Tuolsung:
Free Dental Camp an huoihawt nawk
CCPur:  JC Dental Care chun zani May 14, 2015, 6:00AM a inthawk khan Thenmuol Lal in­ah ‘Oral Hygiene’ le inzawmin Free Dendal Camp an huoihawt nawk. Hi huna hin JC Dental Care neitu  Dr Deborah Sangi le Dr Helhing han mi 89 hai chu an ha hriselna an enfel bakah Tootpaste, Tootbrush le damdawi hai a thlawnin an sem. Hi huna hin JC Dental Care­a Assistant sinthaw Nk. Hrieti chun Ha enkawl dan chungthuah mipui hai hrilhrietna a nei.
          
  
JC Dental Care chun May 7, 2015 khawm khan Ngurte khuoah hiengang Free Dental Camp an lo huoihawt ta bawk. Hmatieng peia khawm hmun tum tum haiah hiengang Free Dental Camp hi la huoihawt pei an tum thu Dr Sangi  chun a hril a, Oral Hygiene pawimawzie mipui han hriea mipuiin ha enkawl that pawimaw zie an hriet theina dinga hiengang camp hi buotsai a ni thu a hril.

Senior Scale a inkaisangtir
CCPur:  Hautinlal, IAAS, s/o  S. Minlianthang Vaiphei of S. Kotlian, Adhoc Deputy Accountant General (DAG), Mizoram sin chel lai mek chu Senior Scale a inkaisangtir a ni le inruolin CAG of India a intahwk full­fledged Deputy Accountant General, Mizoram ni ta dingin Order an suo. Ama hi  2010 batch IAAS Officer a nih. A kaisangna hi ei Chanchinbu chun a lawmpui hle.

Review meeting  nei ding
CCPur:  May 18, 2015, 11:00AM khin CMO Mini Conference Hall­ah NHM programme implementation le inzawmin Block tina CHC/PHC haia Block Program Managers, Block Data Managers le Block Finance Managers han review meeting nei an tih. Hi huna hin BPMU le DPMU hai chu thang seng dinga inhriettir an nih. Review meeting huna hin PFMS implementation, Block Progam Accounts Opening, Protocol Administrative Setup, MCTS/FMR reporting/DBT issues/audit, HBNC, le monthly review meeting hun chungthu hai ennawn le hriltlang ning a tih.

Zogam Today 4th Anniversary
CCPUR: May 14, 2015, 2:00PM khan Zogal Memorial Hall, Zoveng, CCPur­ah Zou tawnga suok nitin chanchinbu Zogam Today 4th Anniversary­cum Live Concert of Zogam Today’ hmang a nih. Hi huna hin Pu Chinlunthang, President, UZO HQ le W. Shyamjai, President, AMWJU hai khawmin an uop ve bakah Ratankumar, Vice President, AMWJU khawm thangin thuhrilna a nei ve. Rev.  Khamchinkhai, bieltu Pastor, Central  District ZPCS chun Zogam Today staff hai ta dinga tawngtaipekna a nei.

Sielmat hin Hmar Martyrs Trophy Third Place
CCPur: Hmar Martyrs Trophy, 2015 khel mekah zanikhan Lenlai FC le Sielmat in thiemtak pathumna inchuin an inkhel a, Sielmat chun Lenlai FC chu 3­1 a hnein Sielmat chun 12th Hmar Martyrs Trophy, 2015 ‘Third Place’ title an lak. Third Place hin lawmmanin Rs. 20,000/­ le a palina Lenlai in lawmmanin Rs. 10,000/­ an dawng. May 16, 2015 nia Martyrs Day hunpui tak hmang huna Hill Town FC le LSC han 12th Hmar Martyrs Trophy, 2015 Final inkhel an tih.

Lucky draw book 3 an hmang
CCPur:  Independent  Church of India (ICI) Tuithaphai Presbytery Musical Society in Lucky Draw an siem Book No. 138 (Sl. No. 6851­6900) le Book No. 140 (Sl. No.6951­7000) ke Book No. 142 (Sl. No. 7051­7100) hai chu a chin hriet lovin an hmang a. Hieng Book number hai inkar sunga Sl. No.  nei Lucky Draw ticket  hai  a hung zawrtu an um a ni khawmin tukhawm a lo inchaw lo dingin ICI, Tuithaphai Presbytery Musical Society chun inhriettirna an siem.

