Tuiṭhaphai, November 11 (HT): Liemtah November 11, 2024-a Jakuradawr, Jiribam hmuna CRPF hai kuta Hmar pasaltha 10 ha’n ram le hnam ta dinga martyr changa, an hringna hlu tak an lo inhlan ni champha vawikhatna chu November 11, 2025 zantieng dar 3 khan Tuiṭhaphai, CCPur-a Saikawt khelmuol-ah ursûn taka inser a nih. Pasaltha hai thi champha hi Hmar Village Volunteer Council (HVVC) huoihawtna hnuoia inser niin, HVVC ha’n pasaltha hai condolence salute pein, sunna hun hmang a nih.
Pasaltha hai martyr champha inser le inzawmin Churachandpur khawpui sunga Hmar area/schools hai an inkhâr bakah Hmar mi dawr siemtu hai khawma dawr hai khârin, umnî khâm meuin an inser.
Rev. Dr. Lalhmuoklien in hun hawng tawngtaina neiin, Secretary, HVVC in introductory speech a nei zoin Rev. Lalramlawm Inbuon chun pasaltha sungkuo hai tawngtaipekna a nei a. Hun hmang sungin Hmar Inpui Gen. Hqtrs le thuoitu dangdang ha’n thu an hril a. Pasaltha sungkuo-hai aiawin Mrs. Tinneilam W/o (L) Lalsiemlien Hmar in thu a hril.
Pasaltha, ram le hnam ta dinga martyr chang hai chu -
Lalsiemlien Hmar (30) s/o (L) Kunga of Valpakot, CCPur;
Henry Lalsanglien (25) s/o (L) Lalnunmawi of Khawpuibung, CCPur;
Elvish Lalropui Zote (21) s/o Laltansang of Khawpuibung, CCPur;
Robert Lalnuntluong (16) s/o Albert Amo of Ngurte, CCPur;
Joseph Lalditum (19) s/o Rosangzuol of Muolvaiphei, CCPur;
Lalthanei Infimate (22) s/o Khawpuihlun of Muolvaiphei, CCPur;
Francis Lalzarlien (25) s/o Vanlalsuong of Thenmol, CCPur;
Ruolneisang (30) s/o Lalsonlien of Tuolbung, Tipaimukh;
Ramneilien (29) s/o Rema of Thenmuol; le
Fimlienkung (31) s/o Benjamin of Ngurte, CCPur hai an nih.
Hun hmang sung hin Lily Ramthar, Joseph Pakhuongte le Gladys Lalparzo haia inthawk hla ngaithlak a ni a, Rev. Joseph R. Joute in tawngtainain hun a khar.
Hmar pasaltha 10 hai ruong postmortem report dungzui chun an taksaah silaimu tam tak a lût el bakah a tamlem chu an hnungtienga kap an ni a. Silai-a kap el chau ni loin nasa taka sawisakna hnuhma hmu thei dingin a um a. Autopsy report dungzuiin Fimlienkung Ngurte, Francis Lalzarlien, Lalsiemlien Hmar le Henry Lalsanglien hai lem chu an mitmu khingkhat seng lakdawk a nih.
Hi chau ni loin, Union Finance Minister Nirmala Sitharaman in Lok Sabha-ah Manipur economy tungding a ni theina dingin assistance a pawimaw ang pek a ni ding thu a hril bawk a. Hi lei hin IDPs hai thlierhran loa inang vawnga enkawl le enkai dingin an ngen a nih. Sawrkar thlungpui in Manipur sawrkar fethlenga IDPs, relief centre-a um le um lo hai ta dinga sum a hung pek hai belkhawm Rs. 647 crore a tling ta a. Tuta IDP-hai pawimaw Justice and Humane Governance a ni leiin a tawp chena thangruol dingin fielna an siem.
