Responsive Ad Slot

COVID-19 THLIPUI A HRÂNG IE

Thursday, March 26, 2020

/ Posted by Simon L Infimate
~ John L Pulamte

"... Thîna hlim ruom hraw lang khawm,
Thil ṭha naw hrim hrim ṭi naw ni'ng;
Nang ka kuomah i um si a..."
~ SÂM 23 : 4

Tûlaia khawvêl titi suktamtu tak le chanchinbu hluo râwn tak chu ieng dang ni lovin, natna ṭibaium tak Covid-19 (Co- corona, Vi- Virus, D- Disease, 19- 2019) China rama khuo pakhat Wuhan an tî a inthawka hung suok hi a nih.


Tûlai taka ding chun, Pathien thîk khawpin Ama hming nêk hmanin ei hriet lârin ei sâm inzing lem a, article (sermon) tam tak a cho suok a, nî tin chanchinbu sukmâwitu a lo chang tah. Pathien thû nêkin ei invawipui a,  ei ṭî lem hman hman ta khawm ni sien a hawi hiel tah. A tar a zûrin hî natna hi manî hming hriet tluk zetin a hming a hre naw a ram ei um ta nawh. Hieng ang hin Pathien thû hi hei invawipui inla chu ei khawvêl hi a va'n hawi âwm de aw tî dâm chu lungrila hung lûtin, ram tin ram tang chu ka ngaituo kâi a; chuong chu ni sien la, ei chêngna khawvêl hi Vân ram thlafuolah ei inchangtir hi a ni ringawt el ding bah. Sienkhawm chu chû thil chu boruoka in bâwl ang lek, dûthusâm rama um, tak chang ngai lo ding thil chu a ni si a.


Tûlai chu chanchinbu sukmâwitu el chau khawm ni ta lovin, ei titi ṭhuoitu tak a hung ni tak. A boin sêramu a thûr thei ta nawh. Ei ṭî tak ni sî, ei hriet nuom zâwng tak ni bawk sî a nih. Mak ve mei mei! Ieng anga thu hring le ṭha sermon khawm khêkpui rak rak inla, ei naah a lût ta nawh, vûr rama barap (ice cream) inhnikzie va sermon pui rak ang chau hi a ni tah, kawngro a dêng ta nawh. Ni e, tûlai rama chu mihriem hung pieng dân nêkin râpum taka an thî dân hai hi a ni pei lem tah ei hriet châk zâwng chu. Chanchin a ṭha tieng nêkin a se tieng vawng hriet châkna'n a mi ṭhuoi kâwi zo tah.
Chu chu hre zingin, thu dang hla dangah pakâi lovin chu tieng chun ei inher lût tum lem a nih.


Hî natna hri hung inṭanna ram, a China tak hmanin  an sukrêm (tukdawl) tieng lem an' tah. Thla khat sûng vêl chauvin a enkawlna hmunhai chu inpeiin, a enkawl dân dinghai le thil ṭûl po po hai chu an induong fel zo vawng hman a nih. Hieng lâwma inrang le harsa taluo um loa hî natna laka an insie kieng el thei bîk hi khawvêl maktî le ringhla a kâi hiel a, ruohmangna nei sa diema hî natna hrî hi an siem suok ni'ng a tih tî ngaidân nei pâwl an um hiel. Hî phêna hin thurûk ie'm a ni tak chu a um a um a ni phawt. Israel le US khawmin hî thurûk hi an hriet ngei taa ring a ni a, amiruokchu san tam tak le thil pawi thei ding vêngna leiin to an la'n chû hrî a nih tia ngaidân nei pâwl khawm an um bawk. Ieng po khawm chu ni sien, hriet chieng ieng khawm a la um naw a, bu tak khûka khûkpui ding lem chu a ni nawh; ring thû el chau a la nih. Pân loah tho a fu di'm? tî chu hun kutah la sie hrî phawt ei tih. Dârthlalang  le hunin khêl an hril ngai nawh tî a ni si a. Chu chun thu dik a la hung puong suok ding a nih.


Covid-19 hin China hi inkieng tieng a pansan zo chau leh, rambung dang dangah a ṭuon nâwk a. Chuong rambung tam tak hai laia a suortluon nasa bîk zuola ei hriet chu Italy hi a nih. A san chu Italy rama hin textile garment industry (thuomhnaw siemna khâwl) lien tak el a um a, chû hnuoia chun China mî a nuoi têlin sin an thaw mup mup a, China leh inlaichinna ṭha tak nei an nih. China rama khawm chun, a vângduoi ding hrî hrîin, Wuhan khawpui, covid-19 hung inṭanna hmun kher kher hi a lo ni fûk hlau nâwk a. Chu bâk a, tû kum january 25-a inthawka february 8, 2020 sûng kha China hai kum thar a lo ni nâwk a. Italy rama chêng China hai chun, an kum thar zu hmang dingin China khawpui an pan tâwl sup sup a. An hung kîr tieng hî natna hrî (Covid-19) hi Italy ramah an hung phur lût ta ṭeu el a nih. Chu chû hrî chun chechâng hlei thei lovin a man khawng a, a ram pumpui hmêlma râl liena inchangin, nasa takin a kawnkawpui ta a nih. Khawvêl hmaah ṭhangpuitu ngaiin an ṭap inrûm a, law ngaina hre lovin an bâuah mei khû a suok a, an sepui raw tuor tlawk tlawk el a nih.


Khawvêlin hieng lâwma natna hri ṭîum le phur rik mi siempêktu hi a la tawng ngai nawh.
A ni têlin fûr tui lien vânglai ang elin tâwp lovin a chîm chin a'n sângin a'n dar lien zuol deu deu a, einî lai chen khawm a mi hung chie zawp ṭan mêk zing ta a nih. Sienkhawm ṭi le zâm ding hi ei ni nawh. Ei thaw thei um sun chu fîmkhur taka invêngna sin thaw kha a ni el a, râl do ding anga tharum insuo le va pên suok a ṭûl naw a, manî ina inkhum el kha ei do dân ding awlsam tak chu a ni el. Ei Pathien hin ei zo lo ding thil hi phur rik a mi'n phurtir ngai nawh. Pawisa chu a tam leh a hmangna ding a lo tam ve pei hlak ang hin, mi lien mi lalhai chu an buoina khawm a lo lien ve pei el. Entirna dingin, China le USA dâm hi hnam lien le ropui an ni a, annî pahni hi an hritlâng kek chun, a khawvêl pumin hritlângin ei lo inkhul ve naw thei ngai nawh. Covid-19 hi chû entirna ṭha tak chu a nih. China a'n khul a, khawvêlin ei lo hritlângpui ve mêk chu a ni ta hi.


Hnam lien le changkâng lem hai chu an harsatna tuok a lien khawmin a do lêt dân ding khawm an hrietin an kengkaw hne a, an tukdawl zung zung el. Einîhai anga hnam hnuoihnunghai lai dâm hin hripui hung inlêng tak tak sien la chu, mîhai angin do lêt hne nâwm ei ni a, Noa hun lai ang khan tui lienin (natna hripuiin) a mi lem hmang vawng el âwm. Amiruokchu chu chu Pathienin phal naw nih. Ei Pathien hin ei thei bâk chu thil a mi phût ngai naw ang hrimin, ei phur zo lo ding thil chu ei liengkoah mi'n bâttir naw tawp a tih. Mihriem hi ei phur zo ding tâwk le ei phâk ang tâwk le inphu peia phur rik hi Pathienin a mi pêk hlak a nih. Natna khir tak tak hai dâm hi a tlângpui thûin, mi retheihai nêkin mi hâusa sûngkuo deuin an invawi nuom bîk deu. Ei hei sui chet chet a, thli sie hrângna hmun, hri ṭitum inlêngna hmun, lîr inhnîngna hmun, tlâng kângna hmun, tui lêtin a chîm buoina hmun le thil mak le ṭitum tak tak a tlungna hmunhai hrim hrim hi a tlângpuiin einîhai chêngna hmun kilkhâwr nêkin, ram changkângna hmun haia tlung a ni deu zat zat vawng. Amiruokchu ei tâ a ni ve nawh ei tîna lem chu a ni nawh. Ei Bible-in "Iengkim in tâ a nih" a ti si a.


Ram changkâng lem haiin an tuok ang hi hei tuok ve ding ni inla chu, ei phur zo teu naw ding a ni a, chûleiin ei fel le ei ṭhat lei rêng khawm ni lovin; hla siemtuin,
"Phû lo hmangaina'n ka phur a mi'n zâng tah..."
a lo tî angin, chû hmangaina pâr tlântuhai chu ei nî leiin, ei phur chu inzângin a lo um lei a nih.


Tiena pi le puhai ṭawngka suok, "Sakei huoiin pasal ṭha a ko suok a, vângduoinain hmangaitu" tî ang khan, vawisûn huna ei harsatna tuok hin hmangaitû Pathien a ko suok ding a nih. Chûleiin lungzîng nâwm ei nîu va, harsatna hmuna hin Pathien hmêl hi a'n lang fie zuol hlak a ni tî hi na hriet el chauva hre lovin, a takin muongpui ei tîu. Hieng hun hi an' nâw ei Pathien nei ei sawr ṭangkâina ding hun tak chu? Chûleiin vawisûn nia harsatna ei hmasawn mêk hin Pathien hmêl a mi'n hmûtir ding a ni a. Ring nawtuhai angin thlaphângin ṭi nâwm ei nîu. Hieng hun hi a nih Pathien neituhai danglamna hun chu.


TLÂNGHAI TIENG KHIN KA MIT HANG INLÊN KA TIH,
KHAW TIENG AM A MI ṬHANGPUINA DING HUNG A T'A?

A MI ṬHANGPUINA DING CHU LALPA,
HNUOI LE VÂN SIEMTU KUOMA INTHAWKIN HUNG A TIH.

AMA CHUN I KÊ INPHET PHAL NAW NI A,
NANGMA VÊNGTU CHU INLUSU BAWK NAW NIH.

[SAM 121 : 1,2&3]
Don't Miss
© all rights reserved
made with by Simon L Infimate