MDC candidate tum tumin Office an hawng
CCPUR: Zani 7AM khan 12­Lanva DCC a Independent candidate S. Kapkhanmuan Central Office hawngna nei a ni a, zani 7AM ma khan 12­Lanva DCC a Independent candidate T. Khaikhomang Election office hawngna nei a ni a, zani 10AM khan New Boljang hmuna 13­Kholmun DCC biela INC candidate Khaipao Haokip Election office hawng a ni bakah zani 1PM khan 14­Tuibuong DCC  biela INC candidate Pu Ngamhao Touthang Election office hawngna  nei a ni bawk.


Headline:
HSLC Examination, 2015 result puong; a pumpuia pass percentage 61.53 a nih
Imphal:  Board of Secondary Education Manipur (BSEM) hnuoia HSLC (Class X) Examination, 2015 result chu zanikhan puonglang a ni tah. Canidates 34831 an um a, hienghai laia 34460 an exam a, an rengin 21225 an passed. First division­ah 6680,  Second division­ah mi 12951 le Third Division­ah mi 1594 an passed. A pumpuia pass percentage 61.52 a nih. Kum 2014 a pass percentage 68 a ni a, kum 4 sunga  Pass percentage inhnuoi tak tum a nih. Churachandpur District­ah candidates 3314 an exam a, 2002 an passed.
    
Districtwise pass percentage chu, pakhatna Tamenglong District an ni a, an pass percentage (PC) 82.39; pahnina Thoubal district 71.48%; pathumna Imphal West 64.16; palina Bishnupur 61.03; pangana Churachandpur 60.41; parukna Imphal East 56.39; pasarina Ukhrul 56.19; parietna  Chandel 53.88; le pakuona Senapati 50.44% an nih.
    
A pakhatnaa inthawka sawmhnipangana (top 25 position holders) hai lai tribal pahni an inlang phak tawk a, chuonghai chu M. Thangminlal Haokip, Children’s Training School, Langol (11th Position) le Sochanna Machinao, Tiny Tots Unique School, Imphal (12th Position) hai an nih.
            
Lisha Lallungawikim
Hmar MIL a mark hmu insang tak chu Lisha Lallungawikim d/o LTS Daniel Khawbung of Little Flower School, Imphal a ni a, marks 100­ah 98 a hmu. Lisha hi a kaina Little Flower School­ah MIL(Hmar) hotu a nei naw a, Term test  nei chang khawm School danga hotuhai question an siem tir hlak niin ei thu dawngna chun a hril. Anni hi lekhathiem thei tak sungkuo an ni a, subject po poah marks 401 a hmu phak. A unu Maryjone Laltlanmawi khawmin kum 2003 khan HL Ngura Award a lo dawng ta a nih. Paite ah H. Siamminlun, Ebenezer Academy, CCPur in marks 93; Thandou­Kuki ah Paominlal Mate, St. Joseph’s H/S, Sugnu in marks 97, Mizo­ah Lalhlimum le Malsawmzuali, Don Bosco H/S, CCPur a kai ve ve niin marks 88 ve ve an hmu; Zou ah Niangngaihlun, Chinkham Modern H/S, CCPur in marks  94; Vaiphei­ah Ch. Muanlem Vaiphei, Don  Bosco H/S, CCPur; Elvin Genlianthang, Don Bosco H/S, CCPur; Jenny Nianglemhoi Vaiphei, Don Bosco H/S, CCPur le  Millerose Hoisangkim, Young Learner’s School, CCPur hai niin marks 98 seng an hmu tawl.        



Langjing le Keithelmanbi inkarah Curfew: motor 5 rawsiet
Imphal: SoO zieknaa thang ve KRF in pasal 2 an thatna le pasal naupang kum 12 mi  na taka an vuok hliemna le inzawma  mipui lungsen leia buoina nasa lem a suok ding laka invengnain District Magistrate, Imphal West chun  hun tiemchin um lovin zani hmasaa inthawk khan NH­37 (Imphal­Jiribam Road) a Langjing le Keithelmanbi inkarah Curfew a puong. Curfew puong nisienkhawm JAC Against the Brutal killing of M. Dayananda and M. Premananda and inhuman torture of K. Bishal chun zanikhan Patsoi Area­ah bandh  an thaw a, motor ke 4 nei 5 an raw siet. Motor rawsieta um hai lai Bolero MN04A­7803; Maruti SN Diva Car, DI Tata mini Truck, Maruti Gypsy le Tata Truck hai a thang niin ei thu dawngna chun a hril.

