Sakawrdai, Sinlung Hills::10/5/15: Tarik 8, May,2015 ni a rawngtak le danlo taka MAP haiin Tieulien khuoa an that Sergeant Malsawmkima HPC (D) ruong chu zani Aizawl Civil Hospitalah Post-mortem thaw ani hnungin vawisun chawhnung dar 1:00 khan Sakawrdai thlanmuolah roputaka vui liem a nih.

Post mortem thaw ani hnung hin Pastor Darchhawna, Thuompui Biel UPC NE chun inthlana tawngtaina neiin hnam thuoitu le mi tlawmngai le sung le kuo mi 40 bawr in mawtawr panga le two wheeler iemanizatin Aizawl anthawkin zani zan dar 8 khan a umna khuo Sakawrdai an panpui a nih.

Sinlung Hills lutna Gate a hin hnam thuoitu hai, sung le kuo le lainatu haiin ropui takin thangsuopuon le lo tuok a ni a, Sinlung Hills khuo tinah ama hi lo tuokin Thangsuopuon loin khum a ni bawk. Malsawmkima thina hin Hnampui khawm a hne hle a, Sakawrdai khuo daiah mipui sangtelin an lo tuok a, nunghak - tlangval tamtak lungril keitho in taphla le hlado an in zawt a, lungphang naw rawh keini khawm tamtak hnam ta ding hin kan la um a, i sulhnung zui ding hi tamtak kan um a nih tiin nasatakin an sun in an tuor nat thu hai an kheksuok pui a nih.

Sakawrdai hi zingkar dar 6:00 in tlungpui a ni a, an inah a pa Pu HC Kapthianga hin a naupa ruong hi alo dawngsawng a, hun tawite hunser nei ani zoin, sunpuina lengkhawm nei tan nghal a nih. Mipui lungril nasatakin a thawnga, Sakawrdai hnai khuo le venghai chu sun ding le tuorpui dingin an hung khawm tawl bawk a nih.

Chawhnung dar 1:00 khan Mihrang Pu Malsawmkima chu ropuitaka Sakawrdai thlanmuolah Hnam ta dinga Martyr vuiin Pastor Vanlalpeka Zote in alo vui liem tah. Sinlung Hills mipui le hnam chun an tuor nasa hle a, mihrang pasaltha fam chang hin vangkhuo a ngui a, nasatakin hnam a suk har thung a nih tiin ei palai chun a hril.

(Thlalak hai chu nakie tieng hung upload tum a nih)





Post a Comment

Powered by Blogger.