Guwahati, January 20 (Virthli): Zani chawhma dar 11:30 khan Asaam sawrkar palai hai le Hmar People’s Convention (Democratic), Assam Region palai hai chu Home & Political Department Conference Hall, Janata Bhawan Dispur Guwahati ah Suspension of Operation (SoO) keiseina le Memorandum of Settlement (MoS) ziek dan ding thu a inbiekna nei a nih.
Sawrkar tieng hi Additional Chief Secretary in an rawi a, ADGP (SB) & Interlocutor, Secretary Home & Political Dept., Commissioner & Secretary Home & Political, IGP (SB), IGP (SoU), SP (SoU) hai an ṭhang a, HPC(D) Assam region palai hai hi Pu David L Hmar, Chairman, HPCD Assam Region in an rawi a, Pu Remsang Joute, Secretary, HPCD Assam Region le Pu Josef V Tuolor, Vice President, HSA GHQ, Chairman HSA Assam State Committee & Spokesperson HPCD AR hai an ṭhang.
HPCD Assam Region chun MoS Final Draft hi thuneituhai kuomah an peklut chu enna nei a ni a, hi thu a hin sawrkar tieng anthawkin kar khat sungin Sawrkar dit dan le HPCD MoS Draft a mi hai lakkawpin sawrkar tiengin MoS hi hung ziek nawk an ta, hi hi entlangna kar khat zoah nei nawkin MoS hi thla hni (2) sung ngeia sukfel a ziekkham hman ani theina dinga hma lak ani ding thu hrilin, tuta SoO ziek hi a tawpna a ni ta ding thu le MoS ziek ani ta ding thu HPCD Palai hai chu Addl. Chief Secretary chun a tiem bawk a nih.
Chief Minister khawma inremna thuthlung (MoS) hi ziek vat a nuom leiin hma nasa tak le inhmaw taka la dingin sawrkar palai hai a hrilpui anga hma lak vat vat a, thil awisawt chi hai buoipui talo a, MoS sukpuitling ani vat theina dinga inhmaw taka ei thaw tlang a tul thu hai hriltlang ani bawk.
Ei hriet seng ta angin HPCD Assam Region hin Assam ram pum huopa dingin Hmar Autonomous Council hi sawrkarah alo hni ani a, a hmawr inbawk thei ding ngirhmun a sawrkar khawm a mi tlung pui tum ta hi lawmum ei ti hle a, mipui le thuoitu tamtak hai hmalakna le tawngtaina zar le Pathien thuoina zar ei zo hi HPCD chu Pathien chunga le mipui chungah a lawm hle a nih. MoS tluong le fel taka ziek ani vat theina dingin ei tawngtainna haia lo hre seng nawk seng dingin HPCD Assam region chun ngenna a hung siem nawk bawk a nih.
Zan huna hin Hmar Welfare Society Guwahati le HSA Guwahati JHQ thuoitu hai le inbiekna palai hai chu inpawl tlangna Pu Lalremthang Khawzawl a in Pilankata Guwahati hmunah nei ani a, thu pawimaw tamtak hai hriltlangna hai nei a nih.
