin VDF han an nuorna an tawpsan ta a, vawisuna inthawk a pangngaiin an sin an sunzawm nawk ta ding niin sarwkar thusuok chun a hril.

Dy.  CM in a vai liem
Imphal: Zani zingkar khan Kangla, Imphal hmuna Deputy Chief Minister Gaikhangam in Nepal­a Simkhawlei inhning leia harsatna tuorhai sawmdawl dinga fe ding mi 15, Manipur Youth Disaster Response Team a mihai chu a vai liem. Hiengang team Manipur a inthawka fe thei ding ei um hi thil lawmum takel a nih tiin Gaikhangam in hi hunsera thu a hrilna huna a hrillang.

Director of Education (S) an va khek khum
Imphal:  Zani 1:30PM vel khan Ithai Govt. High School student­hai chu New Secretariat, Imphal Complex sunga Director of Education (S) Office tuola inthawk hi Directorate office hi an va khek khum a, lekhabu le an bu chawi hai lungsenin an dengthlak. Student­hai hin zirtirtu ngen naa hi thil hi an thaw a nih.

Edn. Dept. in Special Exam huoihawt a tum
Imphal: Education Department, Manipur chun CBSE Exam­a thang thei lo student hai ta dingin  tukum June thla hin Special Examination a huoihawt el thei niin ei thu dawngna chun a hril. Amiruokchu, state cabinet in remtipuina a nei huna special exam.­a dinga arrangement siem ni chau dingin State Education Department thusuok chun a hril. 

Candidates 555 an tling phak
Imphal:  June 1, 2015 a ADC election hung um dinga hin candidates in Scrutiny an fethleng a, inhnukdawk theina hun May 11, 2015 chen hawng a ni a, May 11, 2015 zova candidate umzat indik tak hriet chieng ning a tih. Candidate­hai lai BJP  121, INC 97, NPF 86, JD(U) 6 le Independent 231 an um niin ei thu dawngna chun a hril. Candidates 10, INC 6, NPF 3 le BJP 1 hai chun khingtu an nei nawh.

May 11 a inthawk tiemchin um lo Blockade thaw an tum
Kangpokpi: KSO Sadar Hills in May 2, 2015 nia Lalhoiphai khuo lal le Van driver Moidangpok hmuna vuok a ni le Cultural University ram chungthu le inzawm haia darkar 24 total bandh an thaw leiin zanikhan NH­2 lampui a chun motor inlawn hmu ding an um naw a, nundan pangngai nasa takin a sukbuoi. KSO Sadar Hills chun Kuki Inpi Sadar Hills le pawl tum tum han meeting an nei huna sawrkarin an thil ngen ni 3 sunga a sukpuitling peknaw chun May 11, 2015 zanrila inthawk tiemchin um lo Economic Blockade thaw dingin an rel. (UNA)

Others:
Malsawmkima kap hlum a nih
Aizawl:  HPC(D) a Sergeant Malsawmkima alias Danny (31) chu zani zingkar dar 6 vel khan Mizoram Police han Tieulien khuo, Tipaimukh Sub­Division, Manipur hmuna an kap hlum a, a ruol danghai chu himin an tlan hmang hman niin PRO, Mizoram thusuok chun a hril. Malsawmkima hi July 1, 2014 zana Sakawrdai Police Outpost a inthawka AK­47 Rifle 1, INSAS Rifle 1 le silaimu 250 le tlan hmanga HPC(D) zawm, a hnunga HPC(D) a lut, March 28, 2015 nia Zokhawthiang­a Mizoram Police, MLAs 3 vengtuhai lo lambun a, Police 3 kap hlumnaa thang, April 24, 2015 a Mizoram Police in luman Rs. 2,00,000 neia a lo puong ta a nih tiin ei thu dawngna chun a hril. Chun, a kuta inthawk Ruger .38 Revolver hmu a ni a, a ruong chu zani 3:30PM khan Sakawrdai phurtlung niin a hril bawk.

