Responsive Ad Slot

Kum 27 invawi hnungah Hmar medium of instruction Mizoram ah hmang ṭan ding

Monday, July 5, 2021

/ Published by VIRTHLI
Aizawl, July 5, 2021 Virthli (ONP): Mizoram sawrkar le Hmar People’s Convention (HPC) ha’n kum 1994 a inremna thuthlung anzieka inthawka kum 27 vel liem hnungah Hmar ṭawng chu Sinlung Hills Council (SHC) huomsunga Primary school a hai "Medium of Instruction" a di'n  hmang a ni ta ding thu, Mizoram sawrkar thuneituhai chun an hril.
Hi le inzawm hin vawisun khan “FIRST PHASE OF WORKSHOP FOR DEVELOPMENT OF HMAR MEDIUM TEXTBOOKS FOR SCHOOLS” ti thupuia hmangin State Council of Education Research and Training (SCERT), Seminar Hall, Aizawl ah Mizo medium a pawl 1-5 inchuklaibuhai Hmar ṭawnga inlet dan ding  hriltlangna workshop nei a ni a. 

SCERT Director Pi Laldawngliani Chawngthu i keihruoi hi workshop a hin SCERT tienga mithiemhai bâkah sawrkarin translator dinga a ruot mi 5 laia 3 an ṭhang a nih.

Pi Laldawngliani Chawngthu chun Mizoram a Primary level chen Hmar medium of instruction hmang a ni ta ding chu lawmum a ti thu hrilin, Hmar nauhai ta dinga mellung pawimaw tak a ni ding thu a hril a.

Hmar Medium of Instruction hi Pawl –I a’nthawka Pawl-5 chena hmang ding a ni thu hrilin, Pi Laldawngliani Chawngthu chun kumnâwk  academic session thar (2022-2023) a inthawka hmang ṭan  ding  niin a tirin pawl-1 ah hmang phawt nîng ata, a kum nawk (2023-2024) ah pawl-2 chenah hmang nâwk nîng a ta, chuongang pei chun a kum nawk peiah pawl-3, pawl-4 le pawl-5 ah hai hmang tung pei a ni ding thu a hril.

Translator hai chu fimkhur taka lekhabuhai inlet dingin an cha bawk a nih. 

Tuhin Pawl-1 inchuklai bu inlet phawt nîng a ta, tuta kâr sunga inlet zo dinga buotsai a nih. 


A hmatiemin inchuklaibuhai hi inlet pei tum a ni thu, thulâkna chun a hril.

SHC rawtna angin Mizoram sorkar chun inchuklaibuhai inlettu dingin mi 5 a ruota, chuonghai chu-

1. Upa Lalthankunga Hmar
2. Pu Lalvarlien Puruolte
3. Pu Sangaia
4. Pu Joseph H. Neingaite 
5. Pu Henry L. Khojol  hai an nih.

July ni 27, 1994 a Mizoram sawrkar le HPC haiin inremna thuthlung (peace accord) an ziekah clause 5.1 in a tarlang dân chun Hmar ṭawng chu Primary level chen Medium of Instruction a hmang ding le Mizoram ah major language anga pawm (recognise) dingin Mizoram sawrkarin hma la’ng a tih, ti a ni a.

Sienkhawm, kum 22 deu thaw anvawi hnung khawma sawrkarin clause 5.1 bakah clause dang thenkhat hai a sukhlawtling naw leiin Sinlung Hills Accord Implementation Demand Committee (SHAIDC) chun May ni 25, 2016 khan Gauhati High Court, Aizawl Bench ah zuolko in, 1994 accord sukpuitling dingin Mizoram sorkar a lo khing a nih.

SHAIDC i khingna chu thutlinga pawmin Gauhati High Court chun September ni 4, 2017 khan judgment order insuoin Mizoram sawrkar chu clause 5.1 le 5.3 hai, order insuo a ni anthawk kumkhat sunga sukhlawtling (implement) dingin an hriettira. 

Sienkhawm Mizoram sawrkar hin suonlam dang dang siema a sukhlawtling thei vat naw leiin High Court bawk chun May ni 8, 2019 khan “Contempt of Court” (Court thupek inzanawna) notice a'nsuo khum nawk a nih.

Hienga High Court in contempt notice ansuo khum phing hin, Mizoram School Education Department chun hma lain ṭum iemanizat zet SHC leh an inrawn hnungin Hmar ṭawng chu council huomsunga khuo-31 a Primary School haiah Medium of Instruction a hmang di’n official gazette ni kum October thla khan a lo insuo ta a nih.

Harsatna dang a um naw chun kumnawk  2022-2023 academic session a hin hmang ṭan dinga ti a nih.

Hi lai zing hin Hmar ṭawng, Mizoram major language a recognise dinga hmalakna ruokchu a la umnaw zing niin ei thulâkna chun a hril bawk. 

Chuelkhelah, SHAIDC chun Hmar Medium of Instruction hi Mizoram pumpui huop ding a ni thu  le SHC huomsung chaua hmang tumna chu MoS kal a nih, a ti bawk a nih.
Don't Miss
© all rights reserved
made with by Simon L Infimate