~ Rev. Lalbiektluong
"Nangni in chawimawi tuo lawmhai, iengtin am ring thei in ta? Pathien tak chova suok chawimawina chu in zawng nawh"
(John 5: 44).
Hmun pakhata hin tlangval pakhat hi Inngaitlawm tak inruolsieknaa hin a ṭhang ve a. Inkhina chi hrang hranga an inkhinaa chun a thaw ṭha khawp el a. A endiktuhai khawm chun inngaitlawm an ti a. Chu tlangval chun lawmman pakhatna a dawng nghe nghe a. Lawmman pakhatna inchikna (badge of merit) chu an pek a. Phûrtakin a zakuo âwma chun langsar takin badge chu a bel a. Amiruokchu, chuleichun pakhatna a nina chu an hlippêk nawk a nih.
Langsär nuomna hi chapona pakhat a nih. Ka thaw a nih ti mi haiin hre sien ti nuomna lungril hi chapona a nih. Mihriem hin chapona hi ei piengpui a ni leiin chapona ka ni ti ei inhriet thei ngai nawh. Chapo inhrietna lampui ṭha tak chu inenna darthlalanga Krista hmang hi a nih. Mi, Isu hmaah a ngîr pha pha iengma lo a ni tih a'n hriet a. A thaw ṭhathai khawm Pathien lei a ni tih a hriet leiin mi dangin hrehai sien tina lungril a nei nawh. Chuleiin tûk tina Isu hmaa inlang thei chu chapona lakah vêngin a um thei a nih. Baptistu Johan chu a rawngbawlnaah a ram phêkin zui lut lut sien khawm, Isu varah a um leiin chapona lampui a pumpel a. "Ama (Isu) chu lien tuol tuol a ta, kei ruok chu chîn tiel tiel ka tih" a ti a nih (John 3: 30). Isu khawm a unau haiin mipui hmaa inlangin a thilthawhai hmu ve sien tina lungril an nei a. Fekân ruoiṭheah mipui tam hun lai takah Jerusalemah fe dingin an ti a, amiruokchu a nuom nawh. "Ka hun a la tlung nawh", a ti pek el (John 7: 2ff). To ṭawkin a nuom hunah a fe el a. A Pa ditdan ang taka a um peinaa chun a lung a awi a nih.
Chapo anga ei inhriet naw khawma chapona hin mi a lo ṭhuoi inril thei khawp el. Chapona hi nei der naw inla chu mi le khawm thubuoi nei mei mei naw ni a, lungsen khawm inkhât hleng a tih. Chapo inlangna ṭhenkhat chu--
(a) Thawlawm pe laia ṭhang ve si, thawlawm pe po tia puonglang laia puong lang ve loa um leia lungril a lo nat hin chapona lampuiah ei inṭhung a nih.
(b) I chunga kher naw khawm, i sûnghai thilṭha thaw an hril ve naw leia a rûk tea i lung a lo awi nawpui hin chapona'n an thuom che a nih.
(c) Pathienin angpuia siem ve tho mihriem, a nina, a hrâtnawna le a ngirhmun leia i ngaihnuoina lungril chu chapo lungril a nih. Pathien chun mihriem po po hi thuhmun vawngin a mi hmu / dawndai si a.
(d) Mi thil thawsuol le thaw indik lo thamlo taka i en/i nuisaw chang hin i lo chapo zing a nih.
(e) Taimak chu hlawtlingna a ni lai zingin, i hamṭhatna le hlawtlingnaah Pathien lei a nih tih i hriet naw chun chapona chu i lungril kawtkhar bulah a bawk zing a nih ti hriet a ṭha
Aw le, ei hril hai khi ei lo lem vawng thei naw a ni el thei, amiruokchu chapona laka mi veng dinga ni tina Lalpa Isu en chu inngaitlawmna lampui a nih ti chu pawm ei tiu. Inngaitlawmna indiktak chu Isu darthlalanga hmangtuhai a chau a um a nih. Hi lungril hi a nih sakawr tha hrâtna nêka hrât, neuclear ralthuom neka thilthawthei le hmêlma châng thei der lova zawr hnâpa sie theitu chu. Tirko Paula'n Isu lungril tia a mi lo hrilpêk hi ei tulai khawvela ding khawm hin thil pawimaw tak a nih. Hi nun hmang hin a nih Isu'n khawvel a ngamna, ram le kohran a'n dinna hmangruo chu.
"Lalpa mithmuin inngaitlawm ro, chuongchun chawisâng a ti cheu." (Jacob 3: 10).
