Dengue thuah intersectoral meeting nei
CCPUR: March 18, 2015, 10:00AM khan National Vector Borne Disease Control programme, National Health Mission, Manipur hmalaknain CMO Conference Hall-ah ‘One Day Intersectoral meeting on Prevention and Control of Dengue’ nei a ni a, DLOs hai an thang. Hi huna hin Mr Shyamchandra Sharma, MCS, ADC Pherzawl khuollienin a thang a. Dr T. Zamkhokam Kuki, SMO/SNO, NVBDCP, Manipur le Dr Thangchinkhup Guite, CMO, CCPur hai chu guest of honour le functional president in an thang. State Malaria Officer, T. Zamkhokam Kuki chun, Kum 2007 le 2011 hai khan Dengue outbreak (hrileng) a lo um ta a, sienkhawm Department tum tum hai thlawpnain control zo a nih. Tukhawm hin iengtik huna khawm Dengue hri inleng thei a ni a, Dengue hri an leng huna department tin hai thlawp dingin a ngen. Dengue natna hi Aedis mosquito in a phur a ni a, sun var lai chauva mi se hlak an ni leiin ‘daytime biters’ tia ko an ni bawk. Thokang pakhat leia sungkuo pum buoi thei a ni leiin mitin fimkhur dingin a ngen a. Dengue natna paitu Aedis mosquito hin tui siekhawlna tanky le syntex haiah an intui hlak leiin Dengue hri inleng huna mani tui siena hai sukfai zing ding a ni thu a hril bawk.

Bike in nupui pakhat a baw hlum
CCPUR: Zani zingkar 6:30AM vel khan Ms Mankhannuam (56) w/o Khamsuanmang of Muallum, tuta Lanva hmuna cheng mek chu Damkam Bazar- lai Bike pakhatin a baw a, a hliemna tuorzo lovin a thi. Ms Mankhannuam hi hmeruo inchaw dinga fe a ni a, inrang takin District Hospital casualty phurlut a ni a, sienkhawm doctor han RIMS, Imphal pan pui dingin an refered-a, sienkhawm damzo lovin a thi a nih. A ruong hi Muallum khuoa vui dingin zanikhan phur a nih. A bawtu hi Phailien khaw mi nia hril a nih.

Essay writing competition nei
CCPUR: PHED, CCPur Division hmalaknaa National Rural Drinking Water & Sanitation Awareness Week nei mek le inzawmin zanikhan Phungkhothang Govt. Jr. H/ S-ah Class IX le XII inchuklai han “Water and Sanitation” ti thupui hmangin Essay ziek inelna an nei. Essay ziek inelnaa hin Schools 5- Rengkai Govt. Hr. Sec. School; Phungkhothang; GM High School, Vimala Raina H/S le CCPur H/S haia inthawk students 74 an thang. 1st in lawmman Rs. 5000/, 2nd in Rs. 3000/ le 3rd in Rs. 1000/ bakah mi 10 kuomah consolation prize Rs. 500/ seng le hi competition- a thang popo Rs. 100/- + certificate pek ning an tih.

Mangkhogin Haokip in SP CCPur
CCPUR/IMPHAL: Manipur sawrkar chun March 17, 2015 khan IPS Officer thenkhat sawnkuolna order an suo a. Hi dungzui hin SP/CID (Security) chel mek Pu Mangkhogin Haokip, IPS chu SP/CCPur sin chel dinga hung sawn a ni a. SP, CCPur sin chel mek K. Kabib, IPS chu SP/Senapati dinga sawn a nih. E.Priyokumar, IPS, SP, Chandel chu SP/CID (Security); Themthing Ngashangva, IPS, SP, Tamenglong ni mek chu SP/Bishnupur dinga sawn a ni a; T.K. Anal, IPS, CO/5MR chu CO/5MR & addl. Charge of SP/TML chelsa ding le N. Herojit Meetei, IPS, SP Bishnupur chu SP/Chandel sin chel dinga sawn niin ei thu dawngna chun a hril.

