PARBUNG, January 21, 2026, Virthli (ONP): 36th Assam Rifles le Pherzawl District Football Association (PDFA) huoihawtna hnuoiah January 20, 2026, dâr 11:00 AM khan Parbung Mini Stadium, Pherzawl District-ah Lt. Col. Rajeev Bakhshi Memorial Football Tournament a vawi 20-na Closing Ceremony le Lt.Col. Rajeev Bakhshi sûnna hunser ursûntakin hmang a nih.
Hi hunser a hin Chief Guest in Pu Laltlanthang, Joint Secretary, Hmar Inpui General Headquarters a ṭhang a, Guest of Honour le Functional President in Dr. Nemchonghoi Kipgen, MO, Parbung CHC le Pu Ramdinglien, President, Hmar Inpui, Hmarram Region hai an ṭhang.
Hi huna Chief Guest in thu a hrilna a chun phairam / meitei helpawl hai laka Hmarram mipuiin harsatna namênlo an tuok dan hai, nuhmei hai chunga an nun tawrawt zie le, khawtlang ṭhuoituhai chunga an nunrawng zie hai, ṭhenkhatin hringna chen an chân thu hai ursûntakin a hril a, beidawng le thlaphang taka santu ding an mamaw lai Lt.Col. Rajeev Bakhshi in a hringna chen châna sansuokna sin a hung thaw chu ropui a ti thu le inzâna insângtak a pek thu a hril a, Hmarram sanhimtu a ni zie hrilin ama hrietzingna dinga tournament huoihawta um chu hlutsak nawk pei hlak dingin mitin a fiel a. Kum 2006 a Hmarram mipuiin harsatna an tuok huna lo sawmdawltu le lo ṭhangpuitu Sinlung Hills mipuihai chunga khawm a tharin lâwmthu a hril.
Guest of Honour chun hieng ni ropui le ni inzaum hmang nia fiela a um chu hlu le ropui a ti thu a hril a, Lt. Col. Rajeev Bakhshi chu inzâna insângtak a pêk thu a hril a, Functional President chun Lt. Col. Rajeev Bakhshi Memorial Football Tournament a hin a hrât tak nina le a lâwmman hai chau buoipui lova ei inunauna le ei inlaichinnahai siemṭhatna'n hmang ṭangkai tum ei tiu tiin hi huna fe khawm Hmarram mipui le Sinlung Hills mipuihai kuomah fielna a siem a, Hmarram mipuihai himna dinga hringna hiel inhlantu, Lt. Col. Rajeev Bakhshi chu Hmarram Saviour a ni thu le, châwi lâr pei a la ni ding thu a hril. Hi hunser a hin Captain Jitender Kumar Singh, 36th AR khawma thuhrilna hun hmangin Lt.Col. Rajeev Bakhshi, SM (P) chungchang hrilna neiin inzâna insângtak a pêk thu ursûntakin a hril.
Hi hunser a hin Peaceful Hmar, PDFA Secretary in lâwmlûtna thucha a hril a, James Pusing, President, PDFA in Khuollien hai chawimawina thilpêk inhlanna a nei.
Hi hunser a hin Lt.Col. Rajeev Bakhshi, SM (P) a chanchin hrilna le toṭawka sûnna hunser hmang a ni a, Parbung HYA in Coffin March neiin pâr inhlanna hunser hmang a ni a, Pherzawl Cultural Troupe le Parbung Cultural Troupe han hnam lâm inentirna an nei.
20th Lt. Col. Rajeeev Memorial Football Tournament 2026 Closing Ceremony le Lt.Col. Rajeev Bakhshi, SM (P) sûnna hunser hmang a ni zoin Final Match Saikhamakawn FC le Sakawrdai Football Team ha'n an inkhêl a, hun pâng ngaiah Saikhamakawn FC chun 2-1 in Defending Champion, Sakawrdai Football Team chu hnein 'Bakhshi Trophy 2026' chu Aizawl tieng an lo dawm phei ta a nih. Saikhamakawn FC hi MPL a inkhel hlak an ni a, an players 7 hai hi Santosh Trophy nei zo a khan an ṭhang a, Bakhshi Tournament 2026 a an Captain le Best Goalkeepr latu RS Lawmzuala hi Mizoram Team Captain ni lai zing a ni a, Bakhshi Tournament Final a hrâtna goal thuntu Saikhamakawn FC Midfielder, Kiran Chhetri hi India U-21 squad a ṭhang a ni bawk a nih.
20th Lt.Col. Rajeev Bakhshi Memorial Football Tournament 2026 a Champion~ Saikhamakawn FC hai Rs.100,000/- le Trophy inhlan an ni a, Runners up~ Sakawrdai Football Team hai Rs.60,000/- le Trophy inhlan an ni a, Third Place latu Parbung Youth Club hai Rs.30,000/- inhlan an nih. Hi tournament sunga Top Scorer- Lalthuomlien (Pherzawl Youth Club) chu Rs.10,000/- le Certificate inhlan a ni a, Best Player- David Lalremruata (Sakawrdai Football Team) Rs.10,000/- le Certificte inhlan niin Best Goalkeeper- RS Lawmzuala (Saikhamakawn FC) khawm Rs. 10,000/- le Certificate inhlan a nih.
The 20th Edition of Lt. Col. Rajeev Bakhshi Memorial Football Tournamen 2026 a hin Tipaimukh biel, Thanlon biel le Mizoram a'nthawkin team 16 an ṭhang a nih.
Hmarbiel mipui hai chunga phairam helpawl hai nunrâwng taka an che mêk lai sansuokna sin a thawna-ah kum 2006, January ni 20 khan Lt. Col. Rajeev Bakhshi hin a hringna hlu tak el a lo inhlân a. Ama hriet zingna dingin Kum 2007 a'nthawkin kum tin Lt. Col. Rajeev Bakhshi Memorial Football Tournament hi martyr a changna hmun Parbung khuoah huoihawt hlak a nih.
