Responsive Ad Slot

HSA le Virthli in Given Lawmpuina thilpek an pek

Friday, May 10, 2019

/ Posted by Simon L Infimate
Aizawl, 10 May, 2019, Virthli (ONP): Hmar Students' Association (HSA) General Headquarters, HSA Aizawl Joint Headquarters le Virthli (ONP) chun Ningani (9/5.2019) zân khan harsatna tamtak palthlanga hlawtlingna chang tâk Bilkhawthlir naupang Given Lawmnakima Ṭhiek chu lawmpuina thilpek sumfaiin cheng 16,000 an inhlân.

HSA Aizawl Joint headquarters ṭhuoituhai chun Ninga zan khan an tlungna Aizawl Venghlui a Pu T Liansiama in ah lengchil in Given le a pa Pu David TVL Hmangaiha kuomah lawmpuina thilpek hi an inhlâna, HSA Aizawl Joint headquarters Treasurer Nk Jasmine Ramtharmawii in HSA General Headquarters aiin cheng 5000 le HSA Aizawl Joint headquarters aiin cheng 5500 anhlâna, HSA Aizawl Joint Headquarters President le Virthli administrator (Mizoram region) ni bawk  Pu Henry L. Khojol in Virthli aiin chen 5500 anhlân bawk a nih.


Hi huna hin HSA a'nthawkin infuina le lawmpuina thucha ngaithlak a nia, Pu Hmangai a inthawkin lawmthu ngaithlak a ni bawk.

Pu Hmangai chun a hriet ngailo a unauha'n hienga an chungah hmangaina le lunginsietna an inlangtir el chu lawmum tiin ropui a ti hlea, lawm taluo leiin a ṭap suok hiel thu HSA ṭhuoituhai chun an hril.

Tarlang tah angin Given hin a pa lo sinthawah a ṭhangpui hlak leiin school khawm kai mumal theilo le lekha khawm tiem mumal thei lovin hun a hmang hlaka, sum an neinaw leiin pawl-10 anchûk ding khan an school in a thlawnin admission anthaw peka, lekha anhnik hle ti an hmu leiin an zirtirtuhai chun an lunginsiet ema uniform le thil dang danghai an inchawk pek hiel a nih.

May ni 2, 2019 a MBSE in pawl-10 result a suksuok tâk a khan Given hin full mark 500 ah mark 433 (86.6%) hmuin Distinction ah a pass a, subject po po- English, Mizo, Mathematics, Science le Social Science a hai letter mark a hmu vawng bawk a nih.
Don't Miss
© all rights reserved
made with by Simon L Infimate