PM Chhattisgarh­ah an zin ding
New Delhi: Vawisun hin PM Narendra Modi chu Chhattisgarh ah inzin a ta, Dantewada le Naya Raipur hai sirin vantlang inkhawmna haiah thu hril a tih. Hmun pahniah hun a hmang zovin Livelihood College va sir a ta, skilled­based education le training chungthuah student hai inbiekpui a tih. Hieng laizing hin Maoist helpawlhai chun PM in Chhattisgarh an zin ding hi an boycott ding thu an puonglang.

Election Commissioner dingin Jyoti
New Delhi: Gujarat Chief Secretary hlui Achal Kumar Jyoti chu Election Commissioner thar dinga ruot a nih. Jyoti hi 1975 batch IAS Officer a ni a, kum 65 a ni chenin a sin hi a chel ding a nih. Election Commissioner hi pathum ding a ni a, tuhin ama leh pahni an nita a, pakhat dang ruot belsa nawk a la ni ding a nih.

Rahul Gandhi Court hmaah an lang
Thane: AICC President Rahul Gandhi chu zanikhan Thane District, Maharashtra a Bhiwani hmuna Court hmaah an lang. RSS activist Rajesh Kunte in Mahatma Gandhi thattuah Rahul Gandhi in an tum tia Court a defamacation case a siem leia Court in Rahul Gandhi hi a ko a nih.

LS inthung hun ni 3 a suksei nawk
New Delhi:  Lok Sabha Budget session neia um mek May 8, 2015 a tawp ta ding chu Land Law Bill thangsain bill sukfel ding a tam leiin Lok Sabha in­thung hun chu ni 3 dang suksei nawk a ni a, hi lei hin Lok Sabha session chu May 3, 2015 chena nei ning a tih tiin zani hmas a Cabinet Committee on Parliamentary Affairs Meeting chun a rel. Chun, Rajya Sabha in­thung hun khawm ni 3 dang suksei a nih.

Mizoram  HSSLC result a suok
Aizawl: Mizoram Board of School Education (MBSE) hnuoia Higher Secondary School Leaving Certificate Examination (HSSLC), 2015 result chu zani 11:30 khan puong a ni a, a pumpuia pass percentage 74.53 a tling phak. Mi 10,174 an exam a, mi 7583 an pass a, mi 2462 an hlawsam. Distriction­ah mi 151, First division­ah 1468, Second division­ah 2452 le Third  Division­ah 3512 an passed a, compartmental hmu 129 an um. Pasal nekin nuhmei pass percentage a tha lem. Pasal pass percentage 73.24 a ni laiin nuhmei pass percentage chu 75.86 a nih.

Bungheia nuorna nei mi 5 Hospital­ah
Aizawl:  Rashtriya Madhyamik Siksha Abhiyan (RMSA) hnuoia thawk Laboratory Attendants le  Clerks 50 hai chu an sina inthawk ban an ni a. Hi leia lungawi lovin April 27, 2015 a inthawk khan bungheiin nuorna an nei tan a, hienghai laia mi 5 hai chu an taksa a chau ta leiin Aizawl Civil Hospital­ah admit an nih. RMSA fund peka um hlak chu sawrkar thlungpuiin a suktawp ta leia ban an nih. Thawktu bana um hi an rengin 366 an nih.

RJD a inthawk Pappu Yadav hnawtdawk
New Delhi: RJD MP Pappu Yadav chu kum 6 sunga dingin RJD a inthawk hnawtdawk a nih. Party kal zawnga a um le thil a thaw leia hnawtdawk a nih tiin  Ramdeo Bhandari, Chief General Secretary,  RJD chun a hril. Pappu Yadav hi Madhepura biela inthawk RJD ticket a term 5 zet lo tling ta le Lok Sabha inthlang nuhnung tak khan JD(U) President Sharad Yadav leh an inkhing a, Sharad Yadav hi a hneban a nih. Pappu Yadav hi Bihar Assembly election hung um dinga hin BJP leh thangruol tum nia hril a nih.

Salman thiemnaw inchangtira a umna supsended
Mumbai:  Zanikhan Bombay High Court in Salman Khan hit­and­run case a kum 5 sung lungin intang dinga Court in thiemnaw an changtirna chu a suspended.  Bail bond Rs. 30,000 thawin Salman Khan hi Bail­a insuo a nih.

