Responsive Ad Slot

CONCEPT ACADEMY & HOSTEL hawngna le inhlanna hunser hmang

Sunday, January 10, 2021

/ Published by Simon L Infimate

Sielmat, January 10, 2020, Virthli (ONP): " Moulding lives for the future" thupuia hmanga Concept Academy & Hostel siem a um chu vawisun khan Rev. Zathangsing Zate in hawngna le Pathien kuomah inhlanna a nei. Concept Academy & Hostel hi Sielmat, Opposite Sielmat Christian Hospital a um a ni a, a kum tluonin Cl-X le XII inchuk ding mek le exam ding mek hai ta ding le Cl- X hnuoitieng hai ta ding khawma buotsai a nih.



Hi huna hun vawngtu le Teaching faculty ni bawk ding- E. Ramngailien Lungtau, B.Tech, B.Ed., (Lecturer, SCHSS) in thu a hrilna a chun Pathien ti hai chu mi var an ni thu, Pathien ti chu varna bul a ni tlat leiin hi hostel a inchuktirtuhai chun khawvel thiemna le varna an inchuktirna a hai Pathien thutak a inchuklai hai an inthanglien pei dan ding hai khawm an ngaipawimaw ding thu ursuntakin a hril a. Bel hemtu'n bel pilpawk ani laia a nuom dan dan a a hem hlak angin Concept Academy & Hostel a inchuklaihai chu an thei tawp suoa siem an tum thu le kohran, hnam le khawtlang ta dinga mi tangkai - officer le rawngbawltu tamtak sersuok chu an thil tum ani thu a hril.


Concept Academy & Hostel hi abiktakin lekha inchuk nuom insung harsatna leia tlangram le CCpur phairuoma sikul thaa kai pha lo, inchukna tha lem beisei hai ta ding khawma hi hostel hi buotsai ani thu a hril a. Hostel siem ding chun hmun le ram hai a tul a, Pu Darliengthang Infimate in rawtna hung siemin a naupa Erwin Fimthanglor Infimate (Warden) hai leh ngunthluk taka inrawntlangna nei ani zoin Concept Academy & Hostel hi siem a ni thu a hril.


Hi hostel a um nuom hai ta dingin Kum 2021 a ding admission thaw thei zing a ni tah a, hostel dang angin admission fee a um ve naw a, teaching faculty ding hai khawm naupanghai inchuktirna kawnga tawnhriet hau tak tak ning an ta, hostel a um hai ta dingin extra tuition fee pek ngai bawk naw nih. Hostel fee khawm an man thei ang tak ning a ta, motivational talks nei dingin Officer le Entrepreneur hai ko ni hlak an tih, kartin worship service um bawk a tih. A hriechieng nuomhai ta dingin E. Ramngailien Lungtau, Lecturer, SCHSS ( Mob.7085604245), Erwin Fimthanglor Infimate, Warden (Mob.7628819573) hai kuomah ngaiven thei zing a nih.

Don't Miss
© all rights reserved
made with by Simon L Infimate