Responsive Ad Slot

Sinlung Hills Council Election ding le inzawma HPC (D) GHQ thusuok

Saturday, October 12, 2019

/ Posted by Simon L Infimate
CCPur, October 12, 2019, Virthli (ONP): HPC(D) General Headquarter chun hungtlung ding 5th November, 2019 a Sinlung Hills Council (SHC) General Election nei ding le inzawmin a hnuoia ang hin thusuok a siem.
-----------------------------------------------------------

PRESS RELEASE
12/10/2019

A hmasatakin Hnama mi siemtu ei Pathien kuoma ropuina le chawimawina um sienla. Sinlung Hills Council sunga mani chanvo le ditthlang theina hun hung ruottu Mizorama Sorkarna kengkawtu MNF chungah HPC(D) General Headquarters chun lawmthu a hril. Sinlung Hills Council sunga mipuihai hi hun hlutak chuongkaitu po po ditsakna chibai vochuom kan buk bawk cheu.

A biktakin, Mizoram Hmar-phei, tuta Sinlung Hills Council nita hin thang iemani sung kha hun khirtak tuokin, mani chanvo le hmasawnna kawl eng hmu phak ve loin a lo um a. Hnam thil taka khawm unau hmelhai thawin, Nau le Pa (Sorkar le Hmar Pasalthahai) karah hmelma ang ela inepna lo um ta sienkhawm, Inremna Thuthlung a velhnina chu April 2, 2018 khan HPC(D) le Mizoram Sorkar chun an lo ziek chu Khawvela Hmar mipui le Sinlung Hills huom sunga cheng hai ta dinga mellung pawimaw a nih. Hmar haiin mani chanvo le nina (constitutional right & identity) humhal na chu 1985 khan tannin, July 27, 1994 khan a vawikhatna dingin Mizoram Sorkar leh Inremna Thuthlung (Agreement) an lo signed a, chu inremna thuthlung chun ngaisak a hlaw zo naw leiin 1995 a inthawk Hmar People’s Convention (Democratic) - HPC(D) chun ralthuom hmangin Sinlung Hills Council puitlingna ding chun hmalakna a nei zawm ta pei a nih.

Sinlung Hills Council piengna ding hin khawvel hmuntina Hmar nauhai chun mani thei ang angin hma dawmin, thi le thau, luvawm chana thisen inluon ram an chang a. Fahra le hmeithai tamtak a sersuok pha a. Pasalthahaiin lamsuk, ruom le tlang hrut velin, thosi le invawt habe tuorin, phing tam dangchar leia tamsawl hai tuokin, Jail runthim le sipai kutthak nulna leia an sakruonga panser hnuhma le awngrawp an chantawk lo nita hai kha an va hlu ngei de…

Vawisuna hi inthlangna hmasuon theia pasaltha hring dama la um hai hi ei Pathien thatna zar ei tinaw thei nawh.

Kum 35 hiel invawia thisen inluon ram, Sinlung Hills Council hi a parvula, ra an suona ding chun a sunga chenghai chungah an nghat tah. A enkawl le cheibawl ei thiem naw chun, ei tap hla hai kha thang la hung thar pei hai tap hla la hung ni pei a tih ti inlau a um tak zet. Pathienin Israelhai khawm Kanaan ram an panna lampuia suknawmnat le harsatna an tuokhai theinghil lo dinga an fui angin, Sinlung Hills Council piengna dinga a chin a lien, nuhmei pasal thlir lova nau hase tuora ei inrumna kha theinghil nawng ei tiu. Zinga dinga ei ram kalbi induongna hi vawisuna ei ditthlangna chun hung hril a tih. Zalenna kawl hung engsuok mek hi hmang thiem a, tangka sum le inhlemna hmangruo hnawl ngamin, Hnam hmangaina lungril indiktak put seng dingin ei inngen mawl mawl a nih.

A tawpna takah, Sinlung Hills Council Election hmasuona um mek hi boruok muongumtak le zalentak hnuoia mani chanvo “Adult Franchise” hmang seng dingin HPC(D) General Headquarter chun mipuihai ditsakna an hlan nawn cheu. Hi hun le inzawma muongna le himna sukse thei zawnga hmalak hrim hrim chu HPC(D) Gen.Headquarters chun a dodal tlat ti kan puong a. Internet/Social Media fethlenga thu belchieng dawllo, mimal le pawl hming hmanga thusuok siem lo dinga mitin fimkhur seng dingin kan inhriettir bawk a nih. A lo thawlui an um chun HPC(D) General Headquarters chun suizuiin, an phutawk hremna peng a tih.

Hnama Inthahnemngaipui,

Sd/-
(LK HMAR)
Commander-in-Chief
HPC(D) GHQ

Sd/-
(ALAN HMAR)
Defence Secretary & External Affairs
HPC(D) GHQ

Sd/-
(THANGSIEM HMAR)
Deputy, C-in-C (Administration)
HPC(D) GHQ

Sd/-
(LALDEMLO HMAR)
Deputy, C-in-C (Operation)
HPC(D) GHQ



Don't Miss
© all rights reserved
made with by Simon L Infimate