Singnboard suksieta um a hmun pangngaia phun nawk
SINLUNG HILLS: HSA Saiphai Unit in Assam le Mizoram inrina Saiphai khuo lut tanna laia “Wel Come to Sinlung Hills, Mizoram; Ei hnam mawina chu nang le keia innghat a nih” ti signboard an inthut, March 8, 2015 nia tu ti hriet lo han an suksiet chu March 17, 2015 khan Saiphai Unit thuoitu han khawsungah an laklut a, siemthat zo ani pha Mizoram Police le IR(Mizoram) hai thangin a hmun pangngai bawka phun nawk ning a tih tiin HSA Serlui Block Secretary chun a hril. Hi signboard siemthatnaa sum seng chu Village Council (VC) Saiphai in an tum ding a nih. Signboard hi tu suksiet am ti hriet a la ninaw leiin a thaw tu man an la um nawh. (LRS)

Neighbourhood youth pariament
CCPUR: March 21, 2015, 11AM khin Lenlai Club (LC) huoihawtna le NYK, CCPur sponsored-nain Simte Inn, Simveng, CCPur-ah Block Level Neighbourhood Youth Development prog. um a tih. Prog. hi H. Doungel, DY CO, NYK, CCPur in hawng a ta, Resource person in S. Khaikhanpau Ngaihte, MCS, DC Office, CCPur le Thienlaljoy Gangte, MCS, SDO/BDO CCPur hai thang an tih.

Pasal 1 vuok hliem
CCPUR: Kangvai khaw bula AR camp-a sinthaw hai chun March 15, 2015 khan Kangvai khaw mi Kamzakop s/o Thiankhogen chu an vuok hliem leiin District Hospital, CCPur-ah admit a nih. Hi thua hin Kamzakob unaupa Siaklalzom chun CCPur Police- ah complaint a peklut leiin Police han FIR No. 20(3) 2015 CCP-PS U/S 326/34 an registered-a an suizui mek.

Government Aided College hai full-fledged College a hlangkai tumna a um nawh - M. Okendro 
CHANDEL: Zani hmasa khan Komlathabi Village, Chandel District a South East Manipur College (SEMCO) hmuna Indooor stadium bawl zo thar hlim chu Manipur Education Minister, M. Okendro in khuollien nipumin a hawng. Pu D. Korungthang, Tengnoupal A/C MLA functional President in a thang a, Pu P. Vaiphei, Commissioner (Higher and Technical Education) chu guest of honour in a thang. Hi Indoor Stadium hi XI Plan of University Grant Commission (UGC) thangpuinaa Rs. 70 lakh zet senga bawl a nih. Hi huna mipui pungkhawmhai hmaa M. Okendro in thu a hrilnaa chun, tu hri hin chu state sawrkarin Government Aided College hai full-fledged College a hlangkai tumna a nei nawh. Amiruokchu, Government Colleges le Government Aided Colleges haia Zirtirtuhai le thawktuhai hlaw an thlau hle leiin kum thar (next financial year) a inthawkin Government Aided Colleges haia thawktuhai hlaw, a bikin Zirtirtuhai hlaw sukpung tum a nih tiin a hril. Quality Education ei nei theina dingin Zirtirtuhai chu taimak insuo nawk zuol dingin M. Okendro chun
ngenna a siem.

Irang Leilak siem that zo
IMPHAL: NH-37 (Imphal- Jiribam Road) a Irang vadung chunga leilak indaw chu siem that zo a ni ta leiin iengang motor khawma hraw thei a ni tah.

Pasal neizo hlim inkhai hlum sain
IMPHAL: Thla hmasa lai ela pasal nei Moirangthem Umabati (24), w/o Moirangthem Apak of Napat Makha Leikai chu zani zingkar khan Theihai kungah inkhai hlum saa hmu a nih. A unu M. Sangeeta chun a thi hmain a pasal leh an inhal niin a hril. Khumah a puonbi hmu le a lukham chu an pidan sirah hmu niin a hril bawk.

