Umrangsuo: Garampani Sporting Association (GPSA) huoihawtnain kumtin summer chawl lai hin Football Tournament huoihawt zie hlak a nih. Umrongso ah Hmar khuo umsun Hebron in 70 lai chau umna ah Sinlung Club tiin an suok ve hlak a hratna vawitam an lak ve ta leiin mi huphur an kai hlak. Hi inhnel hi Pathienni (Sunday) khawm inhnel zie hlak a ni a, Sinlung Club hin kum dang khan “Pathienni hi kei ni kristienhai kan chawlna ni a nih” tiin hnielna an lo pek hlaka chu pawmpek a ni ngai naw leiin tu tieng tieng khawm hin hnielna pe chuong ta lovin pet ve pei el a ni tah.22nd July 2012 Pathienni sun dar 2:00pm khan Sinlung Club ‘B’ team le Denizens Club ‘A’ team (an ni hi NEPCO an nih) hai an in hnel a. ‘B’ team mei mei naupang teruol tiin hnesa ding anga an ngai a. An ring angin an thaw el si nawh. Second-half chen a khawm an lan ang zing el si. A hrat naw lem lem tla (Knock out) ding an ta bawk leiin inhnel a rush tan ta a. An ni lain hin Sipai Officer Tharon Garg, Major, Assam Rifle a nina suonghlur el a um a, a khel mawinaw hle. An suk tluk pal khawmin, a suktluktu ring a va rak a, Hebron mipuiin an khek khum a, thenkhat an va tlan lut a, puo tienga khek a hriet chieng tak Lalramsan Hekte chu a va hnek a, a va chil khuma, mipui lungsenin field sung an tlan lut a. Chuphing leh a sahimna ding zawng ni awmtakin a Body Guard hai a kutin a hui a, silai kawmin Player hai an chuk zawt zawt el a nih. Buoina a khawm mi theltu dinghai khah mi vuotu ah an thang lem tah. A hliem inrik met chu Mr.Vanramthang le Mr.Lalramsan Hekte hai an nih. Mi dang pathum Mr.Eleazar Zote, Mr. Joel Lungtau le Mr. Hnezo Zate hai hi Umrongso Cilvil Hospital panpui an ni a, nikhat le zan khat an um hnungin 23rd July zan tieng an suok nawk nghal a nih.
First Information Report (FIR) hi Police ah thelut tum a nih ti hi Major pa hin a lo hriet lei hin khawsung mi a lo in thi sen zing leiin mi hnam kara Hmar tlawmte um ni bawk, effect a sei ding anga an lang leiin thuok infuol tak putin FIR ziek sa diem khawm pek lut a ni ta nawh. Ama ruok hi chu GPSA in inhnel ta lo dinga hnawt dawk a nih.
Hieng lai zing hin 25th Assam Rifle haiin liemtah innrinni 21st July khan Haflonga Auto Driver an vuok leiin vawisun 23rd July 2012 hin Haflong Auto Driver Association haiin Haflong khawpui popo BANDH an thaw. Dima Hasao a hin Sipei hi an nun an tawrawt deu pei niin an lang.
