Ui se chungthuah Dist. Level Consultative nei 
CCPUR: Tulaia Churachandpur District/khawpui sunga Ui se tamna thu le inzawma CMO, NRHM le Medical Supdt. District Hospital hmalaknain zani 1:00PM khan CMO Mini Conference Hall-ah District Level Consultative Meeting on Dog Bites nei a nih. Dr Thangchinkhup Guite, CMO/CCPur chun lawmlutna thucha hrilin Dr Kh Manglem Singh,retd CMO/ Medico Legal Specialist le Dr S.Shantikumar Singh, Specialist (cattle) Dist Vety Office/CCPur han Ui se titumna, Ui se laka inveng dan ding, Ui se hai enkawl dan ding hrilhrietna (briefing) an nei.

Hi huna thang ve Pu Lunminthang Haokip, IAS, DC, CCPur chun, CCPur District-a DC-a a hung um hnungin buoina chi tum tum a hung hmasawn pei thu hrilin, Ui se (dog bites) tam leia harsatna tuta ei tuok mek le harsatna tum tum hai chu Pathien thangpuina zara dang hne a ni ding thu a hril. District Administration chun CCPur district-a Ui se thua report a hmu chara inthawk hma la nghalin Rapid Action Team an din nghal a, Police le CEO staff han a pawimaw le tul ang peia sin thaw dinga inring zing dingin an hriettir a nih. CMO le CEO staff hai khawmin a pawimaw le tul ang peia Ui se hai damdawi an kap pei ding thu, Mipui le VA member hai chu Ui se chungthuah hin Rapid Action Team kuoma report an rang thei anga pe nghal pei dingin DC, CCPur chun a ngen.

Orlando, USA -ah an zin
CCPUR: Rev. Tlanghmingthang, Regional Superintendent, WMCEI chu January 10-16, 2015 inkar sunga Rozen Plaza Hotel, Orlando, Florida, USA a International Conference of Wesleyan Church (ICWC) inkhawmpuiliena thang dingin zanikhan Churachandpur, Manipur suoksanin USA a pan.

JNV Admit Card lak thei ding
CCPUR: February 7, 2015 nia JNV Tuinuom, CCPura Class VI inchuk dinglakna dinga Entrance Test-a thang ding han January 12, 2015 a inthawk office hour sungin ZEO Office-a UDC Ningta kuoma Admit Card lak thei ning a tih. JNV Entrance Test hi CCPur Block han Phungkhothang Govt. H/S; Henglep Block han Vumhao Govt. H/S; Singngat Block han Singngat Govt. H/S; Thanlon Block han Thanlon Govt. H/S; Tipaimukh Block han Parbung Govt. H/S le Samulamlan Block-a mi han INA Memorial H/S-ah entrance exam hi nei an ta, Concerned DI of School hai chu an biela Centre Superintendent ning an tih.

DTF Meeting Jan. 13-ah
CCPUR: National Immunization Day (NID)/ Ientensified Pulse Polio Immunization (IPPI) 2015 nei ding le inzawmin January 13, 2014, 11:00AM khin DC Office chamber-ah Lunminthang Haokip, DC, CCPur inrawinain District Tast Force (DTF) meeting um a tih. Hi huna hin Micro plan & Budget for NID/IPPI 2015; Jan. 18, 2015 a IPPI hawng dan ding le thu pawimaw dang dang rel an tih. Meeting-a hin DTF-I member hai chu thang seng dinga inhriettir an nih.

Orientation-Consultative meeting
CCPUR: January 12, 2015, 11:00AM khin CMO/District Mission Director, Dist. Health Society/CCPur hmalaknain CMO Office Chamber- ah Orientation-cum- Consultative meeting on Formulation of Dist. Health Action Plan 2015 um a tih. Hi huna hin CHC, PHC a Medical Officer incharge hai; Medical Superintendent, Dist. Hospital DFWO; Principal, ANM Training School; Block Program Management Unit staff hai thang an tih

Parade-a thang nuom han
CCPUR: January 26, 2015 nia Public Ground, CCPur hmuna district level republic Day hmang huna Parade contingents thang nuom hai chun January 15, 2015 chenin ZEO Office-a Pumshong Hangshing, DI of School/Thanlon kuomah School hming, student thang ding hai hming peklut thei ning a tih.