Sharmila Court hmaah inlangtir
IMPHAL: Irom Sharmila Chanu chu zanikhan Chief Judicial Magistrate (CJM), Imphal West, Lamphelpat ah inlangtir a nih. Ama hi AFSPA hlip dinga ngennaa bungheia nuorna la neizing a nih.

IG AR in CM an hmupui
IMPHAL: Zanikhan Inspector General (IG), Assam Rifles designate in Manipur CM O.Ibobi Singh an hmupui. Inspector General, Assam Rifles (South) hin Mantripukhri ah Headquarter an nei a nih.

Imphal West-ah Cr.P.C. 144
IMPHAL: District Magistrate, Imphal chun March 17, 2015 zan dar 6 a inthawk thuthar um nawk hmapo a dingin Imphal West District pumpui sungah Cr.P.C. 144 puong a nih tiin zanikhan order an suo.

Telephone Adalat nei a nih
IMPHAL: Zanikhan BSNL Office, Imphal-ah Telephone Adalat nei a ni a, Cases 400 rel fel dinga tihai laia cases 45 rel fel le telephone fee bat le fine in Rs. 1.80 lakh hmu a nih.

MPSC member dingin Rev. Zosangliana
AIZAWL: Mizoram sawrkarin Mizoram Presbyterian Kohrana Synod Executive Secretary sin lo chel ta le tuta Synod Multipurpose Training Centre-a Programme Director, Rev. Zoramsangliana Colney chu Mizoram Public Service Commission (MPSC) member dinga an fiel leiin an kohran remtinain Voluntary retirement a ngen a, March 31, 2015 chen a sin hi la chel a ta, April 1, 2015 a inthawk a sin a chawlsan ta ding a nih. Rev. Zoramsangliana Colney hi thiemna tieng M.A. (Political Science) le Master of Theology a nih.

Mi 56 zet man an ni tah
DIMAPUR: March 5, 2015 a Dimapur a Naga nunghak a suollui tia intum leia pasal pakhat mipui lungsen thangruol han an vuok hlumna le inzawmin Police han mi 56 zet an man ta niin K. Shouka, Additional SP & PRO, Dimapur chun a hril. Hi inthatna a thang ringhla mi 8 thlalak tarlang le an umna a inthawka Police station hnai takah inpe dinga inhriettir an ni a, an inpe naw chun an sunghai man ni dingin Police thusuok chun a hril.

Zokhawtharah Land Customs Station
AIZAWL: March 25, 2015 khin Zokhawthar, Mizoramah Union Minister of Commerce & Industries, Mrs Nirmala Sitharaman in Land Customs Station hawng a tih. March, 24, 2015 chawhnung dar 2:15 khin Mrs Nirmala Sitharaman chu Aizawl hungtlung a ta, zan khat riek a ta, March 25, 2015 khin Aizawla inthawk Pawan Hans Helicopter in Zokhawthar a pan ding a nih. Mrs Nirmala Sitharaman hin Land Customs station a hawngnaa hin Mizoram CM Pu Lalthanhawla, a nuhmei Pi Lalriliani le Mizoram Trade & Commerce Minister Pu H. Rohluna han tawiawm an tih.

Sixth Schedule Provision thu
NEW DELHI: Autonomous District Councils (ADCs), Manipur chun Sixth Schedule ngenin ka kuomah Memorandum an hung pek. Kum 2001 khan Manipur sawrkarin certain local adjustments le amendments thawin Manipur- a tribal Areas sungah Constitution Sixth Schedule hnuoia ADC-hai sie a nuom thu le dodalna a neinaw thu a hung hril a. Sawrkar thlungpuiin Manipur sawrkar local adjustments/revised proposal chipchier taka pe dinga ti a ni a, sienkhawm tuchen hin a la hung pek or thawn nawzing a nih tiin Union Minister of Stae for Home Affairs, Kiren Rijiju chun ziek ngeiin zanikhan Rajya Sabha-ah K.C. Tyagi indawnna siem a dawn.

