Responsive Ad Slot

Retzawl-Ngaibanramthar (Amranagar) Road thua inbiektlangna nei

Saturday, October 12, 2019

/ Posted by Simon L Infimate
Retzawl, October 12, 2019, Virthli (ONP): Zani zan khan Hmar Peoples' Union (HPU) hnuoia Retzawl - Ngaibanramthar (Amranagar) Road Construction Committee thuoitu hai chun Retzawl le Doiheng khuoah lampui chung thua inhrilhrietna an nei.

Hi lampui hi kum 60 deuthaw rausan ta hung alo ni ta a, hun sawttaka inthawka hilai ei ram delna hmuna lampui siemțhat ani thei dan ding ngaituoa HPU in alo buoipui tah chu a hmawr inbawk a hnai ta hle. Hi lampui siemna ding hin tlawmngai hai zawngkhawmin chu hai sumtuok hai hmangin lampui khawm hi țum khat lo sukthar tah a nih. Thu hnung le thuhma hai le sawrkar anthawka thil bawzuidan hai chipchier taka hrilna hun hmang ani a, hi lampui ei hnam ta dinga a pawimaw zie hai khuosung thuoitu hai kuomah hrilna nei ani bawk. Tuta lampui siem dinga bawzui mek hi PMGSY hnuoia hotuhai hmalakna zara siem thei dinga ahung um ta hi khuosung mi hai chun lawmum an ti thu hai an hril bawk a nih.

Doiheng khuo hi NC Hills (Dima Hasao) a Vate khuolzin tamna tak hmun khawm ani a, kumtin vate khuolzin en dingin mi tamtak an fekhawm hlak a nih. Lampui țhat tanaw lei hin ti angin mi an fe thei ngainaw a. Lampui țha a hung um chun khuolzinmi tamtak an hung thei ta ding ana, a khuo mi le a ram ta ding khawma hlawkna nasatak intluntu ni a, tlai le an ching hai khawm awlsam taka zawrsuok thei ani ta ding hi ațha bek bek le lawm a um bek bek thu hai khuo mi hai chun an hril a nih. Lampui neina dingin biekin inkhawma hai khawm kar tin vawkhat bek țawngțaina an nei hlak thu Doiheng khuo mi hai chun an hri a, lungril a hne hle a nih.

Retzawl Gaon Bura (GB) Pu Thilsinghluo Tuolor in Road Construction Committee thuoitu hai hi bufakpuina a nei a, thuoitu hai chun lawmum an ti hle a nih. Retzawl, Doiheng, Arda le Khawhmunlien khuosung thuoitu haiin Road Construction Committee nasa taka an tlawpna hi Committee chun lawmum a ti hle. Chun, hi lampui nei thei dan dinga nasa taka bawzuitu le hmalatu Pu Zosumthang Joute, MAC, NCHAC (Road Construction Committee member ni bawk) kuomah HPU Road Construction Commt chun lawmthu a hril a, chu chau chu niloin fe le hungna ding mawtawr khawm ala hung tum nawk pei hi thuoitu hai chu an lawm hle bawk a nih. Chu bakah Pu Lalremthiem Tuolor (Contractor) khawmin fena le hungna ding mawtawr pakhat a hung tum lei khawmin Committee chun a lawm hle a nih.






Don't Miss
© all rights reserved
made with by Simon L Infimate