Patpuihmun, July 6, 2021, Virthli (ONP): Pherzawl District ta dinga lamṭhuom pawimaw tak hung ni mek, Jiribam - Tipaimuk Road, JT Road tia hrietlar, Zawlliensuo a Tuiruong chunga leilâk, (Bailey Suspension Bridge) dawna sin chun sunzawm zing a nih. Leilak dawna sin hun sawttak chawlsan a ni hnungin April, 2021 khan sunzawm ṭan a ni nawka, hripui inleng lockdown le harsatna dang dang karah sin hi sunzawm met met zing a nih a. Tuhin a leilâk hmangruo pawimaw Kolkatta a incha hai khawm a hung tlungkim tah leiin, thla 2 sung vêla leilâk hi zo inbeisei a ni thu Dr. Chaltawnlien Amo, bieltu MLA anthawk thu dawng a nih. Hieng ang lamṭhuom pawimawa leilâk bawlna sin sunzawm pei theia a um le daw zo el thei tah dinga a um hi mipuiin an hrietin lawmum an ti hle.