VDF han an sinthaw chawlsana nuorna
IMPHAL: Village Defence Force (VDF) chun an thil ngen (Charte of Demands) sukpuitling dinga sawrkar nawrnain March 20, 2015 a inthawk an sinthaw le an silai chawi chawlsana nuorna nei an tum. Hi nuorna hi Manipur Police Department hnuoia Districts 9 a VDF personnel han thlawp an tih tiin All Manipur VDF Welfare Association thusuok chun a hril.

Football player Hospital panpui
IMPHAL: Amateur Football Club, Athokpam a player Leimapokpam Romenjit Singh (28), s/o L. Meino of Tekcham Mayai Leikai chu march 17, 2015, 5:30PM vel khan Wangjing Tentha A/C MLA, Paonam Brojen Singh Escort han an vuok a, a hnara thisen a suok leiin District Hospital, Thoubal panpui niin Th. Shyamo, President, AFC, Thoubal Athokpam chun a hril.

AMCTA in an nuorna an tawpsan
IMPHAL: All Manipur College Teachers Association (AMCTA) han an sinthaw chawlsana nuorna an nei le inzawmin zani hmasa khan Education Minister thangin AMCTA thuoitu han Chief Minister officeah inbiekna an nei a, an thil ngen hai CM le Education Minister han lo bawzui pek an tiem leiin AMCTA chun an nuorna an tawpsan ta niin an hril.

President Mizoramah an zin ding
AIZAWL: India President Pranab Mukherjee chu April 9, 2015 khin zankhat riek dingin Aizawl, Mizoramah inzin a tih. President hi Mizoram University 9th Annual Convocation-ah khuollienin thang a tih.

Electric le water bill bathai list
NEW DELHI: New Delhi Municipal Council chun electric le water bill pe lova bat hai hming a tarlang a, hienghai lai hin AICC President Sonia Gandhi; PM hluihai Dr Manmohan Singh, H.D. Devegowda, Union minister Smriti Irani, Najma Heptullah, Ram Vilas Paswan; Union minister hlui Jainarain Prasad Nishad, L.K. Advani, Digvijay Singh, Jagdish Tytler hai bakah Lok Sabha MPs 166 le Rajya Sabha MPs 151 an thang. Sonia Gandhi in Rs. 193.68; PM hlui Dr Singh in Rs. 22,934; PM hlui ma Devegowda in Rs. 1.49 lakh an bat. A bat rawn tak Nishad in Rs. 18.47 lakh zet a bat.

India Ngamantu 145 le Lawng 34
NEW DELHI: Zani zantieng khan India Ngamantu 145 le Ngamanna lawng 34 hai chu Sri Lanka sawrkarin a hung insuo a, Nagapattinam, Kottaipattinam le Mandapam haiah an hungtlung ding nia hril a nih. Sri Lanka Navy han India Ngamantu lawng an man chu 87 a ni a, sienkhawm 34 chau hmangtlak an ni taa hril a nih. Ngamantu 145 hai hi Tamil Nadu state mi vawng an nih.

J&K Assembly Spearker in Gupta
SRINAGAR: Zanikhan Jammu & Kashmir Assembly speaker ding thlang a ni a, BJP MLA Kavinder Gupta chu khingtu um lova thlangtling a nih. Kavinder Gupta hi Jammu region a Gandhinagar Assembly Constituency a inthawka BJP ticket a thlangtling a nih.

Solar Plane in Ahmedabad a suoksan
AHMEDABAD: Solar Plane- Solar Impulse 2 chun zani zingkar khan Ahmedabad Airport a suoksan a, zan dar 9 velin Varanasi tlung a ta, March 19, 2015 in Varanasi suoksanin Mandalay, Myanmar a pan ding nia hril a nih. March 10, 2015 a kha Solar Plane hi Ahmedabad hungtlung ta a nih. Myanmar le China ram hai a sir zovin Pacific Ocean hraw tlangin US a pan ta ding a nih.

