Responsive Ad Slot

NC HILLS MI HMUNDANGA INTANG HAI THUOIKIR

Wednesday, May 13, 2020

/ Posted by Simon L Infimate
Muolhoi, May 13, 2020, Virthli (ONP): Inchuklai le inhlawfa Covid-19 leia mani in lum pan thei ta lo NC Hills (Dima Hasao) mi Manipur, Mizoram le Cachar (Assam) a intang hai chu an harsatna HSA Assam Hills JHQ an intlun angin HSA Assam Hills Joint Headquarters le HSA General Headquarters in kawng dang danga an buoipui hnungin zani zantieng (12.05.2020) khan mi 34 (sawmthum pali) hai chu an khuo le veng hai seng an tlung thei ta thu dawng a nih.


Hieng ramdang a intang hai hi, Churachandpur a Bible inchuklai, Imphal a inchuklai, harsatna leia hmundanga inhlawfa a um Lockdown leia intang laklaw hai an nih. Cachar (Kumba, Kamrangphailien, Neithangpunjee le Muoldam) khuo mi pakhat (1) seng an ni a, Jinam Valley (Leiri - 5, Jinamghat - 2, N.Hmarlusei - 2, Muollien - 2, Tattephai - 1), Tuolpui - 2, Hebron Umrangso - 1, Saron Mahur - 8, Muolhoi -7 hai an nih.

Churachandpur a intthawk hin College hotuhai le Hmar Inpui GHQ thuoitu haiin Manipur-Assam Pass an buoipui pek a, Jiribam a Manipur le Assam gate a hai HSA Jiribam JHQ in theitawp in an lo bawisawm a, Mizoram a intang hai Mizoram an suok theina dingin Mizoram a HSA GHQ thuoitu haiin an riruong a, Hmarkhawlien ah Mawtawr inthlengkuolna nei el ni loin, Hmarkhawlien khuosung thuoitu haiin innghakkhawm ngai hai riekna ding inhawi tak buotsai pekin, fak le dawn hai chen thei tawpa buotsai pekin an lo bawisawm bawk a nih. Laklaw taka Hmarkhawlien chen thuoi tlung ngai hai HSA GHQ thuoitu Hmarkhawlien a um haiin riruong an lo buotsai pek bawk a, Silchar HSA Branch in mawtawr Pass (inter-district) hai an buoipui bawk a, HSA Assam Hills Joint Headquarters le HSA GHQ thuoitu hai chun Haflong tieng fe le hung dan ding mawtawr le riruongna dang dang hai siemin sawrkar tienga buoipui ngai iemani tawk hai an buoipui a nih. Jinam Valley tieng pan ding hai popo hi NCHAC Jinam Valley bieltu MAC Pu Zosumthang Hmar in Hmarkhawlien a inthawkin mawtawr hai tir pekin an khuo seng a thak bawk a nih. 

Hieng hmundanga intang thuoisuoka um hai hin nasa takin a buoipuitu hieng HSA thuoitu hai popo, Hmarkhawlien VA, Pu Zosumthang Hmar le an khuo senga khuosung thuoitu haiin an umna le an umdan ding haia riruong felfai tak an siempekna thu le mani khuo thuoitlung an nina thuah hin anni hai chunga hin an lawm hle thu an hril bawk a nih.

HSA GHQ thuoitu hai chun Hmarkhawlien VA kuoma ngenna an siem sukpuitling peka, harsa le intang hai inzinna lampuia chambang hai chinlem boa an lo bawisawmna le khawsung remruot dan reng hai lawmum le ropui tiin inpakum an ti hle a, MAC Pu Zosumthang Hmar in a biel mipui hmun tin ramtin a intang hai thuoilutna sin thahnemngai taka a thaw hi lawmum le inpakum an ti bakah HSA Joint Headquarters le Branch thuoitu hai popo chungah thangpui ngai hai theitawp a an lo thangpuina le bawisawmna thuah hin lawmum a ti tak zet zet a ni thu a an hril bawk a nih.
Don't Miss
© all rights reserved
made with by Simon L Infimate