Manipur pumpui huopin darkar 24  General Strike
Imphal: Kuki Revolutionary Front (KRF) in M. Dayananda le M. Premananda hai nunrawng taka  an that le K. Bishal (12) na taka an vuok hliem le inzawma indin JAC chun zani zanrila inthawk May 15, 2015 zanril chen, Darkar 24 sung aw ding Manipur pumpui huopin General Strike an thaw tan. KRA le SoO zieka um hlip ding le tuolthattuhai ni 2 sunga man le an kuta pesuok dingin JAC chun state sawrkar an ngen.

Cabinet meeting nei a nih
Imphal:  Tulaia Manipur­a Law & Order ngirhmun le inzawmin zanikhan CM O.Ibobi Singh inrawinain Cabinet meeting an nei. Cabinet meeting chun KRF in pasal 2 an that sunghai kuomah zangnadawmna  Rs. 5,00,000 seng pek ding le hi thil le inzawma hliem inrik tuorhai thangpuina Rs. 1,00,000 seng le hliem inriklo hai Rs. 20,000 seng pek dingin an rel. CM chun Sakhuo le hnam hming sala buoina siem lo dingin Manipur mipuihai a ngen.

Certificate­cum­Marksheet May 18 a inthawk
Imphal: Board of Secondary Education Manipur (BSEM) chun HSLC Examination, 2015 a pasihai ta dingin Provisional Certificate­cum­Marksheet chu May 18, 2015 a inthawk a peksuok tan ding thu, hi thil lakna ding hin Rs. 500+Rs. 50 (Application form man) pek a tul ding thu, School hai chu Certificate­cum­Marksheet hi May 27, 2015 a intahwk an peksuok tan ding thu, Answer Scripts re­examining thaw nuom han result suoka intahwk ni 20 sungin Rs. 400 pein thaw thei an ta, Subject pakhata failed hai Compartmental examination­ah ‘hang thei an ta, a faile hai chu kum tharah external candidates in exam thei an ta, regular candidate anga re­admit  thei ninaw ni a, Compartmental exam form fill up a ngai naw a, mani school chitah examination fee peka exam thei le exam fee hi June 6, 2015 chen Board­ah pek thei a nih tiin BSEM chun inhriettirna a siem.

Admission thawna dingin Entrance Test
Imphal: Class ­XI Admission thawna ding le inzawmin May 25, 2015 khin Imphal khawpui sunga Government Higher Secondary Schools 8 haiah Joint Entrance Test Examination buotsai ning a tih tiin  Manipur Education Minister M. Okendro chun a hril. Kum thar tienga chun District Headquarters tinah hiengang test hi huoihawt tu m a nih tiin Mr M. Okendro chun a hril.

HSA Imphal in Admission Help Desk
Imphal: DM College, Imphal­a B.Sc., BA, B.Com . 1st Year admission thaw nuom hai ta dingin HSA Imphal Joint Hqrts. Le HSA DM College Unit chun DM College hmuna Admission Help Desk  a hawng. Admission thaw nuom hai chun Office kai hun sungin May 15, 2015­ June 6, 2015, 10:30AM ­3:00PM inkar sungin College Office­ah Rs. 300/­ le internet­a Marksheet chawia lak thei ning a tih tiin HSA Imphal Jt. Hqrts. chun inhriettirna a siem.
    
Etrance Test  June 12, 2015 in u m a tih. Cut off marks Science­ah ST hai ta dingin 55% le Arts­ah ST hai ta dingin 45% a nih.
            
Thu chieng lem hre nuom han Arts­ah #9856823184, Science­ah # 9089590582 le Commerce­a dingin #8131052716  haiah contact thei ning a tih tiin HSA Imphal Jt. Hqrts  chun inhriettirna a siem.

MSW  le Pol. Sc. Admission hun
Imphal:  Kum 2015­16 Academic Session sunga Indira Gandhi National Tribal University, Regional Campus, Manipur a Master of Social Work (MSW) le  Political Science a MA Admission thaw nuomhai ta dingin May 18, 2015 chenin online/offline a admission thaw thei a nih. Admission Form Rs. 50/­ (ST/SC Rs. 30) pein hi University a hin Office hours  sungin lak thei a nih. Thu chieng lem www.igntu.nic.in ah hriet thei a nih.