A pasal hmuhawiin an suol hrawn
NAMMAKAL: March 15, 2015 zan khan Tamil Nadu state, Namakal district sunga Rasipuam bula pasal 5 han nupa tuokkhat an man a, a pasal thingbul leh khitdein a mit hmu ngeiin a nuhmei an suol hrawn. Nupui suolhrawntuhai hi man le lungina khum an ni tah tiin S.R. Senthil Kumar, SP, Namakkal district chun a hril.

Syria sipai han US vuongna an kap thlak
LATAKIA: Syria sipai han Syria hmarthlang tieng, President, Bashar al-Assad hratna, Latakia khawpui bulah US indo vuongna an kap thlak niin an hril. US chun hi thu hi suichieng mek a nih tiin a hril. Syria hi Islamic State helpawlhai donaa thang lo a nih. US indona vuongna kap thlaka um hi thudik a ni chun Syria Forces han US indona vuongna an kapna hmasa tak a la ni ding a nih.

Nuhmei suolluitu saruoka khawlai fangpui
AHMEDNAGAR: Pasal kum 19 mi, Shubham Bharadia chun nuhmei tleirawl kum 15 mi a suollui leiin an veng mipuiin an man a, a hremnain saruokin Sabengtung chunga inchuongtirin slippers an inawrtirin khawlai an fangpui. Hi thil hi Wambori, Ahmedabdnagar district a March 13, 2015 a kha tlung niin Police chun an hril.

Pakistan Doctor Ukil kap hlum
PESHAWAR: CIA han Al- Qaeda lukhaitu tak Osama Bin Laden an zawng laia CIA pawl thangpuitu Dr Shakil Afridi Ukil Samiullah Afridi chu a in tieng pana an lawi laiin March 17, 2015 khan Taliban helpawl han Peshawar khawpuiah an kap hlum niin Pakistan Police han an hril. Dr Shakil Afridi hi Lunginah a lan tang zing a nih.

Pakistan-ah mi 9 khai hlum nawk
ISLAMABAD: Zanikhan Pakistan -ah mi 9 khai hlum nawk an nih. March 17, 2015 khan mi 12 khai hlum an ni. Ni 2 sungin mi 21 le December, 2014 a inthawk tuchena Pakistan rama mihriem khai hluma um ta chu 48 (unofficial) an ni tah tiin ei thu dawngna chun a hril. December 17, 2014 a kha Pakistan PM Nawaz Sharif in Moratorium a lo hlip ta a nih.

Combined Medical Services Examination
NEW DELHI: Union Public Service Commission (UPSC) chun June 28, 2015 khin Combined Medical Services Examination, 2015 buotsai a tih. Hi exam a hin Medical officers post 1402 lak ning a tih. Thu chieng lem UPSC website: upsc. gov.in-ah hriet thei ning a tih. Hnina lekha peklut theina hun nuhnung tak 10-04-2015 a nih.

Kum 5 dang NLUP la sunzawm pei
AIZAWL: Zani hmasa a Mizoram Governor Dr Aziz Qureshi in Mizoram Assembly Session a hawngnaa thu a hril huna New Land Use Policy (NLUP) chu kum 5 dang Mizoramah sunzawm a la ni ding thu le NLUP thawna dinga hin sum harsatna a um nawh tiin a hril. NLUP dawng ding hin sungkuo 1,35,000 thlang an ni a, sungkuo 62,567 hai kuomah sum hmu ding pekkim vawng an ni ta a, state sawrkarin revised action plan hnuoiah sungkuo 72,433 hai kuoma sum pe nawk a tih tiin Aziz Qureshi chun a hril.