Pranab Mukherjee  Doctorate degree
Moscow:  India President Pranab Mukherjee chu ni 4 sung cham dingin May 7, 2015 khan Moscow a tlung ta a, zanikhan Russian Diplomatic Academy in Honorary Doctorate Degree an hlan. Pranab Mukherjee hi Victory Day hmangnaa thang dinga Russia rama inzin a nih. Indopui pahnina huna Allied Forces han hnena an chang a vawi 70 tling lawmna chu vawisun hin ropui takin Moscow khawpuiah nei a ni ding a nih.

Sportsperson of the year in Jitu Rai
New Delhi: Times of India Sports Award chun May 7, 2015 khan Ace Marksman Jitu Rai chu Sportperson of the Year in a puong a, Sports person of the Year Crown an khumtir. Milkha Singh chu Lifetime Achievement Award, Pankaj Advani Popular Choice Award, Malaika Goel chu Emerging Players Jury Award, Sanjita Chanu le Virat Kohli hai chu Popular Choice Award, Harmanpreet Kaur chu Cricketer of the Year Award inhlan le Youth Icon of the Year in Saina Nehwal puong a nih.

Left  Front in seats um po po an lak
Agartala:  May 3, 2015 a seats 28 umna Tripura Tribal Areas Autonomous District Council (TTADC) inthlangnaa chun seats um po po, seats 28 hai chu rorelna cheltu Left Front in an lak vawng. CPI(M) in seats 25, CPI, RSP le Forward Bloc (FB) han seat 1 seng an chang. TTADC hi January 1982 a inthawka Constitution Seven Schedule hnuoia um tan ta a nih.

An thla khat hlaw zatve  pek dingin
Gangtok: Nepal­a simkhawlei hrat takel an hning leia harsatna tuortuhai thangpuina dingin Sikkim CM, Ministers le MLAs hai chun an thla khat hlaw zatve seng thawlawm an ta, Sikkim sawrkar hnuoia thawktu han an ni khat hlaw seng thawlawm an tih tiin Sikkim CM Pawan Kumar Chamling chun a puonglang. Sawrkar thlungpui leh inrawntuoin Nepal­ah puonin, blanket, matress, tarpaulins, puonthuo le a dang dang hai thawn ning a tih tiin Chamling chun a hril.

Nun suolluinaa bultumtu tak man
Kolkata: March 14, 2015 nia Ranaghat, Nadia district hmuna Catholic nun kum 71­a upa suolluina le inzawma bultumtu taka intum  Ahidul Islam Babu chu zanikhan Sealdah railway station­ah  midang pakhat Milan Sarkar an tipa leh Criminal Investigation Department (CID) pawlin an man. Nun suolluina le inzawm hin tuta hma khan Police han mi 3­ Shaikh Salim, Gopal Sarkar le Mintu Shiekh hai an lo man ta bawk.

Saina Nehwal kuomah Rs. 25 lakh
New Delhi: All England Open Badminton Championship a final a kai lawmpuinain sawrkar thlungpui chun Saina Nehwal (25) chu Rs. 25 lakh a pek. Final inkhelnaah a khingpui Carolina Marin of Spain chu 21­16, 14­21, 7­21 in a hne tanaw a nih. Special Award  hi International Sports Events a medal lahai le an coaches hai pek hlak hrim a nih tiin Union Sports Ministry chun a hril.

UK Parliament Election­ah David Cameron pawl an hrat
London:  United Kingdom a Parliamentary Election a chun rorelna chel mektu Conservative Party chun House of Commons seats 650 umah seats 326 lain hratna an chang nawk. An PM  David Cameron chu India PM Narendra Modi in a lawmpui thu a thawn. Labour  Party in seats 231,  Scottish National Party in seats 56, LD in seats 8 le Independent in seat 1 an  chang.
    
UK a election a hin Scottish  National Party (SNP) candidate Mhairi Black chu thlangtling a ni ta a, kum 1667 a inthawka UK Parliament Eletion­a thlangtlinga um hai laia a naupang tak a la nih. Mhairi Black hi kum 20 mi chau a la nih.