Aribam Syam kuomah Award inhlan
Imphal: Zanikhan Film Forum Manipur (FFM) chun Manipur State Film Development Society (MSFDS), Konung Mamang, Imphal hmuna an pawl champha vawi 43­na an hmang. Hi huna hin  Manipur CM O. Ibobi Singh chun Manipur film siemtu Aribam Syam kuomah chawimawina Award sumfai Rs. 1,0,1000; Memento Rs. 10,000 manhu le Shawl an hlan. Manipur Cinema­a a thaw hlawk leia hi chawimawina hi inhlan a nih.

AFSPA thuah CPI in rally an nei
Imphal: Manipur state­a inthawk Armed Forces Special Powers Act (AFSPA) hlip dinga ngennain zanikhan Manipur State CPI le All Manipur Nupi Marup chun Imphal khawpui sungah rally an nei. AFSPA hlip ding baka hin Manipur integrity venghim ding, Food security Bill hmang ding le a dang dang hai ngennaa rally hi an nei a nih.

Others:
HPC(D) hotu 4 manna ding Order insuo
Aizawl: Zani hmasa khan Chief Judicial Magistrate Court, Aizawl District chun HPC(D) hotu 4, H. Zosangbera, Biaknunga, Alex J.S. Hmar le L.S. Hmar hai manna ding Order an suo. April 16, 2015 a Mizoram Police han an man HPC(D) Army Chief, Lalropuia Famhoite, Finance Secretary Norbar Sanate le Pvt. Ngurthantluanga Sanate hai chu CJM Court­ah inlangtir anni a, sienkhawm Police han Chargesheet an lak peklut naw leiin an thu buoi ngaituo lovin Central Jail­ah sielut nawk an nih tiin ei thu dawngna chun a zieklang.

A pasal chemin a sat hlum
Aizawl: May 13, 2015 khan Kority alias Biaki (25) of Mualthuam Village, Mamit district, Mizoram chun a pasal Ram Mohan chu an lo tu sungah Chempuiin a sat hlum. A ringah  chema atna be hmu a ni bawk. Koriti hi Police han an man  a, vawisun hin Court hmaah inlangtir ning a tih.

Agartala­Dhaka  Bus Service
Agartala: May 15, 2015 a inthawk hin Tripura Road Transport Corporation (TRTC) chun  Agartala­Dhaka Bus Service sunzawm nawk tang a tih. Zani hmasaa intahwk khawm khan Dhaka­Agartala  Bus service chu sunzawm nawk a ni tah. Haptakar tin service hlak a tih. Agartala­Dhaka (Maitree Bus Service) hi thawtanni le  Zirtawpni zatin fe hlak a ta, Dhaka­Agartala (Shyamali  Bus Service ) chu Thawleni le Inrinni haiah fe hlak a tih. Bus chuongman hi mi pakhatah Rs. 180 a nih.

Rangkachak Rs. 1.75 crore manhu leh mi 2 man
Kozhikode: May 12, 2015 khan Dubai a inthawka hung vuong, Oman Airlines passenger 2 hai chu Karipur International  Airport, Kozhikode, Kerala  an hungtlung hnungin Customs personnel han rangkachak kg. 7,  Rs. 1.75 crore manhu leh an man niin S.P. Shyam Sunder, Assistant Commissioner (Air Customs Intelligence) chun a hril. Mana um hai chu Dipali Vijay Maskar (39) of Mumbai le  Hissinar of Thailangadi hai an nih.

Thiemnaw inchangtir hnung mi 2 a thisaa hmu
New Delhi: Court in thiemnaw an changtir tasa ve ve, Tihar Jail a intang mek  Ritesh Mittal @  Shalu (32) le Amit Panda (26) hai chu zani zingkar khan a thisaa hmu an nih. An pahni hin Jail No. 2 a Ward No. 8­9 a um an nih. Ritesh hi tuolthatna case a  damsung lungin intang dinga Court in thiemnaw an changtir ta hnung a nih. An pahni hin drug hipa inthat an nih tiin Doctor han an hril. May 11, 2015 ni khawm khan hi Jail a intang Ajay (40) chu an tangpui pasal 3 han an lo sun hlum ta bawk.