Editorial
Sawiselna hi

Sawiselna hi mi tha le mi tha lo, mi fel le fel lo, mi taima le taima lo, sakhuo mi le sakhuo mi lo, milien le milal, mi hausa le mi rethei, mi hmeltha le hmelsie, minister le terlo, mitin tuok hlak a nih. Pathien naupa Isu Krista ngei khawm hi khawvela a hung lai khan sawiselna a tuok ve tho a nih. Sawselna hi a lakawi lo annawleh a ngaikawi nawhai ta ding chun theida a um nawh. Nisienlakhawm a lakawi le a ngaikawi hai chun an theida hlak. Amiruokchu, mivar le mipuitling hai chun mihai sawiselna, hrilsietna le demna hai hi iengah an ngai naw a, an dawn let kher kher ngai nawh. Inbichiengna, inennawnna le insiemthatnain an hmang lem hlau hlak.

Sawiselna hi mi hran hran han ei ngaidan le ei lak dan an ang naw thei hle ring a um. Lung inrawm deu le mi nunsie hai chun lungsen taka lain an sang let nghal hlak. A then chun na ti takin an dawngsawng a, a sawiseltu le an inkar chu an sukhla a, a then lem chu hmelma inen takin an inen pha hlak. A then chun thiem changna ding zawngin thang an khaw rak rak a, hrilfiena dam an siem hlak. Thenkhat chun thiemnaw inchangin mani le mani an intum hlak. Mi tlawmte chauvin sawisel an hlawna lai kha an dik a nih an ti thei a, lungsen le dawn let nekin insutkirna, inbichiengna, inenawnna le insiemthatnain an hmang hlak.

Sawiselna lawm pakhat khawm ei um nawh. Mitinin inpak ei lawm seng. Mihai sin thaw that, an felna, an taimakna hai hril nekin an sietna, an tlinnawna, an baksamna, an suolna le an thil thaw tha lo chiterek lo um pal hai kha ei hril punlun rak hlak. Mihriem hai ku hi mak le suol takel ei nih. Mihai lawmna ding, mihai thatna ding, mihai mawina le hmingthatna ding hai a um lai zingin an sietna le suksuolna hai kha hril ei chak em em a, minute tlawmte sungin kil le kap a deng suok nghal hlak. Sawiselna hriethiem le pawm thiem hrim ei um nawh.

Sawiselna hi sut chieng tum tieng ni lova, a theida zawng, a lungsen zawng le invet thlak taka ei lak chun, a tirah chun thiem ei inchang a ni el thei, huoisen, thaw thei le che thei khawm ei inti el thei; nisienlakhawm a hnunga chun a sawiseltu le ei inkar kha kak lien takel siemin ei lo sukchat der el thei a nih. Chun, a mi sawiseltuhai kha ei hotuhai an ni lem chun, invet thlak taka ei lak chun a man ei chawi tam phien el thei a nih. Hotu khing chu an thaw chi naw a, khawtlang, kohran le hnam khing ang tho a ni nuom hlak.

A beidawng le lungngai zawnga a dawnna ei lak a lo ni khawmin mani le mani ei inhrem thlawn mei mei a ni thei. Ei lo dawngsawng tum dan kha a hriltu tum dan a ninaw el thei a ni aw! Inngamtlak leia hril mei mei kha ei lo lak thu tak taluo chun ei kar sukhla taluong ei ta, kum tam takel ei tuor pha el thei ding a nih. Chuleiin, insawiselna zawng hi chu lungsen le a ninaw zawnga lak lo a tha, mihai le inremnawna a nih.

Sawisel thiem tak le lawm taka dawngsawngtu chun midang hai ang bawkin a thaw indiknaw thei a nih ti an hriet a ni hlak. Mitin hin fel nawna le tlin nawna ei nei seng a, ei fel nawna le ei tlin nawna tam tak hi mani chun ei inhrietchieng naw rawp hlak. Chuleiin, sawisel ei ni hin, “ ka lo thaw indiknaw mani ding aw?” tiin insut let inla a tha rawp a nih. A hnunga dingin ei thawfuk lem el thei. Mihai mi sawiselna hi nun siem thatna kawnga thangpuitu tha le hlu tak a nih ti hrietthiem a tha. Ruol a mi sawisel nuomtuhai hi ei laka inhawng, ei thatna diong hmakhuo mi ngaipuitu an ni nuom rawp
hlak.



Post a Comment

Powered by Blogger.