~ Henry L Khawzawl

Aizawl, January 8, 2015: Mizoram Liquor Prohibition & Control (MLPC) Act hnuoia ‘zu’ in/dawn phalna ‘Liquor Card’ application form chu December ni 23, 2014 ânthawk khan district hrang hranga Excise & Narcotics Department Office ânthawkin sem tan a ni a. January ni 6 chena Mizoram pumpuia application form semsuok zat chu 1056 lai a nih. Mizoram khawpui Aizawl bikah vawisun (8.01.15) chen khan application form 2164 lai Excise & Narcotics Department chun a peksuok tah. 

Liquor Card hi zu dawn/in phalna ding amani zu dawra zu inchawk theina dinga siem a ni a, Zu dawr (wine shop) hawng phalna dinga 'license' ruok chu a ni nawh. Nitin in application form latu an pung peia, Aizawl bikah January ni 6 khan 446 lai peksuok niin, ni 7 khan 729 le ni 8 khan 989 lai peksuok a ni bawk.  

January ni 5 a Excise department thawktuha’n kum thar lawmna le infuitharna hun an nei a hmangpuina ah Mizoram Excise & Narcotics Minister Pu. R. Lalzirliana chun MLPC chu kum 2015 sung ngei hin hmang a ni ding thu le, inhriettirna (notification) khawm January thla sung ngei sawrkar gazette ah insuo a ni ding thu a lo puong ta bawk.


R Lalzirliana chun, MLPC Act hmang a ni hnungah chun Excise & Narcotics-a thawktuhai chu khauh lema an uma atul ding thu hrilin, "Thawktu tuelkhawm thil indiknaw le sin thawtha pei loa, department sukhmingsie zawnga um reng reng chu indawi ninaw ni hai” ti'n a hril

Post a Comment

Powered by Blogger.