Rural Bank rawktu man a nih
Itanagar:  May 12, 2015 zan khan December 5, 2013 a  Arunachal Pradesh Rural Bank, Ganga Branch, Itanagar rawktuhai laia a thuoitu tak Gichik Tachung (28) of Lengdik village, Kradaadi district chu Police han Songlo­3 Village ah an man a, a kuta inthawk tuolsuok  Pistol 3 le a mu 33 zet  hmu a nih tiin Techi Honyir, SDPO, Itanagar chun a hril.

Ruotui  lo sekkhawl tha seng dingin
New Delhi:  El Nino weather pattern leiin tuta kum fe mek sunga fur huna hin ruotui a tla tlawm ding nia Met Office in an hrillawk leiin Union  Rural Development Ministry chun States le Union Territories tina sawrkar hai chu  van ruotui tha taka lo sekkhawl seng dingin thurawn a pek tawl. Fur ruotui tla inkhawlna ding hin rural job scheme Mahatma  Gandhi National Rural Employment  Guarantee Act (MNREGA) sinthawnaa lo hmang dingin Union Rural Development Ministry chun an hriettir tawl bawk.

CVC le VC ruotna fepui pei dingin
New Delhi:  Supreme  Court chun Chief  Vigilance Commissioner (CVC) le Vigilance  Commissioner (VC) ruotna (appointment) chu fepui pei dingin sawrkar thlungpui an hriettir. CVC, Pradeep Kumar Vigilance Commissioner, J.M. Garg hai chu September 1, 2014 a kha an sin haia inthawka pension ta anni a, hieng sinhai hi thla 9 deuthaw a ruoka um ta an nih.

Red Sanders Rs. 4 crore manhu man
Gurgaon: May 12, 2015 zan khan Police han Jharsa Chowk Flyover ah mini­truck le  SUV sukchawlin an dap a, red Sanders kg. 2,700, Rs. 4 crore manhu an dapdawk a, mini truck le SUV motor a chuong mi 4 hai leh an man a, FIR an registered khum.

New Delhi­ah mi 2 kap hlum an nih
New Delhi: Zani zingkar khan Ranjit Nagar, New Delhi­ah pasal 2, Ram Charan le Lakhan Lal hai chu tu ti hrietlo han an kap hlum. Hieng pasal pahnihai hi dawrkai ve ve an nih. Pasal 3 hai chu hi lai hmuna hin an va fe a, Pistol phawrdawkin Ram le Lal hai hi an kap hlum el niin mita hmutuhai chun an hril. Police chun mimal intheidana leia hi thil hi a tlung ni dinga an ringhla thu an hril.

PM, President le CJ hai thlalak chau
New Delhi: Sawrkarin print media haia sawrkar advertisements an suo haiah Prime Minister, President le Chief Justice of India (CJ) hai thlalak chau inchuon phal ning a ta, politicians danghai thlalak inchuon phal ni tang a tih. Chief Minsiters le Governors hai thlalak khawm inchuon a ni tanawh tiin zani hmasa khan Supreme Court in a rel.

Nepal­ah Simkhawlei an hning nawk
Kathmandu: Zanikhan Nepal­ah simkhawlei vawinga zet an hning nawk. May 12, 2015 nia Nepal­a Simkhawlei inhning nawk leia mihriem thina tuok khawm 107 le hliem 2563 an tling ta bakah April 25, 2015 a richter scale 7.9 a hrata simkhawlei an hning leia mihriem thina tuok chu 8,151 le hliem 17,861 an tling ta niin Home Ministry, Nepal thusuok chun a hril.

Kabul Guest House run, mi 14 an thi
Kabul: Zani hmasa zan khan Kabul Guest House helpawl han an run a, mi 14 an thi a, thihai lai hin India mi 4 an thangsa. India mi 4 hai  laia 2 Auditors, 1 consultant le pakhat dang NGO volunteer a nih tiin Kabul ­a Indian Embassy official thusuok chun a hril. Taliban helpawlhai chun hi thil hi anni pawl thaw niin an hri. Hi thil tlung hi Afghanistan President Ashraf Ghani chun pawi a ti thu le mithi sunghai a tuorpui thu a hril.
----------------------------------------------------------------------------------------------------------------
VAWISUN THUPUI
Lalpa chu mi lunginsiet thei, lainatnaa sip, Lunginuoi, ngilneina nasatak nei a nih. Lalpa chu iengkim chunga khawm a tha a nih; A lainatnahai chu a thil siem po po chungah a um a. ­ Sâm 145:8­9

