“Lalpa chu ka Berâmpu a nih; tlasam naw ning” (Sâm 23:1)
~ Rev. Cliff Kawldinglien Joute
Khawvêl rorêltuhai le lalhai chu an sipaihaiin a vêng hlak a. Hnuoia lalhai chu ropui vieu hai sienkhawm an nêka inhnuoi le thilthawtheinaw lem hai vêngna hnuoiah um anni leiin, himna le thlamuongna tak tak an nei chuong nawh.
David chun Pathien chu ama hringna vênghimtu Pathien a nih ti a hrietchieng êm leiin, “Ṭhilṭhanaw hrim hrim ṭi naw ning; nang Ka kuomah i um si a” a ti thei a nih. Harsatna, natna, hripui, indona hmun hnuoiah lêng inla khawm, David vêngtu le humhimtu Pathien chu ei Pathien le mi Vêngtu a ni a, ei kuoma um zing Immanuel a nih.
Khawvêl rorêltuhai le lalhai vêngtu chun chau le sâwl hun nei in, an inlusu thei a. Lalpa mi vêngtu ruok chu a inlusuin, a innghil ngai nawh (Sâm 121:4. Ama chu lunginzîng nia ei inhumhimna, ei hrâtna le mi ṭhangpui vartu hnai zing a nih (Sâm 46:1).
Khawvêl rorêltuhai le lalhai vêngtuhai chun an i vênghai chu hmêlma, hripui le natna ânthawk an vênghim zo nawh. Ringtuhai ruok chu Iengkimthawthei vênghimna hnuoiah um ei ni leiin, hri ṭha nawtaka inthawka mi sanhimtu a nih (Sâm 91:3).
Hnuoia lal vêngtuhai chu an i vêngpa’n ama an vêng dânah thu a nei tak hlak. Ringtuhai ruok chu Pathienin ami vêng dânah thu pakhat khawm ei nei nawh. Pathien chun ei nuom dân le ṭha ei ti angin a mi vêng naw a, Ama’n a ditdân le nuom dân angin a mi vêng lem a nih.
Lalpa chu a mi vêngtu a nih, tlasam naw nîng ti ei hriet lai zing khawmin iengleia ei thla a la phâng hlak? Mihriem chun taksa hrisêl-damna ei mamaw a, sum le pai tlasam loa um ei nuom lai zingin ei tlasam zing bawk. An leh, ei tlâksam naw chu iengtak hîm ni tâng a ta? Lalpa chu mi vêngtu a ni a, a mi vêngna chu ieng huna khawm ei tlasam naw hi a nih. Chun Lalpa’n a mi vêng dân hi ei ni’n ei hrietthiem naw leiin tlasam angin ei inngai chau a lo ni lem. Chuleiin, Lalpa’n a mi vêng dân hi tiem thiem tum lem ding a nih.
Iengkimthawthei thlazâr hnuoia umhai chu hmêlma amanih, rinumna amanih, lungngainain amanih, ṭamin amanih, ṭiumin amanih, hri inamanih chun mi hnê naw ni a. Chuong po poa chun, mi vêngtu le hmangaitu Isu Krista lei chun ropuitaka hnêtu ei ni lem a nih (Rom 8:35, 37). Hallelujah!
.webp)