---------------------------------------------------------------------------------------------------------------------
VAWISUN THUPUI
Kraws thu chu bohmang zinghai ta ding chun invetna a ni sih a, eini sandam zinghai ta ding ruok chun Pathien thilthawtheina a ni lem.  ­1 Korinth 1:18

Editorial:
Tu tu  haiin am an baw fuk ding chu maw!
Tulaia ei state a thu inlar le mihai titi tamna tak chu Manipur tlangram biela ADC paruk haia inthlangna ding thu a nih. Hi inthlangnaa ngir nuom hai ta dinga nomination file theina hun tawp hnung le scrutiny zo a ni zova Seats 144 inchu dinga candidates fe thleng zat chu 555 an ni a, hieng hai laia candidates 10 hai chu a khingtu uan um naw leiin khingtu um lova tlinga puong an ni ding a nih. Khingtu um lo hai laia mi 6 hai chu Congress candidates, pathum hai chu NPF candidate le pakhat dang chu BJP candidate an nih. Khingtu um lova an um elna san hi um nei a tih.
    
Tuta tuma candidates 555 um hai laia 121 hai chu BJP, 97 INC, 86NPF, Independent 231 le Others 4 an nih.  Manipur history a ding chun ADC inthalngnaa Independent candidate an tamna tak a la nih Khawvel pumpui huopa inthlangna um a Independent candidate an tamna tak a ni ngei khawm ring a um. Inthlangna hai hrim hrimah mi han Party ticket an  inchu sup sup laia Party ticket hnawla Independent candidate­a an ngir elna san khawm um ngei a tih. Mipui hriet chi a ninaw leia puonglang lova um niah ngai inla hadam tak a tih.
    
Deputy Chief Minister le MPCC President Gaikhangam chun, ADC election a hin Congress  Party chun seats um po po 144 haiah candidate an nei vawng a nuom a. Amiruokchu, vauna le hrat taka thawluitu an um leiin seat um po po haiah candidate an nei thei tanaw a nih tiin a hril. Congress thlawp le thangpui Independent candidate hai khawm hung hlawtling an ta, Congress party chun hlawtlingna le hratna hung chang tho a tih tiin a hril. Hi taka inthawk hin candidate­hai vautu le thawluitu  an um a, state sarwkar khawmin a hriet a, sienkhawm iengkhawm an law thei hri naw niin an lang.
    
BJP Manipur Pradesh President, Th. Chaoba chun, “Free and Fair  Election” a um phawt chun ADCs 6 haia inthlangna hung um dinga hin BJP in ‘absolute majority’ a chang ka beisei tiin a hril.  BJP Manipur Pradesh chun canidates 130 nei dingin a puong a. Amiruokchu, a tawpah seats 121 haiah candidate a hung neina san chu inthuoihmangna le inhnukdawk an um lei a nih tiin a hril. Ama thu hrila inthawk khawm hin candidate­hai vautu le thawluitu an um a nih ti chu chieng taka hriet thei a nih. Pu Gaikhangam le Pu Th. Chaoba hai thu hril haia inthawk hin chu ADC election hung um dinga hin ‘free and fair election’ a hung um thei dim maw? ti chu mihai lungril le ngaituona a um a nih.
    
ADC election hung um dinga hin tuhai  haiin am an baw fuk ding ti chu hunin a la hung hril ding a nih. Independent candidate a ngir han an baw fuk  am ti le Party tum tum ticket laa candidate han an thil baw hi an baw fuk le fuk naw chu election nei zo le vote tiem zo a ni pha leh ei hung hriet thei chau ding a nih. Baw fuk le baw fuk naw inkar hi hla takel a nih. A bawfu han sawrkarna siemin nina hung chang an ta, a bawfu lo hai chan ding chu inhnar um lo takel a ni ding a nih.
    
Baw fuk tumin candidate thenkhat chun Pastor le Kohran Upa hai meu kovin tawngtaina meu leh hlawtlingna chang dingin hnina an nei tawl ti ei hriet. A tha ie, sienkhawm, election huna le vote thlak huna thangpuina ei hnipa kha hriefuin thuneina ei inchangtir nuom dim chu maw? ti h i ngaituo tham a tling a nih. Election huna hin a tak takin ei Pathien hin lalna chang sienla nuom a um hle.  Anachu a chang zo dim chu maw! A tha le an dik ei dit, sienkhawm ei thaw nuom sinaw chu a ni hi!







Post a Comment

Powered by Blogger.