Jiribam-a Chêng Hmar Haiin Pâm Rorel An Nei

5th January, 2021, Jiribam (Virthli ONP): Kum tina an lo nei dân angin, Jiribam khawpuia chêng Hmar haiin, Jiribam Hmarveng Administrative Council (HAC) inrâwina hnuoiah, vawisun dar 10:00 AM khan pâm rorel (kumbul rorel) an nei. Hi rorelnaa hin Jiribam sûnga chêng Hmar hai In tin a'nthawk palai pakhat bêk fekhâwm dinga inhriettirna siem a ni angin, palai 82 an ṭhang.

HAC activities report, audit report, finance report hai bâkah HYA/Val-Upa, HSA Jiribam Unit, HNU Jiribam le HWA a'nthawk report ngaithlâkna nei a ni a, kum 2020 sûnga fam lo chang tah - Upa LT Ngaihte, Pu Lalawikung le Pi Niengneichin hai sûnna ṭawngṭaina Rev. Immanuel Hrangchal, P/S, EFCI in a nei bawk. 

Hi rorelnaa hin Jiribam thlanmuol thar nei dan ding le Jiribam Hmarvêng khawtlang sûnga Society siem dan ding hai hriltlângna nei a nih. 

Upa Raltawnlui, Adviser, HAC in hun hawng ṭawngṭaina a nei a, Upa Varrohlun Varte, Vice-Chairman in mipui fekhâwm hai lâwmlûtna a nei zovin, Pu Thangsanglur, Secretary le Tv. Henry Joute, Finance Secretary haiin HAC report an pêk; rorelna nei a ni zo hin Upa H.J Dinga, Chairman, HAC in lawmthu hrilna a nei a, Upa Benjamin Shakum, Jt. Secretary, Hmar Inpui Gen. Hqrs. in ṭawngṭaina'n hun a suktâwp.