Sketch competition hun sawn
CCPUR: 67th Zomi Namni- cum-Mithun Festival le inzawma Jan. 10, 2015, 1:00PM-a VK Tawna College- a Sketch Competition nei dinga ti chu remchangnawna leiin Jan. 24, 2015, 1:00PM a SSA Residential School, N. Lamka hmuna nei dinga sawn a nih.

Editorial
Beiseina le hun liemta hai

Kum thar hin thil iemani tak hung hersuok dinga beiseina lien tak ei nei seng ring a um. Chu beiseina chu a tha tieng le a tha naw, a se tieng an ni thei. Iengleh khawleh hun fe liemta ang bawk khan a hung inher ding chu a ni phawt a. A sunga chenghai chun kum thar hin iemani tak hung hersuok dingah ei ngai a, chulei chun kum thar January 1 chu khawvel hmuntinah ei lawm luoi luoi a, ieng thil tak am a mi hung hersuok pek ding chu maw? Thil se tieng nekin thiltha tieng mi hung hersuok pek sienla ti chu mitin dit le beisei a nih. Beiseina neia Pathienin a mi siem hi chu vangnei takel ei nih. Mihriemhai hin beiseina neinaw inla chu mihriem hringnun hi rinum hleng a ta, mani le mani inthat ei tam hle ring a um. Hun hi a mak ngawt el. Tuta kum thar ei hmang mek khawm hi, puonkhawngtuin puon a khawng a, a khawng naw huna a ziel ang hin, January, 2015 thla chu a zielkai nawk der ta a nih. Thil mak takel chu, hun fe l;iemta hai hin khawsawt an keitho tlat hlak. Hun hmang mekah leh hun la hung tlung ding hin khawsawtna a keitho ngai naw a, khawsawt vawng vawngna ding a um ngai nawh.

Hun liemtahai ruok chun khawsawt a keitho a, khawsawtna ding thil a tam hle hlak. A chang lem chun hun liem ding cheltang ei nuom hlak. Amiruokchu, hun liemta sa hai kokir thei nawk nisienla hlimna le lawmna tak tak a mi pek thei ring a um ta nawh. Hun liemtahai enkir thei nawkna khawl hi lo um ta sienla, mi tam tak chun a renga herkir ei nuom laiin, tam tak chun a then azar chau herkir ei nuom awm ie! Ei hun hmang liem ta hai po po kha hang herkir thei nawk ni inlakhawm, nuizat um fe fe, innui nuom mang lo deu deu, a hlim le a lawm, lusunna leia tap tlawk tawl ei tam hle ring a um.

Hun hmang dan hi fimkhur a ngai hle ti a chunga ei hril hai hin an sukchieng hle. Ei hun hmang liem pei hi siem that nawk thei ninaw sienlakhawm, kha hun liemta a ei thil tuok le tawng tahai, hmu le hriet hai kha, bu ei sep a, a hum le a fai ei thlir hran a, a kem dam ei lak ang hin, a fai tha lak tlak la a, a kem le a hum ei sie hran ang hin, thiltha naw le mawi naw hai chu hlamsie peiin, thu tha, thaw dan tha, nun dan tha le mawiin ei hun hi hmang inla chu ei mimal nun, ei insung, ei khawtlang, ei ram le hnam ta dinga thiltha a hung ni ngei ring a um.

Mimal tinin ei damlai lawng ei khal seng a ni a. A chang chun suor sietna lai ei intawl chang um a ta, a chang chun lipui inthuk tak le nem duoi chunga ei intawl chang a um ngei ngei ding a nih ti hi pawm thiem le hmang thiem tum hram hram ding a nih. Ei hun ei hmang tha a, ei insiem tha phawt chun suor sietna lai intang sawng ngai nawng ei tih.

Beiseina neia ei hun le ei nun ei hmang tha phawt chun ei mimal nun, ei sungkuo nun, ei khawtlang nun hung inhawi a ta, inthanglienin hma sawn pei ei ta, ei ram hi ram inhawi hung ni ngei a tih. Hun liemtahai ngaia innam kun el nek chun, ei hmatienga hun la hung um dinga hin beiseina tha nei a, theitawp suo a sin thaw a, mani nun le hun hmangthiem tum seng ei tiu.


Post a Comment

Powered by Blogger.