December 31,2014 a bo Zarkawt tlangval Lalnunmawia Zadeng a ruong hmu

Lalnunmawia Zadeng

Aizawl, January 8,2015: December 31, 2014 zan a inthawka a chin hriet lo a bo, tlangval Lalnunmawia Zadeng (Mawitea), Zarkawt HDFC Bank, Lawngtlai Branch a Deputy Manager sin thaw lai chu vawisun dar 3 vel khan Falkland veng, Tantia Camp thlung hma, Pu Lana panthlang phul lai hmu a ni a, a ruong hi nupui pakhatin vawkbu a zawngna a hmu a nih. A bo hlima a thuomhnaw hak ni a hriet, Jacket le kekawr a la hak a, anachu a taksa ruokchu a se ta hle a, mi kut tuor a ni le ni naw chu hi thu buotsai lai hin a lan hriet thei el nawa, a ruong umna bul velah hin midang thuomhnaw ni awm tak thil ieng iem anih a uma hril a nih. Police hai khawmin an enfie mek niin thu dawng a ni a, a suok dawk zana a scooty khal ruok chu hmu ala ni naw zing a nih.

January ni 3, inrinni khan Tuirial hmunhnawk peina ah naupang thenkhatin a wallet hi an lo hmu taa, a wallet a hin a driving licence, ATM Card, a sinthawna HDFC visiting card le a thlalak hai kimthlap in a la um a nih. Hi ni vek hin Pu Marina Armed veng south, Tuirial, a huona fe chun tlangval pakhat inchei smart tak leh an in hmu a, hi tlangval hi a chau hle a, a bufuon hai pe in an inthe nawk niin a hril a nih.

Pu Marina hin Zarkawt tlangval Mawitea a bo thu hi a lo hriet ve nawa, in a tlung hnunga Mawitea thlalak hai an hang inhmu tir chun a ni ngei a nih ti a hril chieng ngam nawa chu an inang hle thu a hril. Pu Marina chun tlangval hi tawng inem tieng pang niin a hrila, a fena lam awm nia an hriet chu suizui nghal a nih.

Mawitea hi Zarkawt khawtlang chun inrinni le chawlni hai khan zawngna sin an lo thaw taa, Central YMA keihruoina in thawtanni a inthawk khan zawngna sin beipui an thlak a, a bo ni a inthawka a ni 9-na ah vawisun chawhnung khan nupui pakhatin a lo hmu ta a nih.

A ruong an hmuna hmun

Vawisun mi bo zawng a ni ruk ni a hin Republic veng, Upper republic, Armed Veng, Chhinga Veng, Dawrpui, Tlangnuam, Kulikawn, Dam Veng, Model veng, Electric veng le Dawrpui vengthar hai chun Chite tieng zawng dingin an inthawksuoka. Zuangtui, Bawngkawn, Bawngkawn South, Selesih, Sihphir, Sihphir venghlun, Leitan, Muanna veng le Thuampui hai chun Zokhawsang tienga an zawng ve thung a nih.

Zantieng khan Falkland Vengthar branch YMA han kuong siem in a ruong hi hall-ah sawtnawte hunser an hmanpui a, vawizan hin postmortem thaw nghala, postmortem zo huna vui liem nghal dinga ti a nih.