Editorial:
Inmamawtawn seng ei nih
Mihriem hi mani khata um le khawsa thei ei um der nawh ti chu a hrietu seng ei nih. Hi lei tak hi ning a tih siemtu Pathien khawmin Adam khan ama khat chauva a um le a khawsa tha a ti naw a, a umpui dingin nuhmei Evi kha a siem. Intipa em em el hai khawm nuhmei bovin an khawsa thei naw leiin an khawsakpui dingin nuhmei an nei ve tho hlak. An khata khawsa thei le um thei nihai sienla chu nuhmei an uksak ring a um nawh. Mihriemhai hi a chang chun mania um hran nuomna lungril ei put hlak. Hi hi mihriem mizie a nih. Nisienlakhawm, chu chu tukhawma ei thei der si lo a nih. Ramsa, Vate le rannung hai chen hi inmamaw  le inringtawn dinga khuonu siem ei nih.
    
Nauhai khawm an chin lai chun nu le pa hai chawm le enkawl anni a, an hung inthanglien pei a, puitling an hung ni huna chun nu le pa hai thangpuia enkawltu an hung ni hlak. Hi lei tak hin nu le pa hai chun nauhai hi an nei bak, an thei bak le mihai pawisa chen a pung um khawm huomin a neihai ta chu an nau le te hai enkawl puitlingna dingin an pukin an bat ngam hlak. Nauhai le nu le pahai inmamawtawnna hi thil mei mei a ninaw a, thil ropui le hlu takel a nih.
    
Khawvela mihausa le mithiem, milien le milal hai khawm hi an khata khawsa thei anni bik nawh. Chuongang bawkin mirethei le mimawl hai khawm an khata khawsa thei anni bik nawh. Inmamawtawn le inthangpuitawn  seng ei nih. Hi lei hin inhmusit, insel inhal, intheida, inhmelma le insukse thei ding ei ni nawh. Inrem tlang taka khawsa chu a mi siemtu Pathien dit  dan a nih. Ienganga ram hausa le changkang, thil thaw thei tak le powerful khawm nihai sienla, rambung dang hai le thangruol lo chun an khawsa thei bik chuong nawh. Hi lei tak hin rambung tinin foreign policy a hran sengin an nei hlak. Hilei hin rambung tinin foreign policy chu an ngaipawimaw seng hlak.
   
Mi chu a ma ta ding chauva hring a ninaw a; a chengpuihai ta ding khawma hring a ni ve tlat. A hring san, a nina indik taka hmang ding lem chun, mi po po ta dinga hring a nina lai a um. Mihriem nina tobul a inthawka an lak hran tlat lem chun, a hausakna hnar le a hring theina hnar a sukchat ni ringawt a tih. Mani kein ngir thei ngei ei tih; nisienlakhawm ei ngir theina  kha mani nu le pahai annawleh mi thangpuituhai lei a ni tlat. Nghaisan bovin ei ngir thei nawh. Mi chapo, tukhawm mamaw lova inngai chu, ama le ama an hlem a nih.
    
Hotu le Siehlaw khawm inmamawtawn tlat dingin Pathienin a siem tlat a nih. Chuongang pei chun ei nina hran hrana hin hang insut chieng inla, inmamawtawn vawng ei lo nih. Sungkuoa khawm member tin hai ei inmamawtawn seng a, ei inkamtuo vawng bawk a nih. Taksa peng hran hran han duty tum tum an nei a, taksa pumkhata an inthlungkhawm ang chie hi a nih. Chuongang peiin thenum khawveng, ram le hnam, kohran pawl tum tuma ei umnaa hai khawm hin ei inmamawtawn seng a nih.
            
Hmasawnna siemna dingin pawl sunga mitin, pawl le pawl inmamawtawnna dam, inkhikinkhal um lova, inkamtuotawn a tul bek bek a nih. Pawl thangruolhai inmamawtawnna hriet fuk lo leiin sawrkar le  ram ropui tak tak tluse nawk ta an tam tah. Ram ropui takhai khawm chuonganga an tluse chun ram chite rek rek hai lem chu an tluse inrang hle ring a um. Lal Isu hin a lo hril indik khawp el.   Sungkuo mani le mani indo hlak hai, ram le ram mani le mani indo taphawt ngirsuok naw nihai a ti hi ram le hnam, Kohan, khawtlang le Pawl tum tum enkawlna dinga hriet zing tha hleng a tih.


Post a Comment

Powered by Blogger.