LOCAL NEWS:
OC hmalaknain motor iemanizat hmukir a nih
CCPUR:  Mr MA Salam, OC, CCPur Police Station  le a rawi hai hmalaknain March 23, 2015 khan khawpui sunga motor chin (two wheeler) inrukhmang iemanizat hmukir an nih.
   
Ei thu dawngnain a hril danin  March 20, 2015  khan Saikot area­ah  motor inruk ding zawnga invak an um ti repor a um dungzuiin Police team chu a hmuna fein hmun tum tum an dap kuol a,  chu huna Honda Aviator Registration umlo pakhat chu ringhla leiin an hrentang a. Hi motor khaltu  thu indawnna an nei huna motor inruk ding zawnga invak pakhat  man a ni a,  an puongnaa inthawk motor chin  (Honda Activa)  dang pathum le  cycle rickshaw  pakhat   hai chu zani zingkar hmun hran hrana va hmukir an ni. Activa pakhat  Leijangphai area­a hmu a ni a, a dang pakhat M.  Tampak, CCPur –Sugnu border a hmu nawk  niin ei thu dawngna chun a hril.  Motor  inhmang hmukir­a  um hai laia pakhat chu  nikum (2014) a inrukhmang  a ni a, a dang pathum hai chu  tukum  February thla vela inrukhmang, pakhat a rawng var (white) chu a rawng dum (black) in an lo thlakthleng hman. Motor hmukir­a um  hai hi an hmang hun  Police station­a record a ni leiin a neitu  zawngdawk a awlsam pha hle  ding a nih. Hi lei hin hienganga motor inrukhmang hai chun an rang thei anga Police­a report  pe  hlak dingin CCPur Police chun ngenna an siem.  Hieng motor hmukir­a um hai le mi man pahni (2) hai chu case siem khum an ni bakah  ni 5 sung Police Custody­a la um phawt dinga  ti an nih.
               
Motor hmukir­a um hai laia  Activa ML05K­3691 March 1, 2015, 10AM vela District Hospital, CCPur compound sunga  inthawka inhmang le March 18, 2015, 1:30PM vela Zion Veng, New Lamka­a Bajaj Avenger (Blue Color) MN02A­7689  hai a thang.

DC in  Free Uniform a sem
CCPUR: Lunminthang Haokip, IAS, DC/CCPur chun zani  9:30AM khan  Ngathal­a SSPP Residential School­a student  hai kuomah  free uniform  a sem.  Thuhrilna a nei huna DC CCPur chun, tulai khawvela dingin  lekhathiem chau ni lovin saptawng (English) thiem a pawimaw  tia hrilin student hai chu English tha taka inchukthiem dingin an fui. Hlawtlingna dingin  tumru taka lekha inchuk a pawimaw, mi hausa hai nekin  mi pasie le rethei hai  lai khawvela mi hlawtling  an tam lem, hi lei hin  khawsakna kawnga ei harsat leia inngaihnuoi ding ei ni nawh tiin a hril a, student hai chu hotu le nu le pa hai inza tak le Pathien hre zing puma lekha inchuk ding le  Bible tiem hlak dingin an fui.



SP CCPur  inthlana hunser  hmang
CCPUR:  SP, Senapati  sin chel dinga sawn  K. Kabib, IPS, SP, CCPur chu zanikhan  SP CCPur Office campus, Tuibuong­ah CCPur Police  Department in inthlana hunser an hmang a, thilpek chi tum tum an inhlan.
 
Hi huna K.Kabib, IPS in thu a hrilnaa chun, IPS a hmu hnunga a posting­na hmasa tak CCPur a ni thu a hril a. CCPur­a a hung posting hmasatak tum­a SDPO/CCPUr a chel laiin CCPur district police sukhratna dinga a ngaituo points 30 vel a ziekdawk hai  sukpuitling theia a umna thuah sawrkar chunga lawmthu a hril a. SP/CCPur a  chel sunga a sinthawpui VDF han tha taka an thlawpna thuah lawmthu a hril a, SP  thar khawm tha taka lo thlawp dingin a ngen.  SP CCPur a chel sungin  SP Office renovation thaw a ni bakah VDF hai kitchen le dining hall ding VDF barrack bawl a ni  thu hrilin hi thil a puitling thei nasan chu VDF le police hai thangruolna lei a nih tiin a hril.  Quick Response team indina zan hun bakah Hospital­a police an thaw hlak leiin motor inrukna bakah hnam thila buoina suok thei ding tam tak pumpel a nih tiin a hril.

DLCC meeting with Dr Ginlianlal Buhril
CCPUR:  March 26, 2015, 11:00AM khin  Mr Lunminthang Haokip, DC, CCPur inrawinain  DC Office­a  BRGF Resource Centre­ah  District Level Officers (DLOs) meeting with Dr Ginlianlal Buhril, Director, Institute of Business Studies & Research, Mumbai  um a tih. Hi huna hin DLOs hai chu kim taka thang dingin DC in an hriettir.

Foundation for Manipur  Scholarship form
CCPUR:    Government, Aided le Private Schools­ haia Academic Session 2015 fe meka Class VI  inchuklai (reading)  nei  Head of institutions hai chu  March 28, 2015 chenah  Foundation  Manipur Scholarship Initiative form a kuoma la dingin Mr Khaikhanlian Guite, Deputy Inspector of Schools,  CCPur Block chun inhriettirna a siem.

Dr Lalmalsawm Pulamte in   Parbung CHC a zawm
PARBUNG:  Dr Lalmalsawm Pulamte s/o Mr Lalropui Pulamte of Rengkai chun  March 21, 2015 khan   Community Health Centre (CHC), Parbung­a  Doctor sin thaw dingin a zawm.  Dr Lalmalsawm hi  kum 2014­a  Guwahati Medical College­a inthawka MBBS zo thar a ni  a.  Pathienin a kut hmanga Hmarbiel –a damnaw  um han damna an chang theina ding le buoina  um  lova hriselna tha tak neia a sin ringum taka a thaw theina dingin  March 23, 2015 khan Rev. Lalthakung, Director, Evangelism, WMCEI   chun tawng­taipekna a nei.  Hi huna hin  Pu Danielthang  V/A Chairman inrawinain lawmlutna le thingpui dawnpuina nei a ni a, ringum  le tlawmngai taka a sin thaw ding le a sinthawna tha taka an thlawp ding thu V/A hmingin Dr Lalmalsawm hi ngen a nih.
   
Hieng laizing hin January 8, 2015­a Parbung Convention hun laia   Parbung CHC a hmang ding Ambulance thar hlawk suklanga um chu,  Registration la thaw lo a ni leia Registration thaw ding tia Tuithaphai (CCPur) tienga  la hang kai vak dinga ti chu tuchen hin   a hmel hmu nawk a la ninaw a,  hi thua hin Parbung CHC a thawk hai chun  iengkhawm hriet an neinaw thu an hril.  Mipui hmakhuo ngaia,  CCPur­a um hai chu hung suizui  dingin  biel mipui han an ngen.  Parbung Hospital hi Hmarbiel­a  hospital function umsun a ni a, chu khawm chu nikhat/nihni dam Doctor umnaw  (inthleng kar lak) changa  khawdanga inthawk damnaw inrik tak tak  motor hmang ding neinaw sa saa hung han doctor an tuokfuk naw chang a um  hlak leiin lainat an um thei hle.

Thawro ! bei a bei ta laklaw, ram­le­hnam hmangai tak taka tlawmngai insuo  rau rau tahai  ei Pu (Sitting MLA) rawi in hma la nasa nawk zuol ei tiu. Lalnunthang Songate, Parbung

KCP(MTF) cardre 1 man
CCPUR:  Police­a inthawk ei thu dawngnain a hril danin March 20, 2015, 1:20AM vel khan 25­Madras Regiment, Khuga Dam­a um han New  Bazar area­ah KCP (MTF) cadre Maibam Suresh @ Khebim (25) s/o M. Deben Singh of Mayang Imphal West  an man. Mana um pa hi Imphal Police kuta an peklut hnungin CCPur Police han case lasawngin  FIR No. 22(3) 2015 CCP­PS U/S 20 UA (P) Act  an registered bakah Chief Judicial Magistrate (CJM), CCPur hmaah inlangtir a ni  a,CJM chun March 25, 2015 chen Police custody­a la um phawt dingin a rel.

EM in Public Toilet le Urinal a hawng
CCPUR:  BRGF 2014­15 sum hmanga  Simveng­a Simte Inn­a  Public Toilet le Public Urinal  bawla um chu zani 7:30AM khan  M. Gouzamang Guite, EM/ADC in a hawng a, Pastor Chinkhangen, NTBC, Simveng in Pathien kuoma  tawngtainain an hlan. Thil hrim hrim a  bul ei tan phawt phawt chun a back­up tu ding a hung um hlak, a sum hi Publi Urinal  bawlna dinga sanction a ni laiin  Toilet khawm bawl saa a umna thuah lawmum a ti thu M. Gouzamang  Guite chun a hril.

Manmasi YB   in ISSN
CCPUR: Manmasi Year Book  le Manmasi Digest chun  International Standard Serial Number (ISSN)  a nei tah. Hi le inzawm hin March 15, 2015 khan  Editor Timothy Z. Zote chengna in, Saikawt Vengtang hmuna  Manmasi Digest Team chun  lawmna ruoi  siemin an kiltlang.

OTHER NEWS
Swine  Flu invawi 5 tling
IMPHAL:  Manipur a Swine Flu invawi umzat chu 5 an tling tah. Mi 5 hai laia 2 hai  khawm Hospital a inthawk insuoktir an ni tah. Swine Flu invawi pangana hi Imphal West District mi, March 22, 2015 nia  Swine  Flu invawi a nih  ti  finfiea um a nih tiin ei thu dawngna chun a hril.

Union Minister 2 an hung inzin
IMPHAL:  Manipur a ni 2 sung cham dingin zanikhan Unin Social Justice and Empowerment minister,  Thawar Chand Gehlot le Union Minister of State for Social Justice and Empowerment, Krishna Pal hai Imphal an hungtlung. BJP Manipur Pradesh Office, Imphal­ah  BJP Manipur thuoituhai inhmupuina an nei. Hi huna thu a hrilnaah Mr Thawar Chand  Gehlot chun, Manipur  sawrkarin ram le hmun a mi pek thei chun development projects chi tum tum thaw ning a ta, hnam tlawm lem SC, OBC le piengphunga ruolbanlohai ta dingin Hostel bawl ning a tih tiin a hril.
   
Mr Gehlot chun, a ministry hnuoia um NGOs hai chu fund indik taka hmang dingin an hriettir a, a hmang indiknaw hai chunga action natak lak a ni ding thu a hril. State sawrkar han a hun taka Utilization Certificates an pek   phawt chun sawrkar thlungpui chu fund hung pedawk dinga inzo sa a nih tiin zani zantiena BJP office a press conference huna Gehlot chun a hril.  Mr Gehlot chun tulai hnai khan a ministry chun NGOs 87 tha taka function lo hai a blacklist thu  hrilin, NGOs black listed hai chunga  chunga action lak ning a ta, a tul chun CBI kuta pekdawk ning a tih tiin a hril bawk.
       
BJP Manipur chun Gehlot kuomah memorandum an pek.
Catholic School khapna hlip
IMPHAL:  Kangleipak Communist Party (Poirei Meitei Lup) in  Catholic Schools 5, Little Flower School, St. Joseph School; Catholic School, Canchipur; Nirmalabas School le  Christ Jyoti School hai class nei an khap (banned) na an hlip ta leiin  zanita inthawk khan hieng Catholic schools 5 hai hi hawng le  class an sunzawm nawk tah.

Amit Shah a hung inzin ding
IMPHAL:  BJP Mational Presdient, Amit Shah chu Manipur­a ni 2 sung cham dingin April 17, 2015 khin Imphal a hungtlung ding nia hril a nih. BJP National President a chela inthawk Manipur a hung inzinna hmasatak ding a nih.

Tui harsatnain zuol tieng
IMPHAL:  Iril le Imphal vadung hai le Imphal khawpuia chenghai ta dinga tui lakna vadung hai tlawm tieng a pan pei leiin  mipui mamaw tawk tui an peksuok zo tanaw leiin Imphal khawpuia tui harsatna chun zuol tieng a pan pei niin ei thu dawngna chun a hril.

Union Minister meuin Ekin a en le a khawmihai an biekpui chun  makti a hlaw
KOHIMA:  Union Minister of State for Drinking  Water & Sanitation, Ram Kripal Yadav chu  March 22, 2015 (Pathienni) khan Nagaland stae­a Rusoma le  Tseisma khuo haiah an zin a, in thenkhat­a  Ekinhai a en a, an ekin ngirhmun a enfel bakah a motor tlan lai chu sukchawlin a tum a, khawsung mihai an biekpui a, an harsatna le mamaw hai an dawn a, hun iemanichen khawsung mihai an biekpui. Hi thil a thaw hin a hnungzuitu Nagaland Government officials le khawmihai makti le lawm a hlaw hle. Yadav hi ni 3 sung cham dinga Nagaland­a inzin a nih.
   
Yadav hi Keyaka khuo   an hei lung a, BSF han khawsung mihai kuoma tui an sem a hmu chun a motor an chawltir a,  a motor a intahwk tmin khawsung mihai an biekpui a, khawsung mihai chun tui leia harsatna nasa tak an tuok thu le dawn ding tui  petu le an innghatna chu BSF an ni thu an minister  kuoma anhril.  Khawsung mihai  thuhril  zaidaw taka a ngaithlak zovin Nagaland sawrkar hnuoia thawktuhai  kuomah, Keyaka khaw mihai chu  an mamaw tawk tui an hmatienga pe dingin thu a pek. ‘Nagaland mihai tui harsatna ka hang hmu hin a mi sukmangang a nih’ tiin Mr Yadav chun a hril. In khuo haia hin la hung inzin nawk ka ta, bu ei la faktlang ding a nih. In mamaw le in harsatna thu hai hi PM Modi kuomah hung intlun ka tih tiin Yadav chun Naga mihai a hril.
   
Bao Angami chun, Union Minsiter meuvin khawsung mihai an biekpui le ekin hai a en hi ka ring thei ngai nawh. Ministers le Govt. Officials han hiengang thil an thaw hi ka la hmu ngai bawk nawh. Union Minister in kan khuo a hung sir hin hmasawnna  a hung intlun ngei ka beisei tlat tiin a hril.
       
Mrs Pelhubiu Mezhu, kum 60  neka upa chun, Union minister Yadav hung inzinna lei hin Rusoma khuo chun hmasawnna  a hung nei pha ngei ka beisei a, tuta neka lamlien tha lem kan la hung ngei ngei le, kan khuo a tui vang leia harsatna kan tuok hi a hung hlipkieng ngei ka beisei a nih tiin a hril.

Biekin suksietna le inzawmin mi 6 man
BHOPAL:   March 20, 2015 zana Madhya Pradesh state a Jabalpur a Kristien Biekin suksieta a umna le inzawmin Police han  mi 6 an man tah. Mana um hai lai hin Hindu Dharma Sena President, Yogesh  Agarwal a thangsa. Ni 3 sung Bible Convention nei a ni laia hi Biekin hi va suksieta um a nih. Bible Convention a hin mi 250, tribal vawng an thang niin ei thu dawngna chun a hril. Biekin suksietna le inzawm hin case registered a nih.Mi 6 mana um hai chu­ Dharam Sena leader Yogesh Agrawal   le an thlawppui  Nitin Rajak, Prateek Pyasi, Anurag Choukse, Abhishek Choukse  le  Sharad Rao hai an nih.

Tripura­ah Border Haat pahnina
AGARTALA:   India le Bangladesh inrina, Sipahijala district, Tripura state sunga  Kamalasagar hmuna Border Haat hawng el thei dinga zo fel a ni tah. Tripura State a Border Haat (Market) pahnina ding a nih. Rs. 2.44 crore senga Border Haat hi bawl a nih tiin official thusuok chun a hril.  Chun, Land Custom Station (LCS) khawm Srimantapur hmuna hawng tum a nih.

Pitar thattu man
AIZAWL:   March 16, 2015 zingkara a khuma a thisaa hmu pitar kum 87 mi, Ngunhnemi of Muallianpui thattu Lalrindika (29) s/o Machhinga of Muallianpui chu Police han  March 20, 2015 khan an man tah. Pitar hi Rs. 20,000 a lakpek hnunga a ringa a rek hlum niin an puong. Lalrindika hin kum 2007  khawm khan mi pakhat a lo that ta ti Police chun an dawpnaa inthawk an dawpdawk.

Karnataka CM in CBI insuizuitir
BENGALORE:   Senior IAS  Officer, D.K. Ravi thina  thu chu CBI in suizuitir ning a tih tiin Karnataka Chief Minister Siddaramaiah chun zanikhan a puong. A hma khan Karnataka CM chun  Senior IAS Officer, D.K. Ravi thina chungthu hi CBI insuitir ninaw nih tia a lo hnawl a nih. Amiruokchu, BJP le JD(U) han nasa taka an nawrna leiin CBI insuizuitir a hung remti ta a nih.

Singapore Founding Father a thi
SINGAPORE:  Lee Kuan Yew (91), Singapore Founding  Father chu zanikhan a thi. Singapore sawrkar chun Lee Kuan Yew thi hi ni 7 sung sun dingin a puong. Lee hin kum 2011 chen khan Singapore PM nina a chel. Kum 31 zet an lal a, an lal sung hin sin ropui tak tak tam tak a thaw a, khawpui chite nisienlakhawm khawvela khawpui hausa le changkangin a siem a, hi lei hin a ram mi han an ngaihluin an ngaisang  hle a nih.

Editorial
Tuihnar humhal tlat ding

Mihriemin ei mamaw em em el, a bova ei um thei der lo hai laia pakhat chu tui a nih. Mihriemhai chau ni lovin tui hi thing le ruo, thlai, ramsa, rannung le thilhring hai po po mamaw a nih. Tui bova dam thei ei um naw leiin tuihnar tha  ei nei theina dinga hma ei lak tak tak a hun ta a nih. Tuihnar ei nei that theina ding chun tuihnar humhal a tul a.  Tuihnar ei humhal theina ding chun ramngaw ei nei that a tul. Ramngaw bo chun tuihnar ei nei  thei naw ding a ni leiin thing phun le ching nasa nawk zuola ei uor a tul a nih.
   
Ei tui hnar tak hi ground water a ni a, groundwater khawm chu Water cycle­a state pakhat a ni ve el a.  Science­in a hril dan chun mass  tam tieng a ngaizing a, sukral (destroyed) thei a ni naw a, siem belsa  (create) thei khawm a ni nawh. Chuleiin khawvela tui tam tieng hi chu a pangngai zing a, hmang thei ding a tam le tam naw hi chu ei hmang annawleh ei relbawl thiem le thiem nawah an nghat a nih. Groundwater a tam le tam naw hi leihnuoi aquifer (tui) khawl thei leilung, a um le um nawah an nghat a, hieng groundwater hai hi hnuoi chungah hung put suok nawkin dil, vadung le vadungpui siemtu, tuihnar indik tak chu a nih.
   
 Khawvel um dan phunga chun ground water hi naturally­a in­recharge zing a ni a, development activities lei le ramngaw ei sukchereu  leia surface runoff a tam hin naturally­a ground water in­recharge a tlawm pha hlak. Ei ramin ruotui a la dawng that lei le vegetation cove a la um tha bawk leiin natural recharging hi a tha tawk dinga ngai a nih. Amiruokchu, surface water (Dil, vadungte le vadungpui) ei hmang nasat hin groundwater reserve a nghawng a, tuihnar humhal dinga thanglak hi thaw makmaw a nih.
   
Ramngaw  ei sukchereu nasa lei le ruotui hau ram ei ni bawk ei ni leiin ei vadungpui haia hin siltation (vadunga pil le lungnawi luonglut insekkhawm) a nasa ding ti inchuk sang rak lo hai ta ding khawma ngaituo thei a nih. Siltation a nasa chun ei vadunghai hi a hung pawnlang sawt sawt pei ding a ni a, hieng laizing hin a tui kiem tieng khawm a tam hle ding a nih. Ei rama ei vadunghai hi ei en a, inthuk nekin dau tieng an pan pei a nih ti hmu theiin a um. Hi lei hin siltation khawm hi sawrkarin a ngaipawimaw hle a tul a nih. Vadungte tam takel chu tulai hin  tui luong hmu ding um ta lo, vadungte ni ngailo ang elin an um an tah.
   
Tui hi a pawimaw hle ti chu a hretu seng ei nih. UNO khawmin tui hi a ngaipawimaw a, kum tin March 22 hi World Water Day in an inser hlak. March 22, 2015 (Pathienni) khawm khan khawvel rambung tinah uluk takin World Warter Day inser a ni hlak. H nia  mithiemhai hril uor le an ngaipawimaw em em el chu tuihnar humhal a nih. Ei tuihnar, ei vadungtui le dil hai hi ei humhal naw chun a tuortu ding chu ei ni tho ei nih.
               
Ruosur nawna a sawt ta leiin ei rama khawm khuo an thal a, kangmei suok thu inzing uta ei hriet bakah tui harsat thu hril le hriet ding a tam. Vadungte le Well thenkhat  an kang tan a,  ruotui ei hmu intak chun tui thua ei harsat dan ding  hi hril ruol ninaw nih. Tulai khawm hin Manipur state sung pumpuiah tui a harsa tan a,  tulaia ei rama zawr hlaw tak le inhawi tak chu tui a nih. Tui man khawm a hma nekin Imphal khawpuia chun sukpung a nih.  Tui man sukpunga a um hin miupi sawisel a hlaw a, sienkhawm tui a harsa tlat leiin  umzie rak a nei thei nawh.



Post a Comment

Powered by Blogger.