Guwahati, May 11, 2019,Virthli (ONP): North Cachar Hills Indigenous Students' Forum (NCHISF) a'nthawk Palai paruk hai chu Guwahati a fein ni 3 sung Assam rama sawrkar thuneituhai inbiekpuina neiin NC Hills mipuihai harsatna tamtak an inthlun.
May 8, 2019:
1) Pu Sunil Jindal, Chief General Manager, Regional Office, Guwahati Office chamber a NHAI officer hai le NCHISF hai inbiekna nei ani a, Lumding-Silchar road siem dinga ti an la siem naw zing nasan Chief Election Commissioner in tender hawng phalna a la pek naw lei ani thu a hrila. Chun ISF hai ngena angin HCC Company hai chu Work order Contractor kuoma an pek dawk hma po lampui chu a sietna hai lo siem dinga remti a nih. CGM hin ISF Palai hai kuoma chun zantieng la la hin Delhi tienga NHAI head office a 49 Crores lampui repair nadinga Estimate Head office a an lo submit ta chungchanga inbiekna um ding ani a, sukfek ani ngei a beisei a ISF hotu hai chu ringzo dingin a fiel bawk.
2) SBI Headquarters a fê in Chief General Manager hai kuoma Mahur a ATM inṭhut dinga February thla a an lo hnina chu hrilpui nawk an ni a, ATM machine chu ala hung naw leiin a hung tlung hmasataka inṭhut ngei dingin an hril bawk.
Chun, Harangajao a mipui pawimawna le inzawmin SBI Branch siem ngei nisien ti rawtna chu tha an ti pui a, SBI Zonal Office Silchar chu inhrietirna an lo pek ding thu an hril a nih.
3) Shri Hiren Nath, IGP(SB) le hohlim tlângna nei a ni a, NCHISF hai hmalakna thua a thei ang anga ṭhangpui dinga a hril angin Palai fekhawm hai hmabul ngeia Sawrkar thuneitu tamtak chu phone a bie in kawng iengkim a Students hai chu thlawp dingin a ngên nghal bawk.
May 9, 2019:
1) Pu N.K Prasad General Manager, NF Railway le NCHISF Palai hai inbiektlângna an nei angin GM chun Compensation thu a sukfel ding hai an la sukfel zo tawk naw deu leiin mipui hai lo chiai lo dingin palai hai kuoma a hril bawk. Chun NCHISF in Mahur le Ditokcherra Station ah Foot over bridge siem dinga hnina a lo pêk angin Mahur ah siem a ni ta a, amiruokchu Ditokcherra a siem zo a la ninaw thu hi GM kuoma hril ani a, GM in an hmatieng DRM Lumding kuoma a lo intlun ding thu a hril.
2) APDCL CGM, GM le Officer mi pawimaw tak tak hai le inbiekna nei a ni a, NC Hills sûnga abik takin Hmar khuo tamtaka Electric Meivar la lût nawna hai chungthu a, 6 Feb. 2019 a CGM APDCL a Chamber a Joint meeting in alo rêl angin tuchena sin zo lova um nasan hai hrilna an nei. CGM hin khuo a tam lem hin Solar light an lo lak ta ti complaint a lut lei a nih tiin a hril. ISF hotuhai chun nasataka solar ni lo a Electric ngei mipui in an dit thu hai an hril mawl mawl a sawttak inbiekna um zo chun Joint meeting hi final decision siem nading in AGM (RE), Contractor le SDO hai kuoma chun Details report Solar lo la ta le Electric keina a tul ding popo hi 16 May chena report pe dingin CGM hin a hrila, hi report dungzui hin sin hi sunzawm nawk dingin a hril bawk.
Chun Harangajao area a mipui in an dittawk Power supply an hmu naw leiin 33KV Power sub-station inṭhut ngei dinga ngênna chu CGM hin Board Meeting um hmasataka a lo putlût ding thu a hril.
3) Pu Sum Ronghang, HAD Minister Govt. Of Assam chu a Chamber ngeia inbiekpuina neipui in mipui harsatna tamtak hriltlâng pui a ni a, ISF hotuhai in a thei nana a thangpui dinga an ngena chu HAD Minister hin Palai fêkhawm hai kuoma chun Mini Stadium Signature Project angin a pêk thei ding thu a hrila, chun a hmun ding khawm Sikpui ruoi a Chief guest a ei fielna Muolhoi a ding bik hin ni thei sien ti ani bawk. Minister hin ISF palai hai kuoma chun Consultant hai rawtna Memorandum le (DPR) Estimate an hmatienga siema Student ṭhuoituhai chu hung nawk dingin a hril.
May 10, 2019,
Pu Raj Chakrabarty Commissioner & Special Secretary PW (Building&National Highway) Department chu a chamber a NHAI road thu a titi puina nei a ni a, Silchar - Jatinga road chungthu a hin Commissioner ani angin Chief Minister kuoma khawm a lo intlun ta thu a hril bawk. Chun mipui harsatna ṭhangpui theina ka nei angin College, Govt. School, Hostel building siemna thu a, Students thuoituhai kuoma a ṭhangpui thei ding thu a hrila, an tul le mamaw hai chu proposal hung submit ding in an hriettir bawk.
BIFURCATION CHUNGTHU A:
Bifurcation chungthu a IPF Palai le ISF Palai hai chun Assam in Budget session a N.C Hills District pahni a ṭhe dinga alo puong ta angin iengkim sukfel vat ani theina dinga CM inhmupui dinga ti chu CM chu Emergency meeting nei thut ani leiin inbiektlângna hi hun danga dingin sawn a nih. Palai hai chun Pu Shri Sanjay Lohiya, IAS Principal Secretary to the Chief Minister Assam le Pu Gautam Das, PPS to CM hai le hohlim tlângna neiin CM chun IPF demand chungthu a hin inbiekna hi Home le Police tienga officer lien hai ṭhanga inbiekna hi nei ding chau ani tâk leiin CM inzin zo tieng hi meeting pawimaw hi nei lem dinga remti tlang a nih. Inbiekna hun ding hi hril dân in 15th May tieng hin IPF hai chu an hung inhriettir dinga